Jé Niná bitjongʼa kʼianga nda nʼia

1. Ánni nga besíni chjota kʼianga kjoajtíntse tísʼejnaná.

¹ Bená je chjota kʼianga mangián je kjoajtíntsená. Tjín naxinandá jñani bitjotʼa tsa periódiko kʼoa bʼaxki̱ tsa ya radio kao telebisión nga kjoajtíntse tísʼejnaná. Ya jñani hotel tjín kʼoa ya jñani kjen chjota, ñaki toje tse je xíngiaa xi bichó kjoajtíntse, kʼoa kʼoati nkjín ndsʼee ʼyaa ya ʼnyo kaye nga kjiotʼale je xo̱n xi fatʼaa nga mangián kjoajtíntse. Tonga ndʼaibi kuila kjoájinkoaan xíngiaa je én xi koasenkaoná nga nda sʼiaan ya jñani sʼe̱jna je kjoajtíntsená ánni nga kuitjongʼasíni je Niná (1 Ped. 2:12).

2. Jósʼin kuitjongʼa Niná kʼiatsa kui najño xi ndasʼin matsen chʼa̱kjá kʼianga sʼe̱jnaná kjoajtíntse.

² Je najño xi ndasʼin matsen chʼa̱kjá. Kʼianga kui najño xi ndasʼin matsen chʼakjá nga sʼejnaná kjoajtíntse tokʼoamale je chjota xi kotsenná. Tonga tjínkʼa xi tokʼia skoe̱ná jolani kʼianga kuichoaa ya hotel, kʼianga tjín jña koanngínkichaa kʼoa tsa tjín xi kjuinkindá. Ningalani likui ñaki tjínnele nga kʼoasóyoaa josoyoaa nga kjoajtíntse tiyoaa, tojo machjén nga nda kjoan najño xi chʼa̱kjá. Katabe je chjota nga tsín mangóson josoyoaa kao je chjota xi tsín kotʼaya énle Niná (Rom. 12:2). Kʼoati machjén nga chʼaa je xo̱n xi fatʼaa nga mangián kjoajtíntse. Kʼiatsa kʼoasʼiaan, skoe̱ní chjota nga kjoajtíntse tísʼejnaná, koaan chja̱kaonajmíñá énle Niná tsa ʼya xi skónanginá kʼoa kʼoati skoe̱ná je ndsʼee.

3. Jósʼin koakoá nga tjínná kjoatsejta kao kjoaxkóntokon.

³ Tsejta katamaa kʼoa koakolee kjoaxkóntokon je chjota. Nʼio nkjín chjota tjín xi nʼio ngʼakon kʼoa xi tsín jme kjoanda tsjoá. Kʼiatsa tsejta koaan kʼoa koakolee kjoaxkóntokon je chjota, ñaki ndajin sa̱tío kon, kʼoa ngisa je xi ya síxá ya hotel kʼoa ya jña kjen chjota (2 Tim. 3:1-5). Kʼoa kʼianga jeya tiyoaa jña sʼe̱jna kjoajtíntse kʼoati machjén nga si̱kjaʼaitsjeen xi tʼatsʼe ndsʼee xi ngikʼa kʼoa chósonnilee jotjín yáxile koatiotʼaxián xi ñá koa̱nchjénná, kʼoa tsakʼiaje̱ nga kʼoainá je xo̱n xi kuitjo (1 Cor. 10:23, 24). Jngo chjota xi tokʼia kitítjon kjoajtíntse i kitso: “Likui tifaʼaitsjennina jotso kjoanokjoaya xi jaʼa ya kjoajtíntse, tonga je xi tondiaa kisʼeya jkoa kui josʼín je testigole Jeobá”.

4. Ánni nga ndatjínsíni nga kʼoainganʼioá jme xá xi sʼe̱ nga sʼe̱jnaná kjoajtíntse.

⁴ Kuiyondaa nga kʼoainganʼioá. Ñá xi chjotale Cristo maa tiyondañá ngantsjai nga bʼainganʼioá jme xá xi sʼe (Sal. 110:3). Kʼoa ji, a koaan kʼoati kʼoainganʼiui. Kʼianga kisʼejna jngo kjoajtíntse, jaonla siento mani je ndsʼee kao tichjaa xi kichosítsje jña kisʼejna. Je chjota xi ya síxá i kitso: “Nisañandiajinla ʼyaijin je chjota xi kʼoasʼín. Likui makjainnajin tsa ñaki tokjoatjao jaʼaisítsje”. Ñaki jemená nga sa̱tío je kjoajtíntse xi tsʼe nó 2013, nga̱ kui kjuinkinóʼyá je kjoachjine xi tʼatsʼe Niná tínroani. Kʼoa xi ijngosani, jé chʼa̱sjengʼaa je Jeobá xi tsjoáná kjoachjine jebi.

