Jósʼin bakó je Jeobá nga tsjoakená

1. 1) Jméni xi tsoná je pastro Juan. 2) Ánni nga si̱kjaʼaitsjensíñá nga nʼio tsjoakená je Niná.

JE PASTRO Juan i kitso: “Kʼoatjín kjoatjaocha xi kitsjoaná Nʼainá” (1 Juan 3:1). Je pastro Juan kʼoatsoná nga si̱kjaʼaitsjeen nga nʼio tsjoakená je Jeobá kʼoa josʼin bakó nga tsjoakená. Kʼiatsa si̱kjaʼaitsjeen, ngisa nʼio miyoná koa̱nni je Niná kʼoa ngisasa nʼio koa̱ntsjoachaa.

2. Ánni nga tsín makjain kʼasínile nga tsjoake je Niná.

² Tjínkʼa je chjota xi tsín makjainle nga tsjoakená je Jeobá. Kʼoasʼin síkjaʼaitsjen nga tsín mandosinle Niná xi tʼatsʼe. Kʼoasʼin síkjaʼaitsjen nga to kjoatéxoma tsjoá je Niná kʼoa nga kjoañʼai tsjoále je xi tsín sítjosonle. Tjínkʼa relijión xi kʼoasʼin tsoyale chjotale nga nʼio tsʼen je Niná. Kuinga nʼio nkjín chjota xi kʼoasʼin síkjaʼaitsjensíni nga tsín koa̱n tsjoacha koaan je Niná. Kʼoa kʼoati tjín xi kʼoasʼin síkjaʼaitsjen nga je Niná tsjoake ngatsʼi je chjota kʼoa nga tsínkui fini tsa ndasʼin kʼoa tsa chʼaosʼin. Tonga ñá, ʼyañá jokjoantjínni xi tʼatsʼe Jeobá nga̱ ʼyañá jotso je Biblia. Ya Biblia kʼoatso kʼianga kjoatsjoacha je Niná kʼoa kuinga tsjoakená nga kisikasénni je ʼNdíle kʼoa kʼienntjainá (Juan 3:16; 1 Juan 4:8). Tonga tsakui nichxin tjínkʼa choʼndale Jeobá xi kʼoasʼin síkjaʼaitsjen nga tsín tsjoake Niná. Tsakui nichxin kui kʼoatjíoni kon xi totʼatsʼe jmeni xi koantʼain ngasʼa.

3. Ánni kʼoabixónsíñá nga tsjoakená je Jeobá.

³ Ánni kʼoabixónsíñá nga tsjoakená je Jeobá. Kuinga je kisindaná kʼoa kitsjoaná kjoabijnachon (tʼexkiai Salmo 100:3).a Kʼoa kuinga “ʼndíle Niná” tsosínile je Adán ya Biblia (Lucas 3:38). Kʼoa kʼianga kitsoya Jesús josʼin kʼoétsʼoaa kʼoakitso nga Nʼainá mani je Jeobá (Mateo 6:9). Je Jeobá nʼio tsjoakená joni jngo nʼai xi nʼio tsjoake ʼndíxtile.

4. 1) Jósʼín je Jeobá nga Nʼainá mani. 2) Jméni xi chótʼayá i̱ kjoaʼmiya jebi kʼoa kao xi ijngo.

⁴ Tjínkʼa chjota xi totaon tsabe je nʼaile kʼianga sʼa ʼndí kjoan. Tsakui nichxin kuinga tsín makjainnile tsa tíjna jngo nʼai xi tsjoakená. Tonga je Jeobá nikʼiajinla kjoañʼai sikjaʼáná nga̱ jngoní Nʼai xi nʼio nda chjota (Salmo 27:10). Nʼio tsjoakená kʼoa nkjín koya josʼin síkuindaná. Kʼianga jchaa nga nʼio tsjoakená kʼoati nʼio koa̱ntsjoachaa tsanda ñá (Santiago 4:8). I̱ kjoaʼmiya jebi ño koya chótʼayá josʼin bakó Jeobá nga tsjoakená. Kʼoa je kjoaʼmiya xi ijngo kʼoati ño koya chótʼayá josʼin koakolee nga tsjoachaa.

