Diciembre

Tsa sakʼoa ñʼai maná nga majinná jmeni xi tso je Énle Niná kʼoa tsakui nichxin tsínkjoan kʼoasʼin koasenkaoná je Jeobá josʼin mená. Kui xosíkao sakʼoaná nga to jao sʼeni tokoán. Tsa tsín kjoásjeyaa jmeni xi to jao bʼé tokoán kjuinroajenjin je kjoamakjainná (Sant. 1:7, 8). Kʼoa tsakui nichxin saʼnda tsín tikoa̱nkjainniná jmeni xi tso je Jeobá tʼatsʼe nichxin xi sʼa nroa. Je pastro Pablo kui kisingósonkao je kjoachoya xi tjínná joni jngo ki̱cha̱ʼba̱ (Heb. 6:19). Je ki̱cha̱ʼba̱ xi tjínle je barco, kui xi basenkao nga tsín fijen fikjá kʼianga jtsíntjao̱ faʼajin ndáchikon kʼoa nga tsín la̱jao̱ kuichosatétʼa. Tonga tokʼiaa basenkao tsa tsín tjójtso je cadena xi tjítʼanʼioni barco. Tojo ma je ntsjáo nga síkitsón je cadenale ki̱cha̱ʼba̱, kʼoati ma nga jao sʼe tokoán, síkʼajen je kjoamakjainná. Kʼianga kjoa faʼatojin jngo chjota xi to jao tjínle, tsakui nichxin likui tikoa̱nkjainnile jmeni xi tso je Jeobá. Kʼoa tsa tsín timakjainnile kʼoati tsín tijme kjoachoya sʼe̱nile. Jngo chjota xi kʼoama alikui titsjoa sʼenile. w21.02 30 párr. 14, 15

Tsakui nichxin jetsʼato 70 nóle Abrahán nga kitjoni naxinandá Ur kao familiale (Gén. 11:31-12:4). Kʼoa jngo sientola nó nga ndʼianajño tsakʼejnaʼya nga tsakʼamje ʼnde Canaán. Kʼoa 175 nóle nga kʼien (Gén. 25:7). Je Abrahán alikui tsabe josʼin kisitjoson Jeobá jmeni xi tongini kitsole, nga je ntje̱le kitsjoale je nangi jña tsakʼamje. Kʼoati tsín tsabe je naxinandá xi kiskoyale, xi tsonile, nga tsakatéxoma je Chjotaxále Niná. Ninga kʼoalani, je Biblia kʼoatso nga jekʼien Abrahán “tjín jngojngo kon jokji tse tsakʼejna” (Gén. 25:8). Ninga nʼio tse kjoa jaʼatojin, nʼio kisʼejna je kjoamakjainle kʼoa kiskoya nga sitjoson jme xi kitso Jeobá. Jmé xi tsakasenkao nga kichokjoajinnile. Kuinga miyole Jeobá koan kʼoa jé kisikuinda jokjitse tsakʼejna (Gén. 15:1; Is. 41:8; Sant. 2:22). Tojo kisʼin Abrahán, kʼoati kui tichoyalee je naxinandá xi tjínle xjáoja̱ma̱ (Heb. 11:10). Alikui tikui tichoyanilee nga koatexoma je Chjotaxále Niná, nga̱ jetsakʼétsʼiakao nga tíbatéxoma ya ngʼajmi tjen nó 1914 (Apoc. 12:7-10). Tokuisa tichoyalee nga koatexoma i̱ Sonʼnde. w20.08 4, 5 párr. 11, 12

Kʼianga nda kuinóʼyalee xi ngikʼa, tjínnele nangitokon koaan kʼoa tsejta koaan. Janla koya kataʼyaa ánni nga nʼio tjínnile kjoandosin nga kʼoasʼiaan. Xi títjon, kuinga tsín chʼaosʼin si̱kjaʼaitsjeen xi tʼatsʼe. Xi majaoni, kʼoasʼin jchañá jotjío kon je ndsʼee kʼoa ánni kʼoasʼínni tsa jmeni. Kʼoa xi majanni, tsa kʼoasʼiaan kuisenkaoñá nga skoe̱ jñáni koa̱n sindayasa yaole. Sakʼoa kʼiani ʼyaa jotjío tokoán nga kjaʼaí xi bʼeyanajmílee jme xi kjimaná. Tjínkʼa ndsʼee xi ñʼai male nga bʼéyanajmí jotjío kon, tsakui nichxin kuinga ñʼai manile nga kjoa jaʼatojin ngasʼa kʼoa tsa tsín kʼoasʼin benije̱ chjota ya jñani tsʼe. Tonga tsa tsejta koaan joni Jeobá, chanjin kuitso kon je ndsʼee nga kuinchja̱ kʼoa kʼoakuitsoná jmeni xi kjimale. Kʼianga kʼoeyanajmíná nda kuinóʼyalee. w20.04 15, 16 párr. 6, 7

Je jti̱ yaa ngisa sʼe jñani tsje tjín nandá kʼoa jñani tjín tsojmi xi kjine. Kʼoa kʼoati tsen tjínle hora jochon nga fikʼasjengindá jti̱ je chjota. Jngo ndsʼee xi ya Pacífico tsʼe kʼoakitsole jngo misionero nga jti̱ koaikʼasjengindá, kʼoa je misionero i kitso: “A koaan tsa las 9 koanngían nyaon tanjio”. Tonga je ndsʼee i kitsole: “Alikui ñá xi bixónñá jochon mangían, kui xi tsoni jochon bitjo je jti̱”. Kʼoati kisʼin je chjota xi jti̱ tsakʼasjengindá nga siglo 1, kʼiaa kikʼasjengindá jochon nga bitjo jti̱ kʼoa jñani bele kon nga kisʼe. Tobʼelañá, je chjotatjenngile Jesús yaa kitsoya Énle Niná ya yo̱ngo̱, ya ndʼia sinagoga, nga xki̱ ndʼia xki̱ ndʼia kʼoa ya jinndi̱tsi̱n (Hech. 5:42; 17:17; 18:4). Ñá kʼoati tjínnele nda jchaa josʼin ngale je chjota ya jñani ʼmiyasoán. Chósonnilee kʼiáni kʼoa jñáni nga ngisa ska̱jiaan je chjota nga kʼuínyalee (1 Cor. 9:19-23). w20.09 4 párr. 8, 9

