Josʼin tjínndajin je kjoajtín Tʼatsʼe chjotale Cristo kao Xále Niná

Isʼin faʼaitʼa

1. Xo̱n jebi kui tsoya jotjínnele sʼin ngatsʼi xi kʼoakaole nga kjoaʼa je kjoajtín Tʼatsʼe chjotale Cristo kao Xále Niná. Xi ijngosani, nga kjesa bʼénda xi bʼakaole, machjén nga kʼoexkia jme xi tso je Xo̱n xi tjítʼa jme xi chotʼayá ya kjoajtín tʼatsʼe chjotale Cristo kao Xále Niná nga̱ yaa tsoya jmesa xi koa̱n sʼin je xi kʼoakaole nga kjoaʼa ya kjoajtín. Koaan kʼoakʼuínle ngatsʼi xi jetsoyason nga koa̱n kjoaʼachoya ya jinjtín ánni nga ngisa koa̱nnile josʼin kuitsoyason. Kʼoati koa̱n kjoaʼa je chjota xi jebichóntsjai kjoajtín kʼiatsa makjainle jmeni xi tso Biblia kʼoa tsa kʼoasʼin tjíofikao yaole jotso Énle Niná. Kʼiatsa ʼya xi kje publicador ma tonga tsa jemele kjoaʼa ya plataforma, jé kjoakaonajmí je xi superintendente sʼin tíjnale je kjoajtín Tʼatsʼe chjotale Cristo kao Xále Niná ánni nga kʼoakuitsonile jmeni xi machjén nga sʼin kʼoa xijekoa̱n, skaan kʼoakuitsole tsa jetísítjoson jmeni xi síjé je naxinandále Niná. Kʼianga kuinókjoakao tjínnele kʼoati ya kʼoéjna je xi tsjoále estudio (kʼoa tsa jngo xijchále xi kʼoati tíkotʼaya). Tikuini kjoafaʼaitsjen xi tjínnele koaitjenngi tsa ʼyani xi mele nga publicador koa̱n (od-S cap. 8 párr. 8).

ÉN XI SʼE̱TSʼIAKAONI

2. Jngo minuto. Kʼianga jekuijndá kʼoa nga jesʼe̱jna kjoabʼetsʼoa, je xi presidente sʼin kʼoéjnale je kjoajtín Tʼatsʼe chjotale Cristo kao Xále Niná kui kʼoakuitso jmeni xi kjoaʼa ya kjoajtín kʼoa kʼoati kʼoakuitso jmeni xi koasenkao je jtín.

ÉN XI NʼIO CHJÍLE XI NYA BIBLIA

3. Kjoanokjoaya: (10 minuto). Je Xo̱n xi tjítʼa jme xi chotʼayá yaa faʼaitʼa joʼmi kjoanokjoaya kʼoa kʼoati faʼaitʼa tsa jao kʼoa tsa jan koya én xi nʼio chjíle. Kjoanokjoaya jebi jé kjoaʼa jngo xi chjotajchínga sʼin tíjna kʼoa tsa jngo siervo ministerial xi jenda male bakóya. Kʼianga sʼa koaitsʼia jngo librole Biblia jngo video sa̱kó xi kui tínchja̱ni libro jebi. Je xi kuinchja̱ya koaan ya skoé choanile je video jme xi kuitso nga sijngokao je kjoanokjoayale. Je sén xi faʼaitʼa kui xá tjíoni nga sichjén je xi títsoya nga̱ yaa majngokao jmeni xi tínchja̱ni je kjoanokjoayale kʼoa nga tsín kjoaʼatone jokji tse bʼakaole. Kʼoati koa̱n koasjaiyasa jñani xin tsa tikui nchja̱ni jmeni xi tso kjoanokjoayale.

4. Kjoásjaiyaa én xi nʼio chjíle xi nya Biblia: (10 minuto). Je xi kʼoakaole nga kjoaʼa toskónanginí. Jé kʼoakaole jngo xi chjotajchínga sʼin tíjna kʼoa tsa jngo siervo ministerial xi jenda male bakóya. Tjínnele sikatío nga jao kjoachjonangi xi faʼaitʼa. Kʼoati je xi kuitsoni tsa kʼoexkia ngayeje texto xi faʼaitʼa. Je xi tsjoá comentariole tjínnele to 30 segundo kʼoa tsa choasa kuinchja̱.

