KJOAʼMIYA XI CHOTʼAYA 22
KJOAJNDA 15 Chʼa̱sjengʼaa je ʼNdítjonle Jeobá
Je Jesús tsakʼasjengʼaa Jeobá kʼoa kitsoyaa jokjoantjínni xi tʼatsʼe
“Tsakakosontsenle jo kjoain nga ji. Tojo kʼoalasʼin koakosontsen ngisale” (JUAN 17:26).
XI TÍNCHJA̱NI
Je Jesús kitsoyaa jokjoantjínni xi tʼatsʼe Nʼaile kʼoa tsakʼasjengʼaa.
1, 2. 1) Jmé xi kisʼin Jesús nga tojeme ni̱kʼien. 2) Jmé xi jchaa i̱ kjoaʼmiya jebi.
KʼIANGA xipe kjoanjio nga 14 sá nisán nó 33 yaa tjíokao Jesús je pastrole xi kixi kitʼale ya xi majaoni pisole jngo ndʼia. Nga kui nichxin tochoasa chale nga jngo chjotale koangi, nga kjoañʼai ni̱kjaʼá je Jesús, nga si̱jtsoʼa, nga jée sʼe̱ne kʼoa nga ni̱kʼien. Kʼianga jetsakjen kao pastrole tsakjákaonajmí kʼoa kisinʼio kon nga̱ tokʼoatjínsa nga ya tsakʼejnakao. Kʼianga to jetjíobitjoni ya ndʼia jña tjíoʼya, tsakʼétsʼoaa je Jesús. Kʼoa jmeni xi kitso nga tsakʼétsʼoa yaa faʼaitʼa ya Juan capítulo 17.
2 I̱ kjoaʼmiya jebi kui jchaa jmé xi bakóyaná jokitso Jesús nga tsakʼétsʼoa. Jméni xi kjimakjáojinle nga kui hora kʼoa jméni xi ngisa kitsjoale kjoandosin nga tsakʼejna i̱ Sonʼnde.
“TSAKAKOSONTSENLE JO KJOAIN NGA JI”
3. Jmé xi kinchja̱ni Jesús kʼianga i̱ kitso: “Tsakakosontsenle jo kjoain nga ji” (Juan 17:6, 26).
3 Kʼianga tsakʼétsʼoa Jesús, i kitsole Jeobá: “Tsakakosontsenle jo kjoain nga ji”. Nʼio chjí tsabe Jesús je jaʼaínle Jeobá nga̱ jao kʼa kʼoakitso (tʼexkiai Juan 17:6, 26).a Nga kʼoakitso Jesús ali tsakuijin kinchja̱ni nga tsín be chjotatjenngile joʼmi je Niná, nga̱ je chjota judío jebe nga Jeobá ʼmi kʼoa jmi kʼa faʼaitʼa jaʼaínle ya Escrituras Hebreas. Nga kʼoakitso Jesús nga tsakakóle jokjoan je Niná, kui xi koanmele nga ngisa nda katabexkon chjotatjenngile jokjoan je Jeobá, nga katamajinle jme xi tjínndajinle, nga katabe jmeni xi tísʼín kʼoa jmeni xi sʼin nichxin xi sʼa nroa. Kitsoya Jesús xi tʼatsʼe Nʼaile nga̱ tojé xi ngisasa nʼio nda bexkon.
4, 5. 1) Ánni nga chjí ʼyatokonñá jngo chjota. Jngo choa̱ tʼejnai. 2) Ánni nga ngisa tinda tsabexkonngáni Jeobá je chjotatjenngile Jesús.
4 Si̱kjaʼaitsjenla tsa toxijña tjín xi koa̱nná kʼoa tokjitʼanangi machjén nga tsʼe chjinexki kjuian kʼoa tsa yakjoan bichoaa ya hospital jñani síxá jngo ndsʼee xi jenda ʼyaxkoaan xi David ʼmi. Je ndsʼee jebi chjinexki kʼoa chjotajchínga sʼin tíjna ya jtín jñani mangián. Ningalani chjotajchínga sʼin tíjna, xi ngisa kjoaʼaítsjenná kuijin nga je kisixkiná nga koanndaya kʼoa ngisajin tichjí jchangáñá.
