Mite Chu Pathian Thu Ngaithla Tûrin Ṭanpui Rawh
1. “I Ram Lo Thleng Rawh Se!” tih District Inkhâwmpuiah khân eng brochure-te nge tihchhuah a nih a, engin nge hmanraw ṭangkai tak nihtîr?
1 “I Ram Lo Thleng Rawh Se!” tih District Inkhâwmpuiah khân, brochure thar pahnih Pathian Thu Ngaithlain Chatuanin Nung Rawh tih leh tluangtlam zâwka siam Pathian Thu Ngaithla Rawh tih chu tihchhuah a ni a. A thuziak hi a tlêm avângin rang tak leh awlsam taka lehlin theih a ni. A nihna takah chuan, Pathian Thu Ngaithlain Chatuanin Nung Rawh tih tlângzarh a nih lai khân ṭawng 431-a letling tûra phalna hmuh a ni.
2. Tute’n nge hêng brochure-te hi hlâwkpui ang?
2 A bîk takin, tute’n nge hêng brochure-te hi hlâwkpui ang? Khawvêl puma thleng fo, a hnuaia dinhmunte hi han ngaihtuah teh:
• Thuchhuahtu pakhat chuan tlawh hmasak ber ṭumah emaw, tlawhkîr neih ṭumah emaw chuan in neitu pakhat a titi pui lai chuan, in neitu chu ziak leh chhiar thiam lo, a nih loh leh lehkha chhiar thiam vak lo a ni tih a hria a ni.
• Thuchhuahtu pakhat chuan thu leh hla chhuah tlêmtê chauh kan neih emaw, kan neih miah loh emaw ṭawngin mite hnênah thu a hril a. A nih loh leh thu hrilhna biala mi a tam zâwkte chuan an ṭawng hman ber chu an chhiar thiam lo a ni.
• Thuchhuahtu pakhat chuan a thu hrilhna biala bengngawng hnêna thu hrilh nân sign language a hmang a ni.
• Pa pakhat chuan lehkha la chhiar thiam lo a fa chu thutak zirtîr a duh a ni.
3. Engtin nge Pathian Thu Ngaithla Rawh tih chu duan a nih?
3 Duan A Nih Dân: Pathian Thu Ngaithla Rawh tih hian thuziak tlêmtê chauh a nei a; a tlângpui thuin, a phêk tin hnuai lama thuziak tluangtlam tak leh Bible châng pakhat târ chhuah chuan a thu pawimawh lai chu a târ lang a ni. Engvângin nge? Hei hi han mitthla teh: Tuemaw chuan i chhiar thiam loh, a hawrawp pawh i la hmuh ngai loh ṭawnga ziak brochure pakhat chu a pe che a. Milem mawi tak tak a nei chung pawhin chu brochure chuan i rilru a la ang em? La lo mai thei a ni. Chutiang bawkin, thu leh hla chhuaha thuziakte chuan lehkha chhiar thiam lote chu awlsam takin a tilunghnual thei a ni. Chuvângin, a phêk tinah chuan fîmkhur taka buatsaih milemte chu a langsâr hle a, chûng milemte sawiho dân tûr indawt dân chu feitêa kawhtîr a ni.
4. Engtin nge Pathian Thu Ngaithlain Chatuanin Nung Rawh tih chu duan a nih?
4 Pathian Thu Ngaithlain Chatuanin Nung Rawh tih brochure chuan Pathian Thu Ngaithla Rawh tih brochure neih ang bawk milem a nei ve a. Hei hi lehkha chhiar thiam vak lote emaw, chhiar zir mêkte emaw zirpui nâna duan a ni. Pathian Thu Ngaithla Rawh tih brochure hmanga tuemaw zirpuitu chuan zirna kaihhruai nân Pathian Thu Ngaithlain Chatuanin Nung Rawh tih brochure hi a hmang thei bawk a ni. Phêk hnih inhmachhawn zêl vei lam chunga zirlai zawhna chu chûng phêk hnihah chuan chhân a ni ṭhîn. Milemahte chuan thuziak leh Bible chângte telh a ni a. Phêk a tam zâwk hnuai lama bâwmah chuan zirlai theihna a zira sawiho theih tûr thu belhchhahna leh Bible châng ṭhenkhat târ lan a ni bawk.