5. Jña koa̱nxkia Biblia: (4 minuto). Jngo ndsʼee kjoaʼa xi tokʼoexkia. Je xi presidente sʼin kʼoéjnale je kjoajtín kui xi ngisa kuenta sʼin josʼin koasenkao je ndsʼee nga katamajinle jmeni xi tíbʼéxkia, nga nda katabitjo énle, nga kʼoasʼin katanchja̱ josʼin nchja̱ntsjai, nga kuenta katasʼín jña tjío punto kao coma kʼoa nga nʼio kʼoa tsa xa̱n katabʼéxkia jñani bakinle. Je xi superintendente tíjnale je kjoajtín tjínnele kuenta sʼin ʼyáni xi skoéjin nga kʼoexkia, nga̱ tjíokʼa je textole Biblia xi tse mani.

NDA KOAKOYAA ÉNLE NINÁ

6. 15 minuto. Kui xá faʼani jebi nga kuinyakao ngatsʼi xi bichó kjoajtín nga ngisasa koa̱nle josʼin kjoakaonajmí je chjota, nga koa̱nle kuitsoyason kʼoa nga koakoya je Énle Niná. Kʼoati koa̱n kjoaʼa ninga je xi chjotajchínga sʼin tjío xi bʼakaole jñani tso Nda koakoyaa Énle Niná kʼoa tsa kuije̱ Jña koa̱nxkia Biblia. Je xi kʼoakaole tjínnele kuenta sʼin jmeni xi faʼaitʼa je Xo̱n xi tjítʼa jme xi chotʼayá kʼoa paréntesis tjíoya je kjoaʼmiya xi sixákao xi tsʼe folleto Tosi tonda nda tʼexkiai kʼoa nda takoyai kʼoa tsa kuije̱ folleto ʼMiyalee chjota nga̱ tsjoachañá. Tjínkʼa xomana xi kao je jtín chótʼayajin kʼoa jé kʼoakaole jngo xi chjotajchínga sʼin tíjna kʼoa tsa jngo xi siervo ministerial sʼin tíjna xi nda male bakóya (chótsenlai párrafo 15 jméni xi tjínnele sʼiain kʼiatsa kui kʼoakaoli xi kao je jtín chótʼayajin).

7. Katamali josʼin chja̱kaonajmí chjota: Jé kʼoakaole tsa jngo ndsʼee kʼoa tsa jngo tichjaa. Alikui koa̱n jngo chjoón jngo xʼin kjoaʼa, tokʼiaa tsa xínkjín mani nga koa̱n. Koaan kuinyando kʼoa tsa koatio nga kjoaʼa (tsa mesali jchai josʼin xi kjoaʼachoya kʼoa josʼin kjoakaonajmí xínkjín, chótsenlai párrafo 12 kao 13).

8. Tʼinchón ngindialai: Jé kʼoakaole tsa jngo ndsʼee kʼoa tsa jngo tichjaa. Alikui koa̱n jngo chjoón jngo xʼin kjoaʼa, tokʼiaa tsa xínkjín mani nga koa̱n (km-S 5/97 pág. 2). Koaan kuinyando kʼoa tsa koatio nga kjoaʼa. Je xi kʼoakaole tjínnele kʼoakuitsochoya jókuitsole nga kuichokon ijngokʼa je chjota xi kafákaonajmí (tsa mesali jchai josʼin xi kjoaʼachoya kʼoa josʼin kjoakaonajmí xínkjín, chótsenlai párrafo 12 kao 13).

