Jósʼiaan nga ndasa kʼuínyasoán: kuisenkoaa je chjota xi tibʼailee estudio nga katatsjoátʼale yaole Niná kʼoa nga katafisʼenngindá

ÁNNI NGA NʼIO CHJÍSÍNILE NGA KʼOASʼIAAN: Kʼianga so̱kole kjoanda ngixko̱n Jeobá je chjota xi bʼailee estudio tjínnele nga tsjoátʼale yaole Niná kʼoa nga koaisʼenngindá (1Pe 3:21, Traducción del Nuevo Mundo). Je xi kʼoasʼin fikao yaole jmeni xi katsole je Niná nda bʼejna ngixko̱n (Sl 91:1, 2). Ñá xi chjotale Cristo maa jé Jeobá bʼaitʼalee yaoná, ali tsa jngojin chjota, ali tsa jngojin xá kʼoa ali tsa jngojin jtín. Kuinga je chjota xi bʼailee estudio tjínnele nga tsjoake katama kʼoa nga katabexkón Jeobá (Ro 14:7, 8).

JOKOA̱N SʼIAAN:

• Kʼianga tibʼailee estudio je chjota, cho̱bayañá jmeni xi bakóyaná xi tʼatsʼe Niná je kjoaʼmiya xi tichotʼayá. Kʼoakʼuínlee nga nyaon nyaon katabʼéxkia je Biblia kʼoa nga katabʼétsʼoa ngantsjai (1Te 5:17; Snt 4:8).

• Kʼoainganʼiolee je xi tibʼailee estudio nga katatsjoátʼale yaole Niná kʼoa nga katafisʼenngindá. Kʼoati kuisenkoaa tsa jmesani xi mele kuichotjenngi. Tobʼelañá, tsa mele tsjoá énle ya jinjtín, tsa mele kuitsoyasonle chjotandaindʼiale kʼoa tsa ya tʼaxále. Tonga si̱kjaʼaitsjeen, nga tsín ʼya xi bʼénele Jeobá nga je katasíxále kʼoa nga ni̱ma̱ná katanroajinni nga kʼoaitʼalee yaoná (Dt 30:19, 20).

• Kʼoakʼuínlee je xi tibʼailee estudio nga katasíkʼantjaiya yaole tsa mele nga nda kʼoéjna ngixko̱n Jeobá kʼoa tsa mele nga koaisʼenngindá (Pr 27:11). Tsakui nichxin ñʼai kjimale nga tísíkʼantjaiya yaole jokjoan kʼoa tsakuije̱ je kostumbre xi tjínle xi ñʼai kjimale nga tífaʼáxinle yaole. Machjén nga kuisenkoaa nga katasíkatío jmeni xi sʼín kʼoa nga katasíndaya yaole (Ef 4:22-24). Koako kʼalee kjoaʼmiya xi “Je Biblia síkʼantjaiyaa chjota” ʼmi xi faʼaitʼa Xo̱n xi Bájinkonná.

• Kʼoéyanajmílee jokji tsjoa tjínná nga Jeobá tinixálee (Isa 48:17, 18).