5 Tikʼoasʼinni, ningalani jebe chjotatjenngile Jesús nga Jeobá ʼmi jaʼaínle Niná, ngisaa nda tsabexkon nga jekoanni kʼoa ngisaa chjí tsabe. Kʼianga jaʼai Jesús i̱ Sonʼnde, je chjotatjenngile ngisaa tinda tsabengáni jokjoan je Jeobá, nga̱ jmeni xi kisʼin kʼoa jmeni xi kitso je Jesús kʼoasʼin tsakakóni jokjoan je Nʼaile. Je chjotatjenngile Jesús ngisaa tinda tsabexkonngáni Jeobá kʼianga tsabe josʼin kitsoya je Jesús kʼoa josʼin tsabekon je chjota (Juan 14:9; 17:3).
“JAʼAÍNLI. JE XI JI TSAKʼAINÁI”
6. Jmé xi kinchja̱ni Jesús kʼianga kʼoakitso nga je Jeobá kitsjoale jaʼaínle (Juan 17:11, 12).
6 Kʼianga tsakʼétsʼoantjai Jesús je chjotatjenngile, i kitsole Jeobá: Tikuindai xi totʼatsʼe jaʼaínli xi ji tsakʼainái (tʼexkiai Juan 17:11, 12).b A kui xi tsonile nga kʼoati koa̱n Jeobá kʼuínle je Jesús. Mai. Nga̱ “jaʼaínli” kitso je Jesús kʼianga tsakʼétsʼoale Jeobá. Je Jesús alikui kisikʼantjaiya jaʼaínle, alikui Jeobá kitsole yaole. Jebi kui xi tsonile nga je Jeobá kisikasén je Jesús. Kʼoakitso nga tʼatsʼe jaʼaínle Nʼaile jaʼaini i̱ Sonʼnde kʼoa tʼatsʼe jaʼaínle Nʼaile tsakatíoni kjoaxkón (Juan 5:43; 10:25). Xi ijngosani, jé “Jeobá bʼasjentjai” sʼin tsoyanile je jaʼaínle Jesús. Tojosʼin tiʼyaa, kʼoati bʼaxki̱ jaʼaínle Jeobá kʼianga kʼoabixoán josʼin tsoyanile jaʼaínle Jesús.
7. Ánni nga koan kinchja̱ni Jesús tʼatsʼe jaʼaínle Jeobá. Jngo choa̱ tʼejnai.
7 Nga ngisa nda koa̱njinná, jngola choa̱ kʼoéjnaa: Jngo chjotaxá síkasénnda je xi fingajaole jñani xi ʼnde. Je chjota xi sasénnda ma je kʼoasʼín jmeni xi kjinele chjotaxá, kʼoa jmeni xi kuitso chjota jebi kʼoati kji chjíle je énle jokji chjíle tsʼe chjotaxá. Tikʼoasʼinni jmeni xi kisʼin Jeobá, jé Jesús kisikasén kʼoa kitsjoale kjoatéxoma nga kuinchja̱ni tʼatsʼe jaʼaínle (Mat. 21:9; Luc. 13:35).
