Si̱chjén je tratado kʼianga ʼmiyasoán énnda chjotse
1. Jósʼin tísíchjén tratado je naxinandále Niná saʼnda nichxin kjoatse.
1 Jenʼio kjoatse kʼianga tratado tísíchjén je naxinandále Niná nga tísíkʼabíson je énnda chjotse. Je C. T. Russell kʼoa kao xi ya tsakinyakao, kʼiaa nga nó 1880 tsakʼétsʼiakao nga tsakʼasje je tratado ánni nga je sikʼabísonsíni jotjín mani xi bʼéxkia je rebista Watch Tower. Je Russell, kʼiaa nga nó 1884 tsakʼétʼa ngixko̱n kjoatéxoma jngo institución xi tsín tao̱n sikinje nga sikʼabíson je énnda chjotse. Kʼoa mani nga nʼio chjíle je tratado xi tsakʼasje, je én xi tract (“tratado”) tso yaa kisʼetʼa je jaʼaínle institución jebi (Zionʼs Watch Tower Tract Society). Je institución jebi i ʼmi ndʼaibi: Watch Tower Bible and Tract Society of Pennsylvania. Je ndsʼee xi kʼia tsakatio, tsʼato jan siento miyón tratado jekisikʼabíson kʼianga kicho nó 1918. Kʼoa nichxin xi tiyoaa ndʼaibi, tojo nʼio machjén ʼndíxo̱n jebi kʼianga ʼmiyasoán.
2. Ánni nga nʼio nda machjénsíni je tratado.
2 Ánni nga nʼio nda machjénsíni je tratado. Xo̱n jebi naskánakjoan. Nʼio tse xi bakóyaná ninga tochoa én faʼaitʼa kʼoa sasa mandosinnile chjota. Je chjota ngisa tsjoake nga tratado sʼeyole tikʼoajinni tsa rebista kʼoa tsa libro sʼe̱yole. Saʼnda koaan sikʼabíson je xtiʼndí kʼoa kao xíngiaa xi tosʼa tjíobʼétsʼiakao nga tjíotsoyason. Kʼoa mani nga to ʼndí kjoan ma chʼá tojñani nga mangián.
3. Tʼeyanajmí jósʼin bichómani kʼianga tratado nichjén, koaan kʼoéyanajmí tsa jmeni xi jisoa xokoantʼain kʼoa tsamaije̱ ya chjoénilai je xo̱n xi bʼasje naxinandále Niná.
3 Nʼio nkjín xíngiaa xi kʼia tsabe jokjoantjínni énle Niná nga tsakʼéxkia jngo tratado. Tobʼelañá, jngo tichjaa xi ya Haití tsʼe, jngo tratado koansjaile ya ʼnyo kaye. Xi jetsakʼéxkia i kitso: “¡Ñaki kʼoatjín jme xi bakóya relijión jebi!”. Kʼiaa ki jña tíjna jngo Ndʼia jña chotʼayá, xijekoan kiskotʼaya kʼoa chan kiskanisʼenngindá yaole. Tojosísʼin tiʼyaa, je xi tsakasenkao kui énle Niná xi tjítʼa tratado xi kisokole.
4. Jméni xi mená nga katama je sá nga tratado koa̱nxákao.
4 Kʼianga xki̱ niʼya ʼmiyasoán. Mani nga nʼio nda machjén je tratado, tjoéjin kʼa sá nga kui koa̱nxákao, kʼoa i̱ sá noviembre kui kʼoabíson. Tonga ali tsakuijin xi tsonile tsa tokui xi mená nga kjoáyolee ngatsʼi chjota, je xi mená kuinga koa̱n chobanajmiá kao chjota. Kʼiatsa síndosin je chjota koaan kʼuínyalee jósʼin chotʼayá Biblia kao je libro Jmé kjoanni xi bakóya je Biblia kʼoa tsa kjaʼaísa xo̱n xi nichjén nga ʼmiyalee chjota. Koaan kʼoasʼiaan ninga tosʼa tichjakao títjoán je chjota kʼoa ninga jeya jao jan kʼani nga tichjakoaa. Jósʼin koa̱n kjoáyoaa je tratado. Je xi machjén kuinga títjon kjoanla ñá kataʼyaa jmeni xi tínchja̱ni je tratado xi mená kjoáyoaa.
