Je xi chjotajchínga sʼin tjío jósʼin bakóle kjoamatokon kao kjoatsjoacha je xi ai jée bajngi

1. Jósʼín kʼa je xi ai jée bajngi.

TOJOSʼIN tsaʼyaa ya kjoaʼmiya xi jaʼato, je Pablo kʼoakitsole je jtín xi kisʼejna ya Corinto jméni xi tjínnele sʼin kʼianga ai jée tsakajngi jngo chjotale Cristo. Kʼianga tsín kʼoakoannile jéele chjota jebi kichʼasjejin jinjtín. Tonga tojo tso texto xi yʼangini kjoaʼmiya jebi, je Jeobá kui xi mele nga kʼoakatamanile jéele chjota xi ai jée bajngi (Rom. 2:4). Jósʼin síchjén Jeobá je xi chjotajchínga sʼin tjío nga binyakao xi ai jée bajngi nga kʼoamanile jéele.

2, 3. Jmé xi sʼiaan tsa sʼe̱jinná nga jngo ndsʼee tsakajngijée, kʼoa ánni.

² Jmé xi sʼiaan tsa sʼe̱jinná nga jngo ndsʼee tsakajngijée. Nga̱ tsa tsín kʼoakoa̱nnile jéele chʼa̱sjejin jinjtín. Kuinga machjénni nga kʼoakʼuínlee nga katabʼéyanajmíle je xi chjotajchínga sʼin tjío jmeni xi kisʼin. Tsa tsín sʼe̱jinle xi chjotajchínga sʼin tjío alikui josʼin kuinyakao (Is. 1:18; Hech. 20:28; 1 Ped. 5:2).

³ Jmé xi sʼiaan tsa kaile je ndsʼee nga kʼoeyanajmíle je xi chjotajchínga sʼin tjío nga tsakajngijée. Ñá kʼoakʼuínlee je xi chjotajchínga sʼin tjío, nga̱ kui xi mená nga katabʼainganʼiole je ndsʼee kʼoa nga tosi tonda je Jeobá katasíxále. Tsa tsín sindaya yaole alikui tinda kʼoéjnani ngixko̱n Jeobá kʼoa tsínjin tinda kʼoaxki̱ni je jtín. Kuinga machjénni nga nʼiojin koaan kʼoa kʼoéyanajmílee je xi chjotajchínga sʼin tjío nga tsakajngijée je ndsʼee. Tsa kʼoasʼiaan, kʼoasʼin koakoñá nga tsjoachaa je Jeobá kao je ndsʼee (Sal. 27:14).

JÓSʼIN XI CHJOTAJCHÍNGA SʼIN TJÍO KʼIATSA AI JÉE KOA̱NJNGÍ JNGO NDSʼEE

4. Ánni nga fákaonajmíni je xi chjotajchínga sʼin tjío je ndsʼee xi bajngijée.

⁴ Kʼianga ai jée bajngi jngo ndsʼee, jan xi chjotajchínga sʼin tjío xi ngisa jetjínle kjoafaʼaitsjen tjoejin nga fákaonajmí je xi kabajngijée.a Ndsʼee jebi nangitokon ma kʼoa kui xi mele nga kuinyakao je ndsʼee nga kʼoakatamanile jéele, tonga alikui kjoanʼio bʼénele nga síndaya yaole (Deut. 30:19). Majinle je xi chjotajchínga sʼin tjío nga tsín tsa tongóson sʼín je ndsʼee xi sokójéele. Tjínkʼa xi bʼaʼén kʼoa síndaya yaole tojo kisʼin je rey David (2 Sam. 12:13). Tonga kʼoati tjínkʼa xi tsín sítjoson je kjoafaʼaitsjen xi tsjoále Jeobá (Gén. 4:​6-8). Kataʼyala josʼín je xi chjotajchínga sʼin tjío nga fákaonajmí je ndsʼee xi kisokojéele.

5. Jmé kjoafaʼaitsjen fitjenngi je xi chjotajchínga sʼin tjío nga fákaonajmí je ndsʼee xi kisokojéele (2 Timoteo 2:​24-26; kʼoati chótsenlai sén xi faʼaitʼa).

⁵ Je xi chjotajchínga sʼin tjío majinle nga tojo choʼndale Jeobá mani je ndsʼee xi kisokojéele (Luc. 15:​4, 6). Je xi chjotajchínga sʼin tjío ngasin nganda fákao je ndsʼee xi tsakajngijée. Alikui tokui kjonangile ánni nga tsakajngijéeni kʼoa jméni xokisikao nga kʼoakisʼinni. Tosaa kui fitjenngi kjoafaʼaitsjen xi faʼaitʼa ya 2 Timoteo 2:​24-26b (tʼexkiai). Kui xi mele nga kuinyakao nga nda katasʼe kon je ndsʼee xi tsakajngijée kʼoa nga katamajinle nga tsín nda kisʼin.

