KJOAʼMIYA XI CHOTʼAYA 23
KJOAJNDA 2 Jeobá ʼmi jaʼaínli
Nʼio chjí ʼyatokoán je jaʼaínle Jeobá
“Jonño testigona kui xi tso je Jeobá” (IS. 43:10).
XI TÍNCHJA̱NI
Jméni xi sʼiaan nga kataʼyaxkón je jaʼaínle Jeobá kʼoa nga kataʼyale nga tsín kʼoatjín jmeni xi tso je Na̱i.
1, 2. Jósʼin ʼyañá nga chjí tsabe Jesús je jaʼaínle Nʼaile.
KUI jaʼaínle Jeobá xi ngisasa chjí be je Jesús tikʼoajinni tojmeni. Tojosʼin tsaʼyaa ya kjoaʼmiya xi jaʼato, je Jesús kitsjoaa kjoabijnachonle nga̱ kui xi koanmele nga nda katabʼaxki̱ je Nʼaile (Mar. 14:36; Heb. 10:7-9). Kʼoa nga jekjoetʼa xi jngo jmi nó, jé Jeobá tsjoá ijngokʼanile xá xi kitsjoale ánni nga kuitjongʼani jaʼaínle Jeobá (1 Cor. 15:26-28). Ngayeje jmeni xi sʼín je Jesús yaa bakóni nga nʼio tsjoake je Nʼaile.
2 Kui xá jaʼaini Jesús i̱ Sonʼnde nga kinchja̱ni xi tʼatsʼe Nʼaile (Juan 5:43; 12:13). Kitsoyale je chjotatjenngile jokjoan Niná (Juan 17:6, 26). Kʼoakitso nga je Nʼaile kitsjoale kjoachjine kʼoa nga je kitsjoale nganʼio nga koan tsakatío kjoaxkón (Juan 10:25). Kʼianga tsakʼétsʼoa kʼoakitsole Jeobá nga katasíkuinda chjotatjenngile xi totʼatsʼe jaʼaínle (Juan 17:11). Tojosʼin tiʼyaa, je Jesús nʼio chjí tsabe je jaʼaínle Nʼaile. Je xi tsín síchjén jaʼaínle Niná kʼoa xi tsín be nga Jeobá ʼmi alikuijinni chjotale Cristo ma.
3. Jmé xi chótʼayajiaan i̱ kjoaʼmiya jebi.
3 Ñá xi chjotale Cristo maa kʼoati nʼia jokisʼin je Jesús, nʼio chjí ʼyaa je jaʼaínle Jeobá (1 Ped. 2:21). I̱ kjoaʼmiya jebi kui chótʼayajiaan nga kui jaʼaínle Jeobá yʼa je xi tsoyason je énnda (Mat. 24:14). Kʼoati koa̱njinná jmé xi sʼiaan nga jngó jngoá nga chjí jchaa je jaʼaínle Jeobá.
“JNGO NAXINANDÁ XI JAʼAÍNLE KʼOA̱”
4. 1) Nga tojeme koai Jesús ya ngʼajmi, jmé xi kitsole chjotatjenngile. 2) Jméni xi kuitsoyaná ya Hechos capítulo 15.
4 Nga tojeme koai ya ngʼajmi, je Jesús i kitsole chjotatjenngile: “Tjoéno nganʼio kʼia nga je Espíritu Santo kjoaʼaíno. Jon koa̱on testigona i̱ Jerusalén, kao ngakijnda nangi Judea, kao ya Samaria, kao jña saʼnda nga fetʼa sonʼnde” (Hech. 1:8). Tojo kitso Jesús, ali tsa toyajin naxinandá Israel jñani kʼuínyasonle je chjota. Nga jekoai nichxin kʼoati kʼuínyasonle je chjota xi tjío ngakjijnda Sonʼnde (Mat. 28:19, 20). Nga “jon koa̱on testigona” kitso je Jesús, a kui xi kitsonile nga testigole Jesús koa̱n je chjota xi koa̱nkjainle axo kʼoati tjínnele skoe̱ jaʼaínle Jeobá. Yaa Hechos capítulo 15 kuitsoyaná xi tʼatsʼe jebi.
5. Jókitso je pastrole Jesús kao chjotajchínga xi tsakatio ya Jerusalén nga nʼio chjíle nga jchaa xi tʼatsʼe Jeobá (kʼoati chótsenlai sén xi faʼaitʼa).
