Jósʼiaan nga ndasa kʼuínyasoán: katamandosinná je chjota

Ánni nga nʼio chjísínile nga kʼoasʼiaan. Je Jesús koanndosinle nga jngó jngó chjota. Tobʼelañá, kʼianga kisindaya jngo chjota xi jtaya, tsakui nichxin tsabe nga títsokjón nga ya tjíokotsenle chjota, kʼoa kuinga tosa kikaotʼaxinni (Mar. 7:31-35). Kuenta kisʼin je chjota tjenngile kʼoa alikui toxkia tsakinyandone én nga̱ koanjinle jokji tjen kicho nganʼiole (Juan 16:12). Kʼoa ndʼaibi nga ya tíjna ngʼajmi tojo kʼoasʼin kjimandosinle je chjotale (2 Tim. 4:17). Kʼoa ñá xi chjota tjenngile maa bʼenelee yaoná nga kʼoati nʼia (1 Ped. 2:21; 1 Juan 3:16, 18). Kʼianga ndasʼin kuichomani nga kʼuínyasoán, tjínnele nga kuenta sʼiaan josʼin tjíoni je chjota, jméni xi mandosinle kʼoa xi makjaojinle. Ngisajin nda kjuinrʼoéná tsa skoe̱ nga ñaki mandosin kjoaixiná, nga tsín tsa tokui xá kabichochonnilee nga Énle Niná kʼuínyalee kʼoa tsa xo̱n si̱káyolee.

Jókoa̱n sʼiaan:

Nda kuiyondaa. Likui kuinókjoaan kʼianga kuinókjoakoaa je chjota, ndʼé si̱koaa kʼoa koakoá nga tsjoa tjínná.
Kuenta sʼiaan jochon niʼyale chjota. A matseen nga ʼndíxti tjínle, tsa tsjoake nga naxó bʼéntje, tsa cho̱ntje tjínle. A tjínle relijiónle. Koaan kui kuenta sʼiaan jebi josʼin chja̱kaonajmiá je chjota.
Kui kuinókjoakaoñá jmeni xi koa̱nndosinle chjota. Likui nʼio ñʼai tjín nga koa̱nná kʼoasʼiaan, nga̱ je tratado, foyeto kʼoa kao rebistaná nʼio nkjín koya xi nchja̱ni. Kʼoa tsa kʼia kuichoaa nga tsín ale chjota, tongotjo chja̱koaa.

I̱ tʼiain sá jebi:

Kʼianga chótʼayajtíon ya niʼyali, kʼoa tsa kʼiaje̱ nga tiʼmiyason, chótʼayao jósʼiaon nga kui chja̱kaoño je chjota jmeni xi koa̱nndosinle.
Je ndsʼee xi kʼoakaole nga koandiaa je kjoajtín nga kuitjokʼinyasoán kʼoati koa̱n kui kuinchja̱ni jósʼin koakoá nga mandosinná je chjota, kʼoa tsa jngo choa̱ koakochoya.