Koakoá nga jetiyondaa nga kjoaʼaí kjoañʼai xi nʼio tse

1. Jósʼin basenkaoná nga tongini biyondaa nga kjoaxkón sʼe.

KʼIANGA tongini biyondaa basenkaoná nga tsín jme xi maná. Tobʼelañá, kʼianga tongini bationda chjota ya jñani kjoaxkón bichó bitjontjaile yaole, kʼoa ngisaa ma binyakao xi kjaʼaí. Je jtín xi binyakao chjota xi Europa tíjna, i kitso: “Kʼianga tongini biyondaa nda bichómani”.

2. Ánni tongini kuiyondañá nga kjesa fitsʼiajin je kjoañʼai xi nʼio tse (Mateo 24:44).

² Toxijña koaitsʼia je “kjoañʼai xi nʼio tse” (Mat. 24:21). Tonga alikui kʼoakoa̱n joma nga kjoaxkón sʼe, nga tsín ʼya xi tjínjinle nga kʼoama, ñá jetjínjinná nga kʼoakoa̱n. Jela jao jmi nó tjínle nga kʼoakitsole Jesús je chjotatjenngile nga tongini katabationda nga kui nichxin (tʼexkiai Mateo 24:44).b Kʼiatsa kjuintjenngiaa je kjoafaʼaitsjen xi kitsjoa Jesús chókjoajinná je kjoañʼai xi sʼe̱ kʼoa kuinyakaoñá je xi ngikʼa nga kʼoati chókjoajinle (Luc. 21:36).

3. Ánni machjénni nga koakoá kjoaka, kjoamatokon kao kjoatsjoacha nga kuiyondalee nga koaitsʼia kjoañʼai xi nʼio tse.

³ Kʼianga kuiyondalee nga koaitsʼia kjoañʼai xi nʼio tse machjén nga koakoá kjoaka, kjoamatokon kao kjoatsjoacha. Jósʼiaan kʼianga kʼoakʼuínná nga kui kjoájinkoaan chjota jmeni xi koa̱ntʼain kʼoa tsa koa̱njtile nga kʼoakʼuínlee (Apoc. 16:21). Kʼianga si̱tjosonlee je Jeobá kʼoa nga ñaki kʼoakʼoé tokoán nga je koasenkaoná, machjén nga ska̱ná je kjoa xi kuitjátojiaan nga kui nichxin. Jósʼiaan kʼiatsa sicha tsojmi xi tjínle je ndsʼee kʼoa tsa tsín tijme xi sʼe̱nile (Hab. 3:17, 18). Machjén nga koakolee kjoamatokon, nga kuinyakoaa kʼoa nga kʼoailee je tsojmi xi machjénle. Kʼoa jósʼiaan nga kʼoetʼaná je naxinandá xi jngo jtín mani, kʼoa tsakui nichxin toʼndí kji cuarto jñani ñatjen kuiyo choatse kao je ndsʼee (Ezeq. 38:10-12). Nga kʼia, nʼio tjínle kjoandosin nga koakolee kjoatsjoacha je ndsʼee.

4. Jótso je Biblia, ánni machjénni nga ngisa koakoá kjoaka, kjoamatokon kao kjoatsjoacha.

⁴ Je Biblia kʼoatso nga ngisa koakoá kjoaka, kjoamatokon kao kjoatsjoacha. Ya Lucas 21:19, itso: “Xi totʼatsʼe kjoatsejtano si̱kinjao kjoabijnachonno”. Colosenses 3:12 itso: “Katasʼeno kjoamatakon”. Kʼoa ya 1 Tesalonicenses 4:9, 10, itso: “Jekʼoasʼin kichotʼayao tsʼe Niná josʼin nga matsjoachao xíngio. [...] Tonga tibʼetsʼoalaijin, ndsʼe, nga ngisasa tsjoachao xíngio”. Kjoafaʼaitsjen jebi jé tsakʼaile je chjotale Cristo xi tokʼoa jebakó kjoaka, kjoamatokon kao kjoatsjoacha. Kʼoatsakʼinle nga tosi tonda kʼoakatasʼín. Kʼoati machjén nga tosi tonda kʼoasʼiaan tsanda ñá. Jméni xi koasenkaoná. I̱ kjoaʼmiya jebi kui chótʼayajiaan jokisʼin je chjotale Cristo xi títjon tsakatio nga tsakakó kjoaka, kjoamatokon kao kjoatsjoacha kʼoa jósʼin koa̱n chjénngilee nga kuiyondalee nga kjoaʼaí kjoañʼai xi nʼio tse.

