Jehova Hmingin Kumkhuain Kan Kal Ang!
“Keini . . . chu Jehova kan Pathian hmingin kumkhuain, chatuan thleng pawhin kan kal ang.”—MIKA 4:5, NW.
1. Mika bung 3 aṭanga 5-na chhûngah eng thuchahte nge chuang?
JEHOVA chuan a mite hnênah thil engemaw hrilh tûr a nei a, Mika chu a zâwlnei atân a hmang a ni. Thil sual titute chunga kutthlâk chu Pathian thil tum a ni a. Israel chu a kalpên avângin a hrem dâwn a ni. Mahse, Jehova chuan a hminga kalte chu mal a sâwm ang. Hêng thute hi Mika hrilh lâwkna bung 3 aṭanga 5-na chhûngah chiang takin a chuang a ni.
2, 3. (a) Israel hruaitute chuan eng ang mizia nge an târ lan tûr ni a; mahse, a nihna takah chuan eng nge an tih si? (b) Engtin nge Mika 3:2, 3-a entîr nei ṭawngkam hman hi i hrilhfiah ang?
2 Pathian zâwlnei chuan heti hian a puang a: “Aw nangni, Jakobho hotute leh Israel chhûngkaw rorêltute u, ngaithla ula, ka ngên a che u, . . . rorêl dân chu in hre tûr a ni lâwm ni?” tiin. Ni e, rorêl dân chu an hre tûr a ni; mahse, ro an rêl tak zet em? Mika chuan: “Thil ṭha in hua a, thil ṭha lo in ngaina a, an vun in hihsak a, an ruh ata tîsa in sâwk thla a; ka mite sa in ei bawk a; an vun an hlai thla a, an ruh an tihtliahsak a: a ni, bêla chhum tûr angin an chan sawm a, sa so bêl chhûnga sa chan sawm ang maiin,” a ti.—Mika 3:1-3.
3 Hruaitute chuan mi rethei, humtu nei lote chu an awpbet a nih chu! Heta entîr nei ṭawngkam a hmante hi Mika thu ngaithlatute tân chuan hriatthiam awl tak vek a ni. Berâm hi chhum tûra buatsaih a nih chuan, a vun hih phawt a, chutah chansawm a ni ṭhîn a. A châng chuan a ruhte pawh a thlîng chhuak thei tûra tih keh a ni ṭhîn. Tichuan, Mika sawi ang khian a ruh leh a sa chu bêl lian takah chhum tlân a ni ta ṭhîn a ni. (Ezekiela 24:3-5, 10) Mika hun laia mite’n an hruaitu suak sual takte kuta hrehawm an tawrh nasatzia sawi lanna tehkhin thu inmil tak a va ni êm!
Jehova Chuan Dik Taka Rorêl Tûrin Min Beisei
4. Jehova leh Israel hruaitute inkârah eng danglamna nge awm?
4 Hmangaihna ngah Berâmvêngtu Jehova leh Israel hruaitute inkârah danglamna nasa tak mai a awm a. Anni chuan dik taka ro an rêl loh avângin, berâm rualte vênhim hna an neih chu an hlen lo. Chutih a hnêkin, an entîr nei berâmte chu mahni hmasial takin an chhawr a, Mika 3:10-a kan hmuh ang hian dikna lâk bosakin, an ‘thisen’ an chhuahsak a ni. He dinhmun aṭang hian eng nge kan zir theih?
5. Jehova chuan a mite zînga hma hruaitute lakah eng nge a beisei?
5 Pathian chuan a mite zînga hma hruaitute chu dik taka rorêl tûrin a beisei a. Chu chu tûn laia Jehova chhiahhlawh dik takte zîngah a awm a ni. Chu bâkah, hei hi Isaia 32:1 thu: “Ngai teh, fel taka rorêl tûr lal a lo awm ang a, dik taka tiṭhîn hotute an lo chhuak bawk ang,” tih nên a inrem chiah bawk. A nih leh, Mika hun laiin eng nge kan hmuh? Rorêlna dik tichhe tûrin ‘thil ṭha hua a, thil ṭha lo ngainatu’ chu an awm zêl a ni.
Tu Ṭawngṭaina Nge Chhân A Nih?
6, 7. Eng thu pawimawh tak nge Mika 3:4-ah târ lan a nih?
6 Mika hun laia mi suaksual takte chuan Jehova duhsakna an beisei thei ang em? Thei teuh lo mai! Mika 3:4 chuan heti hian a sawi: “LALPA an au vang a, nimahsela anmahni a chhâng lo vang: a ni, chumi hnunah chuan an thil tiha an tih ṭhat lohzia ang zêlin an lakah a hmai a thup ang,” tiin. Hei hian thil pawimawh tak mai a târ lang a ni.
7 Thil sual kan tih chuan Jehova’n kan ṭawngṭaina a chhâng lo vang. Chu chu nun kawng chi hniha nung a, kan thil sual tihte thup chunga Pathian rawng rinawm taka bâwl anga kan inlantîr hian a ni zual. Sâm 26:4-ah Davida chu heti hian a zai a: “Mi engmah lo mai maite hnênah ka ṭhu ngai lo va; vervêkte hnênah pawh ka lût hek lo vang,” tiin. Jehova chuan duh rêng vânga a Thu bawhchhiate ṭawngṭaina chu a va chhâng dâwn lo tak êm!
Pathian Thlarauva Tihchak
8. Mika hun laia zâwlnei derte chu eng thil lo thleng tûr hmanga vaukhân nge an nih?
8 Israel thlarau lam hruaitute thil chîn ṭhenkhat chu a va râpthlâk tak êm! Zâwlnei derte chuan Pathian mite chu thlarau lamah an vahvaihtîr a. Hruaitu duhâmte chu “Muanna” tiin an au va; mahse, ei tûr pe lo apiangte hnêna indo a awm dâwn tih an puang a ni. Chuvângin, Jehova chuan: “Inlârna in hmuh loh nân in hnênah zân a lo thleng ang a; ai in en theih lohna khawpin in hnênah thimna a lo awm ang a; zâwlneite tân chuan nî a liam ang a, chhûn pawh an chungah chuan khaw thim a ni ang. Hmutheitute chu an zak ang a, aienthiamte chu an mualpho vang; a ni, an vaiin an hmui an hup ang,” a ti.—Mika 3:5-7a.
9, 10. ‘Hmui hup’ tih chu eng tihna nge ni a, engvângin nge Mika’n hmui hupna tûr chhan a neih ve loh?
9 Engvângin nge “an hmui an hup ang”? Hei hi a ni, Mika hun laia mi suaksualte chuan an zah avânga an tih chu ni. Chûng mi suaksualte chu zak ngawih ngawih tûr an ni. An tân chuan “Pathian chhânna a awm . . . lo.” (Mika 3:7b) Jehova chuan mi chapote leh suaksualte ṭawngṭaina chu a ngaihsak lo a ni.
10 Mika erawh chuan ‘hmui hup’ chhan tûr a nei ve lo. A zah ve tlat loh avângin. A ṭawngṭaina chu Jehova’n a chhâng a. Mika 3:8-a zâwlnei rinawm thusawi hi lo ngaithla teh: “LALPA thlarau avânga thiltihtheihna te, rorêlna te leh chakna te chuan ka khat tak meuh a ni,” tih hi. Mika chu rinawm taka hun rei tak rawng a bâwl chhûng zawnga ‘LALPA thlarau avânga thiltihtheihnaa a khah tak meuh’ avângin, a va lâwm tak êm! Chu chuan Jakobho hnênah an bawhchhiatna hriattîr tûr leh Israelho hnênah an sualna hriattîr tûrin” chakna a pe a ni.
11. Engtin nge mihringte chu Pathian thuchah puang chhuak tûra tihchak an nih?
11 Mika chuan rorêlna râpthlâk tak puang chhuak tûrin mihring chakna mai piah lam a mamawh a. Jehova thlarau, a nih loh leh a chakna che vêl reng thiltithei tak chu a mamawh a ni. Chu chu kan mamawh ve em le? Kan thuhrilhna chu Jehova’n a thlarau thianghlim hmanga min tihchak chauhvin kan hlen chhuak thei a ni. Duhrêng vânga sual kan tih tlat chuan kan thuhrilh zawng zawng chu engmah lo maiah a chang ang. Chutiang a nih chuan a rawngbâwl tûra chakna dîla kan ṭawngṭaina chu Pathianin a chhâng thei dâwn lo a ni. “Jehova thlarau” kan chunga a innghat a nih chauh loh chuan, kan Pa vâna mi rorêlna râpthlâk tak lo thleng tûr chungchâng chu kan puang chhuak thei lo a ni. Pathian ngaihthlâk ṭawngṭaina leh thlarau thianghlim ṭanpuina hmangin, Pathian thu chu Mika ang bawka huaisenin kan sawi thei dâwn a ni.
12. Engvângin nge Isua zirtîr hmasate khân, ‘huai taka Pathian thu an hril’ theih?
12 Tirhkohte 4:23-31-a thuziak hi i hre chhuak mai thei a. Kum zabi pakhatnaa Isua zirtîrte zînga pakhat angah han indah ta la. A hleihluaka mi tihduhdah chîngte chuan Krista hnungzuitute thusawi chu tâwptîr an tum a. Mahse, hêng mi rinawmte hian an Lal Chungnungbera hnênah ṭawngṭaiin: “Lalpa an mi vauziate hi ngai teh; i bâwihte hi huai takin i thu hriltîr la,” tiin an ngên a ni. Eng nge a rah chhuah? An ṭawngṭai zawh chuan an awmkhâwmna chu a lo nghîng a, an zain thlarau thianghlimin an lo khat a, huai takin Pathian thu an hril ta a ni. Keini pawhin rawng kan bâwl hian Jehova hnênah ṭawngṭaiin, a thlarau thianghlim ṭanpuinaah i innghat tlat ang u.
13. Jerusalem leh Samaria te chungah eng thil nge thleng dâwn a, engvâng nge?
13 Mika hun lai kha han ngaihtuah leh ta la. Mika 3:9-12 sawi dânin, thisen chhuah hmang rorêltute chuan thamna hmu tûrin ro an rêl a, puithiamte pawhin man neiin an zirtîr a, zâwlnei derte lahin sum hmuh nân thil an hrilh lâwk bawk nên. Pathianin Juda khawpui, Jerusalem chu “thil chhe awm khâwm a ni ang” a ti pawh hi a mak lo ve! Sakhaw dik lo leh nungchang bawlhhlawhna chu Israel-ah pawh a hluar êm avângin, Samaria chu Pathianin “thil chhe awm khâwm” angin a siam dâwn tih sawi tûrin Mika chu thlarauva thâwk khum a ni. (Mika 1:6) Zâwlnei chuan B.C.E. 740-a Assuria sipaiin Samaria an tihchhiat tûr hrilh lâwkna thlen famkimna chu a hmu hial a ni. (2 Lalte 17:5, 6; 25:1-21) Hêng Jerusalem leh Samaria chunga thuchah khauh takte hi Jehova chakna lo chuan puan chhuah theih a ni lo vang tih a chiang hle.
14. Engtin nge Mika 3:12-a chhinchhiah hrilh lâwkna hi a thlen famkim a, chu chuan engtin nge min khawih ang?
14 Juda chuan Jehova rorêlna chu a pumpelh thei lo rêng rêng a. Mika 3:12-a chhinchhiah hrilh lâwkna thlen famkim nân, Zion chu “lo anga leileh” a ni ang. Kan kum zabi 21-na hun aṭanga han thlîr chuan, B.C.E. 607-a Babulon-in Jerusalem leh Juda a tihchhiat khân hêng thilte hi a thleng famkim a ni tih kan hria a ni. He thil hi Mika’n hrilh lâwkna a sawi hnu kum za chuangah a lo thleng a; mahse, a thleng famkim dâwn tih a chiang hle a ni. Keini pawhin he khawvêl suaksual hi “Lalpa nî” lo thleng tûra hrilh lâwkah hian a tâwp dâwn tih kan ring tlat thei a ni.—2 Petera 3:11, 12.
Jehova’n A Zilhhau
15. Mika 4:1-4-a chhinchhiah hrilh lâwkna hi engtin nge i irâwm chhuaka i hrilhfiah ang?
15 Han thlîr lêt hian, Mika chuan beiseina thuchah phûrawm tak a puan belh tih kan hmu a. Mika 4:1-4-a kan thu hmuh chu a va thlamuanpui awm tak êm! Mika thu puan chu a ṭhen lai chauh lo tilang ta ila: “Ni hnuhnûngahte chuan heti hi a ni ang a, LALPA in awmna tlâng chu tlâng lian chungahte chuan tihnghehin a awm ang a, tlâng tête chungah chuan chawisânin a awm bawk ang; chutah chuan chi tinrêngte chu an kal nguah nguah ang. . . . Tin, ani chuan chi tam tak kârah ro a rêl ang a, hla taka hnam chak tak pawh a zilhhau vang; tin, an khandaihte chu leilehna hmâwr zumahte an chher ang a, an feite chu thei kûng ahchhumna chem kawmahte an chher ang: hnam dangin hnam dang chungah khandaih a lek tawh lo vang a, indo dân pawh an zir tawh hek lo vang. Mi tinte chu an grêp hrui hnuaiah leh an theipui kûng hnuaiah an ṭhu zâwk ang a; tuman an tihlau lo vang: sipaihote LALPA kâ chuan a sawi tawh si a.”
16, 17. Engtin nge Mika 4:1-4 thu hi tûn laiah a thlen famkim?
16 Heta “chi tam tak” leh “hnam chak tak” hi tute nge ni? He khawvêla hnamte leh sâwrkârte hi an ni lo. He hrilh lâwkna hi Jehova biakna dik tlânga rawngbâwlna thianghlima rawn tel ve hnam tina mite an ni zâwk a ni.
17 Mika hrilh lâwkna nêna inremin, Jehova biakna thianghlim chu khawvêl pum puiah hian awmze nei lehzuala vawn a ni thuai dâwn a. Tûn laiah, “chantuana nun duhna rilru dik tak nei” apiangte chu Jehova kawng chungchâng zirtîr an ni. (Tirhkohte 13:48, NW) Jehova chuan Lalram ṭantu ringtute tân ro a rêl ang a, thlarau lamah a zilhhau vang. Chûng mite chu “mipui tam tak” angin “hrehawmna nasa tak” lak ata an dam khawchhuak ang. (Thu Puan 7:9, 14) Anni chuan an khandaihte leilehna hmâwr zumahte chherin, tûn laiah pawh Thuhretu an nihpuite leh mi dangte nên inrem takin an chêngho a ni. An zînga mi nih chu a va hlimawm êm!
Jehova Hminga Kal Chu Tum Tlat Rawh
18. ‘Mahni grêp hrui leh theipui kung hnuaia ṭhut’ chuan eng nge a entîr?
18 Kan hun laiah hian, khawvêl hmun tina mite an hlauh laiin, mi tam takin Jehova kawng an zir avângin kan hlim hle a. Chutianga Pathian hmangaihtu zawng zawngte’n indo dân zir ngai lo va, mahni grêp hrui leh theipui kûng hnuaia an ṭhut hun tûr lo thleng lek lek tawh chu kan nghâkhlel hle. Theipui kung chu grêp huana phun a ni tlângpui a. (Luka 13:6) Mahni grêp hrui leh theipui kung hnuaia ṭhut chuan muanna, neihnunna, leh himna dinhmun a entîr a ni. Tûnah pawh, Jehova nêna kan inlaichînna chuan rilru muanna leh thlarau lama himna chu min pe a. Lalram awpna hnuaia chutiang dinhmun a lo thlen hunah chuan, kan hlau lovin, kan him hle dâwn a ni.
19. Jehova hminga kal tih chu engtihna nge?
19 Pathian duhsakna leh malsâwmna chang tûr chuan, Jehova hmingin kan kal tûr a ni. Chu chu Mika 4:5, NW-ah khauh takin hetiang hian a inziak a ni: “Hnam tin mahni pathian hming ṭheuhvin an kal ang a, keini pawh Jehova kan Pathian hmingin kumkhuain, chatuan thleng pawhin kan kal ang,” tiin. Jehova hminga kal tih awmzia chu kan Pathian a ni tih sawi mai a ni lo. Kristian inkhâwmnaa telte leh Lalram thuhrilh rawngbâwlnaa telte pawh pawimawh êm êm tho mah se, chu aia tam chu a huam a ni. Jehova hminga kan kal chuan, amah kan hmangaihna avângin a hnênah kan inpumpêk a, thinlung zawng zawnga rinawm taka a rawngbâwl chu kan tum tlat ang. (Matthaia 22:37) Amah betu kan nih angin, chatuana kan Pathian Jehova hminga kal chu kan tum nghet tlat a ni.
20. Mika 4:6-13-ah eng nge hrilh lâwk a nih?
20 Tûnah chuan Mika 4:6-13-a hrilh lâwkna thu hi lo ngaihtuah ila. “Zion fanu” chu “Babulon thleng pawhin” a vâkvai ang. Chu tak mai chu B.C.E. kum zabi pasarihnaa Jerusalem luahtute chunga thil thleng chu a ni. Nimahsela, Mika hrilh lâwkna chuan a la bângte chu Judai ramah an kîr leh ang a, Zion dinthar lehnaah chuan Jehova chuan a hmêlma chu a tihsawmsak vek ang.
21, 22. Engtin nge Mika 5:2 a thlen famkim?
21 Mika bung 5-ah chuan thilthleng danglam tak dang hrilh lâwk a ni bawk a. Entîr nân, Mika 5:2-4 thu hi chhinchhiah teh. Mika chuan Pathian thlan Rorêltu—“a lo chhuahna chu hmâsâng ata,”—chu Bethlehem ata a lo chhuah tûr thu a hrilh lâwk a. Ani chuan “LALPA chaknain” berêm rual chu a awp ang. Chu bâkah, he Rorêltu hi Israelah chauh ni lo, “lei tâwp thlengin” a ropui ang. He rorêltu nihna hi khawvêl mite tân chuan hriatthiam har a ni mai thei a; mahse, kan tân chuan a ni ve lo.
22 Bethlehema piang tawh zîngah tunge pawimawh ber? Tunge ‘lei tâwp thlenga ropui’ dâwn? Messia, Isua Krista lo chu tu dang mah an ni lo! Heroda Ropuia’n puithiam lalte hnêna Messia lo pianna tûr a zawh khân, anni chuan: “Judai rama Bethlehemah” tiin an chhâng a. Mika 5:2 thu pawh an la chhuak hial a ni. (Matthaia 2:3-6) Chu chu mipui zînga ṭhenkhat pawhin an hria a ni, Johana 7:42 hian mipuite chu: “Krista chu Davida thlahte zîngah, Davida awmna khua Bethlehemah chhuak tûr a ni tih Pathian Lehkhain a sawi lo vem ni?” tia sawi nia a târ lan avângin.
Mipuite Tâna Chawlh Hahdamna
23. Mika 5:7 thlen famkim nân tûnah hian eng thil nge thleng mêk?
23 Mika 5:5-15 chuan rei lo te chhûng chauh hlawhtling tûr Assuria rûnna leh Pathianin thu âwih lo hnamte chunga phuba a lâk tûr thu a sawi a. Mika 5:7 chuan Juda inlamlêt a la bângte chu anmahni rama dinthar leh an nih tûr thu a tiam a; mahse, chu chuan kan hun lai pawh a kâwk bawk a ni. Mika chuan: “Jakobho mi la awm chhunte chu chi tam takte zîngah LALPA aṭanga dai tla ang leh hlobet chunga ruah sûr angin an awm ang,” a ti. He tehkhin thu duhawm tak hian thlarau lam Jakob, a nih loh leh Israel chu mite tâna Pathian malsâwmna a nih tûr thu a hrilh lâwk a ni. Isua “berâm dang,” lei lam beiseina neite chuan tûn laia “Pathian Israel” la bângte nêna rawngbâwl tlân a, thlarau lama mi dangte tihhahdam chu nuam an ti êm êm a ni. (Johana 10:16; Galatia 6:16; Zephania 3:9) He mi chungchângah hian, ngaihtuah tûr thu pawimawh deuh mai a awm a. Lalram thu puangtu kan nih angin, kan vai hian mi dangte hnêna hahdamna dik tak thlen theihna chanvo hlu kan neih hi kan hlut hle tûr a ni.
24. Mika bung 3 aṭanga bung 5-a eng thute hian nge i rilru khawih?
24 Mika hrilh lâwkna bung 3 aṭanga 5-na thleng aṭang hian eng nge i zir le? Hêngte hi i zir ngei ang: (1) Pathian chuan a mite zînga hma hruaitute chu dik taka rorêl tûrin a beisei. (2) Duh rêng vânga thil sual kan tih chuan Jehova’n kan ṭawngṭaina a chhâng lo vang. (3) Kan thuhrilhna hna hi Pathianin a thlarau thianghlim hmanga min tichak a nih chauh loh chuan hlen chhuah theih a ni lo. (4) Pathian duhsakna dawng tûr chuan, Jehova hmingin kan kal tûr a ni. (5) Lalram thupuangtu kan nih angin, mite hnêna hahdamna dik tak thlen theihna chanvo hlu kan neih hi kan hlut hle tûr a ni, tihte hi. Thu dangte pawhin i rilru a khawih hle thei bawk a. He Bible hrilh lâwkna bu aṭang hian eng dang nge kan la zir theih? Kan zir leh tûr thuziak hian rinna tichak thei tak Mika hrilh lâwkna bung tâwpna pahnihte aṭanga zir tûr ṭangkai tak takte hre tûrin min ṭanpui ang. (w03 8/15)
Engtin Nge I Chhân Ang?
• Eng nge Pathianin a mite zînga hma hruaitute hnên aṭangin a beisei?
• Engvângin nge Jehova rawng kan bâwlnaah hian ṭawngṭaina leh thlarau thianghlim a pawimawh êm êm?
• Engtin nge mite chu ‘Jehova hminga an kal’?
[Phêk 24-naa milem]
Mika ang bawkin kan rawngbâwlnaah huaisen takin kan thawk