Jehova’n Eng Nge Min Beisei?
“LALPAN a phût che chu eng nge ni? Dik taka tih leh khawngaihna ngaihnat leh i Pathian nêna thuhnuairawlh taka lên dun a ni lo vem ni?”—MIKA 6:8.
1, 2. Engvângin nge Jehova chhiahhlawh ṭhenkhatte chu an lunghnual mai theih a; mahse, eng thil hian nge ṭanpui thei?
VERA chu kum 75 mi vêl Kristian rinawm tak leh hrisêl lêm lo a ni a. Ani chuan: “A châng chuan tukverhah ka dâk chhuak a, ka Kristian unaute in tina thu hrila kal ka hmu ṭhîn a. An zînga tel ve ka châk si; mahse, ka dam lohna avânga Jehova rawngbâwlnaah theih chin ka neih avângin ka mittui a tla zawih zawih ṭhîn,” a ti.
2 Hetiang hian i awm ve tawh ngai em? Jehova hmangaihtu zawng zawngte chuan a hminga kal leh a thil phûtte hlen chhuah chu an duh ṭheuh ngei alâwm. Mahse, kan hrisêlna a tlachhia emaw, kan tar tawh emaw, a nih loh leh chhûngkaw mawhphurhna kan nei emaw a nih chuan engtin nge ni ang? Chutiang dinhmunte avânga kan châk anga Pathian rawng kan bâwl theih loh avângin kan lunghnual mai thei. Chutiang dinhmunah kan ding a nih chuan, Mika bung 6 leh 7 thu ngaihtuahna hian min tichak ngawt ang. Chûng bungte chuan Jehova thil phûtte chu a âwmin, kan tlin ngei tûr thil a nihzia a târ lang a ni.
Pathianin A Mite A Cheibâwl Dân
3. Engtin nge Jehova’n Israel hel hmangte a cheibâwl?
3 Tûnah chuan Mika 6:3-5 thu hi enin, Jehova’n a mite a cheibâwl dân hi lo chhinchhiah ta ila. Mika hun lai chuan Israelte chuan hel an hrât hle a. Chutiang an ni chung pawhin, Jehova chuan “Aw ka mite u,” tih ṭawngkamin hmangaih takin a be hrâm hrâm zêl a. Anni chu: “Aw ka mite u . . . tûnah hre reng rawh u,” tiin a ngên a ni. Nasa taka hauh hrep mai aiin, “In chungah eng nge ka tih tâk?” tia zâwtin an thinlung thlen a tum zâwk a. Amah “khing” hial tûr pawhin a fuih a ni.
4. Pathian lantîr khawngaihna chuan kan chungah eng nghawng nge a neih tûr?
4 Pathian chuan kan za atân entawn tûr a va siam ṭha êm! Mika hun laia Juda leh Israel hel hmangte pawh hmangaih takin, “ka mite u” tiin a ko va, anmahni chu a ngên ngawih ngawih a ni. Chuti a nih chuan, kohhrana mite kan cheibâwlnaah khawngaihna leh ngilneihna kan lantîr tûr a ni tih a chiang hle. Ṭhenkhat chu thurualpui an har deuh emaw, thlarau lamah an chak lo emaw pawh a ni ngei ang. Mahse, Jehova an hmangaih phawt chuan anmahni ṭanpui leh an chunga khawngaihna lantîr chu kan duh a ni.
5. Mika 6:6, 7-ah eng thu bulpui nge chuang?
5 A dawtah chuan, Mika 6:6, 7 han en ta ila. Mika chuan zawhna inzawm hetiang hian a zâwt a: “Eng nên nge LALPA hmâah chuan ka lo kal anga, Pathian chungnung hmâah ka kûn ang? Hâlral thilhlante, bâwng no kum khat mite nên a hmâah chuan ka lo kal dâwn em ni? LALPA chu berâmpa sâng tam tak emaw hriak lui sîngte emawah a lungni dâwn em ni? Ka bawhchhiatna avângin ka fa tîr chu ka pein, ka thlarau sualna avângin ka taksa rah chu ka pe dâwn em ni?” tiin. Aih, Jehovah chu “berâmpa sâng tam tak emaw hriak lui sîngte emawah” tih lungnih theih a ni lo. Mahse, amah tilâwm thei thil engemaw a awm a ni. Chu chu eng nge ni?
