Jósʼin koa̱n si̱chjén je tratado kʼianga chja̱kaonajmiá je chjota

Tjen sá enero nó 2018, je Xo̱n xi tjítʼa jme xi chotʼayá, yaa faʼaitʼa jokoa̱n kuixoán nga chja̱kaonajmiá je chjota. Kʼoaʼminá nga chja̱kaonajmiá je chjota ʼndele nga tokui kʼoailee je xo̱n xi Énle Niná yʼangini. Je video xi faʼa nga chotʼayajiaan “Jókoa̱n kuixoán nga chja̱kaonajmiá chjota” kui tsoyaná jme xi sʼiaan nga jngo textole Biblia chja̱kaonajmíñá je chjota. Tonga jebi alikui xi tsonile nga tsín koa̱n si̱chjén je xo̱n xi Énle Niná yʼangini. Tobʼelañá, ma nichjén tratado nga chjakaonajmiá je chjota. Josʼin koa̱n si̱chjén.

1. Kui tichjain je kjoachjonangi xi faʼaitʼa ya portadale kʼoa je katakjoéjin jmeni xi kuitso.

2. Takolai je texto xi faʼaitʼa ya página xi majaoni. Tsa ale je chjota, koaan chótʼayajiaan jmeni xi tínchja̱ni je tratado.

3. Tʼailai je tratado je chjota kʼoa kʼoatʼinlai nga katabʼéxkia kʼianga kʼoakoa̱nle.

4. Nga kjesa nikjetʼajián, koakolee je kjoachjonangi xi faʼaitʼa ya jñani tso “Tikjaʼaitsjain jebi”. Xijekoa̱n kʼoakʼuínlee nga kjaʼaí nichxin kuichochonlee kʼoa nga kao Biblia kʼuínyanilee je kjoachjonangi.

Kʼianga kuicho ijngokʼá, chótʼayajiaan jmeni xi tso je tratado kʼoa xijekoa̱n ijngo kjoachjonangi si̱kʼénachxʼoá. Koaan kui chjoéjiaan je kjoachjonangi xi faʼaitʼa ya página xi tíjnaná ya Internet kʼoa tsakuije̱ kjoachjonangi xi nroatʼa je xo̱n xi síkʼaxki̱ je tratado. Kʼianga bele tokoán, koaan kʼoailee je folleto Énnda chjotse xi tʼatsʼe Niná tínroani kʼoa tsa jñasanile xo̱n xi nichjén nga ʼmiyaa je Biblia.