Agosto

Jao koya xi nʼio chjíle síkʼaxki̱ versículo jebi. Xi títjon, je chjota xi kixi kjoa faʼatojin. Kʼoa xi majaoni, jé Jeobá basenkaoná. Jngo koya josʼin basenkaoná Jeobá kuinga majinná nga toxá kjoa kuitjátojinñá nichxin xi tiyoaa ndʼaibi. Je Jeobá kʼoatsoná nga tsjoa sa̱tío tokoán kʼiatsa je si̱xálee, tonga ʼyañá nga tojo kjoa kuitjátojiaan (Is. 66:14). Kui xi mele nga kui si̱kjaʼaitsjenjiaan josʼin kuiyoaa nichxin xi sʼa nroa, nga̱ kui xi mele nga nda kuiyoaa (2 Cor. 4:​16-18). Tonga tíbasenkaoná nichxin xi tiyoaa ndʼaibi nga chókjoajinná kjoa xi bitjatojiaan (Lam. 3:​22-24). Je choa̱le choʼndale Niná xi tsakatio nichxin kjoatse kao xi tjío ndʼaibi kui bakóná nga toxá kjoa bitjatojinñá. Tonga tsa je Jeobá si̱nʼiotʼaa jé koasenkaoná kʼianga kjoa kjoaʼaínená (Sal. 55:22). w23.04 14, 15 párr. 3, 4

Koaan chjénngilee jokisʼin je José kao María. Kisitjosonle chjotaxá ninga ñʼai koanle (Luc. 2:​1-6). Tobʼelañá, kʼianga jeñajanle sá nga yʼa ʼndí je María, je Augusto César xi tíbatéxoma nga kʼia, kʼoakitso nga jngo censo tjoé. Nga kisitjoson je José kao María yaa Belén ki. Jngo siento basenla kilómetro kjin ki. Chʼao chon ndiaa josʼin ki kʼoa je María alikui choa ñʼai koanle. Tsakui nichxin kui kisikjáojin je María kao José tsa jme xi koa̱nle je ʼndíle. Kʼoa tsakui koankjáojinleje̱ tsa ya jtsín ya yandiaa. Je ʼndí xi yʼa je María jé xi Mesías koa̱n nga koa̱nskanni. Ningalani nkjín koya tjínni jmeni xi ñʼai koanle, kisitjoson je kjoatéxoma jebi. Ningalani kisikjáojin je José kao María alikui kui tsakinyangini yaole nga tsín kisitjoson kjoatéxoma. Nga kisitjoson kisichikontʼain je Jeobá. Nda kicho je María ya Belén kʼoa nda kitsin je ʼndíle, kʼoa kʼoasʼin kitjoson je én xi tongini kinokjoa (Miq. 5:2). w23.10 8 párr. 9, 11; 9 párr. 12

Tsa nokjuin kʼianga kui nikjaʼaitsjain nga comentario k’oai kʼianga satíoná kjoajtín, koasenkaoli tsa tongini chótʼayajin jmeni xi faʼa (Prov. 21:5). Kʼianga nda jchai jme xi tínchja̱ni xi faʼa ya kjoajtín ngisaa choa ñʼai koa̱nli nga kʼoai comentarioli. Ijngo koya xi koasenkaoli kuinga tochoakjoan én kuinókjoai nga kʼoai comentarioli (Prov. 15:23; 17:27). Alikui nʼio kuijkuín tsa tochoa én kuinókjoai kʼoa tsa ñaki tsi én si̱chjain, kʼoa koakoní nga majinli jmeni xi tíchotʼayajin kʼoa nga nda tsakijnandai. Tsa jekʼoatinʼiai jotso kjoafaʼaitsjen jebi, tonga tsa tojo nokjuin kʼoa tsa tojngo jao kʼa bʼai comentarioli, kuenta tʼiain nga chjí be Jeobá nga tibʼenelai yaoli nga bʼai comentario (Luc. 21:​1-4). Tonga alikui kui koyale Jeobá nga tsʼatone kʼoakji kʼoasʼiain jokji tjen kʼoakoa̱nli (Filip. 4:5). Tikjaʼaitsjain jótjín comentario koa̱n kʼoai kʼoa tijélai Jeobá nga katabasenkaoli nga tsín nʼio kuinókjuin. Je xi títjon koa̱n sʼiain kuinga tochoakjoan én kuinókjoai nga kʼoai comentarioli. w23.04 21 párr. 6-8

Je pastro Pablo yaa kisingósonkaoná josʼín jngo sondado xi tjenyatokon tíjna, xi yʼa ngayeje jme xi machjénle. Kʼianga kjoajchán tjín, machjén nga kʼoéjnanda ngantsjai je sondado. Kʼoatisʼinni tsanda ñá, tsa tjínná kjoamakjain, kjoatsjoacha kao kjoachoya, yaa koakoñá nga tiyondaa nga tichoyalee je nichxinle Jeobá. Nga chingaki̱cha̱ tsakʼakjá je sondado tsakasenkao nga tsín flecha jaʼatosʼenjin ni̱ma̱le. Nga makjainná kʼoa nga bakoá kjoatsjoacha kʼoati basenkao ni̱ma̱ná. Basenkaoná nga tosi tonda je Jeobá nixálee kʼoa nga mangíntjenngilee je Jesús. Nga makjainná tjínjngoo tokoán nga je Niná tsjoále “chjíle je chjota xi nʼio básjai nga je” (Heb. 11:6). Kʼoati kui xi basenkaoná nga kixi mangíntʼalee je Jesús ninga tse kjoa bitjatojiaan. Xi koasenkaoná nga sa nʼio sa nʼio sʼe̱jna kjoamakjainná kʼoa nga chókjoajinná je kjoa xi kuitjátojiaan kuinga kuenta sʼiaan jméni xi tjíobinyakao je ndsʼee xi chjota tjíofitjenngike kʼoa xi ñʼai kjimale tao̱n. Kʼoa nga tsínkui si̱metokoán nga nʼio nkjín tsojmi sʼe̱ná, kuenta sʼiaan jotjíosʼín je ndsʼee xi tokjimanile josʼin tjío kʼoa xi kui xále Niná títjon tjíosíkatío. w23.06 10 párr. 8, 9