5. Hêng brochure-te hi engtikah leh engtin nge kan sem chhuah theih?
5 A Hman Dân Tûr: Brochure pahnih zînga a enga zâwk pawh hi brochure sem chhuah thla a nih loh pawhin, in tina rawngbâwlnaah a ṭangkai dâwn nia i hriat apiangin i sem chhuak thei a ni. (“Sem Chhuah Theih Dân,” tih bâwm chu en rawh.) Tlawhkîr i neih hunah ngaihventu chu thil engemaw hmuh tûr i neih thu hrilh a, brochure chu pein i hmêlhriattîr thei a ni.
6. Engtin nge hêng brochure-te hmanga Bible kan zirpui theih ang?
6 Pathian Thu Ngaithla Rawh tih hian zawhna chhut chhuah sa a neih loh avângin, Bible Zirtîrna lehkhabu hmanga zirpuina i neih laia in neih ang ṭhin zawhna leh chhânna nêna sawihona ang a ni dâwn lo va. Hnam tina mite chuan thawnthu ngaihthlâk chu nuam an ti a. Chuvângin milemte chu Bible-a chhinchhiah Pathian thâwk khum thawnthute sawi nân hmang ang che. Milemte chu hrilhfiah la. Phûrawm takin sawi ang che. Zirlai thil hmuh leh ngaih dânte chu zâwt la. A phêk hnuai lama Bible châng târ lante chu chhiarin, a thute chu chhûtpui rawh. Sawihonaa tel ve tûr leh a hre thiam ngei tih chian nân zawhnate zâwt ang che. I zirpui chuan Pathian Thu Ngaithlain Chatuanin Nung Rawh tih brochure a hmang a nih chuan milem tinte in sawiho laiin, a milpui thuziak leh Bible chângte chu chhiarpui ang che.
7. Engtin nge Bible zirlai chu hmasâwn tûra kan ṭanpui theih?
7 Zirlai Chu Hmasâwn Tûrin Ṭanpui Rawh: In sawihona aṭang chuan i Bible zirpuiin mahnia Jehova hriatna a neih chhoh theih nâna lehkha chhiar dân zir châkna a neih chu kan beisei tlat a. (Mt. 5:3; Joh. 17:3) Chuvâng chuan, Pathian Thu Ngaithla Rawh tih brochure aṭanga sawiho a nih a, a hnuah zirlai chu lehkha chhiar dân zir thei tûra i hriat chuan Pathian Thu Ngaithlain Chatuanin Nung Rawh tih brochure-a thlâkin i zirpui thei ang. Eng brochure pawh hmang mah la, zir zawh a nih hnuah pawh zirlai chuan baptisma chan a inpeih chuang lo vang. Bible hriat thiamna a neih lehzual nân zirna chu Bible Zirtîrna lehkhabu emaw, thu leh hla chhuah inâwm tak dang emaw nên i thlâk tûr a ni.
8. Rawngbâwlna atâna hêng hmanraw tharte avâng hian engvângin nge kan lâwm?
8 Mite chuan chatuana an nun theih nân lei leh vâna Lalchungnungber thu an ngaithla tûr a ni a. (Is. 55:3) Tin, Jehova duhzâwng chu lehkha chhiar thiam lote pawh tiamin ‘mi zawng zawngin’ a thu ngaihthlâk dân an zir hi a ni. (1 Tim. 2:3, 4) Mite hnêna Pathian thu ngaihthlâk dân zirtîr nâna kan hman theih tûr hêng hmanraw tharte avâng hian kan va lâwm tak êm!
[Phêk 3-naa bâwm]
Sem Chhuah Theih Dân
In neitu hnênah chuan phêk 2-3-na chu entîr la, heti hian sawi rawh: “Hetiang khawvêlah hian nun i duh em? [A chhânna nghâk rawh.] Bible chuan [a nih loh leh lehkhabu thianghlim chuan] Pathianin he khawvêl hi rethei emaw, dam lo emaw awm lohna hmun him leh mawi takah a siam thuai dâwn tih a tiam a ni. Chuta nung tûra kan thiltih ngai chu lo chhinchhiah rawh. [Phêk 3-na chung lama târ lan Isaia 55:3 chu chhiarsak rawh.] He Bible châng hian Pathian ‘hnêna lo kal a,’ amah ‘ngaithla’ tûrin min hrilh a ni. Mahse, engtin nge Pathian chu kan ngaihthlâk?” tiin. Phêk 4-5-na chu keu la, a chhânna chu sawipui rawh. Hun a nei loh chuan, brochure chu hnutchhiah la, tlawhkîr a, a chhânna sawipui tûrin ruahmanna siam ang che.