KJOAʼMIYA XI CHOTʼAYA 15
Jmé xi bakóyaná je kjoaxkón xi tsakatío Jesús
“Je Jesús xi tsakʼamje nga tokjoanda kisʼin, kʼoa kisinda ngatsʼi” (HECH. 10:38).
KJOAJNDA 13 Choa̱ xi tsakʼéjnaná Cristo
XI TÍNCHJA̱NIa
1. Jméni xi kjima nga tsakʼéjnatítjon kjoaxkón je Jesús.
KUILA si̱kjaʼaitsjenjiaan jokoan nga tosʼa tsakʼétsʼiakao Jesús nga kitsoyason kʼianga tífikjetʼa nó 29. Kʼianga chixan chjota ya Caná, jngo ʼnde xi tíjna ya Nazaret jñani koanjchínga je Jesús, ki je Jesús kao na̱le kʼoa kikao kʼa je chjotatjenngile. Je María miyole koanni je xijchále chjota xi tíbixan, kʼoati je tísísinle chjota xi tjíobichó, tonga toʼikoan jetʼa je vino.b Tsakui nichxin ngisa nkjín chjota kicho jotjín tíchoyale tsakai, kʼoa kʼiaa kjitʼanangi ki María jñani tíjna Jesús kʼoa kʼoakitsole nga jetsín vino (Juan 2:1-3). Je Jesús vino kisikʼóya je nandá kʼoa vino jebi kui xi ngisasa nda ʼyo (Juan 2:9, 10).
2, 3. 1) Jósʼin kisichjén nganʼiole Jesús. 2) Jósʼin koasenkaoná nga kui chótʼayajiaan je kjoaxkón xi tsakatío Jesús.
2 Nkjínsa kjoaxkón tsakatío Jesús nga jaʼai i̱ Sonʼnde.c Nkjín jmi chjota tsakasenkao. Tobʼelañá, ñandia nga 5,000 chjota kisikjen kʼoa ñandia nga 4,000 kisikjen. Tsakui nichxin tsʼato 27,000 chjota tjínni xi kisikjen tsa kʼoéxkikoaa je yánchjín kao xtiʼndí xi ya tjío (Mat. 14:15-21; 15:32-38). Kʼoati kisindaya Jesús xi chʼin tjínle nga kʼia (Mat. 14:14; 15:30, 31). Tokʼoajin koanle chjota jebi nga kisikjen je Jesús kʼoa nga kisindaya.
3 Tsee xi bakóyaná je kjoaxkón xi tsakatío Jesús. I̱ kjoaʼmiya jebi kui chótʼayajiaan xi koasenkaoná nga nʼio sʼe̱jna kjoamakjainná. Kʼoati jchaa jósʼin chjénngilee Jesús. Nga kjoaxkón tsakatío nangitokon koan kʼoa koanmake chjota.
XI BAKÓYANÁ TʼATSʼE JEOBÁ KAO JESÚS
4. ʼYá tʼatsʼeni xi ʼyaa nga chotʼayajiaan je kjoaxkón xi tsakatío Jesús.
4 Je kjoaxkón xi tsakatío Jesús tsee xi bakóyaná xi tʼatsʼe, kʼoa kʼoati bakóyaná xi tʼatsʼe Jeobá, nga̱ jé Jeobá kitsjoale nganʼio nga koan tsakatío kjoaxkón. Ya Hechos 10:38 itso xi tʼatsʼe Jesús: “Niná kitsjoale xá kao Espíritu Santo kao nganʼio. Je Jesús xi tsakʼamje nga tokjoanda kisʼin, kʼoa kisinda ngatsʼi xi je na̱i kisikjaʼá kjoañʼai, nga̱ Niná tíjnakao Jesús”. Je Jesús tsakakó jokjoan je Nʼaile kʼoa josʼin síkjaʼaitsjen, kʼoa yaa tsakakó jokitso kʼoa jokisʼin, jolani kʼianga tsakatío kjoaxkón (Juan 14:9). Janla koya kataʼyaa jmeni xi bakóyaná je kjoaxkón xi tsakatío Jesús kʼoa xi koasenkaoná nga nʼio sa̱tío je kjoamakjainná.
5. Ánni nga kjoaxkón tsakatíoni je Jesús (Mateo 20:30-34).