Jngo chjota xi kjoéxkó yaole male síkuinda kjoafaʼaitsjenle kao jmeni xi sʼín. Kʼoa jebi basenkaoná nga kʼoanʼia jme xi tjínndajinná ninga ñʼai kjimaná kʼoa tsa tsín tso tokoán nga kʼoasʼiaan. Nga maná chjoexkoá yaoná kui “kjoanda xi tsjoájin ni̱ma̱ná je espíritu santo”. Tsa si̱jélee nganʼiotsjele Jeobá kui xi koasenkaoná nga koa̱nná chjoéxkoá yaoná (Luc. 11:13; Gál. 5:​22, 23). Alikuijin choyalai nga kʼia kʼoasʼiain nga nda kuijnai. Nga̱ alikuijinkʼia nda kuiyoaa nichxin xi tiyoaa ndʼaibi. Tsa kʼoakuixoán nga kʼia kʼoasʼiaan nga nda kuiyoaa, alikuijinkʼia kuichotjenngiaa jme xi tjínndajinná. Sakʼoajin tsín kuitso tokoán nga kʼoasʼiaan jmeni xi tjínndajinná tsa kʼoasʼin si̱kjaʼaitsjeen nga tsín kuitjosonná. Tsa kʼoakjimai koaan tochoa choa kʼoasʼiain jmeni xi tjínndajinli ánni nga kuitjosonnili. Tobʼelañá, tsakui xi meli nga si̱ndayasai yaoli, koaan tochoa choa kʼoasʼiain. Kʼoa tsakui xi meli nga kʼoéxkiai ngakjijngo Biblia koaan kʼoasʼin kʼoéndajin nga tochoa choa kʼoéxkiai. w23.05 29 párr. 11-13

Je Jeobá jé naxinandále tísíchjén nga títsjoáná jmeni xi machjénná nga tosi tonda ya kuitsomayaa je ndiaa xi tsje (Is. 35:8; 48:17; 60:17). Kʼianga jngo chjota kotʼaya Biblia joxi tsoyanile nga kʼia bʼétsʼiakao nga fiya je “Ndiaa Tsje”. Tjínkʼa xi tochoatse nga ya bʼetsomaya, kʼoa tjínkʼa xi kʼoatjío kon nga ya kʼoétsomaya saʼnda nga kuicho jñani tjíofi. Jñáni tjíofi. Je xi ya ngʼajmi tjínle kjoachoya kui xi tsonile nga ya ngʼajmi kuichokao je “Ndiaa Tsje” xi tjíofiya (Apoc. 2:7). Kʼoa je xi i̱ Sonʼnde koyale koatio, je ndiaa xi tjíofiya yaa saʼnda kuichokao nga jekjoetʼa xi jngo jmi nó koatexoma je Cristo kʼianga jechjotatsje koa̱n ngatsʼi chjota. Kʼiatsa ya tiʼmiyai ndiaa jebi, ali yándsʼinjin chotsenni. Tosi tonda ya tʼinyai saʼnda nga kjoaʼaí sonʼnde chjotse. w23.05 17 párr. 15, 16; 19 párr. 17, 18

Tsa si̱kjaʼaitsjenjin josʼin tíbasenkaoli Jeobá kʼoaijinlai kjoanda kʼoa kʼoaitʼajinlai yaoli (Sal. 116:​12-14). Je Biblia kʼoatso nga tʼatsʼe Jeobá nroani ngayeje xi ndatjín (Sant. 1:17). Je kjoatjao xi ngisa chjíle xi kitsjoaná Jeobá kuinga kisikasén ʼNdíle nga tsakʼéchjíntjainá. Nga kʼoakisʼin Niná koaan miyole koaan kʼoa koaan kuiyoaa ngantsjai nichxin (1 Juan 4:​9, 10). Kʼianga kʼoaitʼalai yaoli Niná kʼoasʼin kʼoainilai kjoanda jme xi kisʼin xi tʼatsi (Deut. 16:17; 2 Cor. 5:15). w24.03 5 párr. 8

Kʼianga ʼyaa josʼin fikao yaole ndʼaibi chjota kʼoasʼe tokoán jokisʼe kon je Lot, jngo chjota xi kixi kitʼale Niná. Aon koanle nga nʼio chʼao kisʼin je chjotatsʼen nga̱ bení nga tsín sasénle Niná nga kʼoasʼín (2 Ped. 2:​7, 8). Nga tsjoake koan Jeobá kʼoa nga tsabexkón, alikui kisasenle nga kisichajngi je chjota. Kʼoati chon nichxin xi tiyoaa ndʼaibi, je chjota alikui bexkón kjoatéxomale Niná. Tonga tsa ʼyaxkoán je Niná kʼoa tsa nokjonchá tsje kjuinkoaa yaoná. Nga mele Jeobá nga tsje kjuinkoaa yaoná, basenkaoná kʼoa kui xá tsakʼétʼaxo̱nni jmeni xi tso libro xi tsʼe Proverbios. Ngatsʼiaa xi chjotale Cristo maa basenkaoná jmeni xi tso libro jebi, basenkao xi xʼin, xi yánchjín, xti kao xi jejchínga. Je chjota xi tsokjónke Jeobá, alikui totjín totjenni kjoa xi bʼangini yaole nga kui kʼoasʼín xi chʼaotjín. w23.06 20 párr. 1, 2; 21 párr. 5