Jngo koya xi koa̱n sʼiaan nga miyole Jesús koaan kuinga kʼoainganʼiolee je naxinandále Jeobá jme xi bʼéndajin. Ngisaa mamiyosaa je Jesús, xi jko̱ sʼin tíjnale je jtín, kʼianga bʼainganʼiolee je ndsʼee xi bándiaaná (Efes. 4:16). Tobʼelañá, je naxinandále Jeobá kui xi mele nga ndasʼin ni̱chjén je Ndʼia jña chotʼayá. Kuinga tjínkʼani jtín xi kjimajngole xínkjín. Nga kʼoakjima, ngisaa nda kjimachjén je tao̱n xi tsjoá naxinandále Niná. Xi ijngosani, nga kʼoasʼin tísʼendajin tjínkʼa je ndsʼee xi xin jtín tjíotsjoánganʼio. Tsakui nichxin nkjín nó kitsjoanganʼio jngo jtín kʼoa jekitsjentʼale ndsʼee xi ya tjío, tonga ndʼaibi xin jtín tjíonikasén nga katatsjoánganʼio. Nʼiojin tsjoa sʼe kon je Jesús nga kʼoasʼin tsjoánganʼio je ndsʼee jmeni xi bʼéndajin naxinandále Niná. w20.04 24 párr. 14

Je rey xi norte tsʼe kao je rey xi sur tsʼe tosi tonda tjíobʼetʼale xínkjín nga mele je koatexoma i̱ Sonʼnde. Tobʼelañá, kʼianga jekisʼejna je Kjoajchántse xi majaoni, je Unión Soviética kao xi ya tsjoánganʼiole nkjín naxinandá xi Europa tjío tsakánentsja. Kuinga je rey xi sur tsʼe nkjín naxinandá tsakájtani nga tojngo kisʼin yaole, je xi OTAN ʼmile. Kʼoa nga jao rey jebi tosi tonda tjíobʼasje je ki̱cha̱ kjoajchán. Kʼoa bʼetʼale xínkjín kʼianga kjaʼaí kjaʼaí xi tsjoánganʼiole kʼianga kjoajchán sʼe ya África, Asia kao América Latina. Kʼoa je nó xi tífaʼato, je Rusia kao xi ya tsjoánganʼiole tsee nganʼio tísʼele jngo tjíjtsa Sonʼnde. Kʼoa yaa tjen Internet tíbʼetʼanile je rey xi sur tsʼe. Nga jao rey jebi kui Internet síchjén nga bʼetʼangañále xínkjín kʼianga je fayojin tʼatsʼe kjoa política kao tʼatsʼe josʼin tjíosíxá nga jngó jngó. Kʼoa tojo kitso je Daniel, je rey xi norte tsʼe tosi tonda tíbʼetʼale naxinandále Niná (Dan. 11:41). w20.05 13 párr. 5, 6

Kʼianga tsakʼejna profeta Isaías, je Jeobá i kitsole naxinandále: “A sichajin jngo chjoón je ʼndíleele [...]. Ninga kʼoasʼin yánchjín jebi, xi an nikʼiajinla sichajinle” (Is. 49:15). I̱ texto jebi kʼoasʼin síngósonkao yaole Jeobá joni jngo na̱, ninga tsín tongantsjai nga kui choa̱ síchjén. Kui choa̱ kisichjén jokji tsjentʼale jngo na̱ je ʼndíleele nga kitsoya jokji tsjoake je choʼndale. Me tongatsʼi xi na̱ ma nga kʼoasʼín jokitso jngo tichjaa xi Jasmín ʼmi, i kitso: “Kʼianga nikakiaa je ʼndíná, nʼio tsjentʼalee xíngiaa ngantsjai”. Je Jeobá be kʼianga jngo choʼndale tsín titsoyasonni kʼoa tsín tifini kjoajtín. Nda chjoéyaa je ndsʼee xi jekisikatío xále Niná kʼianga fi ijngokʼani kjoajtín. Je Jeobá kui xi mele nga je katasíxá ijngokʼale kʼoa kʼoati kui xi mená tsanda ñá (1 Ped. 2:25). w20.06 18 párr. 1-3

Alikui to ngayeje kjoatjao xi nʼio chjíle nga kao xkoaan ʼyañá. Kʼianga kinchja̱ya je Jesús ya jngo sonnindo kui kinchja̱ni tʼatsʼe kjoanyiná xi tsʼe ngʼajmi xi ngisa chjíle tikʼoajinni tsojmi xi tjín sonʼnde. Kʼoa i kitso: “Ya jña nga tíjna kjoanyináli, kʼoati ya kʼoéjna ni̱ma̱li” (Mat. 6:19-21). Yaa ni̱ma̱ná kjuinroajinni nga kjoásjee jmeni xi chjí ʼyatokoán. Yaa ngʼajmi bʼejnatjoá “kjoanyiná” kʼianga nda mangínkoaa yaoná kʼoa nga nda biyoaa ngixko̱n Niná. Tojo kitso je Jesús, niʼyajinla xi koa̱nle kjoaʼaná tsojmichjí jebi. Je pastro Pablo kʼoatsoná nga kui kuenta sʼiaan je tsojmi “xi tsín matsen” (2 Cor. 4:17, 18). Jngo koya xi nʼio chjíle xi tsín matsen kui je kjoanichikontʼain xi tsjoáná Niná ya sonʼnde chjotse. Jósʼin koakoá nga ʼyachjiá je kjoatjao jebi. w20.05 26 párr. 1, 2