6. Jósʼin bationda xi chjotajchínga sʼin tjío nga kjesa fákaonajmíjin je ndsʼee xi tsakajngijée (Romanos 2:4).

⁶ Tongini bationda xi chjotajchínga sʼin tjío. Kuenta sʼín jmeni xi kitso Pablo, nga i̱ kitso: “Je kjoandale [Niná] fikaoli nga si̱kʼantjaiyani kjoafaʼaitsjenli” (tʼexkiai Romanos 2:4).c Kʼoatisʼin bakóle kjoanda je xi bajngijée josʼín je Jeobá. Majinle nga je kjinele sikuinda je ndsʼee kʼoa jé Jesús kjenngile (Is. 11:​3, 4; Mat. 18:​18-20). Nga kjesa fákaonajmíjin je ndsʼee xi tsakajngijée, bʼétsʼoale Jeobá ánni nga koa̱n kuinyakaosíni je ndsʼee xi kisokojéele nga kʼoakoa̱nnile jmeni xi kisʼin. Kʼoati básjaiya ya Biblia kao xo̱n xi síkasén naxinandále Niná. Kʼoatsole Jeobá nga katamajinle jotjín kon je ndsʼee xi kisokojéele, fáoyani jméni xokisikao je ndsʼee nga kisokojéenile (Prov. 20:5).

7, 8. Nga tsejta Jeobá, jósʼin kjenngile xi chjotajchínga sʼin tjío nga fákaonajmí je xi ai jée kabajngi.

⁷ Je xi chjotajchínga sʼin tjío kjenngile Jeobá nga tsejta. Je xi chjotajchínga sʼin tjío kuenta sʼín josʼin tsabekon Jeobá je chjota xi jée tsakajngi nichxin kjoatse. Tobʼelañá, ngasin nganda tsakatekjáyale Caín. Kʼoakitsole nga nda kʼoéjna ijngokʼa ngixko̱n tsa sindaya yaole, tonga tsa tsín kʼoasʼin kʼoati kitsole josʼin kuichomani (Gén. 4:​6, 7). Kʼoa nga tsakatekjáyale je rey David, jé profeta Natán kisichjén. Kʼoa je Natán jngoo choa̱ kisichjén nga koanjinle David nga tsín ndatjín jmeni xi kisʼin (2 Sam. 12:​1-7). Kʼianga tsín kisitjoson chjota israelita profeta kisikasén Jeobá nga tsakatekjáyale (Jer. 7:​24, 25). A kʼiaa tsakasenkao Jeobá je choʼndale kʼianga jekʼoakoannile jéele. Mai. Kʼiaa tsakasenkao nga sʼasa tjíobajngijée kʼoa kʼoakitsole nga kʼoakatamanile jéele.

⁸ Machjén nga skénngile Jeobá je xi chjotajchínga sʼin tjío, nga tsejta koa̱n kʼianga fákaonajmí je ndsʼee xi ai jée kabajngi. Tojo tso ya 2 Timoteo 4:​2, alikui yaole síjtile, tosaa ngasin nganda fákao je ndsʼee nga kui kʼoakatasʼín xi ndatjín. Kʼiatsa tsín kʼoasʼin likuijin koasenño xi ai jée kabajngi kʼoa tsínjin kʼoakoa̱nnile je jéele.

9, 10. Jmé xi tjínnele sʼin je xi chjotajchínga sʼin tjío nga kuinyakao je ndsʼee xi tsakajngijée nga katamajinle nga tsín kixi tíjna jme xi kisʼin.

⁹ Je xi chjotajchínga sʼin tjío básjaiyaa ánni nga tsakajngijéeni je ndsʼee. A tobijbi likui tikiskotʼayani kʼoa likui tikitsoyasonni. A tsínti ntsjaintsjai tsakʼétsʼoani. A tokui kisikjaʼaitsjenntsjai xi chʼaotjín. A jé tsakájta chjota xi tsín nda sʼín. Axo kui tsakʼétsaojinkao xi tsín kixi tíjna. A majinle nga tsín ndatjín kon Jeobá nga kui kʼoakisʼin xi tsín ndatjín.

¹⁰ Je xi chjotajchínga sʼin tjío koaan skónangile je ndsʼee jméni xokisikao nga tsakajngijée, tonga machjén nga ngasin nganda kjoakaonajmí ánni nga kʼoakuitsoni je ndsʼee jotjín kon. Tonga kʼoati tsín koa̱n nga kui skónangile jmeni xi tsín machjén nga je skoe̱ (Prov. 20:5). Kʼoati koa̱n choa̱ koatiole tojo kisʼin je Natán kʼianga tsakjákaonajmí je David ánni nga koa̱njinnile nga tsín kixi tíjna jme xi kisʼin. Kʼianga sʼa kjoakaonajmí títjon tsakui nichxin koa̱njinle je ndsʼee kʼianga tsín kixi tíjna jme xi kisʼin kʼoa kʼoakoa̱nnile jéele.

