1925: Jejngo siento nó jaʼato

ALIKUINI KITJOSON JMENI XI KISKOYALE

Nkjín Chjota xi kotʼaya Biblia xi kui kiskoyale nga ʼndenaxó koa̱n sonʼnde nga nó 1925, tonga tsínni kʼoakoan. Nga koanskanni, je ndsʼee Albert Schroeder, xi ya tsakʼejnajinle Cuerpo Gobernante, i kitso: “Kʼoasʼin kinikjaʼaitsjainjin nga kʼia koai ngʼajmi je chjota xi ya koatexomakao Cristo kʼoa nga kʼia kjoaʼáyanile chjota xi tsakatio nichxin kjoatse. Jolani Abrahán, David kʼoa kao xi kjaʼaísa. Nga xá kʼoaile kʼoa nga je koandiaale chjota xi koatio i̱ sonʼnde”. Tonga nga tsínni kʼoakoan tjínkʼa xi tsín nda kisatio kon (Prov. 13:12).

Ningalani kʼoakoan je Chjota xi kotʼaya Biblia tosi tonda kitsoyason kʼoa koanjinle nga kui xi ngisa chjíle nga kui kuinchja̱ni xi tʼatsʼe Jeobá. Kataʼyala jósʼin kisichjén je radio nga ngisasa nkjín ʼnde kitsoyason.

NKJÍN ESTACIÓN XI TSʼE RADIO KISATIO

Nʼio nda kichomani nga jngo estaciónle radio kisʼejna nga nó 1924, xi WBBR tsakʼin. Nga tsabe je Chjota xi kotʼaya Biblia nga nkjín chjota kinrʼoéle radio jebi, kʼiaa ijngo estación tsakʼénda ya chrian Chicago (Illinois), xi WORD tsakʼin. Kʼoa jngo chjota xi Ralph Leffler ʼmi xi ya kisixá nga kisʼenda estaciónle radio, i kitso: “Nda kinrʼoéle radio je chjota ninga kjin tjío kʼoa ninga nʼio nyʼán”. Tobʼelañá, jngo familia xi tsʼato 5,000 kilómetro kjin tíjna xi ya Pilot Station (Alaska) nchja̱ni kinrʼoéle je radio, kʼoa kʼianga jejetʼa jngo carta kiskile je chjota xi ya síxá jñani tíjna je radio, kʼoakitsole nga nda kisʼin nga ya tjen radio kinoʼyanile je Énle Niná.

Kʼianga kitjo je revista xi tsʼe 1 sá diciembre nó 1925 nga én inglés, kui kinchja̱ni tʼatsʼe je radio xi WORD tsakʼin, kʼoa itso xi jaʼaitʼa: “Kui radio jebi xi ngisasa kjin kinoʼyale xi kisʼejna ya Estados Unidos nga̱ 5,000 vatios kisʼele, kinoʼyale tjen Cuba saʼnda Alaska. Nga kʼoakoan, nʼio nkjín chjota kinrʼoé je Énle Niná kʼoa koanmele tsabesa”.

Nga tikuini nichxin je Chjota xi kotʼaya Biblia kʼoati koanmele nga radio sichjén nga kuitsoyason ya Canadá. Kʼianga nó 1924 kʼiaa tsakʼénda je radio xi CHUC tsakʼin ya Saskatoon (Saskatchewan) kʼoa kui xá kisʼendani nga tʼatsʼe religión kuinchja̱ni. Kʼianga nó 1925 je Sociedad Watch Tower tsakjáoyani kʼoa kʼoakitso nga ngisa nda nga xin ʼnde koaikao je radio, kʼiaa tsakatse kʼoa yaa kikao ya Regent Building, jngo ndʼia xi tíjna ya Saskatoon.

Nga kisʼejna je radio jebi nʼio nkjín chjota kinrʼoé xi kjintʼa tsʼe xi tiyani Saskatchewan. Jolani jngo chjoón xi ya tsʼe jña McKague ʼmi xi nio kjintʼa tíjna, koanmele nga kinikasénle je xo̱n xi Énle Niná yʼangini. Kʼoa je ndsʼee George Naish, i kitso: “Je chjoón jebi nʼio koanmele nga kinikasénle xo̱n xi Énle Niná yʼangini, kuinga kinikasénnilaijin ngayeje Estudios de las Escrituras”. Kʼoa tochoatse jaʼato nga tsakjákaonajmíni Énle Niná je chjota xi kjintʼa tjío.

