Kisakole kjoatsjoacha

JE Yomara, Marcelo kao Hiver ndsʼe̱e fáo, tsín matsenle kʼoa yaa Guatemala tsʼe. Jé títjon Yomara kiskotʼaya Énle Niná kʼoa skan kiskotʼaya nga jao ndsʼe̱. Nga tsín male bʼéxkia braille jé xi kitsoyale Biblia tsakʼéxkiale párrafo kao textole Biblia.

Kʼoati ñʼai koanle nga ki kjoajtín, nga̱ ñachanla minuto kjin tíjna Ndʼia jña chotʼayá kʼoa tsín be josʼin ki nga toje. Je ndsʼee tsakʼéndajin ʼyani xi faʼakʼáto nga fi kjoajtín. Kʼoa nga jetsʼakaole jaʼa ya kjoajtín xi satíoná nga jinle xomana, jé ndsʼee tsakinyakao nga tsakʼéjinkon jmeni xi kitso.

Kʼianga sá mayo nó 2019 kʼiaa kisʼejna kjoajtín ya ʼndele. Kʼoa jngo ndsʼee kao chjoónle xi precursor regular sʼin tjíosíxá xi ya kikatio. Jé ndsʼee jebi kitsoyale je Yomara, Marcelo kao Hiver je én braille ninga tsín male tsanda je ndsʼee xi tʼatsʼe én jebi. Yaa ki jña tíjna jngo biblioteca nga tsabe josʼin chji nga én braille kʼoa josʼin sakóya.

Kʼoa tojngo jao sá jaʼato nga koanle tsakʼéxkia nga én braille nga jan xti jebi. Kui xi tsakinyakao nga ngisa koanjinsale xi tʼatsʼe Niná.a Kʼoa ndʼaibi precursor regular sʼin tjíosíxá nga jan, kʼoa je Marcelo siervo ministerial ma. Nkjín hora síkʼaya nga xki̱ xomana nga xále Niná sʼín. Nga kʼoasʼín nga jan ndsʼee jebi kʼoati matsjoajinle je ndsʼee xi ngikʼa.

Nʼio tsjoá kjoanda je Marcelo, Yomara kao Hiver nga tsakinyakao je ndsʼee kʼoa nga tjíobakóle nga tsjoake. Je Yomara itso: “Tsakakónajin nga tsjoake kjoaixinajin je ndsʼee josaʼnda nga tsaʼyaxkuinjin”. Kʼoa itso Marcelo: “Nʼio nda chobaijin kao je ndsʼee xi tjío ya jinjtín, kʼoa tsjoachangañáñá xíngiaa kao ngatsʼi ndsʼee xi tjío jngo tjíjtsa Sonʼnde”. Jemele je Yomara kao nga jao ndsʼe̱ nga katafaʼai nichxin nga ʼndenaxó koa̱n Sonʼnde (Sal. 37:10, 11; Is. 35:5).