11. Jósʼin tsakasenkao Jesús je chjota xi tsakajngijée.

¹¹ Je xi chjotajchínga sʼin tjío jé Jesús kjenngile. Kʼianga tsín koanjinle Saulo nga tsín kixi tíjna jmeni xi tísʼín, je Jesús i kitsole: “Saulo, Saulo, ánni nga an ʼmitjenngi kontrasíninái” (Hech. 9:​3-6). Kʼoa tʼatsʼe chjoón xi Jezabel ʼmi, je Jesús i kitso: “Kitsjoaʼndele Jezabel, jméni nga sikʼantjaiyasíni kjoafaʼaitsjenle” (Apoc. 2:​20, 21).

12, 13. Jmé xi sʼin xi chjotajchínga sʼin tjío nga kuinyakao je xi tsakajngijée nga kʼoakatamanile jéele (kʼoati chótsenlai sén xi faʼaitʼa).

¹² Je xi chjotajchínga sʼin tjío, jé Jesús kjenngile kʼoa alikui kʼoasʼin síkjaʼaitsjen nga tsín kʼoakoa̱nnile jéele je ndsʼee xi tsakajngijée. Tjínkʼa xi kʼia kʼoatso nga kʼoamanile jéele kʼianga chjakaonajmí. Tonga tjínkʼa xi nichxin machjénle kʼoa skan chjakaonajmí ijngokʼa. Tsakui nichxin sikjaʼaitsjenjin jme xi kitsole xi chjotajchínga sʼin tjío nga tsakjákaonajmí kʼoa sijéle kjoanichatʼa Jeobá (Sal. 32:5; 38:18). Kʼoa kʼianga chja̱kaonajmí ijngokʼa tsakui nichxin kʼoakuitso nga kʼoamanile jéele.

¹³ Je xi chjotajchínga sʼin tjío síjinle yaole jotjín kon je ndsʼee xi tsakajngijée kʼoa ngasin nganda fákao. Kʼoatsole Jeobá kʼianga bʼétsʼoale nga je katabándiaale ánni nga koa̱n kuinyakaoni je ndsʼee xi tsakajngijée nga kʼoakatamanile jéele (2 Tim. 2:​25, 26).

14. ʼYáni xi bakinle nga kuitjongʼa kʼianga kʼoamanile jéele jngo chjota, kʼoa ánni.

¹⁴ Kʼianga kʼoamanile jme xi sʼín je xi bajngijée tsjoa satío tokoán (Luc. 15:​7, 10). Ningalani je xi chjotajchínga sʼin tjío binyakao, alikui je bitjongʼa, nga̱ je Pablo i kitso: “Tsa tsjoásale Niná nga sikʼantjaiya kjoafaʼaitsjenle” (2 Tim. 2:25). Kui xi tsonile nga jé Jeobá basenkao chjota xi kabajngijée nga síkjaʼaitsjenjin jmeni xi kisʼin kʼoa nga síndaya yaole. Kʼoa je Pablo kʼoakitso nga je xi kʼoamanile jéele ngisaa nda majinle jotjínni xi tʼatsʼe Niná, majinle jñani tsín nda kisʼin kʼoa jósʼin nga tsín che̱nle Na̱i ska̱ya ijngokʼa (2 Tim. 2:26).

15. Jmé xi sʼin je xi chjotajchínga sʼin tjío nga kuinyakao xi kʼoamanile jéele.

¹⁵ Je xi chjotajchínga sʼin tjío tosi tonda koaisíxatʼa je ndsʼee xi kʼoamanile jéele ánni nga nʼio sʼe̱jnasíni kjoamakjainle kʼoa nga tsín tikui kʼoasʼinni xi tsín kixi tíjna kʼoa nga nda kʼoéjna ijngokʼani (Heb. 12:​12, 13). Je xi chjotajchínga sʼin tjío alikui tjín xi kʼoakuitsole jmeni xi kisʼin je ndsʼee. Tonga jméni xi tjínnele sʼe̱jinle je jtín.

JE XI TÍBAJNGIJÉE TICHÁKJÁYALAI “NGIXKO̱N NGATSʼI”

16. ʼYá xi tínchja̱ni nga “ngatsʼi” kitso Pablo tojosʼin faʼaitʼa ya 1 Timoteo 5:20.