Tsakui nichxin batiochjoaná je xíngiaa nga Énle Niná chotʼayá kʼoa tsa tokjimanináje̱ josʼin tiyoaa nga xále Niná títjon tinikʼéjnaa (Mat. 6:33). Kʼiatsa kʼoakjimai, tikjaʼaitsjenjin nga kuenta sʼín Jeobá jmeni xi tinʼiai nga je tinixálai (Heb. 6:10). Kʼoajinti tiʼyai nga kʼoatjín jmeni xi kitso Jesús, nga i̱ kitso: “Niʼyajin xi tjín xi kisikʼéjna niʼyale, axo ndsʼe̱, axo ndichja, axo nʼaile, axo na̱le, axo chjoónle, axo xtile, axo nangile, xi totʼatsʼan, xi totʼatsʼe je énndana, xi tsín ndʼaibi nga je nichxinbi ngisa nkjín ya kʼoatjín kʼoaile niʼyale, kao ndsʼe̱, kao ndichja, kao na̱le, kao xtile, kao nangile, kʼoa kao kjoañʼai, kʼoa kʼia nichxin xi kjoaʼaí sʼeele kjoabijnachon ngantsjai” (Mar. 10:​29, 30). Ngisajin tse kjoanichikontʼain tísokóli tikʼoajinni xi tinikʼéjnai nga je Jeobá tinixálai (Sal. 37:4). w24.03 9 párr. 5

Kʼianga kisʼejinle je jtín xi tíjna ya Antioquía de Siria nga kjinrá tjíofaʼá je chjotale Cristo xi Judea tsʼe, kisikasénle tsojmi xi koanchjénle kʼoa kitsjoa jotjín kʼoakoanle nga jngó jngó (Hech. 11:​27-30). Je chjotale Cristo xi Antioquía de Siria tsʼe kikaole tsojmi je chjotale Cristo xi Judea tsakatio ningalani kjintʼa tsʼe (1 Juan 3:​17, 18). Kʼianga sʼejinná nga ñʼai sʼin tjío je ndsʼee kʼoati koa̱n kuinyakoaa. Tobʼelañá, koaan kjitʼanangi kʼoakʼuínlee je xi chjotajchínga sʼin tjío nga mená kʼoainganʼioá, koaan koatioá tao̱n ya jtín jñani mangián nga kʼoainganʼioá je xá xi kjima jngo tjíjtsa Sonʼnde, kʼoa koaan kʼoétsʼoantjé je ndsʼee. Tsakui nichxin ñʼai koa̱nle ndsʼee nga so̱kole tsojmi xi koa̱nchjénle. Tsjoajin sa̱tío tokoán nga tibinyakoaa je ndsʼee kʼianga kjoaʼaí Jesús nga kʼoendajinle kjoa je chjota, nga̱ i̱ kuitsoná: “Chjoékjoatjao je kjoatéxoma xi tíjnanda xi tʼatsaon” (Mat. 25:​34-40). w23.07 4 párr. 9, 10; 6 párr. 12

Kʼianga jaʼai Jesús i̱ Sonʼnde tsakakó nga kʼoati kosonnile josʼín joni Jeobá. Ninga kui xá kinikasénni nga je chjota israelita kuitsoyasonle Énle Niná, tsakasenkao jngo chjoón xi tsín chjota israelita kitjenni. Chjoón jebi kʼoakitsole Jesús nga katasíndaya tsotiʼndíle nga sénnichxin xi chʼaokjoan tíjnajinle. Je Jesús koanmake kʼoa kisindaya tsotiʼndíle chjoón jebi (Mat. 15:​21-28). Ijngola choa̱ kataʼyaa jokisʼin je Jesús. Kʼianga jejaʼato choatse nga títsoyason i kitso: “Toʼyanibe xi kuitso ngixko̱n chjota nga tsín tsʼan, kʼoati an kʼoaxián nga tsín tsʼan” (Mat. 10:33). Je Jesús alikui tsakʼasjengi je Pedro ninga jan kʼa kʼoakitso nga tsín bexkon. Koanjinle nga kʼoakoannile Pedro jmeni xi kitso kʼoa nga kixi tífitʼale je Niná. Kʼianga jejaʼáyanile Jesús kichokonle Pedro, tsakui nichxin kʼia kʼoakitsole nga jekisichatʼale kʼoa nga tsjoake (Luc. 24:​33, 34). Je Jeobá kao Jesús kosonnile josʼín. Je Jeobá kui xi mele nga kʼoati sʼiaan tsanda ñá. w23.07 21, 22 párr. 6, 7

