Jmé xi sʼiaan nga ngisa si̱miyoaa je ndsʼee

SAKʼOA kʼoasʼe tokoán nga tsín ʼya xi binyakaoná kʼianga kjoa bitjatojiaan. Nga nichxin fetʼa tiyoaa ndʼaibi sa ñʼai sa ñʼai kjimachon kʼoa kuinga sakʼoa tsín nda sʼeni tokoán (2 Tim. 3:1). Tonga alikui toñá tiyoaa kʼianga kjoa bitjatojiaan. Ya Biblia kʼoatso nga je xi miyo sʼin chobá jé xi koa̱nle koasenkaoná “kʼianga kjoaba tijnajiaan” (Prov. 17:17).

JÓSʼIN BINYAKAONÁ XI ÑAKI MIYONÁ MANI

Je pastro Pablo nkjín miyo kisʼele xi tsakinyakao nga kjin kikakóyason kʼoa nkjín koya josʼin tsakinyakao (Col. 4:​7-11). Tobʼelañá, jé Epafrodito kichokaole Pablo je tsojmi xi kisikasénle je jtín xi kisʼejna ya Filipos kʼianga ndoyá tsakʼejnaʼya ya Roma (Filip. 4:18). Kʼoa jé Tíquico kikaole jtín je carta xi kiski Pablo (Col. 4:7).a Nga nkjín miyo kisʼele Pablo tosi tonda kitjosonle je xá xi kisʼenele ninga kʼia nga ndʼiale kinikʼéjnanʼio kʼoa kʼianga ndoyá tsakʼejnaʼya. Kʼoa ñá, jméni xi sʼiaan nga kuinyakoaa je miyoná.

Nichxin xi tiyoaa ndʼaibi nkjín ndsʼee xi kjoa tjíofaʼatojin xi tjíobe nga nʼio chjíle nga sʼená miyo. Kataʼyala je choa̱le Elísabet, jngo tichjaa xi España tsʼe, xi precursora sʼin tísíxá. Kʼianga cáncer koanle je na̱le, jngo tichjaa xi kjitʼa kiskile kʼianga kisikasénle textole Biblia. Je Elísabet itso: “Nda kisʼe tokoan nga textole Biblia kisikasénna je tichjaa, kui xi tsakasenkaona nga kiskana je kjoa xi jaʼatojian” (Prov. 18:24).

Tsa kʼoainganʼiolee je ndsʼee ngisasa nda koa̱nmiyoaa. Tobʼelañá, koaan ñá koanngínkoaa je xi tsínti chókjoanile nga fi kjoajtín kʼoa tsa kʼiaje̱ nga ʼmiyasoán. Tsa kʼoasʼiaan, kʼoasʼin kʼoainganʼiongañálee xíngiaa (Rom. 1:12). Tonga kʼoati tjínkʼa ndsʼee xi tsín tima bitjoni ndʼiale. Jósʼin koa̱n kuinyakoaa ndsʼee jebi.

JÓSʼIN KUINYAKOAA JE NDSʼEE XI TSÍN MA BITJO NDʼIALE

Tjínkʼa ndsʼee xi ñʼai male nga fi kjoajtín xi satíoná nga chʼin bʼetʼale kʼoa tsa kjaʼaísa kjoa sʼele. Kʼoakoan jngo ndsʼee xi David ʼmi, cáncer koanle kʼoa tsʼato jaon sá nga to kisixki ʼndeʼnde. Nga tsínti koan kitjoni ndʼiale, je David kao chjoónle videoconferencia kisichjén nga kinrʼoéle je kjoajtín xi satíoná.

Kʼianga jefetʼa kjoajtín, je ndsʼee yaa tjen videoconferencia tsakjákaonajmíni je David kao chjoónle. Kʼoa kʼianga tsjoá comentariole, nkjín xi mensaje kisikasénle nga kʼoakitsole nga nda tso comentario xi kitsjoa. Nga kʼoakoantʼain kʼoasʼin tsabeni nga tsín tjíotsjionkon je ndsʼee.