5 Xi títjon, je Jeobá kao Jesús nʼio tsjoakená. Kʼianga jaʼai Jesús i̱ Sonʼnde, kʼoasʼin tsakakóni nga nʼio tsjoake chjota kʼianga kisindaya xi kjoañʼai tjíofaʼá. Ñandia nga jao chjota xi xka̱ kjoan kʼoakitsole nga katasíndaya (tʼexkiai Mateo 20:30-34).d Je Biblia kʼoatso nga koanmake chjota jebi kʼoa kisindayaa. Kʼianga én griego xi “koanmake” tso kui tsoyanile nga ñaki tsen koanle kʼianga tsabe chjota xi kjoañʼai tjíofaʼá. Nga koanmake yaa tsakakóni Jesús nga nʼio tsjoake chjota, kuinga kʼoati kisikjenni xi baole kʼoa kisindayaa xi jtsé yajon yaole (Mat. 15:32; Mar. 1:41). Ñaki tjínjngoo tokoán nga mamakená je Jeobá kao Jesús, nʼio tsjoakená kʼoa aon male nga kjoañʼai chjaʼá (Luc. 1:78; 1 Ped. 5:7). Kui xi mele nga kjoaʼaxin ngayeje xi kjoañʼai síkjaʼáná.
6. Jméni xi koa̱nle sʼin je Jesús xi totʼatsʼe nganʼio xi kitsjoale Jeobá.
6 Xi majaoni, je Niná kitsjoale nganʼio je Jesús nga kjoaʼaxin ngayeje kjoa. Tjín kjoa xi tsín koa̱nná ñá kʼoéndajiaan. Kʼianga tsakatío kjoaxkón je Jesús tsakakó nga koa̱nle kʼoendajin tojme kjoani. Tobʼelañá, tjínle nganʼio nga kjoaʼaxin je jée nga̱ yaa nroani nga kjoañʼai chjaʼá, jolani nga chʼin sʼená kʼoa nga biyaa (Mat. 9:1-6; Rom. 5:12, 18, 19). Nga tsakatío kjoaxkón je Jesús kʼoasʼin tsakakóni nga koa̱nle kjoaʼaxin tojme chʼinni kʼoa nga sikjaʼáyanile xi jekʼien (Mat. 4:23; Juan 11:43, 44). Kʼoati tjínle nganʼio nga koa̱nle sikʼéjnajyo je jtsíntjao̱nʼio kʼoa sikinjele je sénnichxin xi chʼaokjoan (Mar. 4:37-39; Luc. 8:2). Nda sʼe tokoán nga tse nganʼio kitsjoale Jeobá je Jesús nga koa̱nle kjoaʼaxin ngayeje kjoa xi tjín.
7, 8. 1) Nga kjoaxkón tsakatío Jesús nga jaʼai i̱ Sonʼnde, jméni xi tsín jao tjín tokoán nga kʼoakoa̱n nichxin xi sʼa nroa. 2) Jméni xi nʼio choyalai nga kʼoakoa̱n kʼianga jeʼndenaxó koa̱n i̱ Sonʼnde.
7 Xi majanni, tjínjngoo tokoán nga tse kjoanichikontʼain kjoaʼaíkao Chjotaxále Niná jngo tjíjtsa Sonʼnde. Jmeni xi kisʼin Jesús nga tsakatío kjoaxkón kui bakóyaná nga kʼoasʼin jngo tjíjtsa Sonʼnde kʼianga jekoatexoma i̱ Sonʼnde. Si̱kjaʼaitsjenla jonaskásʼin kuiyoaa nga kʼia. Ñaki nda kuiyoaa nga̱ kjoaʼaxin je xi kjoañʼai síkjaʼáná kʼoa kjoaʼaxin je chʼin (Is. 33:24; 35:5, 6; Apoc. 21:3, 4). Alikui tikjinrá sʼe̱ni kʼoa tsín tijme kjoaxkón kjoaʼaíneniná (Is. 25:6; Mar. 4:41). Nʼio tsjoa sa̱tío tokoán nga chjoéyaa je xíngiaa xi kjoaʼáyanile (Juan 5:28, 29). Kʼianga jeʼndenaxó koa̱n i̱ Sonʼnde, jméni xi nʼio choyalai nga kʼoakoa̱n.