Nkjín koya jmeni xi bʼéjngo tokoán nga ʼndenaxó koa̱n Sonʼnde. Jósʼin kuinyakoaa xi kjaʼaí nga kʼoati sʼe̱jngo kon nga sitjoson Niná jmeni xi tso. Xi títjon, koaan kʼoakʼuínlee nga jesoa Jeobá xi kʼoatso nga kʼoakoa̱n. Ya Apocalipsis itso: “Je xi tíjnason yáxile, kitso: Koeni an sichjotse ngayije”. Je Jeobá tíjnandaa nga sitjoson jmeni xi tso, tjínle kjoachjine kao nganʼio nga kʼoasʼin. Xi majaoni, ñaki tjínjngoo kon Jeobá nga kuitjoson énle, kuinga i̱ tsoni: “Je énbi ndaní, kʼoa kjoakixiní”. Kʼoa itsosa: “Jekʼoakisʼe”, xi tsonile, jekitjoson. Kʼoa xi majanni, síkjetʼa Jeobá jmeni xi bʼétsʼiakao. Kuinga i̱ tsoni: “An nía je Alfa kʼoa je Omega” (Apoc. 21:6). Je Jeobá koako nga ndiso je Na̱i kʼoa nga tsín bitjoson jmeni xi tso. Kʼianga kʼoakuitsoná chjota nga tsínkʼia kʼoakoa̱n jotso Apocalipsis 21:​4, koaan koakoyalee jmeni xi tso Apocalipsis 21:​5, 6. Kʼoakʼuínlee nga ya mangóson jebi joni tsa jngo xo̱n tísʼín firma Jeobá nga kʼoatso nga sitjoson je énle (Is. 65:16). w23.11 7 párr. 18, 19

Kʼianga kʼoakitsole Jeobá én jebi je Abrahán jejankan kao xjaʼaon nóle kʼoa nijngojin xti tjínle. Tochoa tsabe Abrahán josʼin kitjoson jmeni xi tsakʼinle. Kʼianga jejaʼatojin xo̱ngá Éufrates 25 nó jaʼato kʼoa kʼiaa kitsin je Isaac, kʼoa 60 nó koanskanni kʼiaa kitsin je xtindaile xi Esaú kao xi Jacob tsakʼin (Heb. 6:15). Tonga tsín tsabe nga jngo naxinandá koanni je ntje̱le, kʼoa tsín kicho ya ʼNde jña tsakʼinle nga kʼoaile. Ninga kʼoalani, nʼio miyole koan Jeobá (Sant. 2:23). Nʼiojin tsjoa sʼe̱ kon je Abrahán nga jekjoaʼáyanile kʼianga sʼe̱jinle nga koanchikontʼain je naxinandá xi totʼatsʼe nga koankjainle kʼoa nga tsejta koan (Gén. 22:18). Jmé xi bakóyaná jebi. Tsakui nichxin tsínkjoan jchaa josʼin kuitjoson ndʼaibi jmeni xi tso je Jeobá, tonga tsa tsejta koaan joni Abrahán, je Jeobá sichikontʼainná ndʼaibi kao nichxin xi sʼa nroa kʼianga jeʼndenaxó koa̱n (Mar. 10:​29, 30). w23.08 24 párr. 14

Nga sʼa xti je rey Uzías nangitokon koan kʼoa tsabexkón je Niná, kʼoa 68 nó tsakʼéjna. Jokjitse nga nda kisʼin kisichikontʼain Jeobá (2 Crón. 26:​1-4). Nkjín naxinandá kisikinjele nga ki kjoajchán kʼoa nda kisikuinda naxinandá Jerusalén (2 Crón. 26:​6-15). Nʼiojin nda kisʼe kon je Uzías nga nda kichomani nga je Jeobá tsakasenkao (Ecl. 3:​12, 13). Nga rey sʼin tíjna Uzías, tsakui nichxin kʼoasʼin kisikjaʼaitsjen nga koa̱n kʼoasʼin tojmeni xi mele. Ñandia nga xongó kichokaká ya sonxta, tonga tsín tjínnele je kʼoasʼin tsakai (2 Crón. 26:​16-18). Kʼoa nʼio jti koanle nga tsakatekjáyale je naʼmitítjon Azarías. Chʼao kisʼin je Uzías kʼoa je Jeobá kjoañʼai kitsjoale, jtsé tsakajon yaole (2 Crón. 26:​19-21). Alikuijin kʼoakoan tsa tosi tonda nangitokon koan. w23.09 10 párr. 9, 10

Ningalani jetsakʼaile nganʼiotsjele Niná, je Pedro tojo ñʼai koan sakʼoale. Kʼianga nó 36, je Pedro tsabe nga tsakʼaile nganʼiotsjele Niná je xi Cornelio ʼmi, xi tsín chjota judío ma. Kʼoasʼin tsaʼyanile nga tsín ʼya xi faʼájin Niná kʼoa nga koa̱n koatiojin naxinandále toʼya chjotani (Hech. 10:​34, 44, 45). Saʼnda nga kui nichxin, je Pedro jetsakjenkao chjota xi tsín chjota judío, nga̱ tsín kʼoasʼín tsakai. Tjínkʼa chjotale Cristo xi chjota judío xi kʼoasʼin kisikjaʼaitsjen nga tsín koa̱n ya koakjenkao chjota xi xin naxinandále. Ñandia nga ya tíkjenkao Pedro chjotale Cristo xi xin naxinandále ya Antioquía, tonga tsín tiya tsakjenkaoni kʼianga kicho je chjotale Cristo xi chjota judío, nga̱ kʼoasʼin kisikjaʼaitsjen nga tsín nda sa̱tío kon. Kʼianga tsabe Pablo nga kʼoakisʼin je Pedro kiskankao (Gál. 2:​13, 14). Ningalani chʼao kisʼin nga kʼia, je Pedro tosi tonda kisixále Niná. w23.09 22 párr. 8

