Kʼianga tsín tiʼyani jmeni xi sʼiain

Je Adriana, xi Brasil tsʼe itso: “Nʼio ba kisʼe tokoan, saʼnda koanmena nga kisikʼien yaona”.

A SAJE kʼoakisʼe tokuin nga tsín timenili nga kuijnachuin. Majinjinli jokisʼe kon je Adriana. Nʼio kisikjáojin, kʼoa nʼio ba kisʼe kon. Xijekoanni, kʼoatsakʼinle nga depresión tjínle.

Kataʼyala jmeni xi koanle je Kaoru xi ya Japón tsʼe, jé kisikuinda xijchále xi jekoanjchínga kʼoa xi chʼin tjínle, itso: “Nga kʼia alikui tinda kisʼeni tokoan, nga̱ nʼio kisikjáojian ya tʼaxána, nga jeki nichxin alikui tikoanbaonina kʼoa tsín tikisʼefeña. Kui xi koanmena nga tsín tikjoañʼai kjoaʼatojinña kʼoa nga tongisa nda tsa kuiyá”.

Je Ojebode, xi Nigeria tsʼe itso: “Me tongantsjai nga ba kisʼe tokoan, kʼoa me tokjiʼndá ʼndejian, saʼnda koanmena nga kisikʼien yaona”. Je Ojebode, Kaoru kʼoa kao Adriana alikuini kisikʼien yaole. Tonga nga xki̱ nó me 800,000 chjota xi yaole síkʼien.

JÑÁNI KOA̱N SOKÓNÁ NGANʼIO

Jé xi xʼin xi ngisa kʼoasʼin síkʼien yaole, alikui síjé nganʼio nga soa male. Je Jesús kʼoakitso nga je xi tjíomʼe chjinexki machjénle (Lucas 5:31). Kuinga machjénni nga kjoásjai nganʼio kʼiatsa depresión tjínli. Nkjín chjota xi binyakao kʼianga fitjenngi jmeni xi tsole je chjinexki. Je Ojebode, Kaoru kʼoa kao Adriana tsakʼainganʼiole kʼoa ndʼaibi tsjoa tjío kon.

Tjínkʼa je chjinexki xi kʼoatso nga xki machjénle je xi depresión tjínle, tsa tochja̱kaonajmíje̱ kʼoa tsa maije̱ nga jao koya. Tonga kʼoati machjénle nga kuinyakao familiale kʼoa kao miyole je chjota xi kui chʼin tjínle. Je miyo xi ngisasa koa̱n si̱nʼiotʼaa jéní je Jeobá kʼoa kui Biblia síchjén kʼianga basenkaoná.

A KUICHO NICHXIN NGA TSÍN TISʼE̱NI DEPRESIÓN

ʼYani xi depresión tjínle, nichxin bʼéngi kʼianga síxkile yaole kʼoa síkʼantjaiyaa josʼin fikao yaole. Kʼiatsa kui chʼin tjínli koaan kʼoakʼoaí tokuin nga ndasʼin kuijnai nichxin xi nroaján. Je Ojebode, itso: “Mena nga katabitjoson jmeni xi tso Isaías 33:24, nga tsín tiʼya xi timʼeña kuitsoni”. Kʼoajin tinda sʼe̱ tokuin nga jchai nga je Niná kjoaʼaxin ngayeje kjoaʼaon kʼoa kao josʼe tokoán (Apocalipsis 21:1, 4). Tjóxin ngayeje jmeni xi kjoañʼai síkjaʼáná. Alikui tikʼia ba sʼe̱ni tokuin kʼoa tsín tikui si̱kjáojinni (Isaías 65:17).

Textole Biblia xi koasenkaoli

Je Niná majinle jotjín tokuin

“Nga̱ an Jeobá Nináli, an titsoanʼioa je ndsai ngakixi, an xi i̱ tixinle: Ali tsa nokjonjin, an koasenkaole” (Isaías 41:13).

Je Niná majinle jotjín tokoán, kʼoa mele koasenkaoná.

Tikjaʼaitsjenjin je Énle Niná

Je Elías kʼoakitso nga tosa katamʼe, i kitso: “Jekichobena. Ji Jeobá tosa chja̱ʼaxinnái je kjoabijnachonna” (1 Reyes 19:4).

Je Ojebode itso: “Kʼianga kisikjaʼaitsjenjian jmeni xi tso je Énle Niná, tsakasenkaona. Koanjinna nga kʼoati kisʼe kon je Elías jokisʼe tokoan”.

Koasenkaoli choa̱ xi faʼaitʼa Biblia

Je Jesús i kitsole Pedro: “Tonga an tsakʼetsʼoantjaile, jméni nga tsín tsa ndiaa cha̱ xi makjainli” (Lucas 22:32).

Je Pedro nʼio kisikjáojin kʼoa kiskiʼndá kʼianga kʼoakitso nga tsín bexkon Jesús. Je Kaoru itso: “Nga koanjinna nga kuenta kisʼin je Jeobá kʼoa kao Jesús jokisʼe kon Pedro, kui xi tsakasenkaona”.

Alikui tikʼia ba sʼe̱ni tokuin kʼoa tsín tikui si̱kjáojinni (Isaías 65:17)