5. Jósʼin kjoáyoaa je tratado kʼianga ʼmiyasoán.
5 Je xi kuitsoni josʼin kjoáyoaa je tratado kui jñanile tratado xi si̱chjén kʼoa je ʼnde jñani si̱kʼabísoan. Jmé xi koa̱n sʼiaan. Koaan kʼoai jngolee je chjota. Tsakui nichxin koa̱nndosinle nga jeskoe̱ jokji. Kʼoa tsa ya tiʼmiyasoán ya jñani xkón chon kʼoa me tsín kjoxʼá niʼyale chjota, koaan kjoásjailee josʼin koakolee kʼoa tsamaije̱ kʼoakʼuínlee tsa koa̱n ya cha̱nisʼenngiaa xo̱ntjoa niʼyale ánni nga kʼoakuitsosíniná jósʼin síkjaʼaitsjen tʼatsʼe tratado jebi. Kʼoa tsa jngo kjoachjonangi tíjnatʼa portadale je tratado xi koájnalee chjota, koaan kʼoakʼuínlee nga kʼoakatatsoná jótso xi tʼatsʼe jebi, kʼoa tsamaije̱, kjaʼaí kjoachjonangi si̱kʼéjnalee ánni nga katamandosinsínile kʼoa koa̱n cho̱banajmísíñá kao je. Xijekoa̱n, koaan kʼoéxkia choalee jotso je tratado kʼoa kʼoakatatsoná josʼin síkjaʼaitsjen tʼatsʼe je kjoachjonangi xi faʼaitʼa jinpárrafo. Kʼoati nda nga ya Biblia kʼoéxkianilee je testo xi nʼiokjoan machjén. Xi jecho̱banajmiá, kʼoakʼuínlee jme nichxin kʼoa jme ora kuichonrʼoé xi ngindia. Kʼiatsa kʼoasʼin ngale je jtín nga xo̱n fáyo ya jñani tsín ʼya xi kajin, koaan tosa jngo tratado katabáyo ya jñani tsín ʼya xi skoe̱.
6. Jósʼin kjoáyoaa je tratado kʼianga ʼmiyaa ya yandiaa.
6 Ya yandiaa. A nichjénñá tratado kʼianga ʼmiyaa ya yandiaa. Tjín chjota xi tsaojiaan xi nʼio xátíyale kʼoa likui binya nga chjakoaa, kʼoa li josʼin ʼyañá tsa mandosinle énle Niná. Mani nga tsín ʼyaa tsa kʼoexkia kʼoa tsa mai tsa rebista xi sʼa chjotse kʼoailee tosa nda tsa jngo tratado kʼoailee. Tsakui nichxin tosa kʼoexkia kʼianga koa̱nʼa ngotjole nga̱ tochoa én faʼaitʼa kʼoa naskásʼin matsen. Tonga tsa kuinya ngotjo chjota jebi koaan chja̱kaonajmíñá jme xi tínchja̱ni tratado jebi.
7. Kʼoalasi jósʼin koa̱n si̱chjén je tratado tojñani nga bitsomaa. Tatio kʼai choa̱.
7 Tojñani nga bitsomaa. Nʼio choa ñʼai tíjna nga fayolee tratado chjota tojñani nga bitsomaa. Jngo ndsʼee tíjna xi nkjín tratado bʼa kʼianga jña fi. Kʼoa toʼya chjota xi kajin, jolani tsa je xi tienda síxá, kʼoatsole tsa mele kʼoexkia jngo xo̱n kʼoa kʼiaa tsjoále jngo tratado. Jngo ndsʼee xi ya Nueva York kikʼamje kao ʼndíchjoónle, nkjín tratado tsakʼa nga ki kʼoa jngo foyeto xi Naciones ʼmi tsakʼa. Nga̱ bení nga nkjín chjota jtsaojin xi kjaʼaí kjaʼaí naxinandá tsʼe. Kʼoa je chjota xi kitsaojin xi kjaʼaí én tjíonchja̱ jngó jngó tratado tsakáyole xi énle tjíotʼa. Kitsjoale je xi tsojmi batena ya ʼnyo kaye, xi ya tjíosíkjáya jña tjío parque kʼoa tsa je xi tjíokjen.
8. Ánni kʼoabixónsíñá nga je tratado ya mangóson joni tsa tsojmi xi sʼentje.
8 “Tʼentjai ntje̱li.” Je tratado yaa mangóson joni tsa tsojmi xi sʼentje. Je chjota xi tsojmi bʼéntje ali tsa tosʼajin choa tsojmi bʼentje, nga̱ likui be tsa nda koa̱nyeje. Kuinga i̱ tsosíni ya Eclesiastés 11:6: “Tʼentjai ntje̱li kʼianga tanjio, kʼoa likui katasíkjáya ndsai ninga nga koa̱nxon; nga̱ likui ʼyai jñáni koa̱nntje, a ibi axo yaa ján, axo nda koa̱n nga jao kʼa”. Kuinga machjénsíni nga tosi tonda si̱kʼabísoan je tratado xi kjioná (Prov. 15:7).
[Én xi tjítʼa ya pájina 3]
Mani nga nʼio nda machjén je tratado nga ʼmiyasoán, tjoéjin kʼa sá nga kui koa̱nxákao, kʼoa i̱ sá noviembre kui kʼoabíson.