Tsa jñasani chali nga si̱ndayai yaoli kuenta tʼiain nga nʼio nda chjota je Nainá kʼoa nga je koasenkaoli (1 Ped. 2:3). Je Pedro i kitso: “Je soa Niná sindayano, sikʼéjnandano”. Ñandia nga kʼoakitso Pedro nga tsín bakinle nga ya koase̱njna ngixko̱n ʼNdíle Niná (Luc. 5:8). Tonga nga jekoanni nda kisixále Niná, nga̱ je Jeobá kao Jesús tsjoake koan kʼoa jé tsakinyakao. Kuinga kitjoʼndenile nga jaʼasʼenjin “kao kjoajeya je kjoatéxomantsjaile Jesucristo xi Nainá kʼoa xi tsakʼasjentjainá” (2 Ped. 1:11). Nʼio tse kjoanda tsakʼaile Pedro. Tsa tosi tonda je Jeobá si̱xálai kʼoa tsa kʼoaiʼndai nga je sindayali, kʼoati tjoéli kjoanda nga koa̱n kuijnai ngantsjai nichxin. Kʼoa kuitjoson je én jebi, xi tso: “Kui nga makjainno sʼe̱no kjoabitjontjai tʼatsʼe ni̱ma̱no” (1 Ped. 1:9). w23.09 31 párr. 16, 17

Ya ndʼianajño jngo nditsin kisʼejna jñani kisʼenyʼoándai kʼoa jña kisixá je naʼmi. Ya nditsin jebi jngo sonxta kisʼejna xi ki̱cha̱ní koanndani jñani kisaka je cho̱, kʼoati kisʼejna jngo xjoa̱ jñani kixinya nandá nga tsakanéjon ntsja je naʼmi kʼianga kjesa sítjosonjin je xále (Éx. 30:​17-20; 40:​6-8). Je chjotale Cristo xi ya ngʼajmi tjínle kjoachoya xi i̱ Sonʼnde tjíosa, kixi tjíofitʼale Niná kʼoa kui xi tsonile nga ya tjíosíxá ya nditsin jña kisixá naʼmi. Je nandá xi kisʼejna ya ndʼianajño kao ya yo̱ngo̱ kui bakóyale ngatsʼi chjotale Cristo nga tjínnele tsje koaikao yaole, kʼoa nga tsje sʼin skoe̱xkón je Niná. Kʼoa jñáni bexkón Niná je chjotankjín. Je pastro Juan jngo sén kisakole jñani tsabe je chjotankjín nga ya tjío “ngixko̱n je yáxilele Niná. Kʼoasʼin síxále nga nichxin kao nga nitje̱n” i̱ Sonʼnde, xi tsonile, nga ya síxá nditsin jñani koan kicho je chjota israelita (Apoc. 7:​9, 13-15). Tsjoa sʼe tokoán nga ma ʼyaxkoán je Jeobá ngatsʼiaa ya yo̱ngo̱ xi tíjnale. w23.10 28, 29 párr. 15, 16

Jé xi chjotajchínga sʼin tjío síchjén Jeobá nga binyakaoná (Is. 32:​1, 2). Kʼoéyanajmílee ndsʼee jebi tsa jme xi makjáojinná kʼoa kʼoaiʼndelee kʼiatsa tsjoánganʼioná. Kʼoati tsjoánganʼioná je kjoachoya xi tsjoáná Biblia nga koa̱n kuiyoaa ngantsjai nichxin, tsa ya ngʼajmi tjínná kjoachoya kʼoa tsa i̱ Sonʼnde nga jeʼndenaxó koa̱n (Rom. 4:​3, 18, 19). Je kjoachoya xi tjínná basenkaoná nga chókjoajinná je kjoa xi bitjatojiaan, nga ʼmiyasoán je Énle Niná kʼoa nga bitjosonná je xá xi kjinená ya jinjtín (1 Tes. 1:3). Kitsjoanganʼiole je pastro Pablo nga kui kjoachoya jebi kisʼele. Kʼoakitso nga totaon tsaʼya, nga chjota kitjenngike, nga kisatele, sakʼoa tsín tsabe jokisʼin, kʼoa nkjín kʼa me kinikʼien (2 Cor. 4:​8-10). Kʼianga kui kisikjaʼaitsjenjin Pablo je kjoachoya xi kisʼele kui xi tsakasenkao nga kichokjoajinle kʼianga kjoa jaʼatojin (2 Cor. 4:​16-18). Tosaa kui kisikjaʼaitsjenjin nga ya ngʼajmi koai. Ngisaa kitjonganʼiole Pablo nga kui kisikjaʼaitsjenjin kjoachoya xi kisʼele. w23.10 15, 16 párr. 14-17

Kʼianga bʼetsʼoalee Jeobá si̱kjaʼaitsjenjiaan jebi: “Jótso Jeobá, a ndʼaikjoán machjénna jmeni xi tisijéle”. Sakʼoa kui xi mená nga ndi̱to̱n kʼoakatama jmeni xi nijé, tonga jé Jeobá xi ngisa nda be kʼiáni machjén nga koasenkaoná (Heb. 4:16). Tsa tsín ndi̱to̱n tsjoáná Jeobá jme xi nijélee, tsakui nichxin kʼoasʼin si̱kjaʼaitsjeen nga tsín nrʼoéná. Je Jeobá basenkaoná ngantsjai, tonga tsakui nichxin i̱ni títsoná: “Kjesa choa̱lejin”. Si̱kjaʼaitsjenla jngo ti xi kui kisijéle Jeobá nga katamandaya nga chʼin tjínle. Tsa kisindayalani Jeobá ti jebi, kʼoajin kitso je Na̱i nga tokui nga koanndayani nga je Jeobá tísíxánile (Job 1:​9-11; 2:4). Je Jeobá jebe kʼiáni nga kjoaʼaxin je chʼin (Is. 33:24; Apoc. 21:​3, 4). Kuinga ʼyañá nga tsín tokjitʼanangi tjóxinná ndʼaibi kʼiatsa chʼin tjínná. Jmé xi koa̱n kuitso ti xi kanikʼaxkiaa kʼianga kʼoetsʼoa. Koaan kui sijéle Jeobá nga katachókjoajinle nga chʼin tjínle kʼoa nga tosi tonda kixi koaitʼale. w23.11 23 párr. 13

