Kjoabiya choʼndá ngatsʼiaa

TIKJAʼAITSJENLAI tsa ʼya xi kui tíbʼéyanajmíli tʼatsʼe jngo chjoón xi se xi nʼio ʼyale. Tsakui nichxin nʼio tsjoachai je músicale. Kʼoaʼmili nga nʼio tsjoake música saʼnda nga sʼa ʼndí kji, nʼio kitsjoale kjoandosin, kʼoa sa nda sa nda koanle kise. Xijekoan, xinxin ʼnde ki nga kise kʼoa kʼoasʼin tsaʼyanile. Kʼoa sʼeyanajmíli nga chan koanjchínga kʼoa xijekoan kʼien.

Ñaki kʼoakoan kjoaixi, tonga ndʼaibi jekʼien je chjoón jebi. Kʼoama toʼya chjotani, jolani maestro, chjinexki kʼoa tsa ʼyasa chjota xi nʼio ʼyale. Ningalani tse jmeni xi sʼín nga sʼa tíjnakon jngo chjota, tsakui nichxin kui nikjaʼaitsjeen nga nʼiosa tse jmeni xi tísʼín tsa tsínlani kʼien.

Ngatsʼiñá nga kjoabiya choʼndá (Eclesiastés 9:5). Ngatsʼiaa xi chjotaa majchíngañá kʼoa biyañá. Sakʼoaa tsín ñá tjínjinná jmeni xi ma sakʼoa, tobʼelañá, tsa tjín xi koa̱nná kʼoa tsa táo chʼin ska̱tʼaná. Je Biblia itso: “Jon joni tsa yojbi xi bʼatsen jngo tjo, sasa chani” (Santiago 4:14).

Nga tsín ñá tjínjinná kʼiani kuiyá, tjínkʼa chjota xi i̱ tso: “Kuichaa, sʼioaa, nga̱ nyaonli kuiyanía” (1 Corintios 15:32). Kʼianga kʼoatso kuini je kjoabiya síkjaʼaitsjen. Kʼoa kʼianga kjoa bitjatojiaan, kui nikjaʼaitsjeen jmé xá tiyoñá i̱ Sonʼnde. Jókoa̱nni jchaa xi tʼatsʼe jebi.

Nʼio nkjín chjota xi je sínʼiotʼa yaole je chjota xi kui kotʼayason tsa koa̱n nga tsesa kuiyoaa. Je chjota jebi kao chjinexki kjimasjaile xki xi tjíobinyakao je chjota nga ngisasa tse koatio. Ninga kʼoalani, tojo kui nikjaʼaitsjeen ánni nga majchíngasíñá kʼoa biyasíñá. A kuicho nichxin nga tsín tiʼya xi kuiyáni. Yaa kjoaʼmiya xi fisani kuitsoyaná xi tʼatsʼe jebi, kʼoa kʼoati chótʼayajiaan jmé xá tiyoñá i̱ Sonʼnde.