5 Kʼianga nó 49 je pastrole Jesús kao chjotajchínga xi tsakatio ya Jerusalén tsakatiojtín nga tsakjáoyani jméni xi tjínnele sʼin je xi tsín judío nga chjotale Cristo koa̱n. Je Santiago, ndsʼe̱jon Jesús, i kitso: “Je Symeón [Pedro] kʼoasʼin kabʼéyanajmíyeje jósʼin kiskoejin títjon Niná ya jinle naxinandá jngo naxinandá xi jaʼaínle kʼoa̱”. Je Santiago kui kisikʼaxki̱ jme xi kitso je profeta Amós, nga kitso: “Ánni nga je chjota xi kuinje̱ngi koasjaini Jeobá kao chjota xi tjín ngakjijnda sonʼnde xi jaʼaínna kʼoa̱. Kui xi tso Jeobá” (Hech. 15:14-18, TNM). Kui xi tsonile nga je xi chjotale Cristo koa̱n tjínnele skoe̱ xi tʼatsʼe Jeobá kʼoa kuitsoyale xi kjaʼaí.
Je pastro kao xi chjotajchínga sʼin tsakatio Jerusalén koanjinle nga tjínnele jaʼaínle Jeobá kʼoa̱ kʼoa kuitsoyale chjota nga Jeobá ʼmi Niná (Chótsenlai párrafo 5)
6, 7. 1) Jmé xá jaʼaini Jesús i̱ Sonʼnde. 2) Jméni xi ngisa kitsjoale kjoandosin je Jesús.
6 Je jaʼaínle Jesús kui tsoyanile nga je “Jeobá bʼasjentjai”. Kitjoson josʼin tsoyanile jaʼaínle, nga̱ je Jeobá jé Jesús kisikasén nga kʼoasjentjai je chjota xi koa̱nkjainle. Je Jesús kui xá jaʼaini nga kitsjoa kjoabijnachonle xi totʼatsaan (Mat. 20:28). Nga tsakʼéchjíntjainá je Jesús koaan jchatʼa je jéená kʼoa koaan kuiyoaa ngantsjai nichxin (Juan 3:16).
7 Tjínnele nga koanchjíntjé ngatsʼiaa xi totʼatsʼe jmeni xi koan ya ʼndenaxóle Edén. Tojosʼin tsaʼyaa ya kjoaʼmiya xi jaʼato, je Adán kao Eva alikui tsakʼaʼénle Jeobá kʼoa tsín tikoan tsakationi ngantsjai (Gén. 3:6, 24). Je Na̱i énndiso tsakáne Jeobá (Gén. 3:4, 5). Kuinga tjínnenile jchale nga tsín kʼoatjín jmeni xi kitso je Na̱i kʼoa nga jchale nga ñaki kixi jmeni xi sʼín je Jeobá. Jé Jesús xi ngisasa nda tsakakó nga tsín kʼoatjín jmeni xi kitso je Na̱i.
Je xi tsín síchjén jaʼaínle Niná kʼoa xi tsín be nga Jeobá ʼmi alikuijinni chjotale Cristo ma
8. Jmé xi tjínnele koanjinle ngatsʼi xi chjotale Cristo koan.
8 Je xi chjotale Cristo koan, xi judío kao xi tsín judío, tjínnele koanjinle nga je Jeobá xi bʼasjentjainá (Juan 17:3). Kʼoati tjínnele koanjinle jokji chjíle nga chʼasjengʼaa je jaʼaínle Jeobá, kʼoa nga kui jaʼaínle Jeobá kʼoa̱ tojo kisʼin je Jesús. Kʼiatsa kʼoasʼin, kuitjontjaile yaole (Hech. 2:21, 22). Ngatsʼi je chjotatjenngile Jesús tjínnele koa̱njinle jotjínni xi tʼatsʼe Jeobá kao tʼatsʼe Jesús. Kuinga i̱ kitsoni je Jesús nga tsakʼétsʼoa: “Kixinyale je jaʼaínli, kʼoa tosi tonda xínya, ánni nga kʼoatisʼin tsjoake katamani xínkjín josʼin koantsjoachanái an kʼoa nga ya tojngo koatejnakoa” (Juan 17:26, TNM).
“JONÑO TESTIGONA”
9. Ñá xi chjotale Cristo maa, jósʼin ʼyatokoán je jaʼaínle Jeobá.
9 Tojosʼin tiʼyaa, ngatsʼiaa xi chjotale Cristo maa tjínnele jchaxkoán je jaʼaínle Jeobá (Mat. 6:9, 10). Alikui ʼya xi mangóson kao je Jeobá. Kʼoa kʼoasʼin ʼyaxkónñá kao jmeni xi nʼia. Jmé xi koa̱n sʼiaan nga kataʼyaxkón je Jeobá kʼoa nga kataʼyale nga to énndiso jmeni xi kitso je Na̱i.