KOANKIXIYAA JOSʼIN MAKJAINNÁ

Je revista xi kitjo nga 1 sá marzo nó 1925 nga én inglés, jngo artículo jaʼaitʼa xi “Nacimiento de la nación” tsakʼin. Ánni nga nʼio nda tsakinyakaoni artículo jebi je Chjota xi kotʼaya Biblia. Ningalani jebe nga je Na̱i kjinentsja je sénnichxin xi chʼaokjoan, je religión ndiso, josʼin maxákao tao̱n jngo tjíjtsa sonʼnde kʼoa kao kjoa política, kuinga kʼoakitsoni revista jebi nga kʼoati tíjna jngole jtín Jeobá xi tsín mangóson kao tsʼe Na̱i (Mat. 24:45). Kʼoati kitso nga kʼia nga nó 1914 tsakʼétsʼiakao nga tsakatéxoma je Chjotaxále Niná ya ngʼajmi kʼoa nga kʼia kinikʼatsaojenngi i̱ sonʼnde je Na̱i kao sénnichxin xi chʼaokjoan (Apoc. 12:​7-9).

Tjínkʼa je Chjota xi kotʼaya Biblia xi tsín kisasenle jotso revista xi kitjo, tonga tiyaa jaʼaitʼani revista jebi je én xi i̱ tso: “Kʼiatsa ʼya xi tsín sasénle jmeni xi tso revista jebi tsejta katama, katakoyale je Nainá kʼoa tsje katafikao yaole”.

Jngo colportor (xi precursor sʼin ʼyale ndʼaibi) xi Tom Eyre ʼmi xi ya tsʼe Gran Bretaña, kʼoakitso jokisʼin je ndsʼee xi Biblia kotʼaya kʼianga tsakʼéxkia je artículo xi kitjo. Itso: “Tsjoa kisatio tokuinjin kʼianga koanjinnajin jmeni xi tso Apocalipsis 12. Kʼianga koanjinnajin nga jetíbatéxoma je Chjotaxále Niná ya ngʼajmi, kichjakaonajmínijin xi kjaʼaí. Ngisasa tse tsakʼinyasuinjin kʼoa koanjinnajin josʼin tíbándiaale Jeobá je naxinandále kʼoa nga ngisasa tse xá sʼe̱”.

KOANJINNAJIN NGA NʼIO CHJÍLE NGA SA̱KÓYASON XI TʼATSʼE JEOBÁ

Ñá xi testigole Jeobá maa ʼyañá jmeni xi tso Isaías 43:10 nga i̱ tso: “Jonño testigona kui xi tso je Jeobá, je choʼndana xi kiskoejian”. Tongini nga nó 1925 tochoaa kʼa kichotʼayajin jmeni xi tso Isaías 43:10. Tonga 11 revista kitjo kʼianga nó 1925 nga én inglés xi kui kinchja̱ni jmeni xi tso Isaías 43:​10, 12.

Kʼianga tífikjetʼa sá agosto nó 1925, je Chjota xi kotʼaya Biblia jngo kjoajtíntse kisʼejnale ya Indianápolis (Indiana). Je programale kjoajtíntse jebi kui jaʼaitʼa jmeni xi kitso je ndsʼee Joseph Rutherford. Itso: “Kui xá kafaʼaiñá kjoajtíntse jebi nga tsjoánganʼioná je Niná, ánni nga tosi tonda kʼuínyasonñá”. Jin nichxin kisʼejna je kjoajtíntse kʼoa kui kinokjoani nga kʼuínyalee Énle Niná je chjota tojñani sa̱téjiaan.

