Xi sakʼoa chjonangiaa

◼ A koaan si̱chjén Internet nga chja̱kaoñá Énle Niná kʼoa tsa estudio kʼoailee je chjota xi tsín ʼyaxkoaan xi xin naxinandá tjío

Tjío naxinandá jñani tsín tjoʼndele je testigole Jeobá nga bakóyason kʼoa tsa choa testigo tjío, kʼoa tjínkʼa publicador xi Internet síchjén nga kʼoatsole je chjota xi ya tjío naxinandá jebi tsa mele nga estudio kʼoaile. Sakʼoaa masjaile chjota xi nda kotʼaya. Tonga xkón tíjna tsa correoná kʼoailee kʼoa tsa je chja̱koaa je chjota xi tsín ʼyaxkoaan ya Internet (chótʼai Nuestro Ministerio del Reino xi tsʼe sá julio nó 2007, pájina 3). Ningalani kui xi mená nga kʼuínyalee Énle Niná je chjota xi ndʼé tjío ni̱ma̱le, tonga mani nga tsín ʼyaxkoaan tsakuini nichxin chʼao kjoan je chjota xi tichjakoaa kʼoa tsa saʼnda je chjota xi yátsʼi̱n tsakasénle Niná (1 Cor. 1:19-25; Col. 2:8). Xi ijngosani, ya naxinandá jñani ñaki tsín tjoʼndele je testigole Jeobá kʼoa tsa jmenije̱ xi tsín tiʼndele nga kʼoasʼín, tsakui nichxin je chjotaxá kotʼa jmeni xi nikasén. Tsa kʼoasʼiaan, tochale xkón tinikatioá je ndsʼee xi ya tjío. Kuenta sʼiaan jebi: alikui koa̱n Internet si̱chjén nga kjoásjee je chjota xi xin naxinandá tjío nga Énle Niná chja̱kaoñá.

Kʼiatsa jngo chjota xi xin naxinandá kafaʼaini ska̱jiaan kʼoa chja̱kaoñá Énle Niná, alikui koa̱n tosi tonda kjoásjee nga kʼuínyalee kʼianga jekoaini ya naxinandále. Tonga tsa kjaʼaí kjoafaʼaitsjen tsjoá je sucursal xi kjinentsja ya jñani ʼmiyasoán, kui koanngíntjenngiaa. Tosa kui koakoyalee jósʼin koa̱nsjaisale ya jw.org jmeni xi mele skoe̱ kʼoa jósʼin koa̱n kuinchja̱ ya sucursal xi kjinentsja ya naxinandále. Kʼoati koa̱n kʼoakʼuínlee nga katabásjai je Ndʼia jña kotʼaya je Testigole Jeobá xi chrian koa̱nle. Kʼiatsa mele nga kuichonixatʼa ya niʼyale, koaan chjónangilee joʼmi, jña tíjnani kʼoa kao númerole teléfonole. Kʼia kʼoailee je xi secretario sʼin tíjna ya jtínná ánni nga sikasénsíni ya Betel, ya tjen jw.org. Je sucursal xi kjinentsja ya naxinandále chjota jebi, ngisa be josʼin koasenkao nga̱ bení jochon ya ʼndele (chótʼai xo̱n Xá xi nʼia tʼatsʼe Niná xi tsʼe sá junio nó 2014, pájina 7, kao Nuestro Ministerio del Reino xi tsʼe sá noviembre nó 2011, pájina 2).

Kʼiatsa tʼaxin naxinandá koai jngo chjota xi jetinixatʼaa, kʼoa tsa estudio tibʼailee jngo chjota xi tʼaxin naxinandá tíjna kʼoa toya Internet ʼmiyanilee, kui koanngíntjenngiaa jotso párrafo xi jekabitjakoaa. Tonga koaan tosi tondala kuisenkoaa chjota jebi saʼnda nga je kuichokonle je ndsʼee xi ya tsʼe. Tonga tsa ya tíjna ya naxinandá jñani tsín tjoʼndele je testigole Jeobá nga bakóyason kʼoa tsa jmenije̱ xi tsín tiʼndele nga kʼoasʼín, nʼio nda si̱kuindaa yaoná kʼiatsa Énle Niná si̱kʼaxkiaa ya karta xi chjílee, kʼiatsa teléfono kuinókjoalee kʼoa tsa correo si̱kasénlee (Mat. 10:16).