Ningalani nʼio chʼao kisʼin je Sansón, tojo kui xi koanmele nga sikjeson je chjota filisteo nga̱ jé Jeobá xi kui xá tsakánele (Juec. 16:​28-30). Je Sansón tsakʼétsʼoale Jeobá kʼoa kʼoakitsole nga katabasenkao nga sikjeson je chjota filisteo. Je Jeobá kinrʼoéle kʼoa kitsjoa ijngokʼale nganʼio. Nga kʼia, ngisaa nkjín chjota filisteo kisikjeson tikʼoajinni jotjín kisikʼien jokjitse tsakʼejna. Ningalani tse kjoañʼai tsakjaʼá Sansón nga chʼao kisʼin, tosi tonda kui kʼoakisʼin jmeni xi mele Jeobá. Kʼoatisʼinni tsanda ñá, tosi tonda kui kʼoasʼiaan jmeni xi mele Jeobá. Tsa kuichákjáyaná jñani tsín nda sʼiaan kʼoa tsa si̱chaa je xá xi tjínná jinnaxinandále Niná. Je Jeobá alikui kʼoasʼin síkjaʼaitsjen nga tsínkʼia tikoa̱nndayañá (Sal. 103:​8, 9). Ningalani sakʼoa tsín nda sʼiaan, je Jeobá tojo sichjénná nga kuitjoson josʼin mele, tojo koan je Sansón. w23.09 6 párr. 15, 16

Nga tjínná kjoatsejta nda biyoaa ngixko̱n Niná. Alikui xi tsonile nga tsjoa sʼe kon Niná nga kjoa bitjatojiaan, kuinga tsjoa sʼeni kon nga chókjoajinná. Nda sʼe tokoán nga ʼyaa nga tsjoa sʼe kon Niná kʼianga kaná je kjoa xi bitjatojiaan (Sal. 5:12). Si̱kjaʼaitsjenjinla jokoan Abrahán. Nga kichokjoajinle je kjoa xi jaʼatojin ndasʼin tsakʼejna ngixko̱n Niná. Je Jeobá miyole sʼin tsabekon kʼoa chjotakixi sʼin tsabekon (Gén. 15:6; Rom. 4:​13, 22). Tikʼoasʼinni, kʼianga nda kuiyoaa ngixko̱n Niná ali tsakuijin xi kuitsoni josʼin tinixálee kʼoa tsa jme xá tjínná jinnaxinandále. Xi ngisa chjíle kuinga kixi koanngíntʼalee kʼoa nga chókjoajinná je kjoa xi bitjatojiaan. Koaanná kʼoasʼiaan jebi ninga sʼa xtiaa kʼoa ninga jetjínná nó, tojosʼin tinijchá yaoná kʼoa ninga nkjín koya jmeni xi maná nʼia. Kʼiatsa jme kjoa tibitjatojiaan kuenta sʼiaan nga nda kuiyoaa ngixko̱n Niná kʼiatsa kixi koanngíntʼalee. Kʼianga ʼyaa nga tsjoa tjín kon Jeobá xi tʼatsaan ñaki sʼejngo tokoán nga kuitjoson jmeni xi choyalee. w23.12 11 párr. 13, 14

Nʼio machjén nga koa̱nle nda kuinyaño je ndsʼee kʼianga ʼya xi fákaonajmí kʼoa nga sijinle yaole jótjín kon je chjota (Prov. 20:5). Nga jchai josʼin síkjaʼaitsjen chjota, kuenta tʼiain jotítso nga tínchja̱, josʼín kʼoa joba nkjaín. Tsa to correo kʼoa tsa to mensaje nikasáin ngisajin ñʼai koa̱nli nga jchai josʼín nga nchja̱ je chjota. Tongisa nda nga ñaki tiʼyaa je chjota nga tichjakaonajmiá (2 Juan 12). Jngo xi jetjínle kjoafaʼaitsjen básjaile jme xá xi sʼín nga bajngiʼa yaole kʼoa nga bajngiʼa familiale (1 Tim. 5:8). Ndatjín nga koa̱nli si̱xái nga̱ kui xi koasenkaoli nga kuijnyíʼai yaoli (Hech. 18:​2, 3; 20:34; Efes. 4:28). Tʼenelai yaoli nga nda tixái. Tsa kʼoasʼiain, so̱koxáli kʼoa nda kʼoaxki̱. w23.12 27 párr. 12, 13

Kʼianga nichxinle Jeobá tso je Biblia kui nchja̱ni nichxin nga sikjeson kontrale kʼoa nga kʼoasjentjai naxinandále. Nichxin kjoatse, tjínkʼa naxinandá xi kisikjeson Jeobá (Is. 13:​1, 6; Ezeq. 13:5; Sof. 1:8). Je nichxinle Jeobá jeme kjoaʼaí. Kʼiaa koaitsʼiani nga ni̱kjeson religión ndiso kʼoa kʼiaa kjoetʼani nga kjoaʼaí Armagedón. Machjén nga tongini kuiyondaa tsa mená nga kuitjontjailee yaoná. Je Jesús kʼoakitso nga ntsjaintsjai kuiyondalee je kjoañʼai xi nʼio tse (Mat. 24:21; Luc. 12:40). Tojo tso ya 1 Tesalonicenses, je Pablo nkjín choa̱ kisichjén xi kisingósonkao jokoa̱n nga kjoaʼaí nichxinle Jeobá xi kuinyakaoná nga kuiyondalee nichxin jebi. Je Pablo koanjinle nga tsesa cha nga sikjeson Jeobá je kontrale (2 Tes. 2:​1-3). Tonga kʼoakitsole je chjotale Cristo nga tjínnele koationda joni tsa jenʼio chrian tíjna nichxinle Jeobá. Machjén nga kʼoati kjuintjenngiaa kjoafaʼaitsjen jebi. w23.06 8 párr. 1, 2