[Rekuadrole pájina 3-6]

Én xi sʼejintokoán tʼatsʼe je kjoajtíntse xi jan nichxin sʼe̱jna nó 2013

◼ Ora nga koaitsʼia kʼoa nga kjoetʼa. Las 8:00 tjóxʼá je xo̱ntjoa. Las 9:20 kjoane je músika xi koaitsʼiani kjoajtíntsená nga jan nichxin. Koanngínkiyoaa ʼndená nga kjoane músika ánni nga jeya tiyosíñá nga koaitsʼia. Nga bixine kao nga xoto las 4:50 kuijndá je kjoajnda xi kjoetʼani kʼoa kʼiaa sʼe̱jna kjoabʼetsʼoa, kʼoa nga taingo las 3:35 kjoetʼa.

◼ Jña sʼeyo karro. Ya jñani tiñá si̱kuindañá je karro alikui kʼoéchjiá, kʼoa kʼoasʼin sʼe̱yo chʼin chʼin josʼin kuicho. Mani nga totjíchoa̱ karro jchóya, kʼoaʼmilee xíngiaa nga nkjín chjota katabatioya nga tojngo karro. Kʼoa ya jñani sʼe̱yo karrole xíngiaa xi tsín ma fi, tojekjoán xi kʼoaiʼndele xi tjínle placa kʼoa kao xi tjínle letrero.

◼ Yáxile. Tojékjoán xi koa̱n koatiolee yáxile je xi tojngo niʼya maa, kao je xi tikui karro koanngínkaoñá kʼoa kao je xi tiʼmiyalee Biblia. Totjínchoaa yáxile xi tsen satío jña ma batio je xíngiaa xi jenʼio koanjchínga kʼoa kao xi chʼin tjínle. Alikui koa̱n nga ya koatiokao ngatsʼi xínkjín. Alikuijin nichjaon yáxile jebi, ánni nga je katabatiosíni xi jenʼio koanjchínga kʼoa kao xi chʼin tjínle kʼoa kao xi sikuinda (1 Cor. 13:5).

◼ Tsojmi xi chinee. Ngisa nda nga chʼaa tsojmi xi chi̱nee tikʼoajinni nga kʼia koanngínkindá nga nyisen. Koaan jngo xjoa̱ chʼaa xi koa̱n ya si̱kʼéjnangiaa yáxile. Ya jñani satío kjoajtíntse alikui tjoʼnde nga kui xjoa̱ xi nʼio yʼai kjoan chʼá kʼoa kao tsojmi xi cho̱tsín.

◼ Tao̱n. Koaan kʼoainganʼioá je xá xi kjima jngo tjíjtsa Sonʼnde nga koatioyá kaxa̱ jotjín nroajin ni̱ma̱ná. Kʼiatsa kʼoasʼiaan kʼoasʼin koakoñá nga nʼio ʼyachjiá je kjoajtíntsená. Tsa ʼyani xi mele nga cheque sikatíoya kaxa̱, kui kʼoetʼa je jaʼaín xi yʼa je testigole Jeobá ngixko̱n kjoatéxoma. Kʼoati sa̱tío kʼa kjoajtíntse jñani koa̱n si̱chjén tarjeta de crédito kʼoa tsa tarjeta de débito nga kʼoee jotjín kjuinroajin ni̱ma̱ná.

◼ Xki. Kʼiatsa tinixkio koaan chʼa̱o xkino, nga̱ tsín ya kʼoainá xki ya jña sʼe̱jna kjoajtíntsená. Tsa ʼyani xi chʼinxi tjínle kʼoa tsa jeringa kʼoa nindo síchjén alikui koa̱n nga tojña sikʼatsao, kʼoa ni koa̱njin nga ya sikʼatsaoya je xjoa̱tjé xi satío ya jña sʼejna kjoajtíntse kao xi tjío ya hotel.

◼ Jté. Nga xki̱ nó nkjín mani xi miʼaon xi totʼatsʼe jtéle. Ngisa nda nga kui kjoáyaa jté xi nda sʼeyaná xi tsín ngʼangi kjoan taconle ánni nga tsín jme xi koa̱nsíniná ya jña mijon chon, jña eskalón tjín kʼoa tsa ya jñani ki̱cha̱ kjiojchxo.

◼ Xíngiaa xi tsín nda nrʼoé. Tjínkʼa kjoajtíntse jñani kʼoati ma noʼyalee kao radio (FM) jmeni xi faʼa, tonga toyaní jinkjoajtíntse. Nga koa̱n kuinóʼyalao machjén nga jngo radio chʼa̱o xi pila tjínle kʼoa kao audífono.

◼ Carriola kao yáxile xi sʼekjaoya. Alikui koa̱n nga carriola kʼoa tsa yáxile xi sʼekjaoya kʼoa̱ je xi xijchá ma. Je xi koa̱n kʼoa̱ tokui yáxile xi tsʼe xtiʼndí xi tochoa̱ ma jchóson jñani biyoaa.

