Ngisa nʼio koa̱nxá i̱ sá agosto
Jngo tratado chjotse si̱kʼabísoan jngo tjíjtsa Sonʼnde
1. Jñánile je tratado xi si̱kʼabísoan jngo tjíjtsa Sonʼnde nga jemachrianle nga kuicho jngo siento nó nga tíbatéxoma je Chjotaxále Niná.
1 Jemachrianle nga kuicho jngo siento nó nga tíbatéxoma je Chjotaxále Niná. Kʼoa nga chʼa̱sjengʼaa je Jeobá jngo tratado xi sʼa chjotse si̱kʼabísoan jngo tjíjtsa Sonʼnde nga sá agosto. Tratado jebi i ʼmi: ʼYáni xi kuitsoyaná jmeni xi nʼio chjonangilee yaoná. Xo̱n jebi bakóyale je chjota nga ya Biblia katabásjaijin jmeni xi kjonangile yaole kʼoa kʼoati bakóyale josʼin koasenkao jmeni xi faʼaitʼa ya jw.org.
2. Jósʼin kʼoainganʼioá nga chʼa̱sjengʼaa je Jeobá nga sá agosto.
2 Nʼio chʼa̱sjengʼaa je Jeobá. Jngo kjoanda tísʼejnabasen sá agosto nga ngisasa tse kʼuínyasoán. Je xi jekisʼenngindá xi mele nga precursor auxiliar sʼin sixá, koaan skoéjin tsa mele nga kante ora sikʼasʼen. Nʼio nkjín publicador xi síxá nga toxkia nichxin kʼoa kao xi skuela tjíotsoma, xi koa̱n nga precursor auxiliar sʼin sixá sá agosto, nga̱ aon bixine, aon xoto kʼoa aon taingo tjínle. Kʼiatsa je chjota xi tiʼmiyalai Biblia kʼoa tsa jeje̱ tili kʼoa tsa tsotili xijekoa̱n nga kuitsoyason, koaan je kʼoatʼin ndi̱to̱nlai je chjotajchínga xi coordinador sʼin tíjna. Nʼiojin tsjoa koa̱nle nga publicador koa̱n je sá jebi nga̱ ngisa nʼio koa̱nxá. Nkjín precursor regular xi jengisa choa síxá nga sá agosto kʼianga jemajngole jotjín ora nijéle nga jngo nó, tonga tsakui nichxin koa̱n kʼoendajin nga tojo nʼio sixá kʼianga si̱kʼabísoan je tratado. Kʼoa nga jngó jngó familia jekoa̱n kʼoendajin jósʼin “[kʼoa]sjengʼa je Jeobá” sá agosto (Esd. 3:11; Prov. 15:22).
3. Jméni xi mená kuichotjenngiaa nga sá agosto.
3 Ningalani jekjoan nkjín kʼa nga kʼoasʼin kinikʼabísoan tratado nichxin xi jaʼato, tonga sá agosto choyalee nga ngisa nʼio si̱kʼabísoan. A ngisasa nʼio nkjín ora koa̱nxá, a ngisasa nʼio koa̱nnkjínya je xi publicador kʼoa kao xi precursor auxiliar koa̱n nga kui sá. Jé Jeobá sichikontʼainná jokji nʼio si̱xá nga kʼuínyasoán jngo tjíjtsa Sonʼnde i̱ sá agosto tikʼoajinni nó xi tífaʼato (Mat. 24:14).