Kʼianga jetífikjetʼa nó 1970, kʼiaa kisʼenda jngo ndʼia xi 60 piso tjínle ya Tokio, (Japón). Je chjota kui kisikjaʼaitsjen tsa chókjoale ndʼia jebi kʼianga cháon kjoaʼa. Tonga ndʼia jebi likui jme xi koanle nga jaʼa cháon. Ánni. Je chjota kʼoasʼin tsakʼénda nga tsín kuixojen kʼoa nga tokuindíya kʼianga cháon kjoaʼa. Ñá xi chjotale Cristo maa yaa mangósoán ndʼia jebi. Ánni kʼoabixónsíñá. Ñá xi Jeobá nixálee kixi mangíntʼalee ninga tse kjoa bitjatojiaan. Tobʼelañá, nitjosonñá ngantsjai je kjoatéxomale. Tsín koa̱n kuitjátoné jmeni xi tsoná, tonga kʼoati alikui koa̱n si̱kʼatoné choa̱le jmeni xi sʼiaan (Sant. 3:17). Kʼiatsa kʼoasʼiaan alikuijin si̱kʼatoné choa̱le josʼin si̱kjaʼaitsjeen. w23.07 14 párr. 1, 2

Kʼoati tsakʼetʼale Na̱i je Jesús nga̱ kui xi koanmele nga katabajngijée kʼoa nga tsín kixi katafitʼale Niná (Mat. 4:​1-11). Je Na̱i kui xi koanmele nga katabajngijée Jesús ánni nga tsín koa̱n kʼoechjíntjaininá. Kʼianga kitsoyason Jesús kʼoati tse kjoa jaʼatojin. Tobʼelañá, je chjotakontrale kitjenngike kʼoa kʼoakitso nga sikʼien (Luc. 4:​28, 29; 13:31). Kʼoati kiskale jñani tsín nda kisʼin je chjotatjenngile (Mar. 9:​33, 34). Kʼianga kinijtsoʼa totaon tsaʼya kʼoa tsaʼyasin. Tsee kjoañʼai kinikjaʼá nga kinikʼien nga̱ jo chjotaché kinikao (Heb. 12:​1-3). Kʼianga tojeme kuiyá, je Jeobá tsakʼasjexinle nganʼiole, kʼoa totsʼee nganʼio kisichjén nga kichokjoajinle (Mat. 27:46). Nʼio tse kjoañʼai tsakjaʼá Jesús nga tsakʼéchjíntjainá. Kʼianga nikjaʼaitsjenjiaan jokji kjoañʼai tsakjaʼá xi totʼatsaan ngisaa tsjoacha maa. w24.01 10, 11 párr. 7-9

Nga tsejta maa basenkaoná nga nda mangínkoaa xíngiaa kʼoa nda binyañolee kʼianga fákaonajmíná (Sant. 1:19). Nga kʼoanʼia nda mangínkoaa xíngiaa. Kʼiatsa tsín sin tjín tokoán alikui toxkia nokjoaa, alikui xitso xiská kʼoanʼia tsa jmeni, alikui tokjoán yaoná nijtilee kʼoa tsín nijndangajaoñá tsa ʼya xi jokuitsoná kʼoa tsa josikaoná. Tosaa tsejta maa kʼoa nichatʼalee xíngiaa (Col. 3:12). Nga tsejta maa nda chjoejiaan jmeni xi nʼia. Kʼianga jme xi chjoejiaan alikui xitso xiská kʼoanʼia, tosaa nikʼayaa nichxin nga fasjaiyaa jmeni xi sʼiaan. Tobʼelañá, tsa xá tifasjee tsakui nichxin tokjoan kui chjoé je xá xi kʼoaitʼaná. Tonga tsa tsejtaa, títjonjinkjoanla kjoásjaiyaa jñani kjuinni̱xá, jmé xá xi sʼiaan, kʼoa tsa ya si̱xá kuijin kuenta sʼiaan jósʼin kuiyoaa kao familianá kʼoa kao Jeobá. Kʼiatsa tsejtaa koasenkaoná nga kui chjoéjiaan xi ndatjín. w23.08 22 párr. 8, 9

Sakʼoa tsín nda satío tokoán nga chjotajée maa kʼoa nga kjitʼa kui bixkantʼakoaa xi chʼaotjín nimetokoán. Tonga tsakui si̱kjaʼaitsjeen jotsakʼinlee Jeobá nga tsakʼaitʼalee yaoná koasenkaoná nga tsínkui kʼoasʼiaan xi chʼaotjín. Ánni nga kʼoabixónsíñá. Kʼianga bʼaitʼalee yaoná Jeobá joxi njiotokonñá yaoná, xi tsonile, tsín tikui kʼoanʼiañá jmeni xi chʼaotjín símetokon yaoná (Mat. 16:24). Kʼianga kui sʼejnabasenná xi chʼaotjín alikuila tsakui nikjaʼaitsjeen jósʼiaan, nga̱ jeʼyaa nga tjínnele kixi koanngíntʼalee Jeobá. Kʼianga tsakʼaitʼalee yaoná kʼoatsakʼinlee nga tsínkui xi chʼaotjín kʼoasʼiaan, nga̱ kui xi mená nga tsjoa kʼoé kon je Jeobá. Kʼoati kuixoán jokitso je Job, ninga tse kjoa jaʼatojin kʼoakitso nga kixi koa̱n (Job 27:5). w24.03 9 párr. 6, 7