Koaan kʼoakʼuínlee je ndsʼee xi tsín tima bitjoni ndʼiale nga ñatjen kʼuínyasoán. Tsa kʼoasʼiaan, kʼoasʼin koakoñá nga mandosinná xi tʼatsʼe (Prov. 3:27). Koaan carta chjiá kʼoa tsa teléfono kuinókjoalee je chjota. Je xi chjotajchínga sʼin tjío koaan videoconferencia sichjén kʼianga satío kjoajtín nga bitjokʼinyasoán ánni nga kjuinrʼoéni je ndsʼee. Je David itso: “Nʼio nda tsakinyakaonajin kʼianga kʼoasʼin videoconferencia kisichjén je ndsʼee nga tsakʼinyasuinjin, nga kitsoya josʼin chja̱kaonajmíjin je chjota kʼoa nga tsakʼétsʼoa”. Tsa bele tokoán, koaan kʼoasʼin kʼoéndajiaan nga ya kjuinkoaa je xi ʼmiyalee Biblia ya ndʼiale ndsʼee xi tsín ma bitjo ánni nga ya chótʼayañá.

Kʼianga kjitʼa mangínchonlee je ndsʼee xi tsín ma bitjo ndʼiale ngisaa nda ʼyaxkoaan jokjoan kʼoa ngisaa mamiyoaa. ʼYañá josʼin tsoya Énle Niná kʼoa ʼyañá josʼin binyakao xi kjaʼaí nga símiyo Jeobá. Kʼianga kʼoasʼin bʼainganʼiolee je ndsʼee ngisaa nkjín miyo sʼená (2 Cor. 6:13).

Nda kisʼe kon Pablo nga kichokonle je Tito (2 Cor. 7:​5-7). Jebi kui bakóyaná nga koa̱n si̱nʼioá kon je ndsʼee nga nda tso én chja̱kaonajmiá kʼoa nga kuinyakoaa tsa jmeni xi machjénle (1 Juan 3:18).

KUINYAKOAA JE NDSʼEE KʼIANGA ʼYA XI FITJENNGIKE

Kʼoatjíosʼín je ndsʼee xi Rusia tsʼe, tjíobinyakaongañá xínkjín. Kataʼyala josʼin tsakinyakao ndsʼee je Serguéi kao Tatiana. Policía jaʼasʼen ndʼiale nga tjín xi tsakásjai. Xijekoan, kikao nga kisijtsoʼa. Nga jekinikʼéjnandái je Tatiana kini ndʼiale. Je Serguéi itso: “Jngo tichjaa xi kiskoé kjoanʼiojin nga kicho ndʼianajin kʼoa nkjínsa ndsʼee kicho xi tsakinyakao chjoónna nga kisindachon ndʼianajin”.

Je Serguéi itsosa: “Nʼio tsjoake̱ jmeni xi tso Proverbios 17:17 nga tso: Jngo xi ñaki miyo tsjoakená tokʼiani kʼoa jngoyale ndsʼeñá kʼianga kjoaba tijnajiaan. Ngisaa tinda tiʼbengáña nga ñaki kʼoatjín jmeni xi tso texto jebi kʼianga kʼoasʼin chjota tífitjenngikenajin. Tsa toʼanlaña alikuijin chókjoajinna kjoa jebi. Jé Jeobá tíbasenkaona kʼoa títsjoána miyo xi binyakaona kʼoa xi tsín tsjionkonna”.b

Nichxin xi tiyoaa ndʼaibi sa ñʼai sa ñʼai kjimachon, kuinga machjénni nga si̱miyoaa je ndsʼee ánni nga kuinyakaoniná. Ngisaa tikoa̱nchjénngániná nga kjoaʼaí kjoañʼai xi nʼio tse. Kuinga machjénni nga tosi tonda si̱miyoaa je ndsʼee (1 Ped. 4:​7, 8).