Xi sakʼoa chjonangiaa
◼ Jméni xi tjínnele sa̱kóyale je ʼndíxti kʼianga ngisa koa̱ntajasa kjoamakjainle
Nʼio tse xá kjinele je xi xijchá ma nga bakoyale je ʼndíxtile jmeni xi tsoya je Jeobá kʼoa josʼin batekjáya (Efes. 6:4). Tobʼelañá, bení nga nʼio chjíle nga kotʼaya kao ʼndíxtile je testo xi maxkia nga nyaon nyaon. Kʼoa Nichxin nga kotʼayajtín ya niʼyale kʼoa tsa kjaʼaísa nichxin, tjínkʼa familia xi video kotsenle kʼoa kui fáoyani, tjínkʼa xi kui fáoyani jmeni xi faʼaitʼa je libro Los jóvenes preguntan, tjínkʼa xi kui kʼoasʼínchoya jmeni xi bʼéyanajmí je Biblia kʼoa tsa maije̱ josʼin sitoánntjai je kjoamakjainle. Tonga nga koa̱ntaja je kjoamakjainle je ʼndíxti machjén nga kui sa̱kóyale je xi ngisa ñʼai tjín xi bakóya Biblia (Heb. 6:1).
Kuila si̱kjaʼaitsjeen jmeni xi ʼmiyalee je chjota. Kʼianga sʼa bichochon títjonlee kʼoa tsa kʼiaje̱ nga maskanni, kui nichjén je libro Jmé kjoanni xi bakóya je Biblia kʼianga ʼmiyalee kʼoa xi jefetʼa libro jebi, tosa kui ʼmiyangálee je libro “Tosi tonda katasʼeno kjoatsjoachale Niná”. Ánni nga kui ʼmiyanilee. Kuinga je libro xi títjon kui tsoya jmeni xi tjínnele skoe̱ títjon chjota kʼoa je xi majaoni kui bakóyale jósʼin sichjén nga nyaon nyaon je kjoafaʼaitsjen xi tsjoá je Biblia. Kʼianga kui nga jao libro jebi sakóyale je chjota xi tosʼa tjíokotʼaya je Énle Niná kui xi basenkao nga je “Cristo xi nʼio [batio]kao” kʼoa nga taja satío kjoamakjainle (Col. 2:6, 7). A tsí kʼoati nʼio nda koasenkao tsakui kʼuínyalee je ʼndíxtiná. Kʼoati machjén nga katamajinle tʼatsʼe je kjoabʼechjíntjai, tʼatsʼe Chjotaxále Niná kʼoa josʼin tjío je kʼien. Nga katamajinle ánni nga tsjoáʼndesíni Niná nga kjoañʼai tichjaʼá kʼoa ánni kʼoabixónsíñá nga jenichxin fetʼa tiyoaa ndʼaibi. Ñaki katasʼejngo kon nga kui relijión xi kixi tiyojiaan. Kʼoati machjén nga koa̱njinle jósʼin sichjén je kjoafaʼaitsjen xi tsjoá je Biblia kʼoa jósʼin sichjine je kjoafaʼaitsjenle (Heb. 5:14). Tonga je xijchá tjínnele kuenta sʼin jótjín nóle je ʼndíxtile kʼoa jókji tje̱n jemajinle. Tjínkʼa je ʼndíxti xi majinle je xi ngisasa ñʼai tjín xi bakóya Biblia ninga sʼa ʼndíkjoan (Luc. 2:42, 46, 47).
Kʼoa nga ngisa koa̱nle je xi xijchá ma nga kuitsoyale ʼndíxtile, kui sa̱tíotʼa ya jw.org/es je xi guías de estudio ʼmi xi ya yʼangini je libro Bakóya. Koaan ya skótʼa ya jñani ENSEÑANZAS BÍBLICAS > JÓVENES tso. Kʼoa skan sa̱tíotʼa xi ya yʼangini je libro “Kjoatsjoachale Niná”. Kʼoati koa̱n kui sichjén je xi ñaki libro. Jé xi xijchá ma xi kuitsoni tsa kʼia sichjén je xi guías de estudio ʼmi je Nichxin nga kotʼayajtín Énle Niná ya niʼyale, tsa kʼia nga tsjoále estudio nga jngó jngó je ʼndíxtile kʼoa tsa kʼiaje̱ nga tsoyale jósʼin skótʼaya nga toje.