Jósʼin si̱chjén je video chjotse nga kʼoétsʼiakoaa estudio
Jenʼio nkjín chjota xi jekiskotsenle ya jw.org jngo video xi Ánni nga machjénsíni nga chótʼayai Biblia ʼmi, kʼoa kui xá kisʼendani nga koa̱nmele nga sa̱kóyale Biblia. Tsa mená chótsenlee video jebi koaan ya kuisennelee ya jñani i̱ tso: “Tijái nga kataʼmiyali Biblia”, kʼoa tsamaije̱ koaan si̱chjén je xi código QR ʼmi, xi sasa ya bichókaoniná ya Internet ya jw.org. Código jebi yaa faʼaitʼa ya jto̱n yátsʼi̱n je tratado chjotse. Kataʼyala jósʼin koa̱n si̱chjén video jebi nga kʼuínyalee je chjota.
Nga kjuinchón ijngokʼalee je chjota koaan i̱ kʼuínlee: “A koaan koako jngole video xi tsoya jñani koa̱nsjainá jmeni xi chjonangiaa xi tʼatsʼe Biblia”. Tsa koa̱njyole je chjota koaan koakolai je video kao je xi bitjasʼenni Internet kʼoa tsa yaje̱ computadorale.
Kʼiatsa ya tiʼmiyasoán ya jñani nʼio tjín chjota kʼoa tsa jngo chjota ska̱jiaan jñani titsomaa xi Énle Niná chja̱kaonajmíñá, koaan si̱kájna jngolee je tratado chjotse kʼoa kʼoakʼuínlee nga koa̱n sʼin escanear je código QR xi faʼaitʼa. Kʼoati koa̱n ya koakolee je video kao je xi bitjasʼenñá ya Internet, nga̱ je código jebi yaa bichókao ndi̱to̱nná jñani tíjna je video ya jw.org.
Kʼoati koa̱n kʼoéyanajmílee xi tʼatsʼe video je xi ñatje̱n mangián skuela, xi ñatje̱n nixá, je xíngiaa kʼoa toʼyani xi ʼyaxkoaan. Kʼoakʼuínlee nga koa̱n koakolee je video tsa mele. Kʼoati koa̱n nga ya correo electrónicole si̱kasénnilee je dirección jñani tíjna je video kʼoa kʼoakʼuínlee nga jesoa katakotsenle.
Tsa kʼoasʼin si̱chjén video jebi, so̱kosaná je chjota xi koa̱n kʼoailee estudio kʼoa koaan kuinyakoaa nga nda katabatio ngixko̱n Niná ngatsʼi xi tjíonda nga kʼoaile “kjoabijnachon ngantsjai” (Hech. 13:48).