Kjoanda xi tje̱nkao nga kʼoasʼin tsen tjío grupo jñani bʼakaoná nga ʼmiyasoán
1. Jñánile kjoanda xi kisʼená nga kisʼejna Estudio de Libro xi tojo koa̱n sʼe̱ná ndʼaibi ya grupo jñani bʼakaoná nga ʼmiyasoán.
1 A sakʼoa faʼaitsjenli joná ma nga sʼejna je Estudio de Libro. Kʼianga tochoa mañá nga tsakiyojtián ngisaná tjínná nichxin nga nimiyoaa xíngiaa (Prov. 18:24). Je ndsʼee xi bándiaaná tsakai nga chotʼayá kuentaná sʼin jmeni xi bitjatojiaan kʼoa tsjoánáná nganʼio xi machjénná (Prov. 27:23; 1 Ped. 5:2, 3). Tonga tojo koaan sʼe̱ná kjoanda jebi ya grupo jñani bʼakaoná nga ʼmiyasoán.
2. Jméni xi koa̱n sʼiain kʼianga nkjínsa miyo sʼe̱li ya grupo jñani bʼakaoli nga ʼmiyasuin.
2 Jmeni xi koa̱n sʼiain. Nga jngó jngó grupo jñani bʼakaole je xíngiaa nga tsoyason me kʼoati tjín mani jonátjín mani nga kisʼejna je Estudio de Libro. Kʼianga bʼainganʼiolee xíngiaa nga ñatje̱n mangínkʼinyasoán sokóná miyo xi nʼio tsjentʼalee (Filip. 1:27). Jótjín mani xíngiaa xi ya bʼakaole ya grupo jñani ʼmiyasuin xi jekitjokoai. A koaan tsa kuitjokoai ngatsʼi ánni nga nkjínsa miyo sʼe̱sínili (2 Cor. 6:13). Kʼoati koa̱n kuinókjoa sakʼoalai ya niʼyali tsa ʼyani xi ya bʼakaole ya grupoli nga katakjenkaono, kʼoa tsamaije̱ koaan kʼoakʼuínlai nga katabichó je Nichxin nga chotʼayajtíon énle Niná ya niʼyano. Kʼoati tjíokʼa jtín jñani je grupo ñandia ñandia bʼakaole nga síkjen je ndsʼee xi bichótsjoá kjoanokjoaya ya jinjtín. Je grupo xi bʼakaole batiojtínní nga bʼétsaojin ninga sakʼoa tsín kʼoamale nga fi je ndsʼee xi bichótsjoá kjoanokjoaya.
3. Jméni xi koa̱n sʼiaan kʼianga koasenkaoná je xi chjotajchínga sʼin tjío ya grupo jña bʼakaoná.
3 Kʼianga kʼoasʼin to jaosa kʼa biyojtián ndʼaibi nga jngo xomana ali tsakuijin xi tsonile tsa tsín tikʼoasʼin sikuindaniná je xi chjotajchínga sʼin tjío. Je ndsʼee xi kjinentsja nga jngó jngó grupo tjínnele sinʼio kon je ndsʼee, kuinyakao kʼoa kuitsoyale josʼin kuitsoyason. Kʼiatsa kje bʼakaojinli nga bitjokoai je ndsʼee xi kjinentsja grupoli, koaan kʼoakʼuínlai nga katabitjokaoli. Kʼoa je superintendente xi tsʼe servicio jngo grupo síxatʼa nga jngo sá kʼoa jao nichxin bitjokao nga fitsoyason, nga xoto kao nga taingo. Ya jtín jñani tochoa mani je xíngiaa tsakