Ka Tiṭha Tâwk Em?
1. Eng nge Kristian rinawmte’n an enghelh?
1 He zawhna hi i inzâwt ngai em? Kum upat vâng emaw, hrisêl loh vâng emaw, chhûngkaw mawhphurhna pung chho zêl vâng emawin, tûn hma angin rawngbâwlnaah i tel thei tawh lo pawh a ni thei. Fa pathum nei unaunu pakhat chuan a chhûngkaw enkawl nâna hun leh tha leh zung a pêk avânga rawngbâwlnaa a tel tam thei ta lo chu a inthiam loh rum rum ṭhin thu a ziak a. Inbûk tâwk taka thil thlîr thiam tûrin engin nge min ṭanpui ang?
2. Pathian Jehova’n kan lakah eng nge a beisei?
2 Jehova’n Min Beisei Chu: Rinhlelh rual lovin, kan vai hian rawngbâwlnaa thawh tam lehzual chu kan duh ṭheuh va. Mahse kan tih duh leh kan tihtheih chu a inthlau hle ṭhîn a ni. Thawh tam lehzual kan duhna chuan inthlahdah kan nih lohzia a târ lang. Pathian Jehova chuan kan tlin tâwk leh kan theih tâwk bâk a phût lo tih kan hre tûr a ni. (Sâm 103:13, 14) Ani chuan kan lakah eng nge min beisei? Thinlung zawng zawnga a rawngbâwl a, theih tâwp kan chhuah hi a ni.—Kol. 3:23.
3. Engtin nge rawngbâwlnaa ṭan kan lâk dân chu kan bih chian ang?
3 Engin nge kan tih theih tûr tâwk hre thiam tûrin min ṭanpui ang? Kan dinhmun dik tak hre thiam tûrin Pathian Jehova ṭanpuina kan dîl thei a ni. (Sâm 26:2) Kan ṭhian rinchhan tlâk, Kristian puitling min hre chiangtu leh kan hmasâwnna tûr min hrilh hreh lotute chuan min ṭanpui thei bawk ang. (Thuf. 27:9) Dinhmun a inthlâk danglam ṭhin avângin, a khât tâwka kan dinhmun bih chian chu a ṭangkai hle ang.—Eph. 5:10, 11.
4. Engtin nge rawngbâwlna chungchânga Bible ṭanchhan hriattîrnate chu kan thlîr ang?
4 Hriattîrnate Kan Thlir Dân Tûr: Intlânsiaknaah chuan a thlîrtute chuan lo auvin an lo fuih ṭhîn a. An lo auh chhan chu intlânsiakte tihbeidawn nân ni lovin, an tum thleng tûra ṭanpui nân a ni. Chutiang bawkin, ‘thu hril’ tûra kohhran inkhâwm leh thu leh hla chhuahte aṭanga kan dawn Bible ṭanchhan fuihna leh hriattîrnate chu kan hlâwkpui atân a ni a, kawng engemaw ti takin kan ṭan lâkna hi a ṭha tâwk lo tih duhna a ni lo. (2 Tim. 4:2) Theihtâwp kan chhuah reng phawt chuan, Jehova’n amah ‘kan hmangaihna leh a rawng kan bâwlna’ chu a theihnghilh lo vang.—Heb. 6:10.