XI NGISA TÍNCHJA̱NI REBISTA JEBI: ʼYÁ CHJOTANI JE TESTIGOLE JEOBÁ
Jméni xi makjainnajin xi testigole Jeobá maijin
Jin xi testigole Jeobá maijin, makjainnajin nga “ngayije xo̱n Escritura Niná jinroani” (2 Timoteo 3:16). Kui xá chotʼayanijin Biblia nga̱ yaa tsoya xi tʼatsʼe Niná kʼoa josʼin nga tsjoa sʼe̱ tokoán.
Je Énle Niná itso: “Katabe chjota nga ji xi Jeobá ʼmili, tojiní xi nʼio ngʼa tijnalai jngo tjíjtsa sonʼnde” (Salmo 83:18). Kuinga toje Jeobá ʼyaxkónnijin. Kʼoa nga testigole maijin ʼmiyalaijin chjota nga Jeobá ʼmi jaʼaínle Niná (Isaías 43:10-12).
Chjotale Cristo maijin kʼoa kʼoasʼin makjainnajin nga “ʼndíle Niná”a ma je Jesús, nga jaʼai i̱ Sonʼnde kʼoa nga Mesías koan (Juan 1:34, 41; 4:25, 26). Kʼianga jejaʼáyanile ki ijngokʼani ya ngʼajmi (1 Corintios 15:3, 4). Xi koanskanni Rey sʼin tsakʼejnale Chjotaxále Niná (Apocalipsis 11:15). Chjotaxá jebi jetíjna kʼoa ʼndenaxó sikao i̱ Sonʼnde (Daniel 2:44). Je Biblia itso: “Je xi ndʼé tsʼee koa̱n i̱ sonʼnde, kʼoa ñaki kʼoetsaojin jokji nyʼán sʼin koatio” (Salmo 37:11, 29).
“Kʼianga bʼéxkia je Biblia, joxi je Niná xi fákao. Kʼianga jme kjoa sʼele, yaa Biblia básjai kjoafaʼaitsjen josʼin bʼéndajin. [...] Tojo tíjnakon je Énle Niná xi kao je.” (Naʼmi católico xi Benjamin Cherayath ʼmi, periódiko Münsterländische Volkszeitung, Alemania)
Xi testigole Jeobá maijin, makjainnajin nga basenkaoná nichxin xi tiyoaa ndʼaibi jmeni xi tso je Biblia (Isaías 48:17, 18). Kuinga bʼenenilaijin yaonajin nga nitjosuinjin jmeni xi tso. Tobʼelañá, je Biblia kʼoatso nga tsín koa̱n si̱jndiá je yaoná kao kjoafaʼaitsjenná, kʼoa kuinga tsín na̱jno̱ chjennijin kʼoa nga tsín droga nikaonijin (2 Corintios 7:1). Kʼoati likui kui kʼoanʼiaijin jmeni xi bʼéchjoa Biblia, jolani, je kjoachʼi̱, kjoachajngi kao kjoaché (1 Corintios 6:9-11).
a Je Biblia kʼoatso nga je Jesús jéní “xi tíjnatítjonle ngayije xi kisʼenda”, nga̱ jesoa Jeobá kisinda kʼoa jé títjon koannda (Juan 3:18; Colosenses 1:13-15).