8. Jósʼin tsoyanile nga je Jesús yʼa jaʼaínle Jeobá nga kjesa faʼaijin i̱ Sonʼnde (Éxodo 23:20, 21).
8 Ya Biblia Én ʼmile je Jesús nga̱ jé kʼoatsole je ánkje kao chjota jmeni xi tso Jeobá (Juan 1:1-3). Tsakui nichxin je Jesús je ánkje xi kisikasén Jeobá nga tsakándiaale chjota israelita kʼoa xi kisikuinda nga tsakʼetsoma ya ʼndekixí. Tjínnele kisitjoson chjota israelita jme xi kitso ánkje jebi nga̱ jé yʼa jaʼaínle Jeobác (tʼexkiai Éxodo 23:20, 21).d Kʼoa ánni kʼoaʼminile Jesús nga je yʼa jaʼaínle Jeobá. Kuinga je kisikasén i̱ Sonʼnde kʼoa jé kinchja̱ntjai Jeobá kʼoa tsakʼasjengʼa jaʼaínle.
“NʼAINA, CHʼA̱SJEJEYAI JAʼAÍNLI”
9. Jósʼin ʼyañá nga nʼio chjí tsabekon Jesús je jaʼaínle Jeobá.
9 Je Jesús nʼio kitsjoale kjoandosin je jaʼaínle Jeobá kʼianga tsakʼejna ya ngʼajmi. Kʼoa ngayeje jmeni xi kisʼin nga jaʼai i̱ Sonʼnde kʼoasʼin tsakakóni nga nʼio kitsjoale kjoandosin je jaʼaínle Nʼaile. Kʼianga tochoatsesa tsakʼejna i̱ Sonʼnde, i kitsole je Jeobá: “Nʼaina, chʼa̱sjejeyai jaʼaínli”. Kʼoa je Jeobá yaa tjen ngʼajmi kinchja̱ni nga i̱ kitso: “Jetsʼasjejeya jaʼaínna, kʼoa kʼoasʼin kʼoasjejeyangánia” (Juan 12:28).
10, 11. 1) Jósʼin tsʼasjejeya Jesús je jaʼaínle Jeobá (kʼoati chótsenlai sén xi faʼaitʼa). 2) Ánni nga jchaxkónñá kʼoa chʼa̱sjengʼañá je jaʼaínle Jeobá.
10 Je Jesús tsakʼasjejeyaa je jaʼaínle Nʼaile. Jngo koya josʼin tsakʼasjejeya kʼiaa nga tsakjákaonajmíni xi kjaʼaí jokjoan je Jeobá kao jmeni xi kisinda. Tonga ali tsa tokuijin jebi xi kisʼin je Jesús. Be nga nʼio tsje sʼin tíjna je jaʼaínle Nʼaile kʼoa nga tjínnele jchaxkón kʼoa ndasʼin kinchja̱ni xi tʼatsʼe. Kuinga kui kisikʼaxki̱ni kʼianga kʼoakitsole je chjotatjenngile jósʼin tjínnele kʼoetsʼoa. I kitso je Jesús: “Nʼainajin xi tijnai ngʼajmi, kataʼyaxkón jaʼaínli” (Mat. 6:9).
11 Ánni machjénni nga kataʼyale nga ñaki kixi jmeni xi sʼín ngantsjai je Jeobá kʼoa nga tjínnele jchaxkón je jaʼaínle. Kuinga énndiso kisʼene ya ʼndenaxóle Edén (Gén. 3:1-5). Je Na̱i kʼoakitso nga tsín male Jeobá nga ndasʼin batéxoma kʼoa nga tsín nda koatio Adán kao Eva tsa tosi tonda je koatexomale. Kʼianga kʼoakitso je Na̱i chʼaosʼin tsakʼasje Jeobá. Kʼoati kitso je Na̱i kʼianga tsakʼejna je Job. Kʼoakitso nga tsín ñaki tsjoachaa je Jeobá, nga tokui nga je nixánilee nga nda tiyoaa kʼoa nga tsín tije si̱xánilee tsa kjoa kuitjátojiaan (Job 1:9-11; 2:4). Kuinga nichxin machjénni nga jchale ʼyáni xi ñaki kʼoatjín jmeni xi tso, a jé Jeobá axo jé Na̱i.
