Kʼiaa koaitsʼiani 1 sá marzo nga kjoájinkoaan chjota nga sʼe̱jna Kjoabichile Nainá
1. Kʼiá koaitsʼiani nga kjoájinkoaan chjota nga kjoaʼaítsjenya je kjoabiyale Cristo, kʼoa ánni nga ngisa nkjín nichxin sʼe̱jnasíni nó jebi.
1 Je Kjoabichile Nainá kʼiaa sʼe̱jna nga 26 sá marzo, kʼoa kʼiaa nga bixine 1 sá marzo koaitsʼiani nga kjoájinkoaan chjota. Mani nga je nó jebi ngisa nkjín nichxin sʼe̱jna nga si̱kʼabiá je xo̱n xi tsʼe nga kjoaʼaítsjenya kjoabiyale Cristo, ngisajin nkjín chjota kjoájinkoaan ya territorioná. Nʼiojin skénndiaale je jtín xi tse territorio tjínle.
2. ʼYáni xi koandiaa josʼin koa̱nxá ya territorio kʼianga kʼoabíson je xo̱n xi kjoáyolee chjota, kʼoa jósʼin kʼoainá xo̱n jebi.
2 Josʼin sʼe̱ndajin. Jé xi chjotajchínga sʼin tjío xi kuitsoni josʼin kʼoabíson je xo̱n ya territorio xi bʼakaole je jtín kʼoa kʼoati je xi kuitsoni tsa sʼe̱yo xo̱n jebi jñani nga tsín naile niʼya. Kʼiatsa kuinje̱ngisa xo̱n jebi nga jekanikʼabísoan nga xki̱ niʼya, koaan ya si̱kʼabísoan tojñani nga tjín chjota. Jé superintendente xi tsʼe servicio kjinele nga katasʼetʼa je xo̱n xi kʼoabíson jñani sʼe̱jna kʼoa jme orani sʼe̱jna nga kjoaʼaítsjenya je kjoabiyale Cristo. Kʼoa jé kjinele nga katasatíobasen jñani koa̱n skoé je xíngiaa jotjín koa̱nchjénle. Alikui koa̱n nga toñandia sʼe̱yobasen ngayeje xo̱n jebi. Je xíngiaa xi jetsoyason tokʼoakjoántjín skoé jotjín koa̱nchjénle nga jngó jngó xomana.
3. Jméni xi kuenta sʼiaan kʼianga si̱kʼabiá je xo̱n xi tsʼe nga kjoaʼaítsjenya kjoabiyale Cristo.
3 Jósʼin kjoáyoaa je xo̱n xi kʼoabíson. Tongisa nda tsa tochoa én kuinókjoaa ánsíni nga ngisa nkjín chjota kjoájinkonsíñá. Yaa pájina 4 faʼaitʼa jokoa̱n kuixoán kʼianga kjoáyoaa je xo̱n xi kʼoabíson. Tonga tsa jngo chjota ska̱jiaan xi nda sa̱sénle kʼoa mesale skoe̱ koaan tsesa cho̱banajmíkoaa. Kʼoa kʼianga si̱kʼabísoan xo̱n jebi nga xoto kao nga taingo kʼoati koa̱n kjoáyoaa je rebista tsa bele tokoán. Je xi ngisa kʼoailee kjoandosin kʼianga 2 sá marzo kuinga si̱kʼabiá je xo̱n xi tsʼe nga kjoaʼaítsjenya kjoabiyale Cristo ʼndele nga estudio kʼoétsʼiakoaa.
4. Ánni nga ñaki kao kjoatsjoa si̱kʼabísonsíñá je xo̱n xi tsʼe nga kjoaʼaítsjenya kjoabiyale Cristo.
4 Choyalee nga nʼio nkjín chjota kuicho nga kjoaʼaítsjenya kjoabiyale Cristo. Je kjoanokjoaya xi kjoaʼa nga kui nichxin kui kuitsoya jmekjoanni xá xi yʼa Jesucristo (1 Cor. 11:26). Sa̱kóya jme kjoanda xi tje̱nkao kjoabiyale (Rom. 6:23). Kʼoa kʼoati kʼuínyaná nga nʼio chjíle nga si̱kjaʼaitsjenjiaan ngantsjai (Juan 17:3). Kʼoénelee yaoná ngatsʼiaa nga kao kjoatsjoa si̱kʼabísoan je xo̱n xi tsʼe nga kjoaʼaítsjenya kjoabiyale Cristo.