Nʼio ndasʼin tjíonda je tratado chjotse

1. Jmé xo̱nni xi sʼa kitjo chjotse xi koa̱nchjénná nga kʼuínyasoán.

¹ Kʼianga kisʼejna je Kjoajtíntse xi jan nichxin xi tsʼe Testigole Jeobá nó 2013, xi “Jé Énle Niná xi ñaki kjoakixi” tsakʼin, aon tratado chjotse kitjo. Kʼoa nga tikuini nó, kʼoati kitjo je tratado número 38 xi A kjoaʼáyanile je kʼien ʼmi. Kʼoa ñaki sʼaa chjotse josʼin tjíonda nga jaon tratado jebi. Ánni nga kjaʼaísʼin tjíondani. Jósʼin koa̱n ni̱chjén jmeni xi faʼaitʼa kʼianga kʼuínyasoán.

2. Jósʼin koasenkaoná josʼin tjíonda je tratado chjotse.

² Ánni nga kjaʼaísʼin tjíondani je tratado. Kʼianga tosʼa bʼetsʼiakoaa nga chjakaonajmiñá Énle Niná je chjota, kui jebi xi nʼia: 1) chjonangilee josʼin síkjaʼaitsjen tʼatsʼe jmeni xi chja̱kaonajmíñá, 2) bakolee jotso je Biblia, 3) nikájna jngolee xo̱n xi Énle Niná faʼaitʼa, kʼoa 4) nikʼéjnalee kjoachjonangi xi kʼia ʼmiyalee nga bichochon ijngokʼalee, kʼoa ñaki nda bʼendajiaan kʼiáni kjuinchón ijngokʼalee. Josʼin tjíonda je tratado chjotse choa ñʼai koa̱nná nga kʼoasʼiaan je xi ño koya kanikʼaxkiaa.

3. Jósʼin koa̱n si̱káyoaa je tratado chjotse.

³ Jósʼin si̱káyoaa je tratado chjotse. Kʼianga sʼa ni̱tiʼndaa je chjota koaan i̱ sʼiaan: 1) koakolee je kjoachjonangi xi tíjnatítjon kʼoa chjónangilee jósʼin síkjaʼaitsjen tʼatsʼe jebi, 2) kui cho̱banajmíñá jmeni xi faʼaitʼa jñani i̱ tso: “Je Biblia itso”. Kʼoa tsa koa̱n, koaan ñaki yakjoan Biblia kʼoéxkianilee jotso je testo xi faʼaitʼa, kʼoa tsa ale je chjota koaan kui kʼuínyalee jñani i̱ tso: “Kjoanda xi sʼená nga ʼyaa jebi”, 3) si̱kájnalee je tratado kʼoa kʼia katabʼéxkia nga kʼoakoa̱nle, 4) nga kjesa nixatʼajián, koakolee je kjoachjonangi xi tíjna ya pájina xi tofetʼani ya jñani i̱ tso: “Tikjaʼaitsjenlai jebi”, kʼoa kʼoéndajiaan kʼiáni kjuinchón ijngokʼalee nga koakolee jotso je Biblia xi tʼatsʼe kjoachjonangi jebi.

4. Jósʼin koa̱n ni̱chjén je tratado chjotse kʼianga kjuinchón ijngokʼalee chjota.

⁴ Kʼoati choa ñʼai tíjna jokʼuínlee nga kuichochon ijngokʼalee chjota. Kui koakolee je testo xi faʼaitʼa je tratado kʼianga kʼuínyalee tʼatsʼe je kjoachjonangi xi kinikʼéjnalee nga sa kichjakaonajmiá kʼoa koakolee je sén xi faʼaitʼa ya tratado xi tsʼe je foyeto Énnda chjotse. Xijekoa̱n, koaan koakolee foyeto jebi ya kjoaʼmiya jñani faʼaitʼa tʼatsʼe jmeni xi tichjakaonajmíñá kʼoa kʼia si̱kájnalee je foyeto. Tsa skoé je foyeto, koaan kʼoéndajiaan nga kjaʼaí nichxin kjuinchón ijngokʼalee nga chótʼayajiaan. Tsa kʼoasʼiaan, jejngo estudio tibʼetsʼiakoaa. Kʼoa tsa tsínkui foyeto si̱kájnalee, kʼoati koa̱n tosa ijngo tratado si̱kájnalee kʼoa kʼoakʼuínlee nga kʼia chótʼayajiaan xi ngindia kuichochonlee.

5. Jósʼin kjimachjén je tratado nga tíʼmiyason Énle Niná.

⁵ Jetsʼato jngo siento kao kante nó nga tratado kjimachjén nga tíʼmiyason Énle Niná. Tsandalani tíbʼantjaiya jokjoan yʼai kʼoa josʼin tjíonda, nʼio ndasʼin machjénná kʼianga ʼmiyalee chjota Énle Niná. Kʼoasʼin si̱chjén ngayeje jme xi faʼaitʼa tratado chjotse kʼianga tosi tonda cha̱nibasoán je Énle Niná ngakjijnda Sonʼnde (Prov. 15:7a).