10. Jmé xi tínchja̱ni Isaías 42 saʼnda 44 (Isaías 43:9; 44:7-9; kʼoati chótsenlai sén xi faʼaitʼa).
10 Ya Isaías capítulo 42 saʼnda 44 kʼoatso jméni xi sʼiaan nga kataʼyale nga tsje sʼin tíjna jaʼaínle Jeobá. Ya capítulo jebi kui nchja̱ni nga kʼoatsole Jeobá je niná xi bʼétsʼoale chjota nga katabakó tsa niná kjoaixi kʼoa nga kʼoakatatso testigole tsa kʼoatjín kjoaixi jmeni xi tso niná jebi. Tonga aliʼya xi tjínle xi nchja̱ntjai (tʼexkiai Isaías 43:9;a 44:7-9b).
Testigo kjimaa xi tʼatsʼe Jeobá (Chótsenlai párrafo 10, 11)
11. Tojo tso Isaías 43:10-12, jméni xi tsole Jeobá je choʼndale.
11 (Tʼexkiai Isaías 43:10-12).c Itsoná Jeobá: “Jonño testigona [ . . . ], kʼoa anña Niná”. Kʼoa itsosa: “A tíjna ijngo Niná xi kjaʼaínile” (Is. 44:8). Nga testigole Jeobá maa kui kjoanda tjínná nga bakoá nga je Jeobá xi Niná kjoaixi kʼoa nga tsín ʼya xi mangósonkao, kʼoa yaa bakoñá jobixoán kao jmeni xi nʼia. Kʼoa josʼin mangínkoaa yaoná, kʼoasʼin bakoñá nga tsjoachaa Jeobá kʼoa kixi mangíntʼalee ninga kjoa kuitjátojiaan. Nga kʼoanʼia, kʼoasʼin chʼasjengʼañá je jaʼaínle Jeobá.
12. Jósʼin kitjoson jmeni xi tso Isaías 40:3, 5.
12 Je Isaías tongini kʼoakitso nga tjín xi koaanda “ndiaale Jeobá” (Is. 40:3). Én jebi kʼiaa kitjoson nga tongini kʼoakitsole chjota je Juan Bautista nga kjoaʼaí je Jesús, nga̱ je Jesús tʼatsʼe Jeobá jaʼaini kʼoa tʼatsʼe Jeobá kinchja̱ni (Mat. 3:3; Mar. 1:2-4; Luc. 3:3-6). Je Isaías kʼoati kitso nga “jchaale kjoajeyale Jeobá” (Is. 40:5). Én jebi kʼiaa kitjoson nga jaʼai Jesús i̱ Sonʼnde nga̱ kʼoakjoán kisʼin josʼín je Jeobá (Juan 12:45).
13. Jméni xi sʼiaan nga chjénngilee Jesús.
13 Kʼianga ʼyaxkoán jaʼaínle Jeobá kʼoa nga nda mangínkoaa yaoná jé Jesús tichjenngilee. Kʼoati testigole Jeobá maa joni Jesús, ʼmiyalee chjota nga Jeobá ʼmi Niná kʼoa kʼoaʼmilee jmeni xi sʼín. Tonga kʼoati ʼmilee jmeni xi kisʼin kʼoa jmeni xi sʼa sʼin je Jesús nga kuitjongʼa jaʼaínle Jeobá (Hech. 1:8). Jé Jesús xi ngisasa ndasʼin tsakakó jótjínnele sʼin jngo testigole Jeobá, kʼoa ñá kui choa̱le mangíntjenngiaa (Apoc. 1:5). Kataʼyala jósasʼin bakoá nga chjí ʼyatokoán je jaʼaínle Jeobá.