KATASʼENÁ KJOAKA

5. Jméni xi kisʼin je chjotale Cristo xi títjon tsakatio nga kiskale je kjoa xi jaʼatojin.

⁵ Je chjotale Cristo xi títjon tsakatio kiskale je kjoa xi jaʼatojin (Heb. 10:36). Sa tse sa tsee kjoa jaʼatojin chjotale Cristo jebi xi totʼatsʼe kjoamakjainle. Kitjenngike je chjota judío xi tsakinyatítjonle religión kʼoa kao chjotaxá xi Roma tsʼe, kʼoa kʼoati totaon tsabe je xi tixínkjín mani (Mat. 10:21). Ñʼai koanle nga tsakatio je chjota xi yátsʼi̱n tsakinyále Niná, xi koanmele kisixkoa̱ya je jtín nga kui kitsoya xi tsín kixi tíjna (Hech. 20:29, 30). Ninga kui kjoa jebi jaʼatojin chjotale Cristo kiskale (Apoc. 2:3). Je xi tsakinyakao nga kichokjoajinle, kuinga kisikjaʼaitsjenjin nga kʼoati kjoa jaʼatojin je choʼndale Niná xi tsakatio nichxin kjoatse, jolani je Job (Sant. 5:10, 11). Kʼoati tsakʼétsʼoale Niná nga kisijéle nganʼio (Hech. 4:29-31). Kʼoa kui kuenta kisʼin nga je Jeobá sichikontʼain kʼiatsa chókjoajinle je kjoa xi tjíofaʼatojin (Hech. 5:41).

6. Jmé xi bakóyaná jokisʼin je Merita kʼianga xínkjín tsakatiochjoale.

⁶ Kʼoati ska̱ná je kjoa xi kuitjátojiaan tsa si̱kjaʼaitsjenjiaan josʼin kichokjoajinle je kjoa xi jaʼatojin je choʼndale Niná xi tsakatio nichxin kjoatse, kʼoa kʼoéxkiaa je choa̱ xi faʼaitʼa je xo̱n xi Énle Niná yʼangini. Kʼoakisʼin je tichjaa xi Merita ʼmi, xi Albania tsʼe kʼianga xínkjín tsakatiochjoale. Itso: “Ñaki kichokajin ni̱ma̱na kʼianga kiskotʼayajian xi tʼatsʼe Job. Je Job nʼio tse kjoa jaʼatojin kʼoa tsín koanjinle ánni nga kʼoakoanni. Ninga kuilani kjoa jebi jaʼatojin i kitso, tojosʼin faʼaitʼa ya Job 27:5: Saʼnda nga an xi kuiyá, kixi koa̱n. Kui kisikjaʼaitsjenjian nga tsín kʼoasikji kjoa tifaʼatojian joni Job kʼoa ʼbeña ʼyáni xosʼín nga kjoa bitjatojiaan”.