8 Nga tsakatío kjoaxkón je Jesús nangitokon koan kʼoa koanmake je chjota, kʼoa kʼoati tjínnele koa̱nkjoaan tsanda ñá. Jaola choa̱ kataʼyaa. Xi títjon, jokoan nga tjín xi chixan ya Caná.
NANGITOKON KATAMAA
9. Ánni kjoaxkón tsakʼéjnani Jesús kʼianga chixan chjota ya Caná (Juan 2:6-10).
9 (Tʼexkiai Juan 2:6-10).e A tjínnele vino kisikʼóya Jesús je nandá kʼianga jetʼa vinole je chjota xi tjíobixan. Mai. Nga̱ tsín jña kʼoatso je én xi tongini kinokjoa tsa vino síkʼóya nandá je Mesías. Tikjaʼaitsjenlai tsa jilani xi tibixain kʼoa kjoetʼa je tsojmi. Je Jesús kuijin kisikjaʼaitsjen nga kjoasoa koatiojin je xi tjíobixan kao xínkjín kʼoa kuijin nga tsakasenkaoni nga koanmake. Kuinga vino kisikʼóyani je nandá 390 litro nandá xi vino kisikʼóya kʼoa kui vino xi ngisasa nʼio nda ʼyo. Kʼoa ánni nga kʼoasikji tseni nandá xi vino kisikʼóya. Je xi kinjengi skanjin koanchjén ijngokʼa kʼoa tsakuije̱ nga koatena je xi tokʼia chixan. Nʼiojin tsjoa kisatio kon.
Kʼoasʼiaan jokisʼin Jesús, alikui yaoná chʼa̱sjengʼaa jmeni xi nʼia (Chótsenlai párrafo 10, 11)h
10. Tikʼaxki̱ kʼai jmeni xi koan kʼianga chixan chjota ya Caná tojo tso ya capítulo 2 xi tsʼe Juan (kʼoati chótsenlai sén xi faʼaitʼa).
10 Chótʼayajinla jmeni xi tso ya capítulo 2 xi tsʼe Juan jmeni xi koan kʼianga chixan chjota ya Caná. Ali tsa jejin Jesús tsakinyá nandá je xjoa̱. Nga tsín ʼya xi sʼe̱jinle jmeni xi sʼin je Jesús, jé choʼnda xi ya tjíosíxá kʼoakitsole nga katabinyá nandá je xjoa̱ (versículo 6 kao 7). Kʼianga vino jekisikʼóya nandá je Jesús alikui jesoa kikaole je xi tísísinle chjota, jé choʼnda xi ya tjíosíxá kʼoakitsole nga katafikao (versículo 8). Kʼoa ali tsa i̱jin kitso Jesús ya jinle chjota: “Kuisi tonda ʼyo je vino xi kabʼenda”.
11. Jméni xi bakóyaná je kjoaxkón xi tsakʼéjna Jesús.
11 Kʼianga tsakʼéjna kjoaxkón je Jesús tsakakó nga nangitokon. Alikui kui tsakʼasjengʼani yaole nga vino kisikʼóya nandá. Kʼoa tsínkʼia nga yaole tsakʼasjengʼa kʼianga jme xi kisʼin. Nangitokon koan kʼoa jé Jeobá tsakʼasjengʼa (Juan 5:19, 30; 8:28). Chjénngilee Jesús, nangitokon katamaa kʼoa tsín yaoná chʼa̱sjengʼaa kʼianga jme xi nʼia. Alikui yaoná chʼa̱sjengʼaa josʼin tinixálee Jeobá, tosa je chʼa̱sjengʼaa nga kui kjoanda tjínná nga je tinixálee (Jer. 9:23, 24). Jé Jeobá xi bakinle chʼa̱sjengʼaa nga̱ tsín jme xi koa̱nná kʼoasʼiaan nga toñá (1 Cor. 1:26-31).
