Jan koya jmeni xi koa̱n sʼiaan nga ngisa nda kʼuínyaa
1. Ánni nga machjénsíni nga si̱ndayasaa yaoná josʼin ʼmiyaa.
1 Ngatsʼi xi tsoyason énnda chjotse maestroní. Tsa tiʼmiyasoán, tsa jngo chjota timangínchon ijngokʼalee kʼoa tsa jngo xi jetiʼmiyalee, je xi mená kuiní nga kui kʼuínyalee jmeni xi nʼiokjoan chjíle. Kʼianga ʼmiyalee chjota “je xo̱n Escritura xi tsʼe Niná” tibakoyalee “josʼin kuitjontjai” (2 Tim. 3:15). Nʼio tse kjoanda tjínná nga kʼoasʼin binyakoaa chjota. Janla koya chótʼayá jósʼin nga ngisa nda kʼuínyaa.
2. Jmé xi sʼiaan nga choa ñʼai sʼin kʼuínyaa.
2 Choa ñʼai sʼin kʼuínyaa. Kʼianga ʼmiyalee chjota jmeni xi jenda ʼyaa ñá tsakui nichxin tsínkui nikjaʼaitsjeen nga kje bejin kʼoa kje majinjinle jmeni xi tiʼmilee. Kuinga tsín koa̱nsíni nga toxkia kuinyandoné én. Tongisa nda nga tokui kʼoakʼuínlee én xi ngisasa chjíle. Je xi male tsoya ali tsa nʼiojin tse nchja̱ (Pro. 10:19). Kʼoati tsín tjínnele nga kʼoéxkiaa ngayeje testo xi faʼaitʼa xo̱n, koaan tokui kʼoéxkiaa xi nʼiokjoan machjén. Kʼoa nga jekabʼexkiaa, tokuikjoan én chjoéjiaan xi kui tínchja̱ni jmeni xi tiʼmiyaa. Si̱kjaʼaitsjeen jokisʼin Jesús ya jngo sonnindo, ninga ñʼai tjín jmeni xi kitsoya nʼio choa ñʼai tíjna josʼin kitsoya kʼoa alikui nʼio tse én kisichjén (Mat. 5-7).
3. Ánni nga ndasíni nga choa̱ nikatíolee chjota, kʼoa jñá kʼanile xi sasa majinnile.
3 Si̱chjén choa̱ kao dibujo. Kʼianga choa̱ nikatíolee chjota xi ʼmiyalee binyakao nga síkjaʼaitsjenjin, tsaojin ni̱ma̱le kʼoa ngisa sʼejinkon. Ali tsakuijin xi machjén tsa ñaki nʼio nda maná josʼin batiolee choa̱ je chjota. Kʼianga tsakatío choa̱ je Jesús, tojngo jao én kinchja̱ kʼoa sasa majinniná jme xi kitso (Mat. 7:3-5; 18:2-4). Ijngosa xi koa̱n sʼiaan kuinga dibujo si̱ndatʼalee xo̱n. Kʼiatsa tongini kuiyondaa koa̱nsjainá jme choa̱ xi koa̱n si̱chjén.
4. Jósʼin si̱chjén je kjoachjonangi kʼianga tjín xi tiʼmiyalee.
4 Si̱chjén kjoachjonangi. Kʼianga jme xi chjonangilee je chjota xi tiʼmiyalee kui xi mená kʼianga katasíkjaʼaitsjenjin. Kuinga chóyakaosíñá nga katanchja̱. Kʼiatsa tokjoán ñá kuinókjoaa alikuijin jchaa josʼin kamajinle. Kʼoa tsa tsín kʼoatjín jmeni xi kuitso, alikui koa̱n nga kjitʼanangi si̱kixiyandaa, ngisa nda tsa kjaʼaí kjoachjonangi koatiole ánni nga koa̱njinnile (Mat. 17:24-27). Ngatsʼiaa xi bakoyaa Énle Niná, toxá machjénni nga si̱ndayasaa yaoná josʼin kʼuínyaa. Kuinga kʼoatsosíni Biblia nga si̱kuindaa je xi tibakoyaa. Tsa kʼoasʼiaan, so̱koná kjoanda ñá kʼoa kao je xi kjuinrʼoéná (1 Tim. 4:16).