CHJÍ ʼYATOKOÁN JE JAʼAÍNLE JEOBÁ
14. Tojo tso Salmo 105:3, jósʼe tokoán nga ʼyaa xi tʼatsʼe Jeobá.
14 Tsjoa tjío tokoán nga ʼyaa xi tʼatsʼe Jeobá (tʼexkiai Salmo 105:3).d Je Jeobá nʼio tsjoa sʼele nga nokjoañá xi tʼatsʼe (Jer. 9:23, 24; 1 Cor. 1:31; 2 Cor. 10:17). Nʼio tse kjoanda tjínná nga ʼmiyalee xi kjaʼaí tʼatsʼe Niná kʼoa kʼoaʼmilee nga kixi tíjna jmeni xi sʼín ngantsjai. Alikui koa̱n koa̱nsoaná nga kʼoakuixoán nga testigole Jeobá maa ya jñani nixá, ya ndʼiaskuela kʼoa tojñani titsomaa. Je Na̱i kui xi mele nga tsín tikui chja̱kaoñá chjota xi tʼatsʼe Jeobá (Jer. 11:21; Apoc. 12:17). Nga̱ je Na̱i kao chjota xi ya bájta kui xi mele nga tsínti katasíchjénni jaʼaínle Niná je chjota (Jer. 23:26, 27). Tonga ñá tsjoachañá Jeobá kʼoa chʼasjengʼañá ngantsjai (Sal. 5:11; 89:16).
15. Jósʼin tsoyanile nga nokjoañá xi tʼatsʼe Jeobá.
15 Tosi tonda kuinókjoañá tʼatsʼe jaʼaínle Jeobá (Joel 2:32; Rom. 10:13, 14). Jósʼin tíjna nga nokjoañá jaʼaínle Jeobá. Kui xi tsonile nga ʼyaa joʼmi kʼoa nichjénñá jaʼaínle. Kʼoati kui xi tsonile nga ʼyaa jokjoan, jé ninʼiotʼaa kʼoa jé nijélee nganʼio nga basenkaoná kʼoa nga katabándiaaná (Sal. 20:7; 99:6; 116:4; 145:18). ʼMiyalee chjota joʼmi Niná kʼoa jokjoan. Kʼoaʼmilee nga kʼoakatamanile je jéele kʼoa nga katasíkʼantjaiya yaole ánni nga nda koatiosíni ngixko̱n Jeobá (Is. 12:4; Hech. 2:21, 38).
16. Jósʼin koakoá nga to énndiso jmeni xi tso je Na̱i.
16 Tosi tonda chʼa̱sjengʼaa jaʼaínle Jeobá ninga kjoa kuitjátojiaan (Sant. 5:10, 11). Kʼianga chókjoajinná je kjoa xi bitjatojiaan kʼoa nga kixi mangíntʼalee Jeobá kʼoasʼin bakoñá nga to énndiso jmeni xi tso je Na̱i. Kʼianga tsakʼejna je Job, je Na̱i i kitso: “Je chjota tsjoántjai tojmeni xi tjínle xi totʼatsʼe kjoabijnachonle” (Job 2:4). Joxi kʼoani kitso nga tokui nixánilee Jeobá nga nda tiyoaa, nga tsín tikʼoasʼianñá tsa tsín tinda kuiyoñá. Nga kixi kitʼale Niná je Job, kʼoasʼin tsakakóni nga to énndiso jmeni xi tso je Na̱i. Kʼoati koa̱n kʼoasʼiaan tsanda ñá, ninga kjoa kuitjátojiaan alikuikʼia si̱kjinlee Jeobá. Ñaki kʼoatjín tokoán nga tosi tonda sikuindaná Jeobá xi totʼatsʼe jaʼaínle (Juan 17:11).
17. Tojo tso 1 Pedro 2:12, jmésa xi koa̱n sʼiaan nga chʼa̱sjengʼaa jaʼaínle Jeobá.
17 ʼYaxkónñá jaʼaínle Jeobá (Prov. 30:9; Jer. 7:8-11). Nga testigole Jeobá maa, yaa kjuinroani jmeni xi sʼiaan tsa nda kʼoaxki̱ je Jeobá kʼoa tsa mai (tʼexkiai 1 Pedro 2:12).e Kuinga nda tso én nokjoañá kʼoa kui kʼoanʼia xi ndatjín nga̱ kui xi mená nga je Jeobá katabitjongʼa. Ninga chjotajée maa, koaan chʼa̱sjengʼaa jaʼaínle Jeobá.
18. Jósasʼin bakoá nga mená nga nda katabʼaxki̱ Jeobá (kʼoati chótsenlai nota).
18 Ngisaa tjínle kjoandosin nga nda katabʼaxki̱ Jeobá tikʼoajinni josʼin kʼoaxkiaa ñá (Sal. 138:2). Nga tsjoachaa jaʼaínle Jeobá kui kʼoanʼia jmeni xi sasénle. Ninga sakʼoa besinná chjota kʼoa tsín nda síkʼaxki̱ná.f Kʼoakisʼin je Jesús, alikui kui kini ninga jo ché kinikao kʼianga kinikʼien nga̱ kui xi koanmele nga je Jeobá katabitjongʼa. Alikui kjoasoa kisisinle kʼoa alikui kui kini josʼin sikjaʼaitsjen chjota xi tʼatsʼe (Heb. 12:2-4). Nga̱ kui xi koanmele nga kʼoasʼin josʼin mele Niná (Mat. 26:39).