12. Jósasʼin koa̱n chjénngilee je Jesús nga nangitokon koan. Jngo choa̱ tʼejnai.
12 Si̱kjaʼaitsjeen jósasʼin koa̱n chjénngilee Jesús nga nangitokon koan. Tobʼelañá, tsa jngo xi chjotajchínga sʼin tíjna koasenkao jngo ndsʼee xi sʼa xti xi siervo ministerial ma nga kʼoenda je kjoanokjoayale xi tosʼa tsjoátítjon. Nga kʼoasʼin basenkao je xi chjotajchínga sʼin tíjna, nʼio nda tsjoá kjoanokjoaya ndsʼee jebi kʼoa tsjoa satíole ngatsʼi ndsʼee. Kʼianga jefetʼa je kjoajtín jngo xi i̱ bichó tsole xi chjotajchínga sʼin tíjna: “Nʼiongó nda katsjoá kjoanokjoayale ndsʼee jebi”. Alikuijin i̱ kuitso je xi chjotajchínga sʼin tíjna: “Kuinga an tsakasenkoa nga nda katsjoáni kjoanokjoayale”. Nga nangitokon ma, tosajin i̱ kuitso: “Jaon, ndasʼin katsjoa”. Jngo chjota xi nangitokon ma alikui yaole bʼasjengʼa kʼianga basenkao xi kjaʼaí. Tosaa kui fini nga kuenta sʼín Jeobá jmeni xi sʼín (tingósonkoai Mateo 6:2-4; Heb. 13:16). Je Jeobá nda sʼe kon nga kʼoati nangitokon maa tojo kisʼin Jesús (1 Ped. 5:6).
KOAKOÁ KJOAMATOKON
13. Jméni xi kjima ya naxinandá Naín nga kichochrian je Jesús, kʼoa jméni xi sʼín (Lucas 7:11-15).
13 (Tʼexkiai Lucas 7:11-15).f Jela me jao nó tjínle nga títsoyason Jesús kʼianga ki ya naxinandá Naín xi nchja̱ni Galilea, ʼnde jebi tiyaa chrian tíjnani ya Sunem kʼoa jela 900 nó tjínle nga kisikjaʼáyale Eliseo je tiʼndíle jngo chjoón ya ʼnde jebi (2 Rey. 4:32-37). Kʼianga jebichóchrian Jesús ya naxinandá Naín nkjín chjota be xi ʼndíkʼien tjíofikáñe. Je xi tífisʼeñe jé ʼndítile jngo ʼndíchjoónkʼan. Je Jesús kʼoatsole chjota nga katabinya kʼoa síkjaʼáyale je ʼndítile chjoón jebi. Ya Evangelio kʼoatso nga jan chjota kisikjaʼáyale Jesús, kʼoa je xi títjon bʼaxki̱ nga kisikjaʼáyale jé ʼndítile chjoónkʼan jebi.
Kʼoasʼiaan jokisʼin Jesús, koakolee kjoamatokon je xi kjoaba tjíojin (Chótsenlai párrafo 14-16)
14. Tʼeyanajmí jmeni xi kisʼin Jesús tojo tso ya capítulo 7 xi tsʼe Lucas (kʼoati chótsenlai sén xi faʼaitʼa).
14 Kataʼyala jmeni xi kisʼin Jesús tojo tso ya capítulo 7 xi tsʼe Lucas. Kui bʼéyanajmí jmeni xi koan. Kʼoatso nga títjon “tsabe” Jesús je ʼndíchjoón xi ʼndíle tífisʼeñe, kʼoa xijema kʼoatso nga “koanmake” Jesús je ʼndíchjoón jebi (versículo 13). Tsakui nichxin tsabe nga tíkjiʼndá nga tífisʼeñe je ʼndítile. Je Jesús ba koanle. Ali tsa tokʼoajin kitso nga koanmake ʼndíchjoón jebi, ñaki tsakakó nga koanmake. I̱jin kitsole: “Ali tichjiʼndájinni”. Tonga ali tsa tokʼoajin kitsole, kisikjaʼáyale je ʼndítile (versículo 14 kao 15).
15. Jmé xi bakóyaná je kjoaxkón xi tsakʼéjna Jesús.
15 Jméni xi bakóyaná je kjoaxkón xi tsakʼéjna Jesús. Kui bakóyaná jósʼin koakolee kjoamatokon je xi kjoaba tjíojin. Ningalani tsín koa̱nná nga si̱kjaʼáyalee xi jekʼien, tojo kisʼin Jesús nga kisikjaʼáyale je tile ʼndíchjoónkʼan jebi, koaan koakolee kjoamatokon je xi xínkjín kisicha. Je xi títjon, kuenta sʼiaan jósʼin tjíoni je xi xínkjín kisicha kʼoa kʼia chja̱kaonajmiá nga si̱nʼioá kon kʼoa tsa josasʼin koa̱n kuisenkoaa (Prov. 17:17; 2 Cor. 1:3, 4; 1 Ped. 3:8).g Ninga tojngo jao én chja̱koaa kʼoa ni tochoa jmeni xi sʼiaan nʼio kuinyakao je xi kjoaba tjíofaʼatojin.
