I Rawngbâwlnaah jw.org Hmang Rawh

Kan Web site hi ‘kâwlkil thleng pawha’ chanchin ṭha hril thei tûra min ṭanpuitu hmanraw ṭangkai tak a ni a. (Tirh. 1:8) Mahse, in neitu tam tak chuan jw.org chu mahniin an zawng hmu mai lo. Thuchhuahtu pakhatin a kawhhmuh hnuah chauh an hre ṭhîn a ni.

Bial kantu pakhat chuan, Engvângin Nge Bible I Zir Ang? tih video chu a phone-ah a download a, hun remchâng a neih apiangin mite a hmuh ṭhîn a ni. Entir nân, in tin a kalnaah heti hian a sawi a: “Hêng zawhna pawimawh tak pathumte chhânna hmu tûra mite ṭanpui turin rei lo tê ka rawn lêng a: Engvângin nge khawvêlah harsatna a tam êm êm? Engtin nge chûng chu Pathianin a chinfel ang? Chu mi hun a lo thlen hma chuan engtin nge kan hmachhawn theih ang? Hêng zawhnate hi he video hian tawi têin a chhâng a ni,” tiin. Tichuan a chhuah sak a, in neitu chhân let dân chu a lo en a. Video chu mit la tak a nih avângin, mi tam tak chuan a tâwp hma loh zawng an en chhuak a. Chutah, ani chuan heti hian a sawi a ni: “Online aṭanga Bible zirpui dîlna i theih lût thei tih a sawi i hre tawh a. Ka awm remchân lai a nih avângin, tûnah ka entîr nghâl thei ang che,” tiin. In neituin rem a tih chuan, Chanchin Ṭha tih brochure hmangin Bible zirpui a nih dân a entîr a. In neituin hun a neih loh chuan tlawhkîr leh huna tih atân ruahmanna a siam a ni. Thingpui dâwra a chawlh laiahte pawh, ani chuan a bul hnaia ṭhu tuemaw chu nêlawm taka a biak hnuah, tûna mi ang bawkin a sawi a ni. Chuti chu, i rawngbâwlnaah jw. org i hmang ve em?