Tsee kjoanda kisʼele je chjota israelita nga kitsoyale je Moisés tʼatsʼe Jeobá kao jaʼaínle. Jmeni xi tsakʼinyale tsakinyakao nga nda kisatio kon kʼoa kisinʼiojin, tojo ma nga bʼanele jtsí je jñá. Jmé xi koa̱n sʼiaan nga kʼoati katama kʼianga koakoyaa. Kʼianga kʼuínyasoán nga xki̱ ndʼia kʼoa tsa ya jña nʼio tjín chjota, si̱chjén je Biblia nga kʼuínyalee je jaʼaínle Niná. Koaan kui si̱chjén je xo̱n xi Énle Niná yʼangini, video kao je página xi tíjnaná ya Internet, ngayeje jebi jé Jeobá bʼasjengʼa. Koaan chja̱kaonajmíñá je chjota tʼatsʼe jokjoan Niná ya tʼaxáná, ya ndʼiaskuela kʼoa tsa tjín jña timangián. Kui chja̱kaonajmíñá jmeni xi tjínndajinle Niná xi kao ñá kʼoa xi kao Sonʼnde. Kʼianga kjuinrʼoé je chjota tʼatsʼe jebi, tsakui nichxin tokʼia skoe̱ títjon nga nʼio tsjoakená je Jeobá. Kʼianga ñandia ñandia bakoyaa jokjoantjínni tʼatsʼe Jeobá, bʼainganʼioñá nga katabitjotsje je jaʼaínle kʼoa bʼejnatsenñá je énndiso xi sakóya xi tʼatsʼe. Nda satío kon je chjota kʼianga nrʼoé jmeni xi tso je Biblia (Is. 65:13, 14). w20.06 10 párr. 8, 9

Jósʼin tjínnele si̱kjaʼaitsjeen tsa mená kuinyakoaa xi jekisikatío xále Niná. Kataʼyala jme xi bakóyaná je choa̱le ti xi ki (Luc. 15:17-24). Je ti jebi kʼoamanile jme xi kisʼin kʼoa fi ijngokʼani ndʼiale. Kʼoa je nʼaile ndi̱toon fikʼáya je tile kʼianga be, tsoakjá kʼoa kʼoatsole nga tojo tsjoake. Je ti jebi kʼoamanile jme xi kisʼin kʼoa kʼoatso nga tsín tibakinnile nga tile kuitsole. Je nʼaile nroajen ndáxko̱n nga kʼoatsole je ʼndíle. Kuinga jngo sʼuí bʼéjnani kʼoa kʼoatsole je choʼndale nga kui najño katatsjoále je xi ngisasa nda kji. Kʼoasʼin bakóni nga ʼndíle mani kʼoa nga tsjoake, nga tsín jochoʼnda sʼin bekon. Je Jeobá yaa mangóson je nʼaile ti xi kinchja̱ni Jesús. Tojo tsjoake je choʼndale xi jekisikjin kʼoa kui xi mele nga je katasíxá ijngokʼanile. Kʼiatsa chjénngilee je Jeobá koaan kuisenkoaa xi jekisikjin. Kuinga machjénni nga tsejta katamaa, nga si̱jinlee yaoná jotjío kon kʼoa koakolee kjoatsjoacha. w20.06 25, 26 párr. 8, 9

Je Jesús kʼoakitso nga tjínkʼa xi nʼio tsjoa sa̱tío kon nga skótʼaya je Énle Niná, tonga kʼianga kjoa kjoaʼaíne kjuinroajen je kjoamakjainle (Mat. 13:3-6, 20, 21). Tsakui nichxin tsín majinle nga kjoa bitjatojiaan kʼianga Jesús mangíntjenngilee (Mat. 16:24). Tsa kʼoasʼin síkjaʼaitsjen nga tsín jme kjoa sʼele je xi chjotale Cristo ma. Tonga nga i̱ Sonʼnde tiyoaa, toxá kjoa bitjatojinñá. Sakʼoa toxijña bʼantjaiya josʼin tiyoaa kʼoa kui xosíkaoná nga tsín titsjoa satíoni tokoán (Sal. 6:6; Ecl. 9:11). Me ngatsʼi je choʼndale Jeobá nga ñaki tjíojngo kon nga tʼatsʼe Niná nroani jmeni xi makjainle. Jósʼin ʼyañá jebi. Kuinga tsín tokui síkʼajennile kon tsa jngo ndsʼee sikiʼaon kjoafaʼaitsjenle kʼoa tsa tsín kixi tíjna jmeni xi sʼin tsa ʼyani (Sal. 119:165). Kʼianga kjoa faʼatojin sa nʼio sa nʼio sʼejna je kjoamakjainle (Sant. 1:2-4). Tjínnele nga nʼio katasʼejna je kjoamakjainná. w20.07 8 párr. 1; 9 párr. 4, 5

Nga kjesa bʼexkiajián je Biblia, kʼoakʼuínlee je Jeobá nga katabasenkaoná nga koa̱njinná jmeni xi kʼoéxkiaa. Tobʼelañá, tsa kjoafaʼaitsjen tifasjee nga kjoa tibitjatojiaan, si̱jélee je Jeobá nga koa̱nsjaijinná ya Biblia je kjoafaʼaitsjen xi koasenkaoná (Filip. 4:6, 7). Jngoo kjoanda kitsjoaná je Jeobá nga ma chaniyaa jkoaa jmeni xi bʼexkiaa. Kʼianga ngisa nda koa̱njinná xi tibʼexkiaa, cha̱niyaa jkoaa jmeni xi koan nga kʼia, kʼoa kʼoasʼin si̱kjaʼaitsjeen joni tsa ñá xi kʼoakjimaa. Kui cha̱niyaa jkoaa jmeni xi tsabe je chjota xi síkʼaxki̱ Biblia kʼoa jokisʼe kon. Xijekoa̱n, si̱kjaʼaitsjenjiaan jmeni xi tibʼexkiaa kʼoa kuenta sʼiaan jme xi bakóyaná. Tsa kʼoasʼiaan, ngisaa nda koa̱njinná jmeni xi tichotʼayá. Tsa tsín si̱kjaʼaitsjenjiaan, yaa mangóson joni je tsojmi xi bichiñá, alikuijin nda chi̱ne tsa tsín kʼoéjiaan jme xi machjénle. w21.03 15 párr. 3-5

