Lalram Chanchin Thar No. 38-na December Thlaah Sem Chhuah A Ni Ang!

1. Mitthite chungchângah mite’n eng zawhnate nge an zawh a, engtin nge December thlaah chûng zawhnate chu chhân a nih ang?

¹ Mite rin dân chu eng pawh ni se, thihna hi mi tinte tân hmêlma a ni a. (1 Kor. 15:26) Mi tam tak chuan mitthite awmna leh an hmu leh ang em tih chu an ngaihtuah a. Chuvângin, khawvêl pumah, “Mitthite An Nung Leh Thei Tak Tak Ang Em?” tih thupui Lalram Chanchin Thar No. 38-na chu thla khat chhûng kan sem chhuak ang. Chu special campaign chu December 1-ah ṭan a ni ang a. Special-a sem chhuah a nih hnu chuan, Lalram Chanchin Thar No. 38-na chu rawngbâwlnaah tract pakhat anga hman zui a ni ang.

2. Lalram Chanchin Thar No. 38-na pian hmang chu eng ang nge ni?

² A Pian Hmang: Lalram Chanchin Thar No. 38-na hi a dung zâwnga thleh tûra siam a ni a, chuvângin phêk hmasa bera a thupui ngaihvenawm tak bâkah “Mitthite chu . . . an nung leh ang i ti em? an nung leh lo vang i ti em? an nung leh mai thei i ti em?” tih thute pawh a lang vek thei a ni. Chhiartuin Lalram Chanchin Thar chu a han keu chuan a thupuia zawhna chhângtu Bible sawi dân leh Bible thutiamte a ṭangkaipui theih dân chu a hmu ang a. Bible a rin theih chhante pawh a hmu bawk ang. Lalram Chanchin Thar hnung lamah chuan a ngaihtuah tûr zawhna ngaihvenawm tak leh zir belh tûra amah sâwmna a awm a ni.

3. Engtin nge Lalram Chanchin Thar No. 38-na chu sem a nih ang?

³ A Sem Chhuah Dân Tûr: He campaign hi Hriatrengna leh district inkhâwmpui atâna sâwmna campaign nên a inang dâwn a. Upate chuan April 1, 2013-a lehkha thawn nêna inmilin, tualchhûng bial tlawh chhuah a nih dân tûr chungchângah kaihhruaina an pe ang. Thu hrilhna bial nei tlêm kohhrante chuan an bul hnaia kohhran bial nei zaute chu an ṭanpui thei ang. I sem chhuah tûr Lalram Chanchin Thar No. 38-na i lâk hunah chawlhkâr khat tâna i mamawh zât chauh lâk tûr a ni tih hria ang che. Campaign chhûng chuan, in tin thu hrilhna bial tlawh chhuah hnuah chuan vântlâng hmunahte pawh sem theih a ni ang. Copy zawng zawng chu thla tâwp hmaa sem zawh a nih chuan chu mi thlaa pêk chhuah tûr thu leh hla chhuahte kan pe thei ang. Inrinni hmasa bera Bible zirpuina neih ṭan tum aiin special campaign-a tel chu kan tum zâwk ang a. Chawlhkâr tâwpah chuan, a remchân hunah magazine pawh kan sem chhuak bawk tûr a ni. He special campaign-naa tel kim thei tûrin ruahmanna i siam em?