9. Tʼinyalai: Jé kʼoakaole tsa jngo ndsʼee kʼoa tsa jngo tichjaa. Alikui koa̱n jngo chjoón jngo xʼin kjoaʼa, tokʼiaa tsa xínkjín mani nga koa̱n (km-S 5/97 pág. 2). Koaan kuinyando kʼoa tsa koatio nga kjoaʼa. Je xi kjoaʼachoya tokoakochoya josʼin tsjoá estudio. Alikui machjén nga koako jonʼia nga sʼa bʼetsʼiakoaa kʼoa nga nikjetʼaa nga bʼé estudio, tokʼiaa koa̱n kʼoasʼin kʼiatsa kʼoatso Xo̱n xi tjítʼa jme xi chotʼayá nga kui katasíxákao. Kʼoati tsín machjén nga ñaki kʼoexkia jmeni xi tso je xo̱n xi títsoya, ninga sakʼoa koa̱n kʼoasʼin.

10. Tʼeyanajmí josʼin makjainli: Kʼiatsa kjoanokjoaya, jngo ndsʼee kjoaʼa, tonga tsa escenificación koaan jngo ndsʼee kʼoa tsa jngo tichjaa kjoaʼa. Alikui koa̱n jngo chjoón jngo xʼin kjoaʼa, tokʼiaa tsa xínkjín mani nga koa̱n. Je xi kʼoakaole tjínnele nga kao kjoaxkóntokon kuitsoya, nga koanjinná xi tínchja̱ni je kjoachjonangi xi kabʼakaole kʼoa nga ya skoénile je referencia xi faʼaitʼa. Tsa je xi mele koaan kʼoakuitso jña tíkjoénile jme xi tíbakóya tonga kʼoati tsín jme xi koa̱nle ninga tsín kʼoakuitso.

11. Kjoanokjoaya: Kjoanokjoaya jebi jngo ndsʼee kʼoakaole kʼoa tokuinchja̱yajinle je jtín. Kʼiatsa ya kʼoakaole nga skoénile ya apéndice A xi tsʼe folleto ʼMiyalee chjota nga̱ tsjoachañá, je xi tsjoá kjoanokjoaya tjínnele kʼoakuitso jósʼin koa̱n si̱chjén texto xi faʼaitʼa kʼianga kʼuínyasoán. Tobʼelañá, koaan kuitsoya jósʼin tsoyanile je versículo xi faʼaitʼa, kʼiáni koa̱n si̱chjén kʼoa jósʼin si̱chjén nga katamachoyale je chjota jme xi tiʼmiyalee. Kʼiatsa ya skoénile jngo kjoaʼmiya xi faʼaitʼa je folleto, tjínnele nga kui ngisa tsjoále kjoandosin jósʼin koa̱n si̱chjén kʼianga kʼuínyasoán. Kʼiatsa skénndiaale koaan kui sikʼaxki̱ je choa̱ xi faʼaitʼa ya punto 1 xi tsʼe kjoaʼmiya xi títsoya kʼoa tsa maije̱ koaan kui sichjén je texto xi ya faʼaitʼa.

12. Josʼin xi kjoaʼachoya: Je kjoafaʼaitsjen xi faʼaitʼa párrafo jebi kao xi ijngo kui tínchja̱ni jokoa̱n sʼin je xi kjoaʼachoya tsa kui kʼoakaole kjoaʼa jñani tso “Katamali josʼin chja̱kaonajmí chjota” kao ya jñani tso “Tʼinchón ngindialai”. Je xi kʼoakaole nga kjoaʼa tjínnele choa ñʼai sʼin kuitsoyale je xi kjoakaonajmí kʼoa nga sikʼéjnachxʼoá jme xi kjoakaoni nga koanskanni. Tokʼia nga tsín kui kjoafaʼaitsjen jebi koaitjenngi kʼiatsa kjaʼaí tso je Xo̱n xi tjítʼa jme xi chotʼayá. Koaan kui kuinchjani jmeni xi ngisa mandosinle je chjota ya jñani tsoyason. Jé xi kuitsoni tsa mele jngo video koako kʼoa tsa jngo xo̱n xi nichjén sikájnale. ʼNdele nga tokʼoejinkon jme xi kuitso, tongisa nda nga kʼoasʼin kjoakaonajmí je chjota josʼin ngale kʼoa nga ñaki katamandosinle xi tʼatsʼe.