Koanjin nga kui kisikjaʼaitsjen je pastro Pablo jmeni xi kisʼin ngasʼa kʼoa koanjin kʼoasʼin kisikjaʼaitsjen nga tsín ndoyá tsakʼejnaʼya tsa tsínlani kʼoasikji nʼio kisitoánntjai je Énle Niná. Koanjin tsakʼéngijti kon nga kitsjionkon je chjota xi Asia tsʼe, kʼoa tsa tsín tikisinʼiotʼanije̱ miyole. Tonga alikui kʼoakisʼin je Pablo. Ningalani jebe nga jeme ni̱kʼien, ñaki kʼoatsakʼé kon nga kui xi ngisa chjíle nga je Jeobá kʼoasjengʼa. Tosi tonda kisinʼiojin xi kjaʼaí, kʼoa tosi tonda tsakʼétsʼoale je Jeobá. Alikui kui tsakʼéjinkon nga tjínkʼa xi kitsjionkon. Tosaa kʼoakitsole je miyole xi kixi kitʼale nga chjí bekon. Kʼoa alikui tsakájñále nga kiskotʼaya je Énle Niná (2 Tim. 3:16, 17; 4:13). Tonga xi ngisa chjíle kuinga kʼoatsakʼé kon nga tsjoake je Jeobá kao Jesús. w21.03 18 párr. 17, 18

Kʼianga siglo 2, je xi chjotale Cristo kitsole yaole yaa naxinandále Niná jaʼasʼenjin kʼoa to kjoaʼmiya ndiso tsakakóya, kʼoa tsakʼéʼma jokjoantjínni je Énle Niná. Saʼnda nga kʼia kʼoa saʼnda nga tífetʼa siglo 19, alikui tikisʼeni je jtín xi tsʼe Niná i̱ Sonʼnde. Je xi chjotatjenngile Cristo kitsole yaole koannkjínya joni jñá xi tsín nda kʼoa likui titsaʼyanile ʼyáni xi chjotatjenngile Cristo ma (Mat. 13:36-43). Ánni machjénsíni nga si̱kjaʼaitsjenjiaan jebi. Kuinga je én xi faʼaitʼa ya Daniel capítulo 11 kui nchja̱ni tʼatsʼe je rey xi norte tsʼe kao je rey xi sur tsʼe, ali tsa jejin xotsole je chjotaxá xi kʼia tsakatio nga siglo 2 saʼnda nga tífikjetʼa siglo 19. Nga kui nichxin, likui kisʼe jngo jtín xi tsʼe Niná xi tsakʼetʼale. Kʼiaa nga jetífetʼa siglo 19 tsʼatsen ijngokʼa je rey xi norte tsʼe kao je rey xi sur tsʼe. w20.05 3 párr. 5

Je profeta Joel tongini kʼoakitso nga chjo̱ba̱ kuichosíkje naxinandá Israel kʼoa ski̱nee tojmeni xi tjín jñani kjoaʼa (Joel 1:4). Nkjín nó nga kʼoasʼin koanjinná nga je naxinandále Niná tsoyanile, xi ya mangóson nga tsoyason je Énle Niná tojo sʼín je chjo̱ba̱ nga ñaki matjainne jngo ʼnde. Kʼoasʼin koanjinná nga tse kjoa bajngi jinnaxinandá je Énle Niná, xi tsonile, chjota xi je religión ndiso kjinentsja. Tonga nga kuenta nʼia jmesani xi tso nga tongini kʼoa nga maskanni, tjínnele nga si̱kʼantjaiyaa josʼin majinná tsakai. Je Jeobá itso: “Kjin kjuísikatíoa [je chjo̱ba̱] je xi ya norte nroani” (Joel 2:20). Tsa jelani testigole Jeobá tsoyanile chjo̱ba̱ jebi, xi tsoyason kʼoa xi chjotatjenngile Jesús síkao chjota tojo kitso je Jesús, ánni nga kjin koaisíkatíoni Jeobá (Ezeq. 33:7-9; Mat. 28:19, 20). Je Niná alikui kjin fisíkatío je choʼndale xi kixi fitʼale, jé xi kjin fisíkatío tsa jmeni kʼoa tsa ʼyani xi kontrale mani. w20.04 2, 3 párr. 3-5

Tsa kʼoasʼin tinikjaʼaitsjeen nga tsín tíbasenkaoná je Jeobá, jméni xi sʼiaan. Je Santiago kʼoatso nga tosi tonda kʼoétsʼoaa. Je Jeobá alikui koa̱nsile ninga ngotjo ngosa kʼoétsʼoanilee nga si̱jélee kjoachjine nga chókjoajinná je kjoa xi tibitjatojiaan. Tosaa kui xi mele nga kʼoasʼiaan kʼoa tsjoáná kjoachjine kʼianga si̱jélee (Sal. 25:12, 13). Be jme kjoa xi bitjatojiaan, mamakená kʼoa tíjnanda nga koasenkaoná, nga ʼyaa jebi tsjoa sʼe tokoán. Jósʼin tsjoáná kjoachjine je Jeobá. Kui Biblia síchjén (Prov. 2:6). Nga chjine koaan, machjén nga chótʼayá Biblia kʼoa kao je xo̱n xi ya yʼangini. Tonga, ali tsa tokuijin xi machjén nga chótʼayá, tjínnele nga kjuintjenngiaa je kjoafaʼaitsjen xi tsjoáná je Jeobá. Je Santiago i kitso: “Kʼoatʼiaon jo tso je énbi, ali tonoʼyajinlao” (Sant. 1:22). Kʼianga mangíntjenngiaa jmeni xi tso je Énle Niná, nda chjota maa, nda nikjaʼaitsjeen kʼoa bakoñá kjoamatokon (Sant. 3:17). Nga kʼoanʼia basenkaoná nga chókjoajinná je kjoa xi bitjatojiaan kʼoa tsjoa sʼe tokoán. w21.02 29 párr. 10, 11