Je Jesús kʼoakitsole chjotatjenngile nga nʼio chjíle nga jchaxkón je jaʼaínle Niná (Chótsenlai párrafo 10)
TSJOAÑA KJOABIJNACHONNA
12. Jósʼin tsakakó je Jesús nga tsjoake je Nʼaile.
12 Je Jesús nʼio tsjoake Nʼaile kʼoa kuinga kitsjoani kjoabijnachonle nga tsakakó nga tsje je Jeobá kʼoa nga ñaki kixi jmeni xi sʼín (Juan 10:17, 18).e Je Adán kao Eva chjotatsje koan, tonga tsín kisitjosonle Jeobá kʼoa jé Na̱i kitʼale. Tonga je Jesús kisitjosonle ngantsjai je Nʼaile kʼianga jaʼai i̱ Sonʼnde kʼoa kʼoasʼin tsakakóni nga nʼio tsjoake (Heb. 4:15; 5:7-10). Kixi kitʼale Niná saʼnda nga kinikʼien (Heb. 12:2). Kʼoasʼin tsakakóni nga nʼio tsjoake je Jeobá kao jaʼaínle.
13. Ánni nga jeni Jesús xi ngisasa nda be nga to énndiso jmeni xi tso je Na̱i (kʼoati chótsenlai sén xi faʼaitʼa).
13 Jmeni xi kisʼin je Jesús nga tsakʼejna i̱ Sonʼnde kʼoasʼin tsakakóni nga ndiso je Na̱i kʼoa nga ñaki kʼoatjín jmeni xi tso Jeobá (Juan 8:44). Jé Jesús xi ngisasa nda be jokjoan je Nʼaile. Tsa kʼoalani tjín choa jmeni xi kitso je Na̱i kʼoajinti tsabe je Jesús. Tonga je Jesús nda kinchja̱ni ngantsjai tʼatsʼe Jeobá. Ningalani tsín tije Jeobá kisikuinda choatseni nga tojeme ni̱kʼien, kitsjoaa kjoabijnachonle kʼoa kisitjosonle ngantsjai je Nʼaile (Mat. 27:46).f
Jmeni xi kisʼin je Jesús kʼoasʼin tsakakóni nga ndiso je Na̱i kʼoa nga ñaki kʼoatjín jmeni xi tso Jeobá (Chótsenlai párrafo 13)
“JEKISIJNGOA JE XÁ XI JI TSAKʼAINÁI”
14. Jmé kjoanda xi kitsjoale Jeobá je Jesús nga kixi kitʼale.
14 Jngo nitje̱n tongini nga toje ni̱kʼien Jesús, i kitso kʼianga tsakʼétsʼoale Jeobá: “Jekisijngoa je xá xi ji tsakʼainái”. Ñaki kʼoatsakʼé kon Jesús nga tse kjoanda tsjoále Jeobá nga kixi kitʼale (Juan 17:4, 5). Kʼoa je Jeobá alikui kitsjoaʼnde nga tondiaa kʼien je Jesús (Hech. 2:23, 24). Kisikjaʼáyanile kʼoa xá kitsjoale ya ngʼajmi (Filip. 2:8, 9). Nga jenkjín nó jaʼato Rey sʼin tsakʼejnale Chjotaxále Niná kʼoa kʼoakitso jmeni xi sʼin Chjotaxá jebi. Kuinga kʼoakitsoni Jesús nga i̱ kʼuínlee je Jeobá: “Katanroa Chjotaxáli. Kʼoakatama josʼin nga meli, i̱ tʼanangi joni ya ngʼajmi” (Mat. 6:10, TNM).
