Jósʼiaan nga ndasa kʼuínyasoán: kʼoétʼaxoaan ʼyani xi koa̱nndosinle énle Niná

Je pastro Pablo i kitsole Timoteo: “Tikuindai yaoli, kʼoa tikuindai je xi tibakoyai” (1 Tim. 4:16). Je kjoafaʼaitsjen jebi kui bakóyaná nga kʼoénelee yaoná nga ngisasa nda kʼuínyasoán énle Niná, ninga tochriansʼa nga ʼmiyasoán kʼoa ninga jekjoatsená. Kuinga je xo̱n Xá xi nʼia tʼatsʼe Niná kui kjoaʼmiya chjotse jebi kjoaʼaítʼa nga xki̱ sá: “Jósʼiaan nga ndasa kʼuínyasoán”. Nga jngó jngó kjoaʼmiya kjaʼaí kjaʼaínile xi kuinchja̱ni kʼoa tsjoáná kjoafaʼaitsjen jokoa̱n sʼiaan. Jmeni xi chótʼayá nga jngó jngó sá kui xi ngisa nʼio kuenta sʼiaan nga kʼuínyasoán nga tikuini sá. Kʼoa nga sʼe̱jnaná je Kjoajtín xi tsoyaná josʼin si̱xálee Niná nga toje tífikjetʼa je sá, kui kʼoakuixoán josʼin tsakasenkaoná nga kʼoakinʼia. Kʼoa ndʼaibi kuila kataʼyaa jósʼiaan sá jebi nga kʼoétʼaxoaan ʼyani xi koa̱nndosinle énle Niná.

Ánni nga nʼio chjísínile nga kʼoasʼiaan. Je xá xi kjinená ali tsa tokuijin nga ʼmiyasoán, machjén nga mangínchon ijngokʼalee je xi mandosinle énle Niná nga ʼmiyalee (Mat. 28:19, 20; 1 Cor. 3:6-9). Kuinga tjínnesínile nga kjuinchón ijngokʼalee, nga kui chja̱kaonajmíñá jme xi mandosinle kʼoa nga kui chjoéya ijngokʼá jme xi sa kichjakaotítjonñá. Kuinga machjénsíni nga kʼoétʼaxoaan kʼianga ska̱jiaan jngo chjota xi koa̱nndosinle énle Niná.