Je testigole Jeobá: Tjíotsoyason jngo tjíjtsa Sonʼnde je énnda chjotse
Ñá xi testigole Jeobá maa jetsʼato jngo siento nó nga kʼoasʼin tiʼmiyasoán je énnda chjotse. Siento koya én tibakoyasoán kʼoa tsʼato jao siento kao kante naxinandá jñani kʼoatinʼia. Nisañandiajinla nga kʼoasikji tíbʼabíson je énnda chjotse joni tsa ndʼaibi (Mat. 24:14). Ánni nga nʼio machjénsíni nga sa̱kóyason. Ánni nga kjima tísakóyasonsíni jngo tjíjtsa Sonʼnde. Xi tʼatsʼe jebi yaa tsoya je video xi ʼmi Je testigole Jeobá: Tjíotsoyason jngo tjíjtsa Sonʼnde je énnda chjotse (tjasjai ya jw.org jñani XO̱N KAO GRABACIÓN › VIDEO tso). Video jebi nchjani josʼin tinixá jngo tjíjtsa Sonʼnde. Nga jechótsenlai video jebi, tikjaʼaitsjenjin je kjoachjonangi xi faʼaitʼa ibi.
Jósʼin kabasenkaoli video jebi nga ngisasa chjí jchatokuin 1) nga kʼoasʼin nʼio tjíobʼénele yaole je naxinandále Jeobá nga tjíotsoyason je énnda chjotse (2 Tim. 4:2), 2) ngatsʼi familia Betel xi tjío jngo tjíjtsa Sonʼnde, 3) josʼin tjíonichjine je misionero kao superintendente (2 Tim. 2:2), 4) jokji chjíle nga tanjio tanjio chotʼayajiaan je testo xi maxkia nga nyaon nyaon kʼoa nga tongini chotʼayá jme xi faʼa ya kjoajtínná nga xki̱ xomana (Hech. 17:11), 5) jokji basenkaoná nga mangián je kjoajtínná (Heb. 10:24, 25), 6) je kjoanichikontʼain xi kʼoainá kʼianga jeʼndenaxó koa̱n Sonʼnde (Is. 11:9), 7) je kjoanda xi tjínná nga tibinyakoaa je chjota nga choʼndale Niná katama (Juan 4:35).
Nʼio ndasʼin kjimachjénná video jebi nga tibinyakoaa je chjota xi mandosinle Énle Niná nga ngisasa katabe je xá xi tinʼia jngo tjíjtsa Sonʼnde xi testigole Jeobá maa. 8) Kʼiáni nga koa̱n koakolee video jebi je chjota xi bʼailee estudio, je xíngiaa kʼoa kao xi kjaʼaísa chjota. 9) Jókitso je chjota xi jetsabe video jebi.
Kʼianga nikjaʼaitsjenjiaan ngayeje xi tísʼín Jeobá ndʼaibi, kʼoati bixoán jokitso je choʼndale Niná xi i̱ kitso: “Nʼio nkjín koya jmeni xi tinʼiai, ji Jeobá Ninána, saʼnda je xáli kʼoa kao je kjoafaʼaitsjenli xi tibakonáijin; tsínsa ʼya xi kjaʼaí xi koa̱nngósonkaoli” (Sal. 40:5). Si̱chjén video jebi nga kuinyakoaa je chjota nga nʼio katabexkón je Jeobá kao naxinandále.