Tsjoa tʼai tokuin tʼatsʼe kjoanichikontʼain xi tsjoáná Niná

Je Niná kʼoakitsole profeta Abrahán nga tʼatsʼe ntje̱le nga koa̱nchikontʼainni “ngatsʼi naxinandá xi tjín sonʼnde” (Génesis 22:18). ʼYá tʼatsʼe kinchja̱ni.

Jeme 2,000 nó tjínle nga je Niná kitsjoale nganʼio je Jesús nga koanle tsakatío kjoaxkón. Nga ya ntje̱le Abrahán kitjenni Jesús, jé sichjén Niná nga sichikontʼain ngatsʼi naxinandá (Gálatas 3:14).

Je kjoaxkón xi tsakatío Jesús tsakinyakao chjota nga koanjinle nga je Niná kisikasén kʼoa nga totʼatsʼe koa̱nchikontʼainni je chjota. Kʼoati kui tsakakó nga je sichjén Niná nga sʼe̱ná kjoanda nichxin xi nroaján. Je kjoaxkón xi tsakatío Jesús kʼoati kui tsakakó jokjoan.

Tjao koanle chjota kʼoa kisindaya xi chʼin tjínle.

Ñandia nga jngo chjota xi tífiʼndojon yaole kʼoakitsole Jesús nga katasíndaya. Je Jesús kisikao kʼoa i kitsole: “Mena, katamatsjai”. Kʼoa ndi̱toon koanndaya chjota jebi (Marcos 1:40-42).

Nda chjota koan kʼoa kisikjen je xi baole.

Je Jesús alikui koanmele nga kjinrá kjoaʼa je chjota. Nkjín kʼa nga tsakʼéjna kjoaxkón je Jesús, jmi chjota kisikjen kʼoa tojngo jao nioxtila kao jti kisichjén (Mateo 14:17-21; 15:32-38). Koanski ngatsʼi kʼoa saʼnda kinjengi tsojmi xi kiskine.

Koanmake chjota kʼoa kisikjaʼáyale kʼien.

Je Jesús kisikjaʼáyale je ʼndíle jngo ʼndíchjoónkʼan, nga̱ “koanmake” chjoón jebi nga tsínle ʼya xi sikuinda (Lucas 7:12-15).