JE JEOBÁ TSJOÁNÁ JMENI XI MACHJÉNNÁ

5. Jméni xi títsjoáná Jeobá ngatsʼiaa.

⁵ Kʼianga ya naxinandá Atenas tíjna je pastro Pablo, tsabe nga nʼio nkjín xkóson tjín kʼoa nga je chjota xi ya tjín kʼoasʼin makjainle nga je niná xokjoan tjíotsjoále kjoabijnachon. Kuinga je Pablo kʼoakitsosínile nga je Jeobá “kisinda sonʼnde, kao ngayije tsojmi xi tjín sonʼndebi”. Kʼoati kitsole kʼianga je Niná “tsjoáná kjoabijnachonná, kʼoa nga chjenjta, kʼoa kao ngayije tsojmi”, kʼoa nga totʼatsʼe “nga tiyoaa, nikjaan, kʼoa tiyochoán” (Hechos 17:24, 25, 28). Jé Jeobá tsjoáná ngayeje jmeni xi machjénná nga tiyochoán kʼoa nga tsjoa tjíoná. Kataʼyala kʼaa josʼin tíbakó nga tsjoakená.

6. Jókji je sonʼnde xi kitsjoaná je Jeobá nga koa̱n kuiyoaa. (Chótsenlai sén xi fitsʼiani kjoaʼmiya jebi.)

⁶ Tobʼelañá, jngo ʼnde jñani naskánachon tsakʼéndaná je Jeobá nga koa̱n kuiyoaa (Salmo 115:15, 16). Je Sonʼnde alikui mangóson kao ngayeje planeta xi kisinda je Jeobá. Je chjota científico nʼio nkjín planeta tjíobe. Tonga nijngojinla planeta kjimasjaile jñani koa̱n kuiyoaa. Je Jeobá nʼio ndasʼin tsakʼénda je Sonʼnde, tjínle ngayeje jmeni xi machjénná nga koa̱n kuiyoaa. Tonga kʼoati naskánakisika, nda biyoná kʼoa nda tiyoaa (Isaías 45:18). Kʼianga nikjaʼaitsjeen jokji je sonʼndená, ʼyañá nga nʼio tsjoakená je Jeobá (Job 38:4, 7; tʼexkiai Salmo 8:3, 4).b

7. Jósasʼin tsakakó je Jeobá nga tsjoakená.

⁷ Ijngosa koya josʼin tsakakó je Jeobá nga tsjoakená kuinga kʼoasʼin kisindaná jokjoan je (Génesis 1:27). Kuinga tsen masíniná nga tsjoakená kʼoa kuinga koa̱n koa̱ntsjoachasíñá. Je Niná bení nga kui xi tsjoa báya tokoán, tojo male je ʼndíxti kʼianga tsjoa satíole nga bakóle kjoatsjoacha je nʼaile. Kʼoa je Jesús kʼoati kitso nga tsjoa sa̱tíoná kʼiatsa chrian tiyolee je Jeobá (Mateo 5:3, TNM). Ya Biblia kʼoatso nga je Niná “tsjoáná ngayije tsojmi, jméni nga sʼe̱síniná kjoatsjoa” (1 Timoteo 6:17). Tojosʼin tiʼyaa, je Jeobá tsjoáná jmeni xi machjénná kʼoa tsjoakená (Salmo 145:16).

JE JEOBÁ BAKÓYANÁ

8. Ánni nga mesíniná nga katabakóyaná je Jeobá.

⁸ Jngo nʼai xi tsjoake je ʼndíxtile bakóyale ánni nga nda koaikaosíni yaole. Tonga nichxin xi tiyoaa ndʼaibi, nʼio nkjín xi nʼai ma xi tsín bexkón jmeni xi tso je Biblia. Kuinga tsín masínile bakóyale je ʼndíxtile jmekjoanni xi ndatjín kʼoa xi chʼaotjín. Kʼoa yaa nroani nga tsín be josʼin je ʼndíxti kʼoa tsín tsjoa satío kon (Proverbios 14:12). Tonga je Jeobá ñaki nda bakóyale je ʼndíxtile nga̱ jéní “Niná xi ñaki kixi” (Salmo 31:5). Je Jeobá bakóyaná jokjoantjínni xi tʼatsʼe kʼoa kʼoatsoná josʼin jchaxkoán. Kʼoati tsoyaná josʼin nga nda kjuinkoaa yaoná (tʼexkiai Salmo 43:3).c Kataʼyala jmeni xi tíbakóyaná je Jeobá xi bakó nga tsjoakená.

9, 10. 1) Ánni nga bakóyaniná je Jeobá xi tʼatsʼe. 2) Jméni xi bakóyaná je Jeobá xi tʼatsaan.

⁹ Xi títjon, je Jeobá bakóyaná xi tʼatsʼe, kui xi mele nga jchaa (Santiago 4:8). Kuinga kʼoatsoniná joʼmi, kʼoa ya Biblia kui jaʼaínle Niná xi nʼio nkjín kʼa faʼaitʼa tikʼoajinni xi kjaʼaí jaʼaín. Je Jeobá kʼoati bakóyaná jokjoan. Tobʼelañá, kʼiatsa chótsenlee jmeni xi kisinda, yaa ʼyañá nga nʼio chjine kʼoa nga tjínle nganʼio (Romanos 1:20). Kʼoa nga bʼexkiaa Biblia, ʼyañá nga kixi kʼoa nga tsjoakená. Kʼianga sa ʼya sa ʼyaa je Jeobá ngisa machriantʼasalee.

