Je Skuela xi síchjine choʼndale Niná nó 2015 koasenkaoná nga ndasa koakoyaa

¹ Je David i kitso: “Je én xi bitjoni ndsoʼba kʼoa jme xi síkjaʼaitsjenjin ni̱ma̱na, katasasénli ji Jeobá, jiní na̱xi̱na kʼoa xi bʼasjentjaina” (Sal. 19:14). Ñá kʼoati mená nga katasasénle Jeobá je én xi nokjoaa, kʼoa nʼio ʼyachjiá je kjoanda xi tjínna nga nokjoañá jokjoantjínni xi tʼatsʼe Niná ya jinjtín kʼoa kʼianga bakoyasoán. Je Jeobá kui síchjén je Skuela xi síchjine choʼndale Niná nga síchjinená josʼin koakoyasoán. Tsʼato 111,000 jtín tjío jngo tjíjtsa Sonʼnde jñani tjíonichjine je ndsʼee kao tichjaa nga xki̱ xomana nga nda katabakóyason énnda chjotse, nga katamale josʼin koakoyale chjota nga katasíkʼantjaiya kjoafaʼaitsjenle, nga ngasin nganda katabakóya kʼoa nga nʼiojin katama (Hech. 19:8, TNM; Col. 4:6).

² Jme xi kjoaʼaítʼa je skuela xi tsʼe nó 2015 yaa yʼangini je xo̱n xi Jméni xi bakóyaná je Énle Niná ʼmi, ʼYáni xi kʼoatjíosʼín ndʼaibi josʼin mele Jeobá, “Tosi tonda katasʼeno kjoatsjoachale Niná” kao Énnda chjotse xi tʼatsʼe Niná tínroani. Kʼoa kʼoantjaiya jotjín minuto kjoaʼa jñani koa̱nxkia Biblia nga xki̱ xomana kʼoa kao kjoanokjoaya número 1. Kataʼyala jmeni xi kʼoantjaiya kʼoa kao jmeni xi sʼin je xi kʼoakaole kjoaʼa ya skuela.

³ Jñani maxkia Biblia. Je ndsʼee xi kʼoakaole jao minuto sichjén nga kuitsoya jngo kjoafaʼaitsjen xi koansjaijinle jñani koanxkia Biblia nga kui xomana kʼoa kui kuinchja̱ni jmeni xi koa̱nchjénle je jtín. Kʼiatsa nda kʼoéjnanda je ndsʼee xi kʼoakaole, koaan kuitsoyale je jtín jngo kjoafaʼaitsjen xi nʼio chjíle kʼoa likui kjoaʼatone jotjín minuto bʼakaole. Kʼoa je xi ngi jaon minuto jé kuinchja̱ je xi tjíobasen kʼoa kui kʼoakuitso jmeni xi koansjaijinle nga tsakʼéxkia Biblia, kʼoa tobasen minuto tjínnele kuinchja̱ kʼoa tsa choasa. Kʼiatsa kʼoasʼiaan kʼoasʼin koa̱nchjineñá kʼoa nkjín koa̱nni xíngiaa xi tsjoá énle tʼatsʼe jmeni xi kiskotʼaya jña tsakʼéxkia je Biblia.

⁴ Kjoanokjoaya número 1. Je xi kʼoakaole yaa Biblia kʼoexkia kʼoa to jan minuto kʼoa tsa choasa kjoaʼa. Machjénní nga nkjín kʼa tongini skótʼaya. Kʼianga skótʼaya nʼio kʼoexkia kʼoa kuenta sʼin nga kʼoakjoansʼin kʼoexkia kʼoa nga nda katabitjo énle, ánni nga nda koa̱njinsínile je xi kjuinrʼoéle. Ngatsʼi choʼndale Jeobá machjénní nga kʼoenele yaole nga nda kʼoexkia, nga̱ jebi nʼio machjénná nga ʼyaxkoán je Jeobá. A tsí nʼio tsjoa sʼe tokoán nga male bʼéxkia je ʼndíxti. Nʼio nda tjíosʼín je xi xijchá ma nga tjíobʼénele yaole nga tjíobinyakao ʼndíxtile nga nda katabʼéxkia.

⁵ Kjoanokjoaya número 2. Jngo tichjaa kʼoakaole kʼoa aon minuto kjoaʼa. Je tichjaa kui xi nʼio katasʼín kuenta jmeni xi tínchja̱ni kjoanokjoayale. Kʼiatsa je kjoanokjoaya xi kjoaʼa ya kʼoangini ya foyeto xi Jméni xi bakóyaná je Énle Niná ʼmi, jngo koya koako josʼin bakoyasoán kʼoa kui xi koa̱nchjénná ya jñani bʼakaoná ʼmiyasoán. Kʼiatsa kjaʼaí xo̱n yʼangini kjoanokjoayale kui koako xi tínchja̱ni kjoanokjoayale kʼoa jé skoéjin testo xi kʼoexkia. Kʼoa koaan sichjén testo xi kjaʼaínile xi koa̱nchjénle. Jé xi kjinele skuela skoéjin ʼyani xi koasenkao.

