Hriatrengna Sâwmna Sem Chhuahna Chu April 2-ah Ṭan A Ni Ang
1. Kumin Hriatrengna sâwmna chu eng hunah nge kan sem ang a, kum tina neih he campaign hlutna chu eng nge ni?
1 Kum khat chhûnga thilthleng pawimawh ber—Krista thih Hriatrengna—atâna sâwmna chu April 2 aṭanga 17 chhûnga sem chhuah a ni ang. Tûn hma chuan, tuina nei mi tam takte chuan he kum tinin neih campaign chu an chhâng lêt a. Entîr nân, Hriatrengna nî-ah nu pakhat chuan branch office chu phone-a biain, heti hian a sawi a ni: “In ka’n haw chu ka kawngka hnuaiah sâwmna a lo awm reng a. Kal ngei chu ka duh a, mahse a hun tûr ka hre chiang lo tlat,” tiin a sawi a. Unaupa chuan sâwmna lehkhaa a hmun leh hun ziakna lai chu a kawhhmuh a. Tichuan, chu nu chuan: “Zânina in thiltihah chuan ka lo tel ve ngei dâwn!” tia tiamin an inbiakna chu a titâwp ta a ni.
2. Sâwmna kan sem chhuah hunah eng nge kan sawi theih?
2 Kan Sem Dân Tûr: Thu hrilhna bial hrût chhuah nâna hun kan neih tam loh avângin, tawifel taka sawi chu a ṭha ber a. Heti hian kan sawi thei ang: “Chibai. April 17, Chawlhni hian kum tina hun pawimawh tak kan neih ṭhin chu khawvêl pumah kan hmang dâwn a, i chhûngte nêna lo tel ve tûrin sâwmna pêk che u kan duh a. [In neitu hnênah sâwmna pe rawh.] Chu mi nî chu Isua thih champha a ni a. Krista tlanna kan hlâwkpui theih dân chungchâng Bible ṭanchhan thusawi chu man chawi lova ngaihthlâk theih a ni ang. Hei sâwmna lehkhaah hian inkhâwmna hmun tûr leh a hun tûrte pawh a chuang a ni,” tiin. Thu hrilhna bial him vak lova thawk i nih chuan, sâwmna i pêk chhuah hmain in neituin a ngaihven a ni tih i chian phawt a ngai ang.
3. Engtin nge mi a tam thei ang ber kan sâwm theih ang?
3 Kohhranin thu hrilhna bial zau tak a neih chuan, upate chuan mi dang hmuh loh tûra sâwmna dah theihna tûr in neitu awm lohna inah remhre taka hnutchhiah tûrin kaihhruaina an pe mai thei a. I tlawhkîr te, chhûngkhat te, hnathawhpui te, school kalpui te, leh hmelhriat dangte pawh sâwm ngei ang che. Chawlhkâr tâwpa sâwmna sem chhuah hunah a theih chuan magazine-te sem chhuak bawk rawh. April thla chhûnga auxiliary pioneer thawkin, he campaign-na hlimawm takah i tel tam lehzual thei ang em?
4. Engvângin nge tuina neite Hriatrengnaa an rawn tel chu kan duh?
4 Tuina nei rawn inkhâwmte thu ngaihthlâk tûr chu thu hriattîrna thiltithei a va ni dâwn êm! Tlanna min pêkna kawnga Jehova hmangaihna ropui tak chungchâng an ngaithla ang a. (Joh. 3:16) Mihringte’n Pathian Ram an hlâwkpui dân tûr an hria ang. (Is. 65:21-23) Tin, an hriat belh nâna Bible zir an duhzia inkhâwm enkawltute hnêna hriattîr tûra sâwm an ni bawk ang. Mi rilru ṭhate’n kan campaign chhâng lêta Hriatrengnaa an rawn inkhâwm chu kan duh ber a ni tak meuh meuh a ni!