15. Jmésani xi sʼin je Jesús.
15 To jemachrianle nga skaan je Jesús kao xi kontra tjíole Niná kʼoa sikjeson je chjotatsʼen kʼianga kjoaʼaí Armagedón (Apoc. 16:14, 16; 19:11-16). Ya Biblia kʼoatso nga je Jesús yaa sikʼatje̱nya je Na̱i “ndi̱tja̱n xi tixʼa̱jinsén”, xi tsonile, alikui tijme xi koa̱n sʼinni je Na̱i (Apoc. 20:1-3). Xijekoa̱n, kʼiaa koaitsʼia xi jngo jmi nó koatexoma je Jesús, nʼio nda sichon Sonʼnde kʼoa kuinyakaoná ngatsʼiaa nga chjotatsje koaan. Sikjaʼáyanile je kʼien kʼoa ʼndenaxó sikao Sonʼnde. Nga kui nichxin kuitjoson jmeni xi tjínndajinle Jeobá (Apoc. 21:1-4).
16. Jósʼin kuiyoaa kʼianga jekjoetʼa xi jngo jmi nó koatexoma je Jesús.
16 Jósʼin kuiyoaa kʼianga jekjoetʼa xi jngo jmi nó koatexoma je Jesús. Alikui tisʼe̱ni je jée kʼoa chjotatsje koaan ngatsʼiaa. Nga kʼia jenda kuiyoaa ngixko̱n Niná kʼoa tsín tikoa̱nchjénniná nga naʼminá koa̱n je xi 144,000 mani kʼoa nga Naʼmitítjon sʼin kʼoéjnaná je Jesús. Alikui tikoa̱nchjénni nga jchatʼa je jéená nga kʼia xi totʼatsʼe nga tsakʼéchjíntjainá je Jesús nga̱ tsín tijée sʼe̱ni. Nga kui nichxin tokʼoa jejaʼáyanile je kʼien kʼoa alikui tiʼya xi kuiyáni kʼoa ñaki chjotatsje koa̱n ngatsʼi xi koatio i̱ Sonʼnde (1 Cor. 15:25, 26).
17, 18. 1) Jméni xi koa̱n kʼianga jekjoetʼa xi jngo jmi nó koatexoma je Jesús. 2) Jmé xi sʼin je Jesús kʼianga jekjoetʼa xi jngo jmi nó koatexoma (1 Corintios 15:24, 28; kʼoati chótsenlai sén xi faʼaitʼa).
17 Jmésani xi koa̱n kʼianga jekjoetʼa xi jngo jmi nó koatexoma je Jesús. Nga kui nichxin jchale nga tsje je Jeobá kʼoa nga ñaki kixi jmeni xi sʼín. Je Na̱i kʼoakitso ya ʼndenaxóle Edén nga ndiso je Jeobá, nga tsín male batéxoma kʼoa nga tsín tsjoakená. Saʼnda nga kʼia, ñá xi choʼndale Jeobá maa, tiʼyaxkónñá jaʼaínle kʼoa tichʼasjengʼañá. Kʼianga jekjoetʼa xi jngo jmi nó, kuitjojeya je jaʼaínle Jeobá kʼoa kʼoasʼin koakoni nga tsjoake kjoaixiná.
18 Skoee ngatsʼi chjota nga to énndiso jmeni xi kitso je Na̱i tʼatsʼe Jeobá. Kʼianga jekjoetʼa xi jngo jmi nó koatexoma Jesús, alikui kʼoasʼin jokisʼin je Na̱i kʼoa sitjosonle ngantsjai je Jeobá (tʼexkiai 1 Corintios 15:24, 28).g Xi jekjoetʼa xi jngo jmi nó, je Jesús tsjoá ijngokʼani xá xi tsakʼaile ánni nga toje Nʼaile koatexomani, kʼoa sitjosonle Nʼaile nga̱ nʼio tsjoake.
