Je Énle Niná nʼio tjínle nganʼio
1. Jókʼuín je kjoajtíntse xi jngo nichxin sa̱tío fitsʼiakjoanni sá septiembre nó 2013 saʼnda sá agosto nó 2014.
1 Je Biblia alikui mangósonkao je libro xi to chjota bʼasje. Ánni. Kuinga tjínle nganʼio nga síkʼantjaiya jotjío kjoafaʼaitsjenná kʼoa nga kui kʼoanʼia josʼin mele Niná. Tonga jókji nganʼio tjínle je Énle Niná. Jósʼin si̱chjén nga ngisasa nda katabasenkaoná kʼoa nga ngisasa nda kuinyakoaa xi kjaʼaí. Jebi kʼiaa sa̱kóyaná kʼianga sa̱tío je kjoajtíntse xi jngo nichxin, fitsʼiakjoanni sá septiembre nó 2013 saʼnda sá agosto nó 2014. Nʼio tsjoánganʼioná jmeni xi sa̱kóya ya kjoajtíntse jebi, kʼoa i kʼuín: “Je Énle Niná nʼio tjínle nganʼio”, kʼoa yaa Hebreos 4:12 yʼangini.
2. Jméni xi nʼio sa̱kóyaná ya kjoajtíntse xi jngo nichxin.
2 Jmeni xi nʼio sa̱kóya ya kjoajtíntse jebi. Kʼianga jeya tiyoaa, koaan kʼoétʼaxoaan kʼianga sa̱kóya xi tʼatsʼe kjoachjonangi xi faʼaitʼa ibi.
• Ánni nga koa̱n koa̱nkjainsíniná jmeni xi tso je Jeobá (Sal. 29:4).
• Jméni xi sʼiaan kʼianga ñásoa kataʼyaa jokji basenkaoná Énle Niná (Sal. 34:8).
• Jósʼin si̱chjén je Énle Niná kʼianga bakoyasoán nga nʼio nda kuinyakoaa chjota (2 Tim. 3:16, 17).
• Jméni xi sʼiaan nga tsínkui katabʼanachaná kjoandiso xi kijnabasenle Na̱i i̱ Sonʼnde (1 Juan 5:19).
• Jon xi sʼa xtio, jméni xi koasenkaono nga ñaki nda si̱xálao Niná (Jer. 17:7).
• Jméni xi sitajaná kʼianga sakʼoa joxi tsínná nganʼio maná (2 Cor. 12:10).
• Jméni xi sʼiaan nga tosi tonda si̱ndayasaa yaoná, tsandalani kui tibixkantʼakoaa xi chʼaotjín kʼoa tsa jmeni xi ñʼai kjimaná nga tinindayá yaoná (Efes. 4:23).
3. Kʼianga jeya tiyoaa ya kjoajtíntse xi jngo nichxin, jmésani xi koa̱n sʼiaan kʼianga nʼio nda katabasenkaoná.
3 Nʼio nda koasenkaoná jme xi sa̱kóyaná ya kjoajtíntse jebi. Kʼoa tojo ma kʼianga satío je kjoajtíntse xi jao nichxin kao xi jan nichxin, kʼoati koa̱n jchasaa je ndsʼee kao tichjaa xi kjaʼaí jtín tjío xi tsjoá koa̱n si̱miyoaa kʼianga sa̱tío kjoajtíntse jebi (Sal. 133:1-3; 2 Cor. 6:11-13). Kʼianga jeya tiyoaa, koaan si̱kʼayaa nichxin kʼianga chja̱kaonajmiá je xi miyoná mani kʼoa si̱miyosaa je xi kje ʼyaxkonjián. Kʼoa tsa jngo superintendente xi tsʼe distrito kʼoa tsa jngo ndsʼee xi ya Betel síxá kuichotsjoá kjoanokjoaya, koaan kjuinchónlee kʼoa chja̱kaonajmiá tsa je kʼoa tsa je chjoónle. Tojosʼin tiʼyaa, nkjín koya josʼin koasenkaoná kjoajtíntse jebi. Ñaki jemená nga katasʼejna, tsí jaon.