16. Jméni xi bakóyaná choa̱ xi faʼaitʼa párrafo (chótsenlai je sén xi kui tínchja̱ni jokoan je tichjaa).
16 Kataʼyala jokoan ñandia kʼianga tísʼejna kjoajtín. Kʼianga kui tíjnda je kjoajnda xi nchja̱ni tʼatsʼe kjoafaʼáya, jngo tichjaa tsabe nga tíkjiʼndá je tichjaa xi ya séjnachrian. Kuinga tíkjiʼndáni nga̱ chriansʼakjoán kʼien je tsotiʼndíle. Nga tjínjinle tichjaa ánni nga tíkjiʼndáni tokjoan kinrʼoe, kitsoakjá kʼoa ñatjen kisee je kjoajnda. Je tichjaa xi tíkjiʼndá tsjoa tsakáya kon, kʼoa tsjoa kisʼele nga ki kjoajtín. I kitso: “ʼBeña nga ya kʼoainganʼiona ya Ndʼia jña chotʼayá”. Kuenta sʼín je Jeobá jmeni xi nʼia kʼoa jmeni xi bixoán nga bʼainganʼiolee je “xi jekisikinroajen kon” nga kjoaba tjíojin (Sal. 34:18).
NʼIO SʼE̱JNA KJOAMAKJAINNÁ NGA CHÓTʼAYAJIAAN JME XI KISʼIN JESÚS
17. Jmé xi kachotʼayajiaan i̱ kjoaʼmiya jebi.
17 Nga chótʼayajiaan je kjoaxkón xi tsakatío Jesús koasenkaoná nga nʼio sʼe̱jna kjoamakjainná. Jmeni xi tso je Evangelio kui bakóná nga nʼio tsjoakená je Jeobá kao Jesús, kʼoa nga tjínle nganʼio je Jesús nga koa̱nle kjoaʼaxin je kjoa xi tjín Sonʼnde. Kʼoa tjínjngoo tokoán nga jeme kjoaʼaíkao kjoanichikontʼain je Chjotaxále Niná i̱ Sonʼnde. Kʼianga kui chotʼayajiaan kʼoati basenkaoná nga nikjaʼaitsjenjiaan jósʼin koa̱n chjénngilee jokjoan je Jesús. Kʼianga chótʼayajtían ya niʼyaná kʼoa tsa toñá chótʼayá, koaan chótʼayajiaan jmesa kjoaxkón xi tsakatío Jesús, kui kuenta sʼiaan jmeni xi bakóyaná kʼoa kui chja̱kaonajmíñá xi kjaʼaí. Kʼianga kʼoasʼiaan ngisaa nda koa̱n cho̱banajmiá (Rom. 1:11, 12).
18. Jmé xi chótʼayajiaan ya kjoaʼmiya xi ijngo.
18 Kʼianga tochoatsesa nichxin tíjnale Jesús nga kitsoyason, kʼiaa kisikjaʼáyale jngo chjota xi miyole mani, xi jeño nichxin kijnakʼien. Kʼoa yaa majanni chjota xi kisikjaʼáyale Jesús tojo tso je Evangelio. Jmé xi bakóyaná jebi, kʼoa jméni xi sʼiaan nga sʼe̱jngo tokoán nga kjoaʼáyanile xi jekʼien. Kui tʼatsʼe jebi chótʼayajiaan ya kjoaʼmiya xi ijngo.
KJOAJNDA 20 Kinikasénní je ʼNdíli xi tsjoachai
a Je Jesús kisikʼéjnajyo jtsíntjao̱, kisindaya xi tjíomʼe kʼoa kisikjaʼáyale xi jekʼien. Tsjoa sʼe tokoán nga bʼexkiaa tʼatsʼe kjoaxkón xi tsakatío Jesús. Je kjoaxkón xi tsakatío alikui toxkia kichjitʼa ya Biblia, kui xá kichjini nga koakoyaná. I̱ kjoaʼmiya jebi kui kjoaxkón xi tsakatío Jesús chótʼayajin kʼa. Ngisaa nʼio sʼe̱jna kjoamakjainná nga kui chótʼayajiaan jmeni xi kisʼin je Jeobá kao Jesús kʼoa jchañá jmeni xi tjínnele sʼiaan.