¹⁰ Je Jeobá kʼoati bakóyaná jmeni xi tjínndajinle xi tʼatsaan. Kʼoatsoná nga ya majngokoaa je familiale. Kʼoati tsoná jmeni xi sʼiaan nga nyʼán sʼin kuiyoaa kʼoa nga jtín sʼin kuiyoaa nga si̱xálee. Ya Biblia kʼoatso nga tsínkui xá kisindaniná je Niná nga ñá kʼoakuixoán jmeni xi ndatjín kʼoa jmeni xi chʼaotjín (Jeremías 10:23). Je Niná bení jmeni xi nda sikatíoná. Tokʼiaa nga tsjoa sa̱tío tokoán kʼoa nga nyʼán kuiyoaa kʼiatsa si̱tjosonlee kʼoa tsa jchaxkoán. Kuinga bakóyaniná je Jeobá xi tʼatsʼe jebi nga tsjoakená.

11. Jméni kjoachoya xi títsjoáná je Jeobá.

¹¹ Jngo nʼai makjáojinle josʼin koatio je ʼndíxtile nichxin xi nroaján kʼoa kui xi mele nga nda katabatio. Tonga me ngatsʼi chjota xi tjín ndʼaibi nga tsín be jmeni xi koa̱nle nichxin xi nroaján. Tokui tjíosíxántjai tsojmi xi tokjoaʼato (Salmo 90:10). Tonga ñá xi Jeobá tinixálee, jé bʼailee kjoanda kʼianga tíbakóyaná nga tsjoa tjíosatío tokoán ndʼaibi kʼoa nga títsjoáná kjoachoya tʼatsʼe nichxin xi nroaján.

JE JEOBÁ BATEKJÁYANÁ

12. Jósʼin tsakasenkao Jeobá je Caín kao Baruc.

¹² Kʼianga tsabe Jeobá nga chʼaotjín jmeni xi jeme sʼin je Caín, tsakasenkao. Kʼoakitsole nga tsín yaole katasíjtile kʼoa nga katasíkʼantjaiya yaole. Kʼiatsa kʼoalani kisʼin, je Jeobá kisichikontʼain (Génesis 4:6, 7). Tonga je Caín alikui kisitjoson kʼoa tse kjoañʼai tsakjaʼá (Génesis 4:11-13). Kʼoati tsakʼejna jngo choʼndale Jeobá xi Baruc tsakʼin xi kijtajinle kʼoa xi kisikinroajen kon. Kʼoa je Jeobá kʼoakitsole nga katasíkʼantjaiya kjoafaʼaitsjenle. Je Baruc kisitjoson kʼoa kitjontjaile yaole (Jeremías 45:2-5).

13. Jósʼin tsakinyakao je kjoa xi jaʼatojin je choʼndale Jeobá.

¹³ Je Jeobá bándiaaná kʼoa batekjáyaná nga̱ tsjoakená. Batekjáyaná nga machjénná tonga kʼoati basenkaoná nga ngisa nda sʼiaan (Hebreos 12:6). Je Jeobá tsakasenkao je chjotale nichxin kjoatse nga kisindaya je yaole. Tobʼelañá, kitsjoaʼndení nga kjoañʼai jaʼatojin je José, Moisés kao David. Kʼianga kjoa jaʼatojin tsakinyakao nga koanskanni kʼianga jetse xá tsakánele je Jeobá. Kʼianga bʼexkiaa je Biblia kʼoa ʼyaa nga basenkao Jeobá je choʼndale kʼoa basenkao nga síndaya je yaole, ʼyañá jokji tsjoakená (tʼexkiai Proverbios 3:11, 12).d

14. Jósʼin bakóná kjoatsjoachale Jeobá kʼianga sokójéená.

¹⁴ Kʼianga sokójéená, je Jeobá bakóná kjoatsjoachale kʼiatsa si̱tjosoán nga batekjáyaná. Jósʼin. Je profeta Isaías kʼoakitso kʼianga je Jeobá “nʼio male síchatʼa” (Isaías 55:7). Kʼoa je rey David i kitso xi tʼatsʼe Jeobá: “Jé síchatʼa ngayeje je jéeli kʼoa síndaya ngayeje chʼinli. Je kʼoatítso nga tsín ya nga̱jao̱ katasʼejnaya je yaoli kʼoa tíbakóli kjoatsjoacha xi ñaki kjoakixi kao kjoamatokon” (Salmo 103:3, 4, 12). Tojosʼin tiʼyaa, je Jeobá tíjnanda ngantsjai nga síchatʼa. Tonga tjínnele kʼoaiʼndee nga katabándiaaná kʼoa katasíkixiyandaná kʼoa si̱kʼantjaiyaa yaoná. Kuinga batekjáyaniná je Jeobá nga tsjoakená (Salmo 30:5).