19. Jósʼin ʼyatokuin je jaʼaínle Jeobá, kʼoa ánni.
19 Nʼio tsjoa tjío tokoán nga ʼyaa xi tʼatsʼe Jeobá kʼoa nga testigole maa. Kuinga tsínkui kuenta nʼiañá ninga chʼaosʼin sikʼaxki̱ná chjota kʼoa ninga skoe̱sinná. Xi ngisa mandosinná kuinga nda katabʼaxki̱ Jeobá tikʼoajinni josʼin kʼoaxkiaa ñá. Alikui kui kʼoechjoaná tojmeni xi sʼin je Na̱i, kui xi mená nga tosi tonda chʼa̱sjengʼaa Jeobá. Tsa kʼoasʼiaan, kʼoasʼin koakoñá nga kui jaʼaínle Jeobá xi ngisa chjí ʼyaa tojo kisʼin je Jesús.
KJOAJNDA 10 Chʼa̱sjengʼaa je Nináná Jeobá
a Isaías 43:9: “Ngatsʼi je naxinandáyʼai tojngo ʼnde katamaña, kʼoa je naxinandá katabatioxkó. A tjíojin kʼa niná xi kʼoakuitso jmeni xi koa̱n. Axo koaanle kʼoakuitsoná jmeni xi títjon koa̱n. Katasíkatíonda je testigole kʼiatsa kʼoatjín jmeni xi tso, katanrʼoé kʼoa i̱ katatso: Ñaki kʼoatjín”.
b Isaías 44:7-9: “ʼYáni xi koa̱nngósoan. Katanchja̱, kʼoakatatso kʼoa katabakó. Kʼoakatatso jmeni xi koa̱n nichxin xi fi kao nichxin xi nroaján tojo tisʼian an saʼnda nichxin kjoatse nga tongini kʼoaxinle chjota jme xi koa̱n. 8 Ali nokjonjion; ali kjoajkonjin síkinjeno. A tsí tongini kʼoakixinno nga jngó jngó. A tsí kʼoakixian. Jonño testigona. A tíjna ijngo Niná xi kjaʼaínile. Mai, tsínsa ijngo Na̱xi̱, tsín ʼyasa xi ʼbe. 9 Je xi xkóson sínda alijme chjíle, kʼoa je xkóson xi tsjoake alikui kuinyakao; likui koa̱n testigo kuitsole nga̱ tsín matsenle kʼoa tsín jme xi be, to kjoasoa koatiojin je xi sínda”.
c Isaías 43:10-12: “Jonño testigona kui xi tso je Jeobá, je choʼndana xi kiskoejian, kʼianga kataʼyanáo kʼoa nga katamakjainno xi tʼatsʼan, kʼoa nga katamajinno nga tojo anña. Tsín Niná xi koannda títjonna an kʼoa xi koanskanni tojo liʼya xi kisʼe. 11 An, anña Jeobá, kʼoa tsínsa xi kjaʼaí xi male bʼasjentjai. 12 An xokixian, an tsakʼasjentje kʼoa an kixinyano kʼianga kjesa ʼyajion niná xi kjaʼaí. Kuinga jonsíño testigona, kui xi tso je Jeobá, kʼoa anña Niná”.
d Salmo 105:3: “Kao kjoatsjoa tinókjoaño tʼatsʼe jaʼaíntsjele. Tsjoa katasatío ni̱ma̱le je xi Jeobá básjai”.
e 1 Pedro 2:12: “Nda tangínkao yaono yajinle chjota xi li judíojin. Nda tsa joni chjotatsʼen bekonno, kʼia tsa skoe̱ nga nda xáno, kʼoasjejeya Niná kui nichxin nga Niná kjoaʼaíkonle”.
f Je Job to yaole kini kʼianga tsín nda kinikʼaxki̱. Kʼoatso ya Biblia nga tsín “jée tsakajngi kʼoa ni chʼaojinla tjín xi tsakánele Niná” kʼianga kʼien xtile kʼoa nga kisicha tsojmi xi tjínle (Job 1:22; 2:10). Tonga kʼianga kʼoatsakʼinle nga kui kʼoakisʼin xi chʼaotjín, alikui nda kisikjaʼaitsjen jmeni xi kitso. ʼNdele nga je Jeobá ndasʼin sikʼaxki̱ tosaa tokui kini jokisʼe kon (Job 6:3; 13:4, 5; 32:2; 34:5).