Dik Takin Ro Kan Rêl Tûr A Ni
6. Mika 6:8-ah Pathian thil phût pathum engte nge târ lan a nih?
6 Mika 6:8-ah chuan, Jehova’n ti tûra min beiseite kan hmu a. Mika chuan heti hian a zâwt a ni: “LALPAN a phût che chu eng nge ni? Dik taka tih leh khawngaihna ngaihnat leh i Pathian nêna thuhnuairawlh taka lên dun a ni lo vem ni?” tiin. Hêng thil phût pathumah hian kan thil vei dân te, ngaihtuah dân te, leh tih dânte a tel a ni. Hêng miziate hi lantîr kan châk tûr a ni a, lanchhuahtîr dân kan ngaihtuah bawk tûr a ni a, a târ lang tûrin thil kan ti bawk tûr a ni. Tûnah chuan hêng thil phût pathumte hi a mal malin lo en ta ila.
7, 8. (a) “Dik taka tih” tih awmzia chu eng nge ni? (b) Eng ang rorêl dik lohna nge Mika hun lai khân hluar êm êm?
7 “Dik taka tih” tih awmzia chu rorêl dik hi a ni. Pathian thil tih dân hi dikna tehkhâwng a ni a. Mahse, Mika hun laia mite chuan dik takin ro an rêl lo va, dik lo takin an rêl zâwk a ni. Eng kawngin maw? Mika 6:10 thu hi ngaihtuah teh. A châng tâwpnaah chuan, sumdâwngtute chu “tehna dawrâwm tenawm tak” hmang anga sawi an ni a, chu chu tehna tling lo tak tihna a ni. Châng 11 chuan “bûkna dik lote” an hmang a ti bawk. Châng 12 sawi dânin “an lei chu bum hmang” a ni bawk. Hetiang hian tehna tling lo te, bûk lung dik lo te, leh dâwt te chu Mika hun laia sumdâwnnaah chuan a hluar hle a ni.
8 Chutianga thil dik lo tih chu dâwr hmunah mai a ni lo. Rorêlna inah pawh a hluar hle. Mika 7:3 chuan “hotuten phût an nei a, rorêltuten thamna an ngiat a,” tih a târ lang a ni. Sualna nei lote chunga dik lo taka hremna an thlen theih nân, rorêltute hnênah thamna pêk a ni ṭhîn. “Mi lianten,” a nih loh leh mi challangte’n dân bawhchhiatna chu an thlâwp bawk. A nihna takah chuan, Mika chuan hotute, rorêltute, leh mi liante chu thil sual tihnaah “an thurual tlâng” a ti.
9. Engtin nge mi suaksualte rorêl dik lohna chuan Juda leh Israel a nghawng?
9 Hruaitu suaksualte rorêl dik lohna chuan Juda leh Israel zawng zawng chu a nghawng vek a. Mika 7:5 chuan dik lo taka tihna chuan ṭhiante, ṭhian bulte, leh nupa inkârah meuh pawh inrin lohna a thlen a ni tih a sawi a. Chu thil chuan chhûngkaw inhnaih tak tak pa leh fapa te, nu leh fanu te inkârah pawh hming intihchhiatsak tawnna a thlen a ni tih châng 6-na chuan a târ lang a ni.
10. Tûn lai rorêl dik lohna hunah hian, engtin nge Kristiante an awm?
10 Kan hun lai hi eng nge ni ve? Chutiang dinhmun bawk chu kan hmu a ni lâwm ni? Mika ang bawkin, dik lo taka tihna te, inrin lohna te, leh chhûngkaw nun leh khawtlâng nun tlâk chhiatna te hian min hual vêl a. Mahse, he khawvêl fel lo tak kâra awm Pathian chhiahhlawh kan nih angin, he khawvêla dik lo taka tihna thlarau chuan Kristian kohhran a tihbawrh bân chu kan rem ti lo. Felna leh rinawmna thu bulte chu kan vuan tlat a, kan nî tin nunah kan lantîr zâwk a ni. Ni e, “engkimah fel taka awm” kan tum a ni. (Hebrai 13:18) Dik taka rorêl avângin, inrin tawna lantîr inunauna aṭanga lo awm malsâwmna nasa tak chu kan dawng tih i pawm lo vem ni?
Engtin Nge Mite’n ‘Jehova Au Thâwm’ An Hriat?
11. Engtin nge Mika 7:12 hi a thlen famkim?
11 Rorêl dik lohna hnuaiah pawh, mi tiin dikna an chên dâwn tih Mika chuan a lo hrilh lâwk a. Zâwlnei chuan mite chu “tuifinriat leh tuifinriat inkâr aṭang te leh tlâng leh tlâng inkâr aṭang te chuan” Jehova betu ni tûrin an lo kal khâwm ang tih a sawi lâwk bawk. (Mika 7:12) Tûn laia he hrilh lâwkna thlen famkimna hnuhnûng berah hian, hnam pakhat chauh ni lo, hnam tina mite chuan Pathian thlei bîk nei lo rorêl dikna chu an hlâwkpui a ni. (Isaia 42:1) Chu chu engtin nge a dik?
12. Engtin nge tûn laiah ‘Jehova au thâwm’ ngei chu hriat a nih?
12 A chhânna atân Mika thusawi hmasa hi lo ngaihtuah ta ila. Mika 6:9 chuan heti hian a sawi a: “LALPA chuan khawpui chu a au a ni, finna nei mi chuan i hming a ṭih ang,” tiin. Engtin nge hnam tina mite chuan ‘Jehova au thâwm’ chu an hriat a, chu chu engtin nge dik taka ro kan rêlna nên a inkûngkaih? A nihna takah chuan, tûn laia mite hian Pathian aw chu a ngial a nganin an hre lo va. Mahse, khawvêl puma kan thuhrilhna hmangin, Jehova au thâwm chu mi chi tinin an hre tawh a ni. Chuvângin, a ngaithla apiangte chuan ‘Pathian hming an ṭih’ a, a hming ngaihsânna an lo nei a ni. Ṭhahnemngai taka Lalram chanchin puangtute anga rawngbâwlna hmangin, dik tak leh hmangaihna nei takin thil kan ti a ni. Thlei bîk nei hauh lo va mi tin hnêna Pathian hming hriattîrna hmangin, ‘dik takin kan ti’ a ni.
Khawngaihna Kan Ngaina Tûr A Ni
13. Hmangaih-ngilneihna leh hmangaihna danglamna eng nge?
13 A dawt lehah chuan, Mika 6:8-a târ lan thil phût pahnihna hi i lo sawikhâwm leh ang u. Jehova chuan ‘khawngaihna ngaina’ tûrin min beisei a. “Khawngaihna” tia lehlin Hebrai thumal hi “hmangaih-ngilneihna,” a nih loh leh “hmangaihna rinawm nghet” tih pawha lehlin a ni a. Hmangaih-ngilneihna chu mi dangte ngaihtuahna, anmahni lainatna nêna ngaihtuahna a ni. Hmangaih-ngilneihna chu hmangaihna nên a inang lo. Engtin nge a inan loh? Hmangaihna chuan a huam zau zâwk a, thil leh ngaih dân atânte pawh a hman theih a ni. Entîr nân, Bible chuan “khawvêla thil awmte . . . hmangaih” chungchâng leh “finna ngainatu [“hmangaihtu,” NW]” chungchâng a sawi a. (1 Johana 2:15; Thufingte 29:3) Mahse, hmangaih-ngilneihna chu mihringte chungah a ni zêl a, a bîk takin Pathian rawngbâwltute chungah a ni ṭhîn. Chuvângin, Mika 7:20 chuan “Abrahama hnêna khawngaihna [“hmangaih-ngilneihna,” NW]” chungchâng a sawi a ni—Pathian Jehova rawngbâwltu chungchângah chuan.