7. Ningalani tsín ñʼai tjín kjoa tibitjatojiaan ndʼaibi, jméni xi machjén nga sʼiaan.

⁷ Je xi koasenkaoná nga chókjoajinná je kjoa xi bitjatojiaan kʼiaa nga kjitʼa kʼoéyanajmílee Jeobá jotjín tokoán (Filip. 4:6; 1 Tes. 5:17). Ningalani tsín jme kjoa tibitjatojiaan, jónʼia kʼianga tsín nda sʼe tokoán kʼoa tsa jmeni xi tinikjáojiaan. A bʼaiʼndeñá nga je Jeobá bándiaaná. Kʼiatsa je Jeobá nijélee nganʼio kʼianga jme kjoa bitjatojiaan ndʼaibi, kʼoati sʼiaan kʼianga ngisa ñʼai koa̱nchon nichxin xi sʼa nroa. Ñaki kʼoakʼoé tokoán nga ngisa nda be Jeobá josʼin koasenkaoná (Sal. 27:1, 3).

8. Jósʼin bakó je choa̱le Mira kʼiatsa chókjoajinná je kjoa xi bitjatojiaan ndʼaibi nga kʼoati chókjoajinná nichxin xi sʼa nroa (Santiago 1:2-4; kʼoati chótsenlai sén xi faʼaitʼa).

⁸ Kʼiatsa chókjoajinná je kjoa xi bitjatojiaan ndʼaibi, kʼoati chókjoajinná je kjoa xi kuitjátojiaan kʼianga kjoaʼaí je kjoañʼai xi nʼio tse (Rom. 5:3). Nkjín ndsʼee xi kʼoatso nga ngisa tichókjoajinngánile je kjoa xi faʼatojin nga maskanni tsa jesa kachókjoajinle. Nga je Jeobá binyakao nga kale je kjoa xi faʼatojin ngisaa nʼio satío je kjoamakjainle (tʼexkiai Santiago 1:2-4).c Kʼoakoan jngo tichjaa xi Mira ʼmi, xi Albania tsʼe, kʼoatso nga kʼoasʼin síkjaʼaitsjen sakʼoa nga toje xi ngisa tse kjoa tífaʼatojin. Nga kʼoasʼe kon kui síkjaʼaitsjenjin josʼin tíbasenkao Jeobá je xi 20 nó tífaʼato. Itso xi síkjaʼaitsjen: “Tosi tonda kixi tʼintʼalai Jeobá, ali nichajinjin jokji tse jetinixálai kʼoa josʼin tíbasenkaoli nga tíchókjoajinli je kjoa xi tibitjatojin”. Kʼoati koa̱n sʼiaan tsanda ñá, si̱kjaʼaitsjenjiaan josʼin tíbasenkaoná Jeobá nga tíchókjoajinná je kjoa xi tibitjatojiaan. Ñaki kʼoakʼoé tokoán nga kuenta sʼín Jeobá nga chókjoajinná je kjoa xi bitjatojiaan kʼoa nga sichikontʼainná nichxin xi sʼa nroa (Mat. 5:10-12). Kʼianga kjoaʼaí je kjoañʼai xi nʼio tse, jetiyondaa josʼiaan nga chókjoajinná je kjoa xi kuitjátojiaan.

KOAKOÁ KJOAMATOKON

9. Jósʼin tsakakó kjoamatokon je jtín xi kisʼejna ya Antioquía de Siria.

⁹ Kʼianga kisʼejinle je jtín xi tíjna ya Antioquía de Siria nga kjinrá tjíofaʼá je chjotale Cristo xi Judea tsʼe, tsakakóle kjoamatokon. Kisikasénle tsojmi xi koanchjénle je ndsʼe̱ kʼoa kitsjoa jotjín kʼoakoanle nga jngó jngó (Hech. 11:27-30). Je chjotale Cristo xi Antioquía de Siria tsʼe kikaole tsojmi je chjotale Cristo xi Judea tsakatio ningalani kjintʼa tsʼe (1 Juan 3:17, 18).