13. Josʼin kjoakaonajmí xínkjín: Je xi kʼoakaole tjínnele kui kʼoasʼinchoya jmeni xi ma jñani tsoyason kʼoa koaan sichjén tojñanile nga jan koya xi faʼaitʼa i̱bi. Tobʼelañá:

(1) Xki̱ ndʼia xki̱ ndʼia: Kui xotsole nga ya ndʼiale mangínchonlee (tsa chja̱kaongaʼaa, tsa teléfono kuinókjoalee kʼoa tsa carta chjílee) kʼoa tsa kʼiaje̱ nga chjakaonajmí ijngokʼá je chjota.
(2) Nga tojña ʼmiyaa: Kʼianí nga bijbi Énle Niná chjakaoñá chjota ninga totsaan xá tinʼia. Tobʼelañá, tsa ya tʼaxáná tiyoaa, tsa ya ndʼia skuela, tsa ya jña tiyoñá, tsa carro tiyoyá kʼoa tsa jñasa titsomaa.
(3) Nga ya ʼmiyaa jña nkjín chjota tjín: Xi tsonile, nga kui carrito nichjén nga ʼmiyaa, nga ya ʼmiyaa jña negocio tjín, ya calle, parque, jña fayo carro kʼoa jñasani nga nkjín chjota tjín.

14. Josʼin koa̱nchjén xo̱n kao video: Je xi kjoaʼachoya jé xi kuitsoni tsa video koako kʼoa tsa kui sichjén je xo̱n xi Énle Niná yʼangini. Kʼiatsa kʼoatso je Xo̱n xi tjítʼa jme xi chotʼayá nga video koa̱nchjén kʼoa tsa mele xi kjoaʼachoya nga kui sichjén alikui ñaki koako, tonga tjínnele kʼoakuitso nga kui skótsenle kʼoa nga skótʼayajin.

JONʼIA XI CHJOTALE CRISTO MAA

15. Jngoo kjoajnda sʼe̱tsʼiakaoni kjoajtín jebi. Je xi títjon 15 minuto jngo kʼoa tsa jao kjoanokjoaya kjoaʼa. Kjoanokjoaya jebi koasenkaoná nga si̱chjén kjoafaʼaitsjen xi faʼaitʼa je Énle Niná. Jé kʼoakaole jngo xi chjotajchínga sʼin tíjna kʼoa tsa jngo siervo ministerial xi jenda male bakóya. Tonga je xi kjoaʼa “Xi machjénná i̱ jinjtín” tojé xi chjotajchínga sʼin tjío. Kʼianga kao je jtín chotʼayajin xi faʼaitʼa je Xo̱n xi tjítʼa jme xi chotʼayá, je ndsʼee xi kʼoakaole kjoaʼa koaan koatiosa kjoachjonangi xi kjaʼaínile ánni nga nda koa̱njinnile je ndsʼee jme xi tínchja̱ni. Tjínnele nga tochoa én sichjén nga kʼoetsʼiakao ánni nga chóyanile jokji tsje bʼakaole kʼoa nga tosa kui kuitsoya xi ngisa tjínle kjoandosin kʼoa nga koa̱n tsjoá comentariole je ndsʼee. Kʼiatsa jngo entrevista kjoaʼa, tsa kʼoakoa̱nle, tongisa nda tsa ya tjen plataforma kjoaʼa je ndsʼee kʼoa tsa tichjaa xi tjoéjin kʼoa nga tsín toya tjen ʼndele kuinchja̱ni.