Niná “xi tsʼe kjoatjaocha” je Jeobá (2 Cor. 13:11). Mandosinle xi tʼatsaan nga jngó jngoá. Tjínjngoo tokoán nga bakóná “xi ñaki kjoatsjoacha” (Sal. 32:10). Kʼianga si̱kjaʼaitsjenjiaan josʼin bakóná nga tsjoakená, ngisasa nda jchaa josʼin síkuindaná kʼoa ngisaa koa̱nchriantʼalee. Kuinga koa̱n kʼoétsʼoanilee kʼoa kʼoakʼuínlee nga tosi tonda katabakóná kjoatsjoacha. Koaan kʼoéyanajmílee tojmeni xi makjáojinná, nga̱ majinle josʼe tokoán kʼoa mele koasenkaoná (Sal. 145:19). Nga tsjoakená je Jeobá yaa mangóson tojo ma je lʼí nga sísoná kʼianga nyʼán chon. Basenkaoná kʼianga kjoa bitjatojiaan, tsjoánganʼioná kʼoa nda satío tokoán. Kuinga koa̱n i̱ kuixónñá ngatsʼiaa: “Tsjoake̱ña je Jeobá” (Sal. 116:1). w24.01 31 párr. 19, 20

Je Jesús ali tsa tokʼoajin kitso nga Jeobá ʼmi Niná, nga̱ je chjota judío tokʼoa jebe je jaʼaínle Niná. Tosaa kui kitsoya jokjoan je Niná (Juan 1:​17, 18). Tobʼelañá, ya Escrituras Hebreas kʼoatso nga bakó kjoamatokon je Jeobá (Éx. 34:​5-7). Je Jesús kui choa̱ tʼatsʼe ti xi ki kisichjén nga kisijinle chjota josʼín je Jeobá nga bakó kjoamatokon. Je Jesús kʼoakitso nga tisʼa kjin nroani ti jebi nga kikʼáyandiaa je nʼaile kʼoa kisichatʼale. Choa̱ jebi kui tsoyaná nga kʼoati sʼín je Jeobá nga bakóná kjoamatokon (Luc. 15:​11-32). Je Jesús kitsoyale chjota nga koanjinle jokjoan je Jeobá. w24.02 10 párr. 8, 9

Nda sʼe tokoán nga sínʼiojinná je Jeobá kʼianga kjoa bitjatojiaan. Jméni xi koasenkaoná nga koakoá kjoamatokon kʼoa nga si̱nʼioá kon je xíngiaa tojo sʼín je Jeobá. Kuinga koa̱nná josʼin si̱nʼioá kon xíngiaa. Jméni xi koasenkaoná nga tosi tonda tsjoacha koaan xíngiaa kʼoa nga si̱nʼioá kon (1 Tes. 4:18). Kʼiaa nga si̱jinlee yaoná jotjío kon xíngiaa, nga tsjoacha koaan kʼoa nga koakolee kjoanda (Col. 3:12; 1 Pedro 3:8). Kʼianga bakolee kjoamatokon je ndsʼee binyakaoñá kʼianga kjoa faʼatojin. Je Jesús i kitso: “Xi nʼio tjínle ni̱ma̱ná, kui xi nchja̱ni ndsoʼbaa. Je xi nda chjota, kjoanda xi sʼín, nga̱ kjoanda tjínle ni̱ma̱le” (Mat. 12:​34, 35). Kʼianga ninʼioá kon je ndsʼee kʼoasʼin bakoñá nga tsjoachaa. w23.11 10 párr. 10, 11

Machjén nga tjín xi koasenkaoná nga koa̱njinná je én xi tongini kinokjoa. Jngola choa̱ kataʼyaa. Si̱kjaʼaitsjenjinla tsa ya kabichoaa jngo naxinandá jñani tsín ʼyaxkoaan, tonga tsa ya tjenkoaa jngo miyoná xi nʼio nda bexkon ʼnde jebi, kʼoajin kuitsoná jñani tiyoaa kʼoa jñáni bichókaoná nga jngó jngó ndiaa. Nʼiojin tsjoa sa̱tío tokoán nga ya tjenkaoná xi nda bexkon ʼnde jebi. Tikʼoasʼinni, je Jeobá nda be josʼin tiyoaa ndʼaibi kʼoa jméni xi koa̱n nichxin xi sʼa nroa. Nga koa̱njinná je én xi tongini kinokjoa machjén nga je Jeobá kʼoakʼuínlee nga katabasenkaoná (Dan. 2:28; 2 Ped. 1:​19, 20). Tojo sʼín jngo nʼai xi tsjoake ʼndíxtile, je Jeobá kui xi mele nga nda kuiyoaa nichxin xi sʼa nroa (Jer. 29:11). Je Jeobá nʼio nda be jmeni xi koa̱n nichxin xi sʼa nroa, kuinga koanmenile nga ya Biblia kisʼetʼa je én xi tongini kinokjoa ánni nga jchasíñá jmeni xi koa̱n nichxin xi sʼa nroa (Is. 46:10). w23.08 8, 9 párr. 3, 4