Kjoájinkoaan chjota nga katafi je kjoajtíntse

1. Kʼiáni kʼoétsʼiakaoñá nga kjoájinkoaan je chjota nga kʼoati katafi tsanda je ya kjoajtíntsená.

¹ Tsa tjínlani xi kʼoéndalee je miyoná kʼoa tsa je xi xíngiaa xi tse kjoama̱ sʼe̱nginá, ñaki kaojin kjoatsjoa kʼoakʼuínlee nga katanroakjen. Kʼoatisʼinni, nʼio tse kjoama̱ tísʼengi nga tísatíonda jmeni xi sa̱kóyaná ya kjoajtíntse xi jan nichxin sʼe̱jna. Kʼoa jan xomana tongini nga sʼe̱jna je kjoajtíntsená kʼoétsʼiakoaa nga kjoájinkoaan chjota nga kʼoati katafi tsanda je. Jméni xi koasenkaoná nga ñaki kao kjoatsjoa kʼoasʼiaan.

2. Jméni xosikaoná nga nʼio kʼoénenilee yaoná nga kjoájinkoaan je chjota nga katafi je kjoajtíntse.

² Tsa si̱kjaʼaitsjenjiaan josʼin basenkaoná nga jngó jngoá jmeni xi ʼmiyaná ya kjoajtíntse, kui xosikaoná nga nʼio kʼoénelee yaoná nga kjoájinkoaan je chjota nga kʼoati katafi (Is. 65:13, 14). Kʼoati si̱kjaʼaitsjenjiaan nga nʼio ndasʼin bichómani nga kʼoanʼia (chótsenlai je rekuadro xi tso: “Nda bichótsjoá”). Jotjín chjota xi kjoájinkoaan tjínjinkʼa xi koai kʼoa tjínjinkʼa xi mai. Ninga tsín ʼyaa jotjín koa̱nni xi kuicho, tsa kʼoénelee yaoná nga kʼoasʼiaan jé Jeobá chʼa̱sjengʼaa kʼoa kʼoasʼin skoe̱ni chjota je kjoanda xi tjínle (Sal. 145:3, 7; Apoc. 22:17).

3. Jósʼin si̱kʼabísoan je xo̱n xi tsʼe kjoajtíntse.

³ Je xi chjotajchínga sʼin tjío nga jngó jngó jtín, jé kʼoendajin jósʼin kʼoabíson je xo̱n xi tsʼe kjoajtíntse nga ngisasa nkjín chjota sʼe̱yole kʼoa tsa koa̱n sʼe̱yo ya jñani liʼya xi tjín je naile niʼya kʼoa tsa yaje̱ jña nʼio tjín chjota. Kʼianga xoto kao nga taingo kʼoati koa̱n si̱káyolee rebista je chjota tsa bele tokoán. Kʼoa xi jekjoaʼato jotjín nichxin sʼe̱jna nga kjoájinkoaan je chjota, nʼiojin tsjoa sʼe̱ tokoán nga tsakʼenelee yaoná nga kʼoakinʼia kʼoa nga nʼio nkjín chjota tsakjajinkoaan nga katafi je kjoajtíntse xi je Jeobá bʼéjnanda

Nda bichótsjoá

Nichxin kjoan jao jan nóján, jngo tichjaa kui tísíkʼabíson je xo̱n xi tsʼe kjoajtíntse, tonga likui tjínjngo kon tsa nda kuichotsjoá nga kʼoatísʼín. Itso xi kisikjaʼaitsjen: “A tokui koaini tsokʼoa je chjota ya kjoajtíntse nga sʼe̱yole je xo̱n”. Nga xoto tanjio, jngo chjota tsabe ya kjoajtíntse xi relijión sij tíjnajin. Nga ya chrian tsakʼejna chjota jebi, je tichjaa kikjákaonajmí. Chjota jebi kʼoakitso nga kuinga kichoni nga jngo xo̱n tsakʼaile xi tsʼe kjoajtíntse. Nkjín koya xi kiskonangi chjota jebi, kʼoa je tichjaa kao kjoatsjoa kitsoyale. Chjota jebi kʼoakitsole tichjaa nga nʼio kisasenle je kjoajtíntse. Kʼoati kitso nga nʼio kisasenle jokjoan najño xi yʼakjá je ndsʼee kao tichjaa kʼoa kao josʼín. Kʼoa nga tikuini nichxin, je tichjaa jngo chjota tsakjákaonajmí kao chjoónle xi tiya chrian tsakatiotʼanile. Kʼoakitso nga kʼoati jngo xo̱n xi tsʼe kjoajtíntse tsakʼaile, kʼoa nga autobús tsakatioyale nga kicho. Nʼio kisasenle jme xi jaʼa ya kjoajtíntse kʼoa kʼoakitso nga mele kuicho nga koa̱nnyaonni. Je tichjaa kʼiani koanchoyale nga nʼio chjíle nga nikʼabísoán je xo̱n xi tsʼe kjoajtíntse.
Sʼala choatse tjínle nga jngo ndsʼee kao chjoónle xi precursor regular tjíosíxá tsakjákaonajmí ya kjoajtíntse jngo chjota xi jengisa jchínga kao chjoónle. Je chjota kʼoa kao chjoónle kʼoakitso nga tokʼia títjon kicho kjoajtíntse. Je ndsʼee kao chjoónle kʼiaa i̱ kitsole: “Jókoanni kisʼejinno”, kʼoa i kitso: “Ñandia nga kichonijin ya niʼyanajin, jngo xo̱n kijnangi ya jchxo xo̱ntjoanajin”. Kʼoakitso nga tsakʼéxkia xo̱n jebi kʼoa nga kisikasén nga jetsakʼétʼa jmeni xi tso ya jto̱n yátsʼi̱n. Nga tjío ya kjoajtíntse, tjíokʼa ndsʼee xi kʼoakitsole nga ya katakjenkaoni. Chjota jebi kao chjoónle nʼio kisasenle je kjoajtíntse kʼoa ijngokʼa kicho nga koannyaonni. Tsakʼéndajin kao ndsʼee nga katafisíxatʼa ya niʼyale ánni nga tosi tonda sa̱kóyasínile Énle Niná.