Kjoaʼmiya 4

Jósʼin nga koan li xi tʼatsʼe Niná

Kʼianga kʼuéxkiai je Biblia koan li xi tʼatsʼe Jeobá. Nʼió kjoatse nga Niná kiskuejin kʼa chjota Soʼnde nga kiski kjoaʼaitsjen xi tsʼe. Je xi kichji Biblia ʼmi. Ndʼaibi koan ná xi tʼatsʼe Niná nga kʼuéxkia Biblia, nga én le Jeobá nya, xi tso ni le, nga sikasen én, kui nga kʼoati Én le Niná ʼmi ni. Koan koakjain ná jotsó je Biblia nga Jeobá likui kʼia bʼendiso. “Niná xi tsín koan le tsakʼendiso.” (Hebreos 6:18.) Je Én le Niná kjoakixi xínya (Juan 17:17).

Nʼió nkjín kjoatjao kitsjoa ná Niná, xi nʼió sa chji le je Biblia. Je Biblia kʼoasʼin joni tsa jngo xon le jngo nʼai xi tsjoakie xti le nga kji le. Ya tinchja xi tongi ni kʼoa kitsó nga tsjoá Niná nga jngo tjíjtsa soʼnde nʼió naskánasichon jngo ʼnde jña koan sijchá yao ná: jngo ʼnde naxó. Titsoya jmé xi kisʼin Niná, kʼoa jmé xi tisʼin ndʼaibi kʼoa jmé xi sikao xti le xi kixi tjiófitʼa le. Xi ijngo sa ni, koasenkao ná nga koan ná kʼuendajian kjoa ná kʼoa koansjai ná nga tsjoa sʼe tokoan (2 Timoteo 3:16, 17).

Je testigo le Jeobá miyo le Niná ni; koasenkao li nga koanjin li kjoaʼmiya le Biblia. Tokui xi tʼín lai nga me li chótʼayai je Biblia; likui sikʼiechji li nga kuitsoya li (Mateo 10:8). Xi ijngo sa ni, koan kʼuin jña majtín chjota tjengí le Kristo ʼnde jña ʼyaxkón Niná Ndʼia tsʼe Reino ʼmi. Tsa kʼuin kjoajtín jebi, tochoa nichxin koanjin ni li xi nʼió tse xi tʼatsʼe Niná.

Koan koanjin li xi tʼatsʼe Niná tsa chotsen lai jo kjoan tsojmi xi tsakʼenda. Jngo la choa, je Biblia kʼoatso: “Niná kisinda ngʼajmi kao soʼnde” (Génesis 1:1, NM). Kʼianga Jeobá “kisinda ngʼajmi”, kisinda Tsʼúi. Tonga, ¿jmé xi tso ná jebi xi tʼatsʼe Niná? Kui xi tsoya ná nga nʼió tjín le nganʼió Jeobá; to je kjoan xi koanle kisinda xi kʼoa sikji nganʼió tjín le joni tsa Tsʼúi. Xi ijngo sa ni, kʼoatso ná nga Jeobá nʼió tse xi ma le, ngo nʼió jin tse kjoachjine koanchjén le nga koanda je Tsʼúi, xi titsjoa ndoa kʼoa tisiʼisen kʼoa likui kʼia fitsʼaoya.

Ngayeje xi kisinda Jeobá kui xi bakó nga tsjoakie ná. Tikjaʼaitsjen lai jotjín koya to tjín xi ma chiné i Soʼnde. Jeobá koan le tsa tojngo koya to xi ma chiné kitsjoa ná, kʼoa tsa nijngo jin je. Tonga Jeobá nʼió nkjín koya to xi ma chiné kitsjoa ná, jo kjoan, xi xkoa xi tsian, josʼín tsen kʼoa jo chiné. Kui xi tso ni le nga tsjoakie ná Jeobá, nda sʼe le nga tsjoá, nga tsín nyí kʼoa nʼió ndʼé (Salmo 104:24).