10. Jósʼin koakolee kjoamatokon je ndsʼee kʼianga toxijña ñʼai machon (kʼoati chótsenlai sén xi faʼaitʼa).

¹⁰ Kʼianga sʼejinná nga ñʼai sʼin tjío je ndsʼee kʼoati koa̱n kuinyakoaa. Tobʼelañá, koaan kjitʼanangi kʼoakʼuínlee je xi chjotajchínga sʼin tjío nga mená kʼoainganʼioá, koaan koatioá tao̱n ya jtín jñani mangián nga kʼoainganʼioá je xá xi kjima jngo tjíjtsa Sonʼnde, kʼoa koaan kʼoétsʼoantjé je ndsʼee (Prov. 17:17).d Tobʼelañá kʼianga nó 2020, tsʼato 950 Comité de Socorro kixinyanda jngo tjíjtsa Sonʼnde, xi tsakinyakao je ndsʼee nga COVID-19 koan. Nʼio tse kjoanda bʼailee je ndsʼee xi ya tjíojinle Comité de Socorro. Nga tjínle kjoamatokon ndsʼee jebi fikaole tsojmi je ndsʼee xi kjoañʼai faʼatojin, tsjoánganʼiole xi kao Énle Niná, bʼéndaya je ndʼiale kʼoa tsa yaje̱ Ndʼia jña chotʼayá (tingósonkoai 2 Corintios 8:1-4).

11. Jósʼin ʼyaxkoán Jeobá kʼianga bakoá kjoamatokon.

¹¹ Kuenta sʼín chjota kʼianga be josʼin bʼainganʼioá ya jñani kjoaxkón bichó. Jngola choa̱ kataʼyaa. Kʼianga nó 2019 nga jaʼa jtsíntjao̱nʼio xi Dorian ʼmi, ya Bahamas jngo Ndʼia jña chotʼayá chixoya. Kʼianga tsakʼéndaya ndʼia jebi, je ndsʼee tsakjákao je chjota xi material baténa jótjín sʼe̱ngile je tsojmi xi koa̱nchjénle. Chjota jebi i kitso: “Mena tsjoanganʼiono, alikui sikjechjíno nga sixá je máquina, totsjoa kjoatjaono material kʼoa an kʼoechjíle chjota xi sixá. Tokʼoamana nga ʼbe josʼin binyakao xíngio”. Ninga tsín be je chjota jotjínni xi tʼatsʼe Jeobá tonga kui kuenta sʼín jonʼia xi choʼndale Niná maa. Jmeni xi nʼia nga bakolee kjoamatokon xíngiaa binyakao chjota nga mandosinle xi tʼatsʼe Jeobá, je Niná xi nʼio tse “kjoamatokon tjínle” (Efes. 2:4).

12. Jósʼin koasenkaoná kʼianga kjoaʼaí kjoañʼai xi nʼio tse tsa bakoá kjoamatokon (Apocalipsis 13:16, 17).

¹² Ánni machjénni nga koakolee kjoamatokon xíngiaa kʼianga kjoaʼaí kjoañʼai xi nʼio tse. Je Biblia kʼoatso nga tse kjoa kuitjátojiaan nga tsín ya bʼainganʼiolee je chjotaxá kʼoa ngisaa koa̱n nga jetíjna kjoañʼai xi nʼio tse (tʼexkiai Apocalipsis 13:16, 17).e Tsakui nichxin ñʼai koa̱nle ndsʼee nga so̱kole tsojmi xi koa̱nchjénle. Tsjoajin sa̱tío tokoán nga tibinyakoaa je ndsʼee kʼianga kjoaʼaí Jesús nga kʼoendajinle kjoa je chjota, nga̱ i̱ kuitsoná: “Chjoékjoatjao je kjoatéxoma xi tíjnanda xi tʼatsaon” (Mat. 25:34-40).

