Nda chjoéyaa je chjota xi kuicho nga sʼe̱jna Kjoabichile Nainá
1. Kʼiáni nga nʼiosa ndasʼin chʼa̱sjee je Niná, kʼoa ánni.
1 Kʼianga sʼe̱jna je Kjoabichile Nainá koaan nga nʼiosa ndasʼin chʼa̱sjee je Niná. Ánni. Kuinga je nó jebi tsʼato te miyón chjota choyalee xi kuichonrʼoé josʼin tsakakó je Niná kʼoa kao Jesús je kjoatsjoachale, kʼianga tsakʼéchjíntjainá (Juan 3:16; 15:13). Je chjota xi kuicho kʼoati sa̱kóyale je kjoanichikontʼain xi koa̱n so̱kole nga kʼoasʼin kitsjoa Niná je ʼNdíle xi totʼatsʼe chjota (Is. 65:21-23). Tonga ali tsa tojejin je ndsʼee xi kuinchja̱yajin xi nda kʼoasje je Niná nga kui nichxin. Ngatsʼiaa xi jeʼmiyasoán kʼoati koa̱n kʼoasʼiaan kʼiatsa nda chjoéyaa ngatsʼi chjota xi kuicho (Rom. 15:7).
2. Jmé xi koa̱n sʼiaan nga ngisa nda chjoéyaa je xi kuicho nga sʼe̱jna je Kjoabichile Nainá.
2 Kʼianga kuichoaa ya jña sʼe̱jna je Kjoabichile Nainá koaan si̱tiʼndaa kʼoa chja̱kaonajmiá je chjota xi kuicho nga̱ tjínkʼa xi tokʼia bichó xi soa male kʼoa xi tsín be jmeni xi faʼa. Kʼoa tsjoá kuijnokoaa kʼoa si̱tiʼndaa ánsíni nga tsjoa koa̱nnile. Tsakui nichxin kui kabichóni nga tsakʼai jngole je xo̱n xi tsʼabíson. Kʼianga jchaa jósʼin kisʼejinnile, koaan chjónangilee tsa tosʼa kabichótítjon je kjoajtín xi satíoná kʼoa tsa bexkon kʼa je ndsʼee. Koaan kʼoakuínlee nga ya katabatiotʼaná kʼoa koakolee je testo xi tsʼe Biblia kʼoa kao je xo̱n xi jndaa. Kʼoa tsa ya sʼe̱jnani je Kjoabichile Nainá ya Ndʼia jña chotʼayá koaan koakolee jochon kʼoa josʼin machjén je tsojmi xi tjíoʼya. Kʼianga jekjoetʼa je kjoanokjoaya xi sʼe̱jna koaan chjónangilee tsa jmeni xi tsín kamajinle. Tonga tsa kjaʼaí jtín kjoaʼasʼen nga jekuitjoaa ñá koaan i̱ kʼuínlee: “Kʼiáni matsjoali tsa cho̱banajmísaa xi tʼatsʼe je xi kanoʼyá ndʼaibi”. Ndakjoan kʼoéndajinñá kʼiani kjuinchónlee. Kʼoa je xi chjotajchínga sʼin tjío nʼio kuenta sʼin nga kuicho je xíngiaa xi jetsín titsoyasonni, kʼoa jé kjinele nga tsjoánganʼiole.
3. Ánni nga nʼio chjísínile nga nda chjoéyaa je xi kuicho nga sʼe̱jna je Kjoabichile Nainá.
3 Nʼio nkjín chjota xi tokʼia kuichotítjon nga sʼe̱jna je Kjoabichile Nainá kʼoa xi skoe̱ jokji tsjoa tjío tokoán xi choʼndale Jeobá maa, nga nyʼán tiyokoaa xíngiaa kʼoa nga jtín xi sʼin tiyoaa (Sal. 29:11; Is. 11:6-9; 65:13, 14). Jósa̱tío kon je chjota xi kuicho nga sʼe̱jna je Kjoabichile Nainá. Nʼiojin tsjoa sa̱tío kon kʼiatsa kʼoénelee yaoná nga nda chjoéyaa.