Nʼio koasenkao je xi tosʼa tíkotʼaya Biblia nga koaisʼenngindá tsa kuinyakoaa ngatsʼiaa xi tiyoaa ya jinjtín. Koaan kʼoainganʼioá ngatsʼiaa nga choʼndale Niná koa̱n. Jngo precursora xi i̱ tso: “Je én xi nʼio síchjén chjota kuinga kʼoatso nga nkjín chjota tsjoánganʼio kʼianga majchá jngo ʼndí. Kʼoati ma nga chjotatjenngile Cristo nikoaa je chjota. Machjénná nganʼiole ngatsʼi ndsʼee nga choʼndale Niná koa̱n jngo chjota”. Nga majchá jngo ʼndí binyakao je xínkjín, miyole kʼoa kao maestro xi tsoyale ya ndʼiaskuela, tsjoánganʼiole kʼoa nkjín koya xi tsoyale. Tikʼoasʼinni, koaan kuinyakoaa je xi tosʼa tíkotʼaya Biblia nga koaisʼenngindá. Koaan kʼoailee kjoafaʼaitsjen, kʼoainganʼiolee kʼoa nda choa̱ kʼoéjnalee (Prov. 15:22). Tsa jngo chjota tiʼmiyalee Biblia, ánni ndatjínsíni nga kʼoati koasenkao je ndsʼee xi kjaʼaí. Kuinga ngisa koa̱ntaja kjoamakjainle. w21.03 8 párr. 1-3

Ngatsʼiaa xi chjotale Cristo maa, ni sʼa xtiaa kʼoa ninga jekoanjchíngaa alikui koa̱n nga nda sʼiaan jinnaxinandále Niná kʼoa kjaʼaíni sʼiaan nga xin tijnaa. Je Juan kui kinchja̱ni tʼatsʼe jebi kʼianga kʼoakitso nga tsín koa̱n Niná si̱xálee tsa tinichajngiñá (1 Juan 1:6). Kʼiatsa mená ndasʼin kuiyoaa ngixko̱n Niná ndʼaibi kao nichxin xi nroaján, machjén nga kuenta sʼiaan nga tíbe Jeobá jmeni xi nʼia nga nyaon nyaon. Kʼoa ninga tsín ʼya xi skoe̱ná jmeni xi nʼia, je Jeobá tíbení (Heb. 4:13). Kʼoati tjínnele tsín koa̱nkjainná jotso chjota tʼatsʼe jmeni xi jée tjenkao. Nichxin nga tsakʼejna Juan, je chjota xi yátsʼi̱n tsakinyále Niná kʼoasʼin kisikjaʼaitsjen nga tojo miyole Niná koa̱n ninga kui kʼoasʼin jmeni xi tsín sasénle Niná. Nichxin xi tiyoaa ndʼaibi, tojo kʼoasʼin síkjaʼaitsjen je chjota. Kʼoatso nga makjainle tʼatsʼe Niná tonga tsín sasénle jotso kjoatéxomale Niná xi tʼatsʼe jée, jolani nga xínkjín fayokao chjota. Jmeni xi jée sʼin bekon Jeobá, alikui chʼaotjín male je chjota. w20.07 22 párr. 7, 8

A nokjoantjaiñá je tichjaa kʼianga nganʼio machjénle. Tobʼelañá, tsa tjínkʼa je ndsʼee xi tokui kuenta sʼín nga tojochon bichó nga sʼejna kjoajtín jngo tichjaa xi tsín kotʼaya xʼinle, kʼoa tsa tokjoan fi kʼianga jefetʼa kjoajtín, kʼoa tsa me tongantsjaije̱ nga tsín bichókao ʼndíxtile. Je ndsʼee jebi tsa tokui fáoyani jmeni xi sʼín je tichjaa kʼoa saʼnda kʼoatso ánni nga tsín nʼio bʼejnanile je xʼinle. Tonga je tichjaa tíbʼénele yaole jokji tjen kʼoakjimale. Ali tsa tojejin yʼa yaole nga kʼoakuitso jmeni xi sʼin kʼoa alikui toje xi tsoni jmeni xi sʼin tʼatsʼe ʼndíxtile. Koaan kʼoakʼuínle je tichjaa nga nʼio nda tísʼín, kʼoa kʼoéyanajmílee xi kjaʼaí nga nʼio nda tísʼín je tichjaa nga kʼoasʼin tísíxále Jeobá. Tsa kʼoasʼiaan, alikuijin tiʼya xi chʼaosʼin sikʼaxki̱ni. Je xi chjotajchínga sʼin tjío majinle nga kuenta sʼín je Jeobá josʼin makuinda je tichjaa (Sant. 1:27). Tojo kisʼin je Jesús, kʼoati kosonnile jme xi sʼín kʼoa alikui kjoanʼio bʼéne tsa jmeni (Mat. 15:22-28). Básjaile josʼin binyakao je tichjaa. w20.09 24, 25 párr. 17-19