JE JEOBÁ SÍKUINDANÁ

15. Jósasʼin bakóná kjoatsjoacha je Jeobá.

¹⁵ Jngo nʼai xi nda sʼín síkuindaa je ʼndíxtile nga tsín xkón katabatio. Je Jeobá kʼoatisʼin síkuindaná. Ya Salmo 97:10 kʼoatso nga síkuinda Jeobá je choʼndale kʼoa nga bʼasjentjai xi tʼatsʼe chjotatsʼen. Tojosʼin nikuindaa je xkoaan kʼoatisʼin síkuindaná je Jeobá. Kjitʼanangi basenkaoná kʼianga xkón biyoaa kʼoa kui kʼoasʼínni nga tsjoakená (tʼexkiai Zacarías 2:8).e

16, 17. Jósʼin síkuinda Jeobá je choʼndale.

¹⁶ Je Jeobá jé ánkje síchjén ngantsjai nga síkuinda je choʼndale (Salmo 91:11). Tobʼelañá, jngo ánkje xi 185,000 sondado kisikʼien kʼianga tojngo nitje̱n nga tsakʼasjentjai je naxinandále Jeobá (2 Reyes 19:35). Kʼianga siglo 1, je ánkjele Jeobá tsakʼaonsje ndoyá je Pedro kʼoa kao xi kjaʼaísa chjotale Cristo (Hechos 5:18-20; 12:6-11). Chriansʼa ya África jngo kjoajchán kisʼejna. Je chjota kiskaan, kisiché, kinikʼien chjota kʼoa kinikaojée yánchjín. Ninga nijngojin testigole Jeobá kʼien, nʼio nkjín xi tsín jme xi tikisʼenile. Ninga kʼoalani kjima, tsabe nga je Jeobá tjíosíkuinda. Ninga tse kjoañʼai kinikjaʼá, tsjoa tjíole. Kʼianga kicho jngo ndsʼee xi ya kini jña tjen tísʼendiaanile xále Niná jngo tjíjtsa Sonʼnde, kiskonangile josʼin tjíoni, je ndsʼee kʼoakitso nga ndatjío nga je Jeobá tjíobinyakao.

¹⁷ Kʼoati tjínkʼa je choʼndale Niná xi tjíonikʼien nga kixi kjima. Kʼoakoan je chjotale Cristo xi Esteban tsakʼin kʼoa kao xi kjaʼaísa. Je Jeobá alikui tongantsjai nga bʼéchjoa nga nikʼien je choʼndale. Tonga síkuindajtínní je choʼndale nga bájinkon jme che̱n xi batíobasen je Na̱i (Efesios 6:10-12). Kʼoa jebi yaa faʼaitʼa ya Biblia kʼoa kao xo̱n xi síkasén je naxinandále Niná. Tobʼelañá, je Jeobá bájinkonná jmeni xi xkón tíjna ya Internet, kʼoatsoná nga ñʼai tjínle tsa tao̱n koa̱ntsjoachaa kʼoa tsakui koa̱ntsjoachaa pelíkula, libro kʼoa kao videojuego xi kjoachajngi kao kjoatsʼen tjínle. Jebi kui bakóná nga tsjoakená je Jeobá kʼoa nga mele sikuindaná.

JNGO KJOANDA TJÍNNÁ

18. Jósʼe tokoán kʼianga tsjoakená je Jeobá.

¹⁸ Kʼianga kisikjaʼaitsjen je Moisés jotjín nó nga kisixále je Jeobá, alikui jao tsakʼé kon nga tsjoake koan je Niná. Kuinga i̱ kitsosíni: “Takonáijin je kjoatsjoachali xi ñaki kjoakixi nga tanjio, ánni nga ñaki kao kjoatsjoa kʼoéjtasínijin kʼoa nga ñaki tsjoa kjoáyaijin tokuinjin jokji nichxin nga kuiyuijin” (Salmo 90:14). Si̱kjaʼaitsjeen jmeni xi kitso je pastro Juan: “Kʼoatjín kjoatjaocha xi kitsjoaná Nʼainá” (1 Juan 3:1). Nʼio tse kjoanda tjínná kʼianga ʼyaa nga tsjoakená je Jeobá.