TOSI TONDA TSJOACHA KATAMAA JE NDSʼEE

13. Jméni xi kisʼin chjotale Cristo xi títjon tsakatio nga tosi tonda tsjoake koan xínkjín (Romanos 15:7).

¹³ Ngatsʼi chjota tsabee nga nʼio tjao koanle xínkjín je chjotale Cristo xi tsakatio nga siglo 1. Tonga tsínjin choa ñʼai koanle nga kʼoakisʼin. Tobʼelañá, je jtín xi kisʼejna ya Roma, xinxin tsʼe chjotale Cristo xi ya tsakatiojtín, tjínkʼa xi chjota judío kitjenni, xi nʼio nda tsabe jotso je kjoatéxomale Moisés, kʼoa tjínkʼa xi xin naxinandále, xi kjaʼaísʼin kisijchá yaole. Tsakui nichxin tjínkʼa xi choʼnda koan kʼoa tjínkʼa xi mai, kʼoa tsa saʼnda tjínjinkʼa xi choʼnda kisʼele. Jméni xi tsakinyakao nga tsín xínkjín tsakjaʼájin kʼoa nga tosi tonda tsjoake koan xínkjín. Je pastro Pablo i kitsole: “Chjoétjao xíngio” (tʼexkiai Romanos 15:7).f Je én xi “chjoétjao xíngio” tso kui tínchja̱ni nga nda chjoéyaa xíngiaa, tojo nʼia nga tjín xi bichókonná ya niʼyaná nga nda nikoaa. Tobʼelañá, je Pablo kʼoakitsole Filemón josʼin tjínnele skoéya je Onésimo, je choʼnda xi ya ndʼiale kitokachjingani. I kitsole: “Chjoétjoai joni tsa an” (Filem. 17). Je Priscila kao Áquila nʼio nda koanjinle jotjínni xi tʼatsʼe Cristo tikʼoajinni Apolos. Ninga kʼoalani, nda kiskoeya kʼoa jé kikao (Hech. 18:26). Jtín sʼin tsakatio chjotale Cristo jebi ningalani xinxin ʼndele kʼoa ningalani kjaʼaí kjaʼaí kjoan, kʼoa nda kiskoéya xínkjín ngatsʼi.

14. Jósʼin tsakakó kjoatsjoacha je Anna kao xʼinle.

¹⁴ Kʼoati bakolee kjoatsjoacha je ndsʼee kʼianga nda chjoéyaa kʼoa nga nimiyoaa. Kʼianga kʼoanʼia, kʼoati tjao bená tsanda je (2 Cor. 6:11-13). Kataʼyala jokisʼin je Anna kao xʼinle, xi misionero sʼin tjío ya África Occidental. Tochoatse jaʼato nga xin ʼnde kinikasén xi tiyani naxinandá kʼoa kʼiaa koan chʼin COVID-19, kʼoa tsín tikoan nga ñatjen tsakatiojtínni kao je ndsʼee. Jókisʼin ndsʼee jebi nga tsakakó kjoatsjoacha. Videoconferencia kisichjén nga kinchja̱le je ndsʼee, nga kʼoakitsole nga mele skoe̱xkon. Kʼoa je ndsʼee kinchja̱le teléfono kʼoa kisikasénle mensaje. Ánni nga kisimiyoni ndsʼee jebi je ndsʼee xi tjío ya jinjtín. Je Anna itso: “Tjínjinkonña jokji tjao tsabenajin je ndsʼee kʼianga kjoa kitjatojinjin kʼoa ninga kʼia nga nda tiyuijin. Kʼianga kui sikjaʼaitsjenjian basenkaona nga bakoa kjoatsjoacha”.