Jokjitse tsakʼejna je Daniel jé Jeobá kisijéle nganʼio nga tsakándiaale. Tobʼelañá, kʼianga je kisichjén Niná nga kʼoakitsole Nabucodonosor josʼin tsoyanile je nijñá xi tsakʼaile, je Daniel alikui yaole tsakʼasjengʼa, tosaa nangitokon koan kʼoa jé Jeobá tsakʼasjengʼa (Dan. 2:26-28). Jebi kui bakóyaná nga tjínnele je Jeobá chʼa̱sjengʼaa ngantsjai kʼiatsa jngo kjoanokjoaya kʼoee xi nda sa̱sénle je ndsʼee kʼoa tsa kʼiaje̱ nga masjainá je chjota xi ʼmiyalee je Énle Niná. Nangitokon katamaa kʼoa kuenta sʼiaan nga tsín jme xi koa̱nná kʼoasʼiaan kʼiatsa tsín je Niná koasenkaoná (Filip. 4:13). Nga kʼoanʼia, kʼoati kui choa̱le Jesús mangíntjenngiaa. Je Jesús jé Jeobá kisinʼiotʼa yaole ngantsjai (Juan 5:19, 30). Alikuikʼia tsakjáʼale xále Nʼaile. Ya Filipenses 2:6 kʼoatso “nda tsa mangóson kao Niná” je Jesús alikui koanmele nga jo Niná sʼin kʼoéjna. Koanjinle nga ngisa ngʼa tíjna je Nʼaile tikʼoajinni je kʼoa kisitjosonle. w20.08 11 párr. 12, 13

Tjínkʼa ndsʼee xi kui tjíofaʼatojin je kjoa xi tsín matsen kʼoa xi tsín majinná. Tsa chʼin tjínná kʼoa tsa tsín ʼya xi majinle jotjín tokoán, koasenkaoná je choa̱le Mefibóset (2 Sam. 4:4). Je Mefibóset nʼio ñʼai tjín kjoa xi jaʼatojin nga̱ chjiʼngé koan, kʼoa xi ijngosani, je rey David ñandia nga totaon tsabe kʼoa tomaa xi kitsole. Tonga je Mefibóset alikui kisikinroajen kon, tosaa tsabechjí jmeni xi kisʼele. Kitsjoále kjoanda je David josʼin tsakasenkao nga títjon (2 Sam. 9:6-10). Kʼianga tsín kixi tíjna jmeni xi kisikao David, je Mefibóset alikui kui tsakʼéjinkon. Alikui chʼao tsakʼé kon jmeni xi kisikao je David kʼoa alikui je Jeobá tsakánele jmeni xi koantʼain. Tosaa kitsjoanganʼiole je rey xi je Jeobá tsakasénnda (2 Sam. 16:1-4; 19:24-30). Jé Jeobá xi kʼoasʼin koanmele nga ya Biblia kisʼetʼa je choa̱le Mefibóset ánni nga koasenkaoniná ndʼaibi (Rom. 15:4). w20.04 26 párr. 3; 30 párr. 18, 19

Tsakui nichxin ya jtín jñani mangián tjío xi misionero sʼin tjíosíxá, xi precursor especial kʼoa tsa precursor regular sʼin tjíosíxá. Ñaki tokui xá tjíosʼín nga tsoyason kʼoa nga tsoyale Biblia chjota. Ningalani me tongatsʼi ndsʼee jebi nga tsín tse tao̱n tjínle, tonga nʼio síchikontʼain Jeobá (Mar. 10:29, 30). Nʼio tsjoa satío tokoán nga tjío je ndsʼee xi kʼoasʼin tjíosíxále Niná ya jinjtín. Ali tsa tojejin ndsʼee xi xá kjinele kao xi ñaki to xále Niná tjíosʼín xi chjíle jmeni xi sʼín ya jinjtín. Ngatsʼi xi tsoyason nʼio chjí be je Jeobá kao je jtín (Rom. 10:15; 1 Cor. 3:6-8). Nga̱ je xá xi kjinele xi tjío jinjtín kuinga chjotatjenngile Cristo sikao je chjota (Mat. 28:19, 20; 1 Tim. 2:4). Ngatsʼi xi jetsoyason, ni jekisʼenngindá kʼoa ni mai, kui ngisa tsjoále kjoandosin nga tsoyason (Mat. 24:14). w20.08 21 párr. 7, 8

Ánni nga nʼio tsjoánganʼioniná én jebi. Kuinga sakʼoa tse kjoa bitjatojiaan ngatsʼiaa. Tobʼelañá, kʼianga xíngiaa biya, nkjín nó nga ba satío tokoán. Tjínkʼa xi ñʼai male nichxin nganyaon nga chʼin bʼetʼale nga jemajchínga. Kʼoa je xi depresión tjínle, tjín nichxin nga sakʼoa nʼio bʼetʼale chʼin jebi. Ninga kʼoalani, alikui nikinroajeen tokoán nga̱ ʼyañá nga i̱ tíjnakaoná “ngantsjai nichxin” je Jesús, ninga kʼia nga nʼio tse kjoa bitjatojiaan (Mat. 11:28-30). Ya Biblia kʼoatso nga ánkje síchjén je Jeobá nga basenkaoná (Heb. 1:7, 14). Tobʼelañá, jé ánkje binyakaoná kʼoa jé bándiaaná kʼianga ʼmiyasonlee je Énle Niná toʼya chjotani, tojñani tsʼe, tojme ntje̱ kitjenni, tojme én xi male kʼoa tojñani naxinandále (Mat. 24:13, 14; Apoc. 14:6). w20.11 13, 14 párr. 6, 7