16. Nga chotʼaya Biblia: (30 minuto). Jé kʼoakaole jngo xi chjotajchínga sʼin tíjna xi nda male bakóya (ya jtín jñani tojngo jao mani xi chjotajchínga sʼin tjío, koaan koa̱nchjén je xi siervo ministerial ma xi nda male bakóya). Jé xi chjotajchínga sʼin tjío bʼéndajin ʼyáni xi koa̱n kʼoaile kjoanda jebi. Je xi kʼoaile kjoanda jebi machjénní nga katamale josʼin koandiaa nga chótʼaya, nga tsín sikʼatone jotjín minuto bʼakaole, nga tokui texto xi nʼio machjén sikʼaxki̱ kʼoa nga koasenkao xi tjíobasen nga katamajinle jméni xi bakóyaná je xi tíchotʼaya. Tjasjaijion josʼin tjínnele sʼe̱ndiaa kʼianga kui chotʼaya xo̱n xi kjoachjonangi faʼaitʼa kʼoa nga tsjoá comentariole je ndsʼee (w23.04 pág. 24, recuadro). Alikui ñaki tjínnele 30 minuto kjoaʼa tsa jekachotʼayajin jmeni xi tínchja̱ni. Koaan kjaʼaí kjaʼaí ndsʼee koandiaa nga xki̱ jin nichxin kʼoa kjaʼaí kjaʼaí xi kʼoexkia. Kʼiatsa je xi presidente sʼin kʼoéjna kʼoakuitsole nga katasíkʼangi choa jotjín minuto bʼakaole, skósonnile josʼin. Tobʼelañá, koaan nga tsín katasʼexkia kʼa párrafo.

ÉN XI FETʼANI

17. Jan minuto. Je xi presidente sʼin kʼoéjna kui sikʼaxki̱ ijngokʼa jmeni xi nʼio kanchja̱ni je kjoajtín. Kʼoati sikʼaxki̱ choa jmeni xi kjoaʼa xomana xi fini. Kʼoa tsa chóyasale minuto, kʼoati koa̱n sikʼaxki̱ jaʼaínle je xi kʼoakaole kʼoexkia Biblia kao xi kjoaʼachoya. Je xi presidente sʼin kʼoéjna koaan kʼoakuitso tsa jme én xi sʼe̱jinkon je jtín kʼoa tsa jme carta koa̱nxkia xi nʼio machjén. Tonga alikui ya tjen plataforma kʼoakuitso je én xi sʼejinkoaan ngantsjai, jolani jme hora bitjokʼinyasoán kʼoa kao je xi kʼoakaole sitsje ya jña biyojtián. Yaa tablero sʼe̱tʼa. Tonga tsa tsín chóyale jotjín minuto bʼakaole, koaan kʼoakuitsole je ndsʼee xi kʼoakaole kjoaʼa “Jonʼia xi chjotale Cristo maa” nga sichoaya jokji tse kjoaʼa kjoanokjoayale (chótsenlai párrafo 16 kao 19). Kao kjoajnda kʼoa kao kjoabʼetsʼoa kjoetʼani je kjoajtín.

KJOAFAʼAITSJEN XI KʼOAILE XI KJOAʼA KʼOA NGA KʼOAKʼUÍNLE JÑA NDA KASʼÍN

18. Kʼianga jekjoaʼa je xi kʼoakaole Jña koa̱nxkia Biblia kao ya jñani Nda koakoyaa Énle Niná tso, je xi presidente kʼoéjnale kjoajtín, tojngoo minuto tíjnale nga kʼoakuitso jmeni xi nda kasʼe kʼoa nga tsjoá kjoafaʼaitsjen xi ya skoénile je kjoaʼmiya xi faʼaitʼa je folleto xi bʼakaole. Kʼianga kʼoakuitso ʼyani xi kjoaʼa, alikui kui kʼoakuitso jmé kjoaʼmiya sichjén je xi kjoaʼa. Kʼianga jekjoaʼa kʼoa nga jekʼoakuitsole jmeni xi nda kasʼe, koaan kʼoakuitso jme kjoaʼmiya kasíchjén kʼoa ánni nga nda kasʼeni jme xi kafaʼachoya, kʼoa tsa maije̱ koaan ngasin nganda kʼoakuitsole nga tosi tonda kui katafitjenngi jmeni xi tso je folleto kʼoa jókoa̱n sʼin. Je xi presidente sʼin tíjna, koaan kʼoakuitsosale jmeni xi koasenkao je xi kafaʼachoya kʼoa tsa kuije̱ jme xi koasenkao je jtín. Tsa machjén nga kʼoaisale kjoafaʼaitsjen, koaan kʼoaitʼaxinle kʼianga jekjoetʼa kjoajtín kʼoa tsa kjaʼaí nichxinje̱ kʼoa yaa skoénile je folleto ʼMiyalee chjota nga̱ tsjoachañá, folleto Nda takoyai kʼoa tsakuije̱ libro Benefíciese, koaan kui kʼoakʼuínle je kjoaʼmiya xi kabʼakaole kʼoa tsa kjaʼaísanile (chótsenlai párrafo 19, 24 kao 25 tsa mesali jchai tʼatsʼe xá xi kjinele je xi superintendente sʼin tíjnale je kjoajtín Tʼatsʼe chjotale Cristo kao Xále Niná kao xi consejero auxiliar sʼin tíjna).