Kʼianga xoto nga 29 sá agosto, je ndsʼee Rutherford jngo kjoanokjoaya kitsjoa xi i̱ ʼmi: “Una llamada a la acción”. Kʼoa kui kinchja̱ni nga nʼio chjíle nga kʼuínyasoán. I kitso: “Jonño testigona […] kʼoa anña Niná”. Kʼoa xijema, itso: “Jngo choa̱ tʼejnao xi skoe̱ je naxinandá xi tjío (Is. 43:12; 62:10). Alikui ʼya xi tjín xi koa̱nle kʼoejna choa̱ nga katabe je naxinandá, tojékjoán je choʼndale Niná xi kao nganʼiotsjele bándiaanile”.

Kʼianga jekitsjoa kjoanokjoaya je ndsʼee Rutherford, kui tsakʼéxkia jmeni xi toxá kisʼendajinni xi “Mensaje de esperanza” tsakʼin. Kʼoa kʼoakitso nga toje Chjotaxále Niná xi sichikontʼainná nga nda kuiyoaa, nga tsín tichʼin sʼe̱niná, nga nda kuiyoaa ngantsjai nichxin, nga ndái kuiyoaa kʼoa nga tsjoa sa̱tío tokoán. Kisasenle ngatsʼi jmeni xi kisʼendajin. Xijekoanni nkjín én jaʼatoya xo̱n jebi kʼoa ñachanla millón tsʼabíson.

Ningalani kje testigole Jeobá ʼmijin je Chjota xi kotʼaya Biblia nga kʼia, koanjinle nga kui xi ngisa nʼio chjíle nga kuitsoya xi tʼatsʼe Jeobá.

KIKON IJNGOKʼALE JE CHJOTA XI NDA KINRʼOÉ

Kʼianga sa nkjín sa nkjín koan je Chjota xi kotʼaya Biblia jngo tjíjtsa sonʼnde, je naxinandále Jeobá kʼoakitsole nga katafikon ijngokʼale je chjota xi nda kinrʼoé kʼianga kitsoyason. Kʼianga jetsʼabíson je xo̱n xi “Mensaje de esperanza” tsakʼin, je xo̱n xi Bulletin tsakʼin,a itso xi jaʼaitʼa: “Tangínchon ijngokʼalao je chjota xi kiskoé je xo̱n “Mensaje de esperanza” ninga tsín jme xo̱n xi kjaʼaínile kiskoé”.

Je Bulletin xi kitjo sá enero nó 1925 kui jaʼaitʼa jokitso jngo ndsʼee xi ya Plano (Texas) tsʼe. I kitso: “Ngisaa nda tinrʼoéngáni je chjota kʼianga jenkjín kʼa bichochonlee, tikʼoajinni nga tokʼia bichotítjoán. Jngo ʼnde tíjna jñani jeʼaon kʼa tsangínjin je xi te nó tífaʼato. Je mana kao je tichjaa Hendrix chriansʼaa kikakóyason kʼoa nkjín libro kisikáyole je chjota”.

Jngo colportor xi Panamá tsʼe, i kitso: “Nkjín chjota xi tsín nda kinrʼoéna nga tokʼia kichokon títjonle, tonga kʼianga jejao jan kʼa kichokonle ndani kinrʼoé. Nó jebi ngisaa kui titsjoale kjoandosin nga tifikon ijngokʼale je chjota xi nda nrʼoé je Énle Niná. Nga kʼoatisʼian nʼio ndasʼin tíbichómani”.

JOSʼIN KOANXÁ NGA KOANSKANNI

Je carta xi kisikasénle ndsʼee Rutherford je xi colportor sʼin tjíosíxá, kʼoakitsole josʼin koanxá nga kui nó kʼoa jmesa xá xi sʼa sʼe̱. Itso xi kiskile: “Je nó xi jaʼato nʼio nkjín chjota kininʼio kon kʼoa nʼio tsjoa tjío tokon nga kʼoakinʼiao. Nó jebi tosi tonda tʼinyason, katabe je chjota nga testigole Niná mao kʼoa nga ya bʼainganʼiolao je Chjotaxále. Tosi tonda si̱xájtián nga chʼa̱sjengʼaa je Nináná kʼoa kao xi Rey sʼin tíjnaná”.

Nga tífe nó 1925, je ndsʼee kui tsakjáoyani nga ngisa yʼai sikjoan je ndʼia xi kjio ya Brooklyn (Nueva York). Kʼoa kʼiaa nga nó 1926 tsakʼétsʼiakao nga tsakʼénda.