15. Jméni xi bakóyaná je choa̱le Vanessa nga tsjoacha koaan je ndsʼee (kʼoati chótsenlai sén xi faʼaitʼa).

¹⁵ Me tongatsʼi ndsʼee xi tjío ya jinjtín nga kjaʼaí kjaʼaísʼin koanjchínga nga jngó jngó. Je xi koasenkaoná nga tsjoacha koaan ngatsʼi ndsʼee kʼiaa nga kuenta sʼiaan jñani nda sʼín. Jngo tichjaa xi Nueva Zelanda tsʼe, xi Vanessa ʼmi ñʼai koanle nga nda kikao kʼa je ndsʼee xi tjío ya jtín jñani fi, nga̱ likui sasénle josʼín. Tichjaa jebi kisikʼayale nichxin je ndsʼee nga kisimiyo kʼoa kʼoasʼin tsabeni jñani nda sʼín je ndsʼee. Itso: “Kʼianga superintendente xi tsʼe circuito koan je xʼinna ngisaa nkjín ndsʼee tsaʼyaxkuinjin. Ningalani kjaʼaí kjaʼaí sʼín nga jngó jngó, ngisaa choa ñʼai mana ndʼaibi nga nda fikoa. Sasénna nga kjaʼaí kjaʼaí sʼín kʼoa nga kjaʼaí kjaʼaí kjoan. Kʼoa ʼbeña nga kʼoati sasénle je Jeobá, nga̱ jé jaʼaikaojin naxinandále”. Tsa kʼoasʼin jchatokoán je ndsʼee josʼin bekon je Jeobá, tsjoachaa koaan (2 Cor. 8:24).

16. Ánni nʼio tjínnile kjoandosin nga koakolee kjoatsjoacha je ndsʼee kʼianga jetíjna kjoañʼai xi nʼio tse (kʼoati chótsenlai sén xi faʼaitʼa).

¹⁶ Nʼio machjén nga koakolee kjoatsjoacha je ndsʼee kʼianga jetíjna kjoañʼai xi nʼio tse. Jósʼin sikuindaná Jeobá kʼianga jekoaitsʼia kjoañʼai jebi. Si̱kjaʼaitsjenla jokitsole je naxinandále jotjínnele kisʼin nga kinjengile yaole kʼianga kichonikjeson naxinandá Babilonia. I kitsole: “Ji xi naxinandána mai, titjásʼain ya cuartoli kʼoa tʼechjoai xo̱ntjoali. Tijnaʼma ngotjui saʼnda nga jekjoaʼato je kjoajti” (Is. 26:20). Tsakui nichxin kʼoati kui kjoafaʼaitsjen jebi koanngíntjenngiaa kʼianga jetíjna kjoañʼai xi nʼio tse. Je xi cuarto tsole texto jebi tsakui nichxin je jtín tínchja̱ni. Nga kui nichxin, tsa nda mangínkoaa je ndsʼee, je Jeobá sikuindaná. Kuinga machjénni nga ñaki ni̱ma̱ná kjuinroajinni nga tsjoacha koaan je ndsʼee. Nga̱ tsa tsín kʼoasʼiaan, tsakui nichxin tsín kuitjo̱ntjailee yaoná.

TONGINI KUIYONDAA NDʼAIBI

17. Tsa tongini kuiyondaa ndʼaibi, jméni xi sʼiaan kʼianga jetíjna kjoañʼai xi nʼio tse.

¹⁷ Nʼio ñʼai koa̱nchon kʼianga jekjoaʼaí nichxinle Jeobá (Sof. 1:14, 15). Kʼoati tse kjoa kuitjátojiaan ñá xi choʼndale maa. Tonga tsa tongini kuiyondaa ndʼaibi, alikui nʼio kuijkoán nga kui nichxin kʼoa koaan kuinyakoaa je ndsʼee. Skaaná tojme kjoa xi kuitjátojiaan. Tsa bakoá kjoamatokon ndʼaibi kuinyakaoñá je ndsʼee kʼoa kʼoailee jme xi koa̱nchjénle. Kʼoa nga tsjoachaa jtín sʼin kuiyoaa. Kʼiatsa kʼoasʼiaan, je Jeobá tsjoáná kjoabijnachon xi tsínkʼia fetʼa kʼoa ndasʼin kuiyoaa nga̱ tsín tijme kjoaxkón sʼe̱ni kʼoa tsín tikjoañʼai chja̱ʼañá (Is. 65:17).