◼ Perfume. Tjín ʼnde jñani satío kjoajtíntsená nga aire acondicionado machjén nga̱ yaniʼyaní. Mani nga tsjoachaa xíngiaa alikui koa̱n nga toxkia tse perfume si̱chjén xi nʼio nje̱, nga̱ tjín xíngiaa xi chʼao síkao xi tsín nanda ma kjenjta kʼoa tjínje̱ xíngiaa xi kjaʼaísa chʼin tjínle (1 Cor. 10:24).

◼ Xon xi Sírvase visitar (S-43-S) ʼmi. Tsa jngo kʼoa tsa jao xo̱n jebi chʼa̱o ánni nga koa̱n ya kʼoétʼaxo̱nsíño tsa jngo chjota xi koa̱nndosinle énle Niná chja̱kaonajmío. Xijekoa̱n, je tʼailao je ndsʼee xi ya síxá ya Departamento de Publicaciones, kʼoa tsamaije̱ kʼia tʼailao je xi secretario sʼin tíjna ya jinjtín.

◼ Jña kjen chjota. Kʼiatsa nda sʼiaan nga tiyoaa ya jña kjen chjota jé Jeobá kuitjongʼa. Kʼoa tsa kʼoasʼin beni ya jñani kuichaa nga sʼejna jotjínle tsʼe ndáxile koaan kʼoéjnaa.

◼ Hotel

1) Ali nkjínjin kuarto nijáo tsa tsínni koa̱nchjénno ngayeje, kʼoa tokʼoakjoantjín tiyoʼyao je kuarto jotjín tsjoáʼnde je hotel.

2) Kʼiatsa ñaki tsínni kʼoakoa̱nno nga ya kuiyo, ndi̱to̱n tinókjoao ya hotel ánni nga koa̱n kjaʼaí xi sijésíni (Mat. 5:37). Tʼetʼao je número xi kʼoaino nga tsínni ya kuiyo. Kʼiatsa tongi jaosa nichxin cha nga kuinókjoao ya hotel, likui tikʼoainino tao̱n xi tsakʼejnangio.

3) Tʼiaon kuenta jebi: Kʼiatsa tarjeta de crédito kʼoa tsa tarjeta de débito kʼoéchjíño hotel, sʼe̱jnanʼio choa je tao̱nno. Je tao̱n jebi kui koa̱nchjíntjaini tsa totsejinni tjín xi si̱kitsón jotjín nichxin nga ya kuiyo. Kʼiaa jekoa̱n si̱chjénño tao̱n jebi nga jekjoaʼato jngo jao nichxin nga jekabʼechjío.

4) Kʼiatsa kui si̱chjaon je ki̱cha̱ xi ma nokjónya chʼá, tiʼa tangínnikʼéjnaño nga jekoa̱nchjénno ánni nga koa̱n sichjénsíni xi kjaʼaí chjota.

5) Kʼiatsa kʼoasʼin beni, tʼailao tsʼe ndáxile je chjota xi síxá ya hotel xi tsókjón tsojmino. Kʼoa nyaon nyaon tikʼéjnalao tsʼe ndáxile je chjoón xi sindachon kuarto jña kuiyo.

6) Kʼiatsa tsín tjoʼnde nga kui sʼenda tsojmi xi ma chine ya kuarto jña kuiyo, alikuijin bʼendao.

7) Chósonnilao jotjín chjóao je kafe kʼoa kao tsojmi xi kʼoaino nga tanjio jotjín nichxin nga ya kuiyo.

8) Katamatsen nga énle Niná tichotʼayao kʼianga chja̱kao je xi síxá ya hotel. Tikjaʼaitsjaon nga nkjín chjota sísinle kʼoa nga tsjoa sʼele nga tondʼé nʼia kʼoa nga tsejta maa.

9) Je xi xijchá ma tjínnele nga sikuinda je ʼndíxtile tojñani nga tjío ya hotel, a yaa ya piscina, a yaa jña bitjasʼenñá hotel axo yaa ya gimnasio.

10) Jotjín síkʼéchjí nga jngo nitje̱n ya hotel yaa tjítʼa je xo̱n xi Lista de hoteles recomendados ʼmi xi nikasénle jtín, tonga kjaʼaínile jotjín síkʼéchjísonsa. Kʼiatsa tsʼato kʼoatjín sikʼéchjíno, kjitʼanangi tikjinrʼóao je ndsʼee xi kjinele Departamento de Alojamiento.

11) Tsa jme kjoa sʼe̱no ya kuarto jña kuiyo jotjín nichxin sʼe̱jna kjoajtíntse, kjoan tikjinrʼóao je ndsʼee xi kjinele Departamento de Alojamiento.

◼ Je xi mele tsjoánganʼio jme xá xi sʼe. Toʼyani xi mele tsjoánganʼio xá xi sʼe̱ ya kjoajtíntse, ya katafi jñani tíjna Departamento de Servicio Voluntario. Je xti xi kje xjaʼaonjngojin nóle koaan tsjoánganʼio jme xá xi sʼe̱ tsa tje̱nkao jngo xijchále. Kʼoati koa̱n sixá tsa tje̱nkao jngo xi jejchínga tsa katsjoáʼnde xijchále.