Xi jekjoetʼa xi jngo jmi nó, je Jesús tsjoá ijngokʼani xá xi tsakʼaile ánni nga toje Nʼaile koatexomani (Chótsenlai párrafo 18)
19. Jókji chjí be je Jesús nga nda katabʼaxki̱ je Nʼaile.
19 Jé Jeobá kisikasénnda Jesús kʼoa kitsjoale jaʼaínle. Kʼoa je Jesús nʼio nda tísítjoson je xá xi tsakʼaile. Kitsjoaa kjoabijnachonle xi totʼatsʼe nga nda katabʼaxki̱ je Nʼaile nga̱ kui xi ngisasa chjí be tikʼoajinni tojmeni. Xi jekjoetʼa xi jngo jmi nó, je Jesús tsjoá ijngokʼani xá xi tsakʼaile ánni nga toje Nʼaile koatexomani. Yaa kjoaʼmiya xi ijngo chótʼayajiaan jósʼiaan nga chjénngia choa̱le Jesús.
KJOAJNDA 16 Chʼa̱sjengʼaa Jeobá xi totʼatsʼe ʼNdíle
a Juan 17:6, 26: “Je chjota xi tsakʼainái i̱ sonʼndebi, an tsakakosontsenle jo kjoain nga ji. Tsi ní, kʼoa ji tsakʼainái. Kisikitjoson énli. 26 Je chjotabi an tsakakosontsenle jo kjoain nga ji. Tojo kʼoalasʼin koakosontsen ngisale, jméni nga sʼe̱sínile kjoatsjoacha, josʼin nga koantsjoachanái, kʼoa an koatejnajian ni̱ma̱le”.
b Juan 17:11, 12: “Likui tiʼi̱ tijnania i̱ sonʼndebi, tonga je i̱ tjío i̱ sonʼndebi. An kjuíkonle nga ji. Nʼaitsje, nda tikatíotjoangi nganʼioli je xi kao jaʼaínli tsakʼainái. 12 Kʼia nga tsakatejnakoa i̱ sonʼndebi, an kisikatíotjoa kao jaʼaínli. Je xi ji tsakʼainái, kʼoasʼin kisikuinda. Nijngojin kicha, tojé xi kjoetʼa nichxinle cha̱ ngantsjai, jméni nga kʼoasʼin katabitjosonni je xo̱n Escritura”.
c Sakʼoa ánkje kisichjén Jeobá nga kinchja̱ngajaole. Kuinga sakʼoa kʼoatsoni ya Biblia nga je Jeobá xi tínchja̱ kʼianga jngo ánkje tsakjákao je chjota (Gén. 18:1-33). Kʼoati tso ya Biblia nga je Jeobá kitsjoale kjoatéxoma je Moisés, tonga kʼoati tjín je texto xi kʼoatso nga ánkje kisichjén Jeobá nga kitsjoale kjoatéxoma je Moisés (Lev. 27:34; Hech. 7:38, 53; Gál. 3:19; Heb. 2:2-4).
d Éxodo 23:20, 21: “Jngo ánkje sikasén xi sikuindali ya yandiaa kʼoa xi koandiaali. 21 Tinóʼyalai kʼoa chʼa̱ʼénlai jmeni xi kuitso. Ali nixíjinjin nga̱ tsín sichatʼali tsa kʼoasʼiain, nga̱ jé yʼa je jaʼaínna”.
e Koaan kuiyoaa ngantsjai nichxin xi totʼatsʼe nga kʼienntjainá je Jesús.
f Chótʼai je Xo̱n xi Bájinkonná xi tsʼe sá abril nó 2021, página 30 kao 31, jñani “Tjínkʼa xi kjonangi” tso.
g 1 Corintios 15:24, 28: “Kʼia je xi kjoetʼa, kʼia nga tsjoále kjoatéxomale je Niná kʼoa Nʼainá, kʼia nga sikixoya ngatsʼi xi tjío títjon, kʼoa ngatsʼi xi tjínle nganʼio, kʼoa ngatsʼi xi batéxoma. 28 Kʼia nga ngayije kjoa nangi sa̱tíole, kʼia tijeni ʼndíle nangi kʼoéjnale je xi nangi tsakʼéjnale nga je ngayije kjoa, jméni nga Niná koa̱nyijesíni tʼatsʼe ngatsʼi”.