JOTJÍN TSE KJOAʼA

19. Ngatsʼi je ndsʼe xi kʼoakaole kjoaʼa nga sʼe̱jna kjoajtín alikui koa̱n sikʼatone jokji tse bʼakaole (kao jmeni xi kuitso je xi presidente sʼin tíjna). Kʼiatsa jenda katsoya jngo ndsʼee jme xi kabʼakaole alikui timachjénni nga jmesa xi kʼoetʼason tojoni nga kʼoatjín minuto sʼin jotjín minuto faʼaitʼa je Xo̱n xi tjítʼa jme xi chotʼayá. Kʼiatsa jngo ndsʼee kʼoa tsa jngo tichjaa xi kjoaʼatone jotjín minuto bʼakaole, je xi presidente sʼin tíjnale kjoajtín kʼoa tsa jeje̱ xi consejero auxiliar sʼin tíjna kuinchja̱tʼaxínle nga tsjoále kjoafaʼaitsjen (chótsenlai párrafo 24 kao 25.) Tojngo hora kao 45 minuto sʼe̱jna je kjoajtín. Yaa maxki̱kao je kjoajnda kao kjoabʼetsʼoa.

KʼIANGA SÍXATʼA JTÍN JE SUPERINTENDENTE XI TSʼE CIRCUITO

20. Kʼianga tísíxatʼa jtín je superintendente xi tsʼe circuito, kʼoantjaiyajin josʼin tjínndajin je Xo̱n xi tjítʼa jme xi chotʼayá. ʼNdele nga kui kjoaʼa “Nga chotʼaya Biblia”, je superintendente xi tsʼe circuito jngo kjoanokjoaya tsjoá xi 30 minuto. Tonga nga kjesa faʼajin kjoanokjoaya jebi, je xi presidente sʼin tíjna kui sikʼaxki̱ choa jmeni xi kafaʼa je kjoajtín xi kasʼejna kʼoa kʼoati sikʼaxki̱ jmeni xi kjoaʼa xomana xi fini. Koaan kʼoakuitso tsa jme én xi machjénle nga sʼe̱jinkon je jtín kʼoa koaan kʼoexkia kʼa carta xi nʼio machjén. Xijekoa̱n, kʼiaa kʼoakuitso nga je superintendente xi tsʼe circuito tsjoá je kjoanokjoaya. Kʼianga jekjoetʼale kjoanokjoayale, jé sikjetʼani je kjoajtín kʼoa jé skoéjin je kjoajnda xi koa̱nchjén. Kʼoati koan kʼoakuitsole jngo ndsʼee xi kʼoejna kjoabʼetsʼoa. Alikui sa̱tío xi kjaʼaí sala xi tikuini én kʼianga sixatʼa jtín je superintendente xi tsʼe circuito. Tonga je grupo xi kjaʼaí én nchja̱ koaan sa̱tíotʼaxinle je kjoajtínle. Tonga tjínnele koaikatio ya sala principal nga jekui kjoaʼa je kjoanokjoaya xi tsjoá je superintendente xi tsʼe circuito.

XOMANA NGA KJOAJTÍNTSE SʼE

21. Alijme kjoajtín sa̱tío kʼianga kui xomana. Je xi bʼakaole nga kui xomana koaan tsen skótʼaya nga jngó jngó ndsʼee kʼoa tsa xki̱ familia.