Kui xi mená nga katamajinle je xi tiʼmiyalee Biblia nga tʼatsʼe Niná nroani jmeni xi ʼmiyalee (1 Tes. 2:13). Kuinga koa̱n chjónanginilee jósʼin síkjaʼaitsjen nga Biblia tíkotʼaya. ʼNdele nga toñá kʼoakʼuín ʼndeʼndelee jmeni xi nchja̱ni nga jngó jngó texto, kʼoakʼuínlee nga kʼoakatatsoná josʼin majinle. Kuinyakoaa nga katamajinle josʼin koa̱n sichjén jmeni xi tso Biblia. Chjónangilee josʼin síkjaʼaitsjen tʼatsʼe je texto xi kʼoexkia (Luc. 10:25-28). Tobʼelañá, koaan i̱ kʼuínlee: “Jótso texto jebi tʼatsʼe jokjoan Jeobá. Jósʼin koasenkaoli jmeni xi tso texto jebi. Jótjín tokuin ndʼaibi nga jekoanjinli jmeni xi tso texto jebi”. Je xi ngisa chjíle ali tsakuijin nga nʼio tse xi koa̱nle, kuinga tsjoake koa̱n je Énle Niná kʼoa nga sitjoson jmeni xi tso. Kʼianga koa̱nná ngisa nda kʼuínyaa machjén nga nangitokon koaan. w20.10 15, 16 párr. 5, 6

Jé Jeobá xi ngisa nda be kʼiáni nga tsín tikʼuínyasonñá. Si̱kjaʼaitsjenla jmeni xi koan nga nichxinle Noé, je Jeobá kʼiakjoán jaʼaikao Jtsínʼio kʼianga kicho choa̱le. Jngo siento kao kanla nó tongini kʼoakitso kʼiáni kjoaʼaíkao Jtsínʼio. Kʼoa xijekoan, kʼoakitsole je Noé nga jngo arca katabʼénda. Ñachanla kʼoa tsa ñachante nó nga kisixá ʼndeʼnde je Noé. Ningalani tsín tsakʼaʼén je chjota jmeni xi kitsole, tosi tonda tsakájinkon saʼnda nga kʼoakitsole Jeobá nga jekichoka choa̱le nga katafaʼasʼen ya arca. Kʼianga jekichoka choa̱le, je Jeobá tsakʼéchjoa je xo̱ntjoale arca (Gén. 6:3; 7:1, 2, 16). Jeme kuicho nichxin nga kʼoakuitso Jeobá nga tsín tikʼuínyasonñá je Énle. Kjoaʼaxin jmeni xi chonle sonʼnde je Na̱i kʼoa ʼndenaxó sikao sonʼnde. Tonga nga kjesa kʼoamajin, chjénngiaa je choa̱le Noé kao je choʼndale Niná xi kixi tjíofitʼale nga tsín tjíobájñále nga tjíotsoyason. Kui ngisa kʼoailee kjoandosin nga kʼuínyasoán, tsejta katamaa, kʼoa katamakjainná xi tʼatsʼe Jeobá kao jmeni xi tongini tso. w20.09 13 párr. 18, 19

Tsa tsínlani ʼyale ʼyáni xi xá kjinele alikuijin nda kuiyoaa. Tobʼelañá, alikuijin jchale ʼyáni xi tjínnele kʼoakuitso jmeni xi koa̱n kʼoa aliʼyajin xi koandiaa títjon nga sitjoson. Tsa nʼiolani ndasʼin tjínndajinle je Jeobá, ánni nga nʼio nkjín chjota xi totaon beni je yánchjín. Kuinga tsínkui kjoatéxomale Jeobá fitjenngi josʼin bándiaale je familiale, kʼoa tokui fini josʼin ngale je chjota jñani tsʼe. Kʼoa tjínkʼa je chjota xi totaon be je yánchjínle nga̱ nʼio xʼin bʼasje yaole. Tsakui nichxin kʼoasʼin síkjaʼaitsjen nga tsín koa̱n kjoanʼio sʼinle je chjoónle nga tsjoake koa̱n, tonga básjaile josʼín nga katatsokjón. Kʼoa nga tsokjón je chjoón jeto kʼoasíkao josʼin mele. Je chjota xi kʼoasʼin síkjaʼaitsjen kʼoa xi kʼoasíkao je yánchjín alikui bakóle kjoaxkóntokon xi bakinle je chjoón kʼoa kontra bʼejnale josʼin mele je Jeobá (Efes. 5:25, 28). w21.02 3 párr. 6, 7

Nda sʼe̱ tokuin tsa kjitʼa kʼoétsʼoalai je Jeobá kʼianga kui nikjáojin je kjoa xi tjínli. Kjuinrʼoéli nga kʼoétsʼoalai kʼoa tsjoáli “je kjoanyʼántakonle Niná xi ñaki faʼatole ngayije kjoafaʼaitsjenle chjota” (Filip. 4:6, 7). Kui nganʼiotsjele Jeobá basenkaoná nga tsín nʼio nikjáojiaan (Gál. 5:22). Kʼianga kʼoétsʼoalai je Jeobá, tʼeyanajmílai jotjín ni̱ma̱li. Tʼinyakixilai je kjoa xi tijnajin kʼoa jotjín tokuin. Tsa ʼyai nga sʼe̱ndajin je kjoa xi tjínli, tijélai kjoachjine nga jchai josʼiain kʼoa tijélai nganʼio nga kʼoasʼiain josʼin kʼoéndajin. Kʼoa tsa tsín tijo koa̱n sʼianni nga sʼe̱ndajin je kjoa xi tjínli, tijélai je Jeobá nga katabasenkaoli nga tsín nʼio si̱kjáojin. Tsa kʼoakʼuínkixilai Niná jme xi makjáojinli, ngisaa ngotjo jchani josʼin koasenkaoli. Tsa tsín ndi̱to̱n jchai josʼin koasenkaoli je Jeobá, ali nikʼajenjinlai tokuin. Je Jeobá kui xi mele nga kʼoakʼuínkixilai jme xi makjáojinli, tonga kʼoati kui xi mele nga kjitʼa kʼoétsʼoalai (Luc. 11:8-10). w21.01 3 párr. 6, 7