¹⁶ (Tʼexkiai 1 Timoteo 5:20).d Je Pablo kʼoakitsole je Timoteo nga katabatekjáyale “ngixko̱n ngatsʼi” je xi tsakajngijée. Nga “ngatsʼi” kitso Pablo alikui je kinchja̱ni ngatsʼi xi tjío ya jinjtín. Tojé kinchja̱ni je ndsʼee xi tsabe jmeni xi kisʼin je xi tsakajngijée kʼoa tsa jeje̱ xi tsakʼéyanajmíle. Je xi chjotajchínga sʼin tjío tojé kʼoakuitsole ndsʼee jebi nga jetsakichakjáyale je xi tsakajngijée kʼoa nga jekisʼendajin kjoa.

17. Tsa nkjín mani xi tjíojinle jmeni xi kisʼin je xi tsakajngijée, jmé xi sʼejinkon je jtín kʼoa ánni.

¹⁷ Kʼiáni nga tjínnele sʼe̱jinle je jtín nga jngo ndsʼee jetsakichakjáyale. Kʼiaa tsa nkjín mani xi tjíojinle kʼoa tsa bele tokoán nga nkjínsa xi sʼe̱jinle. Kʼianga kʼoama, machjén nga jngo xi chjotajchínga sʼin tíjna koajinkon je jtín nga jetsakichakjáyale ndsʼee xi tsakajngijée. Ánni nga tjínnenile sʼe̱jinkon je jtín. Je Pablo i kitso: “Jméni nga xikʼa kʼoasʼin koa̱nxkónsínile” nga tsín kʼoati katasʼín.

18. Jósʼín je xi chjotajchínga sʼin tjío nga jngo ndsʼee xi kje xjaʼaonjanjin nóle bajngijée (kʼoati chótsenlai sén xi faʼaitʼa).

¹⁸ Kʼianga jngo ndsʼee xi kje xjaʼaonjanjin nóle bajngijée, je xi chjotajchínga sʼin tjío jao ndsʼee xi kʼoati chjotajchínga sʼin tjío kjoéjin nga fákaonajmí je ndsʼee xi tsakajngijée kao xijchále, xi kʼoati chjotale Cristo ma.e Je xi chjotajchínga sʼin tjío kui kjonangile je xi xijchá ma jósʼin tjíobinyakao je tile nga tísíndaya yaole kʼoa nga kʼoakjimanile jéele. Tsa tíbʼaʼén je ndsʼee josʼin tíbinyakao xijchále alikui machjén nga jngojtín je xi chjotajchínga sʼin tjío kjoakaonajmí. Nga̱ je Jeobá jé bánele xi xijchá ma nga je koatekjáyale xtile (Deut. 6:​6, 7; Prov. 6:20; 22:6; Efes. 6:​2-4). Xijekoa̱n, je xi chjotajchínga sʼin tjío koaan skónangile xijchále ndsʼee jméni xi tjíosʼín nga tjíobinyakao. Tonga tsa tsín kʼoaʼén je ndsʼee kʼoa tsín sindaya yaole, jngojtín je xi chjotajchínga sʼin tjío kjoakaonajmí kʼoa yaa koatiobasen xijchále.

JE JEOBÁ TJAO BENÁ KʼOA TJÍNLE KJOAMATOKON

19. Jósʼin kjenngile Jeobá je xi chjotajchínga sʼin tjío kʼianga ʼya xi bajngijée.

¹⁹ Kui xá tsjoále Jeobá je xi chjotajchínga sʼin tjío nga katasíkuinda je jtín ánni nga tsínkui xi chʼaotjín kjoaʼasʼenjinni (1 Cor. 5:7). Tonga kʼoati binyakao je xi bajngijée nga kʼoakatamanile jéele kʼoa alikui kʼoasʼin síkjaʼaitsjen nga tsínkʼia sindaya yaole. Nga kʼoasʼín, jé Jeobá kjenngile nga̱ nʼio tjao bená kʼoa tjínle kjoamatokon (Sant. 5:11). Je pastro Juan i kitso kʼianga jenʼio jchínga: “Ngatsʼio ʼndíxtina, je kjoabi kjino, jméni nga tsín kuijnyisínio jée. Tsa jngo xi tsajngi jée, tíjnajngoná xi fajinná ngixko̱n Nʼainá, je Jesucristo xi tjínle kjoakixi” (1 Juan 2:1).

20. Jmé xi chótʼayajiaan ya kjoaʼmiya xi ijngo.

²⁰ Kʼianga tsín kʼoamanile jmeni xi sʼín jngo ndsʼee xi ai jée bajngi chʼasjejin jinjtín. Yaa kjoaʼmiya xi ijngo chótʼayajiaan jósʼin bʼéndajin kjoa je xi chjotajchínga sʼin tjío kʼianga kʼoama.