XOMANA NGA FAʼAITSJENYA KJOABIYALE CRISTO

22. Kʼiatsa kʼia kʼoakaole nga jinle xomana nga kjoaʼaítsjenya Kjoabiyale Cristo, alikui sʼe̱jna je kjoajtín Tʼatsʼe chjotale Cristo kao Xále Niná.

JE XI SUPERINTENDENTE TÍJNALE JE KJOAJTÍN TʼATSʼE CHJOTALE CRISTO KAO XÁLE NINÁ

23. Jé xi chjotajchínga sʼin tíjna kʼoaile xá jebi. Je xá xi kjinele kuinga kuenta sʼin nga kʼoakjoansʼin kjoaʼa josʼin tjínndajin je kjoajtín kʼoa kui koaitjenngi jotso xo̱n jebi. Tjínnele ñatjen sixá kao je consejero auxiliar. Kʼianga jekuitjo nga xki̱ jao sá je Xo̱n xi tjítʼa jme xi chotʼayá, kjoan kʼoenda je programa ʼyani xi kʼoakaole kjoaʼa nga kui sá. Jé kʼoendajin ʼyani xi kjoaʼa ngayeje kjoajtín jñani tso: Én xi nʼio chjíle xi nya Biblia, Nda koakoyaa Énle Niná, Jonʼia xi chjotale Cristo maa kʼoa kao xi presidente koa̱n. Tjínnele je xi chjotajchínga sʼin tjío kʼoakuitso ʼyani xi koa̱n nga presidente sʼin kʼoéjna kʼoa ʼyani xi koa̱n kjoaʼa jñani tso Jonʼia xi chjotale Cristo maa. Kʼia nga sʼa kʼoenda je programa tjínnele kui kuenta sʼin jotjínle nó je ndsʼee kʼoa tsa jngo tichjaa, jokji majinle, tsa nda koa̱nle kuitsoya jme kjoanokjoaya xi kʼoaile. Tjínnele tsa jan xomana tongini kʼoakʼuínle je ndsʼee xi kʼoakaole kjoaʼa kjoajtín, je xi kʼoakaole Jña koa̱nxkia Biblia kʼoa kao xi kʼoakaole kjoaʼa jñani tso Nda koakoyaa Énle Niná, kui kʼoaile je xo̱n xi Je xi kʼoakaole kjoajtín Tʼatsʼe chjotale Cristo kao Xále Niná ʼmi (S-89). Kʼoati je koatʼa ya tablero je programa ʼyani xi kʼoakaole kjoaʼa kjoajtín. Je xi chjotajchínga sʼin tjío koaan kʼoasʼin kʼoendajin nga kjaʼaí ndsʼee koasenkao, tsa ijngo chjotajchínga kʼoa tsa jngo siervo ministerial. Tonga tojé xi chjotajchínga sʼin tjío xi koa̱n kʼoakuitso ʼyani xi kjoaʼa jñani Jonʼia xi chjotale Cristo maa kao xi presidente koa̱n.