⁶ Kjoanokjoaya número 3. Jngo ndsʼee kʼoa tsa jngo tichjaa kʼoakaole kʼoa aon minuto kjoaʼa. Kʼianga jngo tichjaa kʼoakaole kʼoasʼin kʼoenda josʼin sʼenda kjoanokjoaya número 2. Kʼiatsa jngo ndsʼee kʼoakaole, jngo kjoanokjoaya tsjoále je jtín. Kui kuenta sʼin jme xi tínchja̱ni kjoanokjoayale kʼoa koaan skoéjin testo xi kʼoexkia.

⁷ Tsʼantjaiyajin josʼin kjoaʼa ndsʼee je kjoanokjoaya número 3. Kʼianga ya kʼoangini je foyeto xi Jméni xi bakóyaná je Énle Niná ʼmi, kʼoasʼin kʼoenda josʼín nga kotʼayajtín Énle Niná ya niʼyale, kʼoa tsa maije̱ koaan kui kʼoasʼinchoya joma nga bakoyasoán. Je xi koasenkao jéní tsa xi xínkjín mani kʼoa tsa jngo ndsʼee xi ya jinjtín tíjna. Me tongantsjai nga je xi kjinele skuela skoéjin ʼyani xi koasenkao kʼoa josʼin kʼoenda jme xi bʼakaole. Koaan sichjén testo xi kjaʼaínile nga koakoya jme xi bʼakaole. Kʼoati sakʼoa koa̱n je kʼoakaole jngo xi chjotajchínga sʼin tíjna kʼoa koaan je skoéjin ʼyani xi koasenkao kʼoa josʼin kʼoenda. Nʼiojin koasenkao je jtín nga skoe̱ je xi chjotajchínga sʼin tjío josʼin bakóyale xi tixínkjín mani kʼoa tsa jngo ndsʼee xi koasenkao.

⁸ Kjoafaʼaitsjen xi kʼoaile xi kjoaʼa. Je xi kjinele skuela jao minuto sichjén nga kʼoakuitso ánni nga nda kasʼesíni je kjoanokjoayale xi kafaʼa kʼoa nga tsjoále kjoafaʼaitsjen xi koasenkao, kʼoa yaa kʼoangini ya libro Benefíciese. Kʼianga tosʼa kʼoakuitso ʼyani xi kjoaʼa ya skuela alikui kui kʼoakuitso jmeni xi tísíxákao. Kʼoa nga jekjoaʼa kjoanokjoayale kʼoakuitsole ánni nga nda kasʼesíni kʼoa kʼiaa sikʼaxki̱ jmeni xi tísíxákao. Kʼoati kʼoakuitsole ánni nga nda kabitjosíni jmeni xi tísíxákao. Tonga tsa tsín nda kabitjo jme xi tísíxákao ngasin nganda kʼoakuitsole ánni nga nʼio machjénsíni nga kʼoenele yaole nga kʼoasʼin.

⁹ Jñani faʼaitʼayeje xi tʼatsʼe josʼin kuinókjoayaa yaa libro Benefíciese pájina 79 saʼnda 81. Nga jekjoetʼa je kjoajtín, je xi kjinele skuela koaan kʼia kʼoechoa̱ je librole xi kafaʼa kʼoa skónangile kʼiatsa tsakʼénda ejercicio xi faʼaitʼa ya jña tísíxákao. Tsa machjénsa nga kʼoainganʼiole, koaan kʼiakjoan kʼoakʼuínle kʼoa tsa kjaʼaí nichxin. Je kjoafaʼaitsjen xi kʼoaile nga jngó jngó xi kjoaʼa skuela kui xi koasenkao nga sa nda sa nda sixále Niná, kʼoa tjínnele nga skoe̱chjí kjoafaʼaitsjen xi kʼoaile (1 Tim. 4:15).

¹⁰ Kʼiatsa kjoaʼatone jotjín minuto bʼakaole je xi kjoaʼa, je xi kjinele skuela kʼoa tsa je xi basenkao koaan tsen sʼin, jolani tsa tjín xi sikjane kʼoa tsa jngo yálapi chéché kʼaontʼa tsa jñani ánni nga skoe̱síni je xíngiaa nga jekafetʼa jotjín minuto bʼakaole. Xíngiaa jebi tosikjetʼasa én xi tínchja̱ kʼoa kuitjojen ya plataforma (chótsenlai je libro Benefíciese p. 282 párr. 4).

¹¹ Je xíngiaa xi jetjíosítjoson jmeni xi tjínnele sʼin je xi koa̱n kjoaʼa ya Skuela xi síchjine choʼndale Niná, koaan kʼoetʼaxo̱n yaole (chótsenlai je libro Benefíciese p. 282 párr. 6). Je kjoachjine xi tsjoá je skuela jebi nʼio tjíobinyakao je choʼndale Jeobá nga bakóyason je énnda chjotse xi tʼatsʼe Chjotaxále Niná. Nga kʼoasʼin tjíonichjine ñaki tjíojngo kon nga nchja̱, male bakóya kʼoa kao kjoatsjoacha kʼoasʼín. Je Jeobá nʼiojin tsjoa sʼele nga tjíobʼasjengʼa ngatsʼi je xi ya tjíonichjine skuela jebi (Sal. 148:12, 13; Is. 50:4).