b Jngo chjota xi tʼatsʼe Biblia kotʼayason, itso: “Ya ʼnde jñani síkʼaxki̱ Biblia nʼio kitsjoale kjoandosin chjota kʼianga kiskoeya xínkjín. Tobʼelañá, ya jña tjín xi bixan nʼio nkjín tsojmi xi ma chine sʼe”.
c Tsʼato 30 kjoaxkón xi tsakatío Jesús bʼaxki̱ ya Evangelio. Nkjín kʼa nga nkjín kjoaxkón tsakatío nga tojngo nichxin. Ñandia nga jngo naxinandá ma chjota kichokonle Jesús kʼoa nʼio nkjín chjota kisindaya nga kʼia (Mar. 1:32-34).
d Mateo 20:30-34: “Koeni jao chjota xi xka̱ kjio tjíondai ndiaa. Kʼia nga kinrʼoé nga Jesús jaʼatobe kiskiʼndíatʼa, kitso: Señor, ji xi ʼndíle David, jchamatakonnajin. 31 Je chjotankjínbe kinchja̱tikao, jméni nga jyó katabatiosíni, tonga je ngisa nʼio kinchja̱: Señor, ji xi ʼndíle David, jchamachanajin. 32 Kʼia Jesús tsakasenjna, kinchjale, kitso: Jmé xi meno nga sikaono. 33 Je xi xka̱ kjio kitsole: Señor, katatjoʼaingi xkuinjin. 34 Kʼia Jesús koanmake kisikao xko̱n. Koantsen ndi̱toonle, kʼoa kitjenngile”.
e Juan 2:6-10: “Ya tjío jaon tií tsian xi la̱jao̱, xi nandá sʼeya, josʼin sítsjeni chjota judíos. Jao janla nisanandá jchóya tiíbe nga jngójngó. 7 Jesús kʼuikitsole: Tinyao nandá tiíbe. Kʼia kisitsentjai. 8 Kʼuikitsole: Chʼa̱sjao nandábe, tangínkaolao maxtoan. Kikaole. 9 Maxtoanbe kiskotʼa je nandá xi kitsʼónya bino. Likui tsabe jña jaʼaini (tonga je choʼnda xi tsakʼasje nandá tsabe). Kʼia maxtoanbe kinchjale je xʼin xi tíbixan. 10 Kʼuikitsole: Ngatsʼi chjota títjon tsjoá bino xi ngisa nda. Kʼia nga jekitse, kʼia tsjoá xi likui tojo nda. Tonga ji totsakʼejnatjaoní je bino xi ngisa nda saʼnda ndʼai”.
f Lucas 7:11-15: “Koanskanni Jesús ki ya naxinandá xi Naín ʼmi. Nkjín chjotale, kʼoa ali tokʼoakji nkjín chjota xi ñatje̱n kikao. 12 Kʼia nga jaʼaichrianni xo̱ntjoa naxinandá, koeni nditsinján tjíobʼasje jngo kʼen xi toje tojngo ʼndíle na̱le jñale xi tíjnakʼan. Kʼoa nkjín chjota xi ya tsʼe naxinandábe tjíokao nga je. 13 Kʼia nga je Nainá tsabe, koanmake nga je, kʼoakitsole: Ali chjiʼndájin. 14 Kʼia nga jaʼaitʼale kisikao kaxa̱le kʼenbe. Je xi yʼa tsakinya, Jesús kitso: Ti, ji xo xinle, tisótjain. 15 Kʼia tsakʼejnakixi kʼenbe, kʼoa tsakʼétsʼia nga kinchja̱. Kʼoa Jesús kitsjoale na̱le”.
g Yaa tsoyaná jméni xi koa̱n kuixoán kʼoa jósʼin si̱nʼioá kon je xi kjoaba tjíofaʼatojin je Xo̱n xi Bájinkonná xi tsʼe mayo 2016, jñani “Jósʼin kʼoainganʼiolee xi kjoaba tjíojin” tso.
h XI TÍNCHJA̱NI SÉN XI FAʼAITʼA: Je Jesús alikui kʼoakitso tsa je tsakʼénda vino, to tíkotseen nga tjíoʼbi vino je xi chixan kao xi kicho.