Ya jinjtín tjío je ndsʼee xi jechixan kʼoa xi jetjínle xti. Tonga kʼoati tjío je ndsʼee kao tichjaa xi tjíotoje. Jósʼin jchatokoán je ndsʼee jebi. Kuenta sʼiaan josʼin kisikjaʼaitsjen Jesús tʼatsʼe xi tjíotoje. Kʼianga tsakʼejna i̱ Sonʼnde alikui chixan, tosaa kui ngisa kitsjoale kjoandosin nga kitsoyason. Alikuikʼia kʼoakitso tsa kjoanʼio tjínnele kuixan jngo chjotale Cristo kʼoa tsa mai. Tonga kʼoakitso nga tjínkʼa xi koa̱nmele toje koatio (Mat. 19:12). Je Jesús tsabexkón je xi tjíotoje, alikui kʼoasʼin kisikjaʼaitsjen nga ngisa nangi tjío tikʼoajinni xi jechixan kʼoa tsín kʼoakitso tsa tjín xi chale nga toje tsakatio. Joni Jesús, je pastro Pablo kʼoati tsín chixan. Tonga alikuikʼia kʼoakitso tsa chʼaotjín nga bixaan. Koanjinle nga ñá xi bixónñá tsa kuixaan kʼoa tsa mai. w20.08 28 párr. 7, 8

Nkjín nó tsakʼejna je Juan kʼoa nʼio nda kisixále Niná. Nʼio kisʼejna kjoamakjainle ningalani tse kjoa jaʼatojin. Tsakʼénele yaole nga kisitjoson jokitso je Jesús, jolani nga tjínnele tsjoacha koaan je ndsʼee. Kuinga tsakʼéjngoni kon nga tsjoake je Jeobá kao Jesús kʼoa nga je kuinyakao nga chókjoajinle tojme kjoa xi kjoaʼatojin (Juan 14:15-17; 15:10). Alikui jme xi tsakʼéchjoale je Juan nga tsakakóle kjoatsjoacha je ndsʼe̱, nijejinla Na̱i kʼoa nikuijinla jme xi chon sonʼnde. Tojo koanchon nichxinle Juan, kʼoati to kjoajticha tjín ndʼaibi, nga̱ jé Na̱i kjinentsja jmeni xi chon sonʼnde (1 Juan 3:1, 10). Je Na̱i kui xi mele nga tsín titsjoacha koa̱nñá je ndsʼee, tonga ñá xi kuixónñá josʼiaan. Kuinga machjénsíni nga tosi tonda tsjoacha katamaa je ndsʼee, kao jmeni xi bixoán kʼoa kao jmeni xi nʼia koakonilee nga tsjoachaa. Tsa kʼoasʼiaan, nʼio tsjoa sa̱tío tokoán nga ndsʼe chobá kʼoa nga naxinandále Jeobá tiyojiaan (1 Juan 4:7). w21.01 13 párr. 18, 19

Nga je Na̱i kjinentsja jmeni xi chon sonʼnde ndʼaibi, kjoa bitjatojiaan kʼoa sakʼoa tsín ʼyaa jmeni xi nʼia (2 Tim. 3:1). Tonga alikui koa̱n nga yaoná kuinyaxkónlee nga̱ be je Jeobá jme kjoa xi bitjatojiaan. Kʼianga nganʼio machjénná, kʼoatsoná je Jeobá nga je koasenkaoná (Is. 41:10, 13). Alikui jao tjínná nga tsjoánganʼioná je Jeobá, kʼoa je Biblia koasenkaoná nga chókjoajinná je kjoa xi bitjatojiaan. Je video, audiodrama xi ya Biblia yʼangini kao libro Xi bakóyana je Biblia ʼmi, nda tsoyaná tʼatsʼe choʼndale Niná xi tsakatio nichxin kjoatse. Nga kjesa noʼyajinlee je audiodrama, nga kjesa chotsenjinlee je video kʼoa nga kjesa bʼexkiajián je libro, kʼoakʼuínlee je Jeobá nga katabasenkaoná jósʼin kjuintjenngiaa je kjoafaʼaitsjen xi tsjoá. Kʼoasʼin cha̱niyaa jkoaa nga ñá xi kui kjoa tibitjatojiaan. Si̱kjaʼaitsjenjiaan jmeni xi kisʼin kʼoa josʼin tsakasenkao Jeobá. Xijekoa̱n, koanngíntjenngiaa je choa̱le. Kʼoailee kjoanda je Jeobá nga tíbasenkaoná. Kʼoa kʼoasʼin koakoñá nga bʼailee kjoanda kʼianga kuinyakoaa xi kjaʼaí. w21.03 19 párr. 22, 23

Jon xi jechixaon, tsa meno nga xti sʼe̱no, tikjaʼaitsjenjion jebi: “A nangitokon maa, a tsjoachañá je Jeobá kao Énle, kʼoa a ñá tíkjoejinná je Jeobá nga koa̱n si̱jchá jngo ʼndí” (Sal. 127:4). Kʼoa tsa jetjínná ʼndíxti, a ʼmiyalee ʼndíxtiná jokji chjíle nga nixá (Ecl. 3:12, 13). A nikuindañá je ʼndíxtiná nga tsín kjoa katatsaojin kʼoa nga tsínkui je che̱n xi batíobasen je Na̱i katatsaoya (Prov. 22:3). Ninga tsín kʼoakoa̱nná nga toñá si̱kuinda ʼndeʼndee, tonga koaan kʼuínyalee nga kui katafitjenngi je kjoafaʼaitsjen xi tsjoá Biblia (Prov. 2:1-6). Tobʼelañá, kʼiatsa jngo xíngiaa xi sikjinle je naxinandále Niná, ya Biblia chʼa̱ngiñá nga kʼuínyalee je ʼndíxtiná ánni nga nʼio chjínile nga kixi mangíntʼalee je Niná (Sal. 31:23). Kʼiatsa jngo xíngiaa kuiyá, koakolee jmeni xi tso Biblia xi kuinyakao nga chókjoajinle kʼoa nga nda sa̱tío kon (2 Cor. 1:3, 4; 2 Tim. 3:16). w20.10 27 párr. 7