INHUATNA THLENG LEH ṬHIN TIHTAWP DAN

3 | I Rilru Aṭangin Huatna Paih Bo Rawh

Bible Zirtîrna:

“Pathian duh zâwng, a ṭha leh, lawm tlâk leh, ṭhat famkim chu in hriat fiah theih nân, in rilru a thara awmin lo danglam zâwk tawh rawh u.”—ROM 12:2.

A Awmzia:

Kan ngaihtuah dân hi Pathian tân a pawimawh hle a. (Jeremia 17:10) Huatna ṭawngkam leh thiltih eng pawh chu kan pumpelh tûr a nih rualin, chu aia tam kan tih a ngai a. Huatna chu thinlung leh rilru aṭanga inṭan a ni a. Chuvângin, kan ngaihtuahna leh rilru aṭangin huatna chu a zung chawpin kan paih bo tûr a ni. Chutianga kan tih chauhvin, kan “lo danglam” tak tak thei ang a, huatna thleng leh ṭhîn chu kan titâwp thei ang.

I Tih Theihte:

Mi dangte, a bîk takin, ram dang mi leh hnam dang mi i thlîr dân leh an chunga i rilru put hmang chu ngun takin endik la. Heti hian inzâwt ang che: ‘Engtin nge anni chu ka thlîr? Ka thlîr dân hi mi mal taka an chanchin ka hriat dâna innghat a ni em? Nge ni a, inpâwng huatnaah a innghat zâwk?’ tiin. Inhuatna leh tharum thawhna lam hawi social media te, film-te, leh intihhlimnate chu pumpelh rawh.

Bible chuan kan thinlung leh rilru aṭanga huatna paih bo tûrin min ṭanpui thei

Mahni ngaihtuahnate leh rilru vei zâwngte dik taka endik chu a awlsam reng lo va. Mahse, Bible chuan “thinlunga ngaihtuah leh tumte” hre tûrin min ṭanpui thei a ni. (Hebrai 4:12) Chuvângin, Bible chu bih chiang ṭhîn la. A zirtîrnate leh i ngaihtuahna chu khaikhinin, i ngaihtuahnate chu Bible zirtîrnate nêna inmiltîr tûrin theih tâwp chhuah ang che. Bible chuan kan thinlung leh rilrua ‘kulhpui nghet tak’ ang huatna hneh tûrin min ṭanpui thei a ni.—2 Korinth 10:4, 5.

Nuna Thiltawn—STEPHEN-A

A Ngaihtuah Dân A Thlâk

Stephen-a leh a chhûngkua chuan mi ngote huat an hlawh a. Chuvângin, ani chuan mihring dikna chanvo humhalhtu politics pâwl pakhat chu a zawm a. A hnuah, amah ngei pawh huatna avânga dân bawhchhiatnaah a tel a ni. Stephen-a chuan: “Ṭum khat chu ka ṭhiante nên tûn hmaa United States-a Africa salte hrehawmzia târ langtu film kan en a. Chu film-a kan thil hmuhte chuan min tihthinrim êm avângin, film enna hmuna mi ngo ṭhalaite chu kan tibuai ta chiam a. A hnuah, kan chhehvêla mi ngoho chênnaahte va kalin kut kan thlâk chhunzawm a ni,” tiin a sawi.

Stephen-a chuan Jehova Thuhretute nêna Bible a zir ṭan chuan a thlîr dân chu a thlâk ta vek a. Ani chuan: “Hnam dang pâwng huatna ka neih nasat ṭhin êm avângin, Thuhretute zîngah chuan mak ka tih ngawih ngawih thilte ka hmu a. Entîr nân, mi ngo pa pakhat chu ram danga a zin chhûng chuan, mi hâng chhûngkaw khatin a fate an lo enkawlsak a. Chu bâkah, mi ngo chhûngkaw khat chuan chênna tûr nei lo mi hâng ṭhalai pakhat chu an inah an chênttîr bawk,” tiin a sawi. Stephen-a chuan Jehova Thuhretute chu Isua’n Kristian dikte zînga awm tûr nia a sawi unau inhmangaihna lantîrtute an ni tih a ring nghet tlat a ni.—Johana 13:35.

Engin nge Stephen-a chu tharum thawhna leh mi dangte a huatna bânsan tûra ṭanpui? Rom 12:2-na hi a ni. Ani chuan: “Ka thil ngaihtuah dân chu ka thlâk a ngai tih ka hre ṭan a. Remna siamtu anga lan mai ni lovin, chu chu nun kawng ṭha ber a ni tih ring tûrin ka rilru ka siam fel a ngai a ni,” tiin a sawi. Tûnah chuan, Stephen-a chuan kum 40 chuang huatna rilru nei lovin a nun a hmang tawh a ni.