Bible Ṭanchhan Zawhnate Chhânna
Mitthite tân beisei tûr a awm em?
Mitthite’n hriat theihna an neih loh va, engmah an tih theih loh avângin, thihna hi muthilh nên a inang a. Nimahsela, nunna Siamtu chuan mitthite chu thawhlehna hmangin a tinung leh thei a ni. Chu mi finfiah nân, Pathianin Isua chu mitthi engemaw zât kaitho tûrin thiltihtheihna a pe a ni.—Thuhriltu 9:5; Johana 11:11, 43, 44 chhiar rawh.
Eng kawngin nge thihna hi muthilh nên a inan?
Pathianin a hriat rengnaa awm mitthite chu felna khawvêl tharah an tholeh dâwn tih min tiam a. Chutianga tholeh tûrte chu Pathianin nunna a pêk kîrleh thleng chu thihnaah chuan an muhîl reng tûr a ni. Engkimtithei Pathian chuan mitthite kaihthawh nâna a thiltihtheihna hman hlân chu a nghâkhlel hle a ni.—Joba 14:14, 15 chhiar rawh.
Thawhlehna chu eng ang nge a nih dâwn?
Pathianin mitthite a kaihthawh hian, anni chu an inhre theiin, an ṭhiante, leh an chhûngte chu an hre thei ang. Mi taksa chu ṭawihral tawh mah se, Pathianin taksa thar neiin chu mi chu a kaitho thei a ni.—1 Korinth 15:35,38 chhiar rawh.
Mi tlêmtê chu vâna awm tûra kaihthawh an ni a. (Thu Puan 20:6) Tholeh a tam zâwkte chu paradis-a chantîr leiah hian an awm ang. Anni chuan chatuana nun beiseina neiin, bul thar an ṭan dâwn a ni.—Sâm 37:29; Tirhkohte 24:15 chhiar rawh. (w13-E 10/01)