Koaan kuiyoaa ngantsjai nichxin

Alikui chʼaotjín nga kui nimetokoán jebi. Nga̱ ya Biblia kʼoatso nga je Niná toxá kui tsakʼéjnajinni ni̱ma̱ná nga mená tse kuiyoaa (Eclesiastés 3:11). Kʼoati tso nga kjoatsjoacha je Niná (1 Juan 4:8). Nga ʼyaa jebi, a tsíkui xi bakóyaná nga kuicho nichxin nga kuiyoaa ngantsjai.

Alikui ʼya xi mele nga kuiyá. Je Biblia kʼoatso nga kontraná mani je kjoabiya (1 Corintios 15:26). Sakʼoaa ngotjo biyañá kʼoa sakʼoaa tse biyoaa, tonga ngatsʼiñá nga kjoabiya choʼndá. Je chjota tsokjónle je kjoabiya kʼoa nʼio nkjín xi tsín mele nga kui síkjaʼaitsjen.

XI BAKÓ NGA KOA̱N KUIYOAA NGANTSJAI

Je Niná alikuikʼia kʼoasʼin koanmele nga kuiyá je chjota. Je libro xi tsʼe Génesis kʼoatso nga kui xi koanmele nga kuiyoaa ngantsjai nichxin i̱ Sonʼnde. Je Jeobáa nʼio ndasʼin tsakʼénda je Sonʼnde. Xijekoan, kisinda je Adán kʼoa yaa kisikʼéjna jngo ʼnde jñani nʼio naskánachon ya Edén. Kʼoa “je Niná kiskotsenle ngayeje jmeni xi tsakʼénda kʼoa, ¡koeni!, tsabe nga nʼio nda” (Génesis 1:26, 31).

Ñaki chjotatsje je Adán kʼianga sʼa koannda (Deuteronomio 32:4). Kʼoa je Eva kʼoati ñaki chjotatsje nga sʼa koannda. Je Jeobá i kitsole: “Katamantje̱ñó kʼoa katamankjínyañó, titsao sonʼnde kʼoa tatexomalao, kʼoa tjanentsjao je jti̱ xi tjín jinndáchikon kʼoa je cho̱ xi fitjen ya ngʼá kʼoa ngatsʼi cho̱ xi tjío i̱ tʼanangi” (Génesis 1:28).

Nga koa̱nnkjínya chjota i̱ Sonʼnde tsee kuichomani. Nga kuitjoson josʼin tjínndajinle Niná, je Eva tjínnele sʼe̱le xti, kʼoa je xtile kʼoati tjínnele sʼe̱le xti saʼnda nga sitse i̱ Sonʼnde (Isaías 45:18). Alikuijin kʼoakitsole Niná nga je sitse i̱ Sonʼnde kʼiatsa tochoatselani koatio, tsa toje xtile kao xtindaile skoe̱, kʼoa tsínjin kʼia skoe̱ nga koa̱nnkjínya chjota i̱ Sonʼnde.

Kʼoa kuila si̱kjaʼaitsjeen jokji xá tjenkao nga je koanentsja cho̱. Nga je Adán tsjoájaʼaínle tsejin nichxin koa̱nchjénle (Génesis 2:19). Nga koa̱nle josʼin sikuinda nga jngó jngó tjínnele nda skoe̱ josʼín, kʼoa tsejin kuichomani.

Nga kʼoakitsole Niná je Adán kao Eva nga je koanentsja cho̱ kʼoa nga je sitse Sonʼnde, kui bakóyaná nga kui xi koanmele Niná nga tse koatio. Kʼoa je Adán nkjín nó tsakʼejna.

CHJOTA XI NKJÍN NÓ TSAKATIO

Je Biblia kʼoatso nga nkjín nó tsakatio je chjota nga kjesa faʼaijin je Jtsínʼio. Ya Génesis 5:5 itso: “Je Adán 930 nó tsakʼejna”. Kʼoa jaon chjota síkʼaxki̱ xi tsʼato 900 nó tsakatio. Jolani Set, Enós, Quenán, Jared, Matusalén kao Noé. Kʼoa je Noé kʼiaa 600 nóle nga jaʼai je Jtsínʼio (Génesis 5:6-27; 7:6; 9:29). Ánni nga kʼoasikji tse tsakationi.

Ngatsʼi chjota jebi kʼiaa kitsin nga to chriankʼia tsakajngijée je Adán kao Eva. Tsakui nichxin kuinga tse tsakationi. Jméni xi be nga chjotatsje maa kʼoa nga tse nichxin biyoaa. Kʼoa jósʼin tjóxin je kjoabiya. Nga jchaa xi tʼatsʼe jebi títjonkjoanla kui kataʼyaa ánni nga majchíngasíñá kʼoa biyasíñá.