JE XI PRESIDENTE KʼOÉJNALE JE KJOAJTÍN TʼATSʼE CHJOTALE CRISTO KAO XÁLE NINÁ

24. Nga jngó jngó xomana, jngo xi chjotajchínga sʼin tíjna xi presidente koa̱n (ya jtín jñani tojngo jao mani xi chjotajchínga sʼin tjío, koaan koa̱nchjén je xi siervo ministerial sʼin tjío xi nda male bakóya). Jé xi presidente sʼin tíjna kʼoetsʼiakao kjoajtín kʼoa sikjetʼani. Jé kʼoakuitso ʼyani xi kjoaʼa nga jngó jngó kjoanokjoaya kʼoa nga chótʼayajin video xi tsʼe josʼin ʼmiyasoán. Kjoaʼayeje jotjín kjoanokjoaya tjínndajin, kʼoa tsa tojngo jao mani xi chjotajchínga sʼin tjío, tsakui nichxin kʼoati kʼoakaole tsjoá kjoanokjoaya je xi presidente sʼin tíjna. Koaan je kʼoakaole kʼianga to video sakó nga tsín jme xi chotʼayajin. Tjínnele tochoa kuinchja̱ nga ñandia ñandia kʼoakuitso kjoanokjoaya xi fini. Jé xi chjotajchínga sʼin tjío ya jinjtín kjaoyani ʼyani xi koa̱n nga presidente sʼin koatio. Xki̱ xomana kʼoantjaiya ʼyani xi kjoaʼa. Tsakui nichxin tjío jtín jñani je xi superintendente koa̱n me kjitʼa kʼoakaole nga presidente koa̱n tikʼoajinni chjotajchínga xi ngikʼa. Je chjotajchínga xi bʼakaole bándiaa “Nga chotʼaya Biblia” kʼoajinti koa̱n nga presidente koa̱n nga sʼe̱jna je kjoajtín. Je xi presidente koa̱n, tjínnele nga koa̱nle ngasin nganda tsjoále kjoafaʼaitsjen je ndsʼee kao tichjaa xi kjoaʼa. Kʼoati je kjinele nga kʼoakjoankji tse sʼe̱jna je kjoajtín josʼin jetjínndajin (párrafo 17 kao 19). Nga tsín nichxin jcha, kʼoa tsa tiʼnde ya plataforma, koaan jngo micrófono sa̱sénjnale je xi presidente sʼin tíjna ánni nga ya tjen kʼoakuitsosíni nga kjoaʼa ndsʼee xi bʼakaole. Kʼoa je ndsʼee xi bʼakaole koaan tjen kuichokasenjnatʼa ya atril. Kʼoati koa̱n tsa jngo yámixa̱ kʼoéjnatʼa kʼianga kjimaxkia Biblia kʼoa nga kjoaʼa “Nda koakoyaa Énle Niná”.

CONSEJERO AUXILIAR

25. Tongisa nda nga je kʼoakaole xá jebi jngo xi chjotajchínga sʼin tíjna xi jekjoatse tsjoá kjoanokjoaya. Ndsʼee jebi jé tsjoátʼaxinle kjoafaʼaitsjen je xi chjotajchínga sʼin tjío kao xi siervo ministerial ma xi faʼa nga sʼejna je kjoajtín Tʼatsʼe chjotale Cristo kao Xále Niná, xi tsjoá kjoanokjoaya xi 30 minuto, xi bándiaa kʼoa xi bʼéxkia nga chotʼayá Xo̱n xi Bájinkonná kʼoa tsa jeje̱ xi bándiaa kʼoa xi bʼéxkia Nga chotʼaya Biblia (chótsenlai párrafo 19). Tsa nkjín mani chjotajchínga xi nda male nchja̱ya kʼoa xi nda tsoya ya jinjtín, koaan xki̱ nó kʼoantjaiyani je xi consejero auxiliar koa̱n. Je ndsʼee xi bʼakaole xá jebi alikui tjínnele nga totsjoántsjai kjoafaʼaitsjen nga ñandia ñandia faʼa je ndsʼee.

SALA AUXILIAR

26. Koaan koa̱nchjén je sala auxiliar tsa nʼio nkjín mani je xi faʼa kjoanokjoaya jebi: Nga jngó jngó sala auxiliar tjínnele jngo ndsʼee sʼe̱nele, kʼoa ngisaa nda tsa je xi chjotajchínga sʼin tjío. Tsa tojngo jao mani xi chjotajchínga sʼin tjío, koaan koa̱nchjén je siervo ministerial xi nda male bakóya. Jé xi chjotajchínga sʼin tjío skoéjin ʼyani xi kui xá sʼe̱le kʼoa tsa kjitʼa kʼoantjaiya. Je xi kui xá kʼoaile kui koaitjenngi jotso párrafo 18. Kʼiatsa sala auxiliar koa̱nchjén kʼiaa kʼoakʼuínle je ndsʼee nga kʼia katafi nga jekjoetʼa “Kjoásjaiyaa én xi nʼio chjíle xi nya Biblia”. Kʼoa kʼiaa kjuinroani kʼianga jekjoetʼa “Nda koakoyaa Énle Niná”.

VIDEO

27. Je kjoajtín xi satío nga jinle xomana video koa̱nchjén kʼa kʼoa yaa sa̱tío ya aplicación JW Library^®.

S-38-MAZ 11/23