XI NGISA TÍNCHJA̱NI REBISTA JEBI: A TOYAA TJE̱N FETʼA NGA JEBIYAA

Jméni xi tjíosʼín chjota xi tʼatsʼe kjoabiya

Je kjoabiya kontraná mani kʼoa mená nga tjóʼaná yaoná. Kʼiatsa jngo xíngiaa kuiyá tsakui nichxin to nijñá tíbʼainá koa̱nná. Kʼoa tsa sʼa xtiaa, tsakui nichxin kʼoasʼin si̱kjaʼaitsjeen nga sʼa nʼio tse nichxin tíjnana, tonga je kjoabiya aliʼya xi síchatʼale, kjoanʼio bichótjennginá ninga tsín mená.

Tochoa mani chjota xi kʼoasikji síkjaʼaitsjen tʼatsʼe kjoabiya jokisʼin je xi faraón sʼin tsakatio ya Egipto. Je faraón me tokui xá kisʼin nga tsakásjai josʼin tjóʼale yaole xi tʼatsʼe kjoabiya, kʼoa nʼio nkjín jmi mani je choʼndale xi kʼoasʼin tsakʼénele nga tokui xá katasʼín. Je pirámide xi tsakʼénda kui bakó jokji nganʼio kisikje nga tsín mele kuiyá kʼoa nga toxitsjoa jmeni xi kisʼin.

Je chjota xi tsakatéxoma ya China kʼoati tsakásjaile josʼin nga tsínkʼia kuiyá, tsakásjai ndáxka̱ xi koa̱n sikatíokon tokʼia saʼndani. Je chjotaxá xi Qin Shi Huang tsakʼin kʼoakitsole je chjotale nga katabásjaile ndáxka̱ xi koa̱n sikʼéjnakon. Tonga je ndáxka̱ xi tsakʼénda kui tsakʼéjin xi mercurio ʼmi. Kʼoa nga nʼio toán xki jebi tochaxóle kui kisikʼien je Qin Shi Huang.

Kʼoati tso én kʼianga je chjota xi Juan Ponce de León tsakʼin, xi España tsʼe, xi kʼia tsakʼejna nga siglo XVI, nga ya saʼnda tsakʼamje ya Caribe kʼianga tsakásjaiya jmeni xi koasenkao nga to xti sʼe̱ ngantsjai. Kʼoa kʼianga tsoʼba yaa kicho ya Florida (Estados Unidos). Tonga tojngo jao nó tsakʼejnasa nga jekiskan kao chjotayo̱ma̱ xi América tsʼe kʼoa alikuini koansjaile jmeni xi tsakásjai.

Je xi faraón tsakatio, xi chjotaxá koan kʼoa kao chjota xi tjín xi tsakásjai nga tsakʼetsomason sonʼnde koanmele nga tjóʼale yaole xi tʼatsʼe kjoabiya. Kʼoa ninga tsín ñá bʼakaoná kʼoakuixoán tsa nda kisʼin jmeni xi kisʼin, ʼyañá nga tsakʼénele yaole. Kʼoa kuijin kʼoakisʼinni nga kʼoatjío ni̱ma̱ná ngatsʼiaa je xi chjotaa nga tsín mená kuiyá.

A KOAAN TJÓʼANÁ YAONÁ XI TʼATSʼE KJOABIYA

Ánni nga tsín ʼya xi mesínile nga kuiyá. Ya Biblia kʼoatso anni. Itso tʼatsʼe Jeobá, je Niná xi kisindaná: “Naskánasʼin tsakʼénda ngayeje nga kicho nichxinle. Yaa ni̱ma̱le kisikʼéjnajin nichxin xi tsínkʼia fetʼa” (Eclesiastés 3:11).a Kuinga mesíniná nga i̱ si̱jchántsjé sonʼnde yaoná, nga̱ naskánachonná. Alikui mená nga to tjíchoa̱ nó kuiyoaa (Salmo 90:10). Kui xi mená nga kuiyoaa ngantsjai nichxin.

Ánni kʼoatsakʼésíni ni̱ma̱ná je Niná nga mená kuiyoaa ngantsjai nichxin. A kuinga to yaoná si̱jtilee nga tsínni kʼoama. Majain, alikʼiajin kʼoasʼin je Niná. Je Niná kʼoatso nga kjoaʼaxin je kjoabiya. Kʼoa ya Biblia nkjín kʼa kʼoatso nga kʼoasʼin kʼoa nga kjoabijnachon xi tsínkʼia fetʼa tsjoáná. (Chótsenlai je rekuadro xi tso: “Tjóxin je kjoabiya”.)

Je Jesucristo i kitso: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi, kʼoa skoe̱ Jesucristo je xi kinikasáin” (Juan 17:3). Tojo tso én jebi, koaan tjóʼaná yaoná xi tʼatsʼe kjoabiya. Tonga tojo kitso je Jesús, jé Niná xi koa̱nle koasenkaoná.

[Nota xi faʼaitʼa]

[Rekuadrole pájina 4]

Tjóxin je kjoabiya

“Ñaki tondiaa kjoaʼaxin je kjoabiya, kʼoa je Jeobá xi batéxomale ngayeje xi tjín kʼoejon ndáxko̱n ngatsʼi chjota.” (Isaías 25:8.)

“Kʼoa kui xi mele je xi kisikasénna, nga je ngatsʼi xi be ʼndíle, kʼoa xi makjainle tʼatsʼe, katasʼele kjoabijnachon ngantsjai.” (Juan 6:40.)

“Kʼoa je kontrale xi fetʼani xi kuixo̱ya, kui kjoabiya.” (1 Corintios 15:26.)

“Jebi xi kʼoakoa̱n nga tichoyalee kjoabijnachon ngantsjai. Niná xi likui bʼanacha kisisʼengi [xi tsonile, tongini kʼoakitso nga tsjoá] je kjoabijnachonbe jo saʼnda nga títjon nga kje nroajin sonʼnde.” (Tito 1:2.)

“Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya.” (Apocalipsis 21:4.)