14, 15. Engtin nge hmangaih-ngilneihna hi lantîr a nih a, a târ langtu eng nge ziah lan a nih?
14 Mika 7:18 [NW] sawi dânin, zâwlnei chuan Pathian chu “hmangaih-ngilneihnaah a lâwm êm êm ṭhîn,” a ti. Mika 6:8-ah chuan hmangaih-ngilneihna chu lantîr mai ni lo va, chu mizia chu ngaina tûra hrilh kan ni. Hêng Bible châng aṭangte hian eng nge kan zir? Hmangaih-ngilneihna chu kan lantîr duh avânga duh tak chunga lantîr hi a ni. Jehova ang bawkin, ṭanpui ngaite chunga hmangaih-ngilneihna lantîrnaah chuan kan lâwm êm êm a ni.
15 Tûn laiah pawh, chutiang hmangaih-ngilneihna chu Pathian mite chhinchhiahna pakhat a ni a. Entîrna pakhat chauh hi lo en ta ila. Kum 2001 June thla khân, thlipui nasa tak chuan U.S.A. ram Texas-ah chuan tui nasa takin a tilian a, in sâng tam tak a tichhia a, chûng zîngah chuan Jehova Thuhretute in a za têlin a tel ve a. An unau ṭanpui ngaite ṭanpui nân Thuhretu 10,000 vêl chuan an hun leh tha leh zung chu phal takin an pe a. Tichuan, kum chanve chuang chhûng chu chhûn zân zawmin an thawk a; chawlhkâr tâwpah pawh an thawk char char a, Kingdom Hall 8 leh an Kristian unaute in chhia 700 chuang chu an sa ṭha leh vek a ni. Chutianga thawk ve thei lote chuan chaw te, thil dang mamawh te, leh sum leh pai te an thawh a ni. Engvângin nge hêng Thuhretu sâng tam takte hi an unaute ṭanpui tûra an rawn thawh? ‘Khawngaihna an ngainat’ vâng a ni. Chutiang hmangaih-ngilneihna chu khawvêl puma kan unaute’n an lantîr tih hriat chu a va nuam êm! Ni e, ‘Khawngaihna ngaina’ tûra thil phût tihhlawhtlin chu phur rit a ni lo va, hlimna a ni zâwk!
Pathian Nên Thuhnuairawlh Takin Lêng Dûn Rawh
16. Pathian nêna thuhnuairawlh taka lên dun a pawimawhzia sawi uar nân eng tehkhin thuin nge min ṭanpui?
16 Mika 6:8-a thil phût pathumna chu “I Pathian nêna thuhnuairawlh taka lên dun” hi a ni. A awmzia chu kan tlin tâwk hriat a, Pathian chunga innghah hi a ni. Heti hian lo hrilhfiah ta ila: Hmeichhe naupang tê pakhat, a pa kut vuan tlat chunga thlipui tleh kâra kal lai han mitthla la. Chu hmeichhe naupang chuan a chakna chu a beitham hle tih a hria a; mahse, a pa chu a ring tlat a ni. Keini pawhin kan chakna chu a beitham hle tih hriain, kan Pa vâna mi chu kan ring tlat tûr a ni. Engtin nge chutianga rin tâwkna chu kan neih reng theih ang? Neih theih dân kawng khat chu Pathian hnaih a finthlâkzia rilrua vawn reng hi a ni. Mika chuan a chhan pathum min hriattîr a ni: Jehova chu min Chhanchhuaktu, min Hruaitu, leh min Vênghimtu a ni, tiin.
