Hriatrengna Sâwmna Campaign Chu March 1-ah Ṭan A Ni Ang
1. Hriatrengna sâwmna sem chhuahna chu engtikah nge kan neih ṭan ang a, engvângin nge kumin campaign hi tihrei deuh a nih?
1 Hriatrengna inkhâwmnaa mi dangte lo tel ve tûra kum tina sâwmna campaign chu, Zirtâwpni, March 1-ah kan nei ṭan ang. Hriatrengna inkhâwm chu March 26-ah neih a ni ang a, sâwmna campaign chu kum dang aia tlema rei deuh neih a ni dâwn tihna a ni. Hei hian mi tam zâwkte tân sâwmna dawn theihna hun remchâng a pe ang, a bîk takin kohhran thu hrilhna bial zau taka awmte tân a ni lehzual dâwn a ni.
2. Sâwmna neih theih nân leh thu hrilhna bial hrût chhuah nâna ruahmanna siam chu eng nge ni?
2 Inruahmanin: Upate chuan ina awm lote hnêna sâwmna hnutchhiah theih a nih leh nih loh pawh tiamin, thu hrilhna bial hrût chhuah dân tûr chungchângah kaihhruaina an pe ang. Thu hrilhna biala in tin kal zawh hnua sâwmna a la awm a nih chuan, vântlâng hmuna thu hrilhna hmanga sem chhuah theih a ni ang. Service overseer chuan sâwmna pêk chhuah mai theih tûra peihsate chu literature counter emaw, magazine counter emawah thuchhuahtute lâk atân a chhawp chhuahtîr tûr a ni a, mahse a vaia chhawp chhuah nghâl tûr a ni lo. Chawlhkâr khat tâna kan mamawh zât tûr chauh chu kan la tûr a ni.
3. Sâwmna kan sem chhuah hian eng nge kan hriat reng ang?
3 Eng Nge Kan Sawi Ang? Tawi fel taka sawina chu mi a tam thei ang berte hnêna sâwmna pêk chhuah theihna a nih avângin a ṭha ber ṭhîn. Phêk 6-naah kan thu hrilhna bial mila kan siam rem theih tûr thusawi dân tûr entîrna a chuang a. Mahse, inneitu chu nêlawm tak a ni emaw, zawhnate a nei emaw a nih chuan, hmanhmawh takin kan kalsan nghâl tûr tihna a ni lo. Chawlhkâr tâwpa sâwmnate sem chhuah a nih hunah, a rem chân chuan magazine-te pawh kan sem chhuak bawk tûr a ni. March 2-ah hian, Bible zîrpuina neih ṭan tum aiin sâwmnate sem chhuah chu kan ngai pawimawh zâwk ang.
4. Engvângin nge campaign-naah ṭhahnemngai taka kan tel ang?
4 Hriatrengna inkhâwmah mi tam tak an rawn tel chu kan beisei a. Thusawi chuan Isua nihna dik tak a târ lang ang. (1 Kor. 11:26) Tin, a thihnain min ṭanpui dân a rawn sawi lang ang a. (Rom 6:23) Amah kan hriat reng a pawimawhna chu a rawn sawi uar bawk ang. (Joh. 17:3) Campaign-naah hian ṭhahnemngai takin i tel ang u!