Jósʼiaan nga ndasa kʼuínyasoán: si̱chjén je libro “Tosi tonda katasʼeno kjoatsjoachale Niná” nga kuichokajin ni̱ma̱le chjota je Énle Niná

ÁNNI NGA NʼIO CHJÍSÍNILE NGA KʼOASʼIAAN: Je chjota tjínnele nga skoe̱ je kjoatéxomale Jeobá kʼoa tjínnele sitjoson, ánsíni nga je Jeobá sa̱sénnile josʼin skoe̱xkón (Isa 2:3, 4). Je libro “Tosi tonda katasʼeno kjoatsjoachale Niná” kui xi majaoni xi nichjén nga bʼailee estudio je chjota kʼoa binyakao nga majinle nga kʼoasʼin tjínnele koaikao yaole jotso je Énle Niná (Heb 5:14). Kʼianga koakoyalee je chjota kʼoénelee yaoná nga kuinyakoaa nga kuichotsaojin ni̱ma̱le je Énle Niná, ánsíni nga ñaki kao kjoatsjoa sikʼantjaiyani yaole (Ro 6:17).

JÓKOA̱N SʼIAAN:

• Nda kuiyondaa. Kuenta sʼiaan jmeni xi ñʼai male je chjota xi bʼailee estudio. Tongini si̱kjaʼaitsjeen jmeni xi chjónangilee nga jchaa josʼin síkjaʼaitsjen kʼoa jotjío kon xi tʼatsʼe jmeni xi tibakoyalee (Pr 20:5; be-S p. 259).

• Si̱chjén rekuadro xi faʼaitʼa je libro nga kuisenkoaa je chjota nga katamachoyale nga nʼio chjíle nga si̱tjosoán jmeni xi tso je Énle Niná.

• Kuisenkoaa je chjota xi tibʼailee estudio nga toje katakosonnile josʼin xi tʼatsʼe jmeni xi tsín kʼoatsokixi je Énle Niná, alikui koa̱n nga ñá kʼoakʼuínlee josʼin (Gál 6:5).

• Chósonnilee josʼiaan nga jchaa tsa jñanile kjoatéxomale Niná xi ñʼai kjimale nga tísítjoson je chjota xi tibʼailee estudio. Kʼoa ngasin nganda kʼoakʼuínlee nga katabʼénele yaole nga katasíkʼantjaiya yaole nga katabakó nga tsjoake je Jeobá (Pr 27:11; Jn 14:31).