17. Engtin nge Jehova chuan hmân laia a mite chu a chhanchhuah a, a kaihhruai a, a vênhim?
17 Mika 6:4, 5-ah Pathian chuan: “Aigupta ram aṭang chuan ka hruai chhuak che u a,” a ti. Ni e, Jehova chu Israel Chhanchhuaktu a ni. Jehova chuan heti hian a sawi zawm a: “In hmaah Mosia te, Arona te leh Miriami te ka rawn tirh kha,” tiin. Mosia leh Arona te chu hnam pum hruaitu tûra hman an ni a, Miriami chuan hnehna an chan lawm nâna an lâmnaah Israel hmeichhiate zîngah hma a hruai a ni. (Exodus 7:1, 2; 15:1, 19-21; Deuteronomy 34:10) Jehova chuan a chhiahhlawhte hmangin kaihhruaina a pe a. Châng 5-naah, Jehova chuan Israel hnam chu Balaka leh Balaama te laka a vênhim thu leh Moab rama Sittim aṭanga Ram Tiama Gilgal thlenga an zin kawng hnuhnûng bera a vênhim dânte a hriatnawntîr a ni.
18. Engtin nge tûn laiah Pathian chu min Chhanchhuaktu, Kaihruaitu, leh Vênghimtu anga a ṭan?
18 Pathian nêna kan lên dun hian, ani chuan Setana khawvêl ata min chhan chhuak a, a Thu leh a inawpna pâwl hmangin min kaihruai a; tin, min dodâltute’n min beih hunah pawh a huhovin min vênghim a ni. Chuvângin, hmân laia Ram Tiam aia ropui êm êm zâwk—Pathian felna khawvêl thar—pana kan zin kawng hnuhnûng ber leh khirh takah hian, kan Pa vâna mi kut vawn tlat chhan tûr tam tak kan nei a ni.
19. Eng kawngin nge thuhnuairawlhna chu kan tlin tâwk neihna nên a inkungkaih?
19 Pathian nêna thuhnuairawlh taka lên dunna chuan kan dinhmunte thlîr dân tâwk thiam tûrin min ṭanpui a. Chutiang a nih chhan chu thuhnuairawlhna lantîrnaah chuan kan theih chintâwk hriatna a tel vâng a ni. Kum upatna emaw, hrisêlna ṭhat lohna emaw chuan Jehova rawngbâwlnaah theih chin tâwk min siam mai thei. Mahse, chu mi avânga lunghnual mai ai chuan, ‘kan neih loh pui ni lovin, kan neih angzia zêla’ kan thawhrimna leh thil hlante Pathianin a pawm a ni tih hriatreng chu a ṭha a ni. (2 Korinth 8:12) Ni e, Jehova chuan kan tih theih apiang tia duh tak chunga rawngbâwl tûrin min beisei a ni. (Kolossa 3:23) A rawngbâwlna kan tih theih apiang ṭhahnemngai tak leh tih tak zeta kan tih chuan, Pathian chuan malsâwmna min vûr ṭhîn a ni.—Thufingte 10:22.
Nghah Peihnain Malsâwmna A Thlen
20. Eng kan hriatnain nge Mika anga nghah peihna lantîr tûrin min ṭanpui ang?
20 Jehova malsâwmna chuan Mika rilru put hmang ang pu ve tûrin min chêttîr a ni. Ani chuan heti hian a sawi: “Ka chhandamna Pathian chungah nghah peihna ka lantîr ang,” tiin. (Mika 7:7, NW) Engtin nge hêng thute hi Pathian nêna thuhnuairawlh taka kan lên dunna nên a inkungkaih? Nghah peihna, a nih loh leh dawhtheihna chuan Jehova nî a la rawn thlen mai loh avânga lunghnual lo tûrin min ṭanpui a ni. (Thufingte 13:12) Dik tak chuan, kan vai hian he suahsualna khawvêl tâwp hun hi kan nghâkhlel ṭheuh va. Mahse, chawlhkâr tinin mi sâng tam takte chu Pathian nên an lêng dûn ṭan chauh si a. Chu mi hriatna chuan nghah peihna lantîrna tûr chhan min pe a ni. He mi chungchângah hian hun rei tak Thuhretu lo ni tawh pakhat chuan heti hian a sawi: “Kum kalta 55 chuang chhûnga thuhrilh rawngbâwlna ka thlîr lêtin, Jehova ka ngahna aṭangin chân engmah ka nei lo tih ka hria. Chutih a hnêkin, thiltawn hrehawm tam tak lak aṭangin ka fihlim zâwk a ni,” tiin. Chutiang thiltawn chu i nei ve em?
21, 22. Engtin nge Mika 7:14 hi kan hunah a thlen famkim?
21 Jehova nêna lên dunna chu kan hlâwkpui tak zet a. Mika 7:14-a kan chhiar angin, Mika chuan Pathian mite chu a vêngtu nêna thlamuang taka awm beram rual nên a khaikhin a ni. He hrilh lâwkna tûn laia a thlen famkimna lian zâwkah hian, thlarau lam Israel la bângte leh “berâm dang” chu an Vêngtu rinchhan tak, Jehova vênna hnuaiah an thlamuang êm êm a ni. Anni chu ‘ramhnuaiah khaw har takin [“a hrangin,” NW]’ an awm a, he khawvêl hlauhawm leh buainaa khat zêl aṭang hian thlarau lamah an inlahrang nalh a ni.—Johana 10:16; Deuteronomy 33:28; Jeremia 49:31; Galatia 6:16.
22 Jehova mite chu Mika 7:14-in a hrilh lâwk angin an hmuingîl bawk a. Pathian berâm, a nih loh leh a mite chungchâng sawiin, Mika chuan: “Basan leh Gilead-ah châwmin awm hlawm rawh se,” a ti. Basan leh Gilead-a berâmte chu ram ṭha taka châwm an nih ang bawkin, tûn laia Pathian mite pawh thlarau lamah an hmuingîl a ni—Pathian nêna thuhnuairawlh taka lêng dûnte tâna malsâwmna dang leh chu.—Number 32:1; Deuteronomy 32:14.
23. Mika 7:18, 19 aṭang hian eng nge kan zir theih?
23 Mika 7:18, 19-ah chuan, zâwlnei chuan Jehova’n inlamlêtte ngaihdam a duhzia a sawi uar a. Châng 18 chuan Jehova’n ‘khawlohna a ngaihdam’ thu leh ‘bawhchhiatna a kal pelh’ thu a sawi a ni. Châng 19-na sawi angin, ani chuan “an sualna zawng zawngte chu tuifinriat mawng thûk takahte chuan [a] paih lût ang.” He mi thu aṭang hian eng thil nge kan zir theih? He mi chungchângah hian Jehova kan entawn leh tawn loh kan inzâwt thei a ni. Kan pawi khawihte kan ngaidam ve em? Chutiang mi chu a inlamlêt a, ngaihdam dîl a duh chuan, Jehova’n chatuan atâna ngaihdam ṭhak a inpeihna ang rilru chu lantîr ve kan duh a ni.
24. Engtin nge Mika hrilh lâwkna hi i hlâwkpui?
24 Mika hrilh lâwkna kan ngaihtuahna chu engtin nge kan hlâwkpui? He hrilh lâwkna hian Jehova chuan a lama hîpa awmte tân beiseina dik tak a pêk thu min hrilh nawn a ni. (Mika 2:1-13) Pathian hminga kan kal reng theih nân, biakna dik tihhmasâwn nâna kan tih theih apiang ti tûrin min fuih bawk. (Mika 4:1-4) Tin, kan dinhmun chu engpawh ni se, Jehova thil phûtte chu kan tlin thei tih kan hre bawk. Ni e, Mika hrilh lâwkna chuan Jehova hminga kal tûrin min tichak tak meuh a ni. (w03 8/15)
Engtin Nge I Chhân Ang?
• Mika 6:8 sawi angin, Jehova’n eng nge min phût?
• ‘Dik taka ti’ tûrin eng nge ngai?
• Engtin nge ‘khawngaihna kan ngainatzia’ kan lantîr theih?
• ‘Pathian nêna thuhnuairawlh taka lên dunnaah’ hian eng nge tel?
[Phêk 29-naa milem]
Mi zawng zawng hnêna thuhrilhna hmangin dik takin ti rawh
[Phêk 29-naa milemte]
Mi dangte mamawh tihsakna hmangin khawngaihna i ngainatzia lantîr rawh
[Phêk 29-naa milem]
Inngaitlâwm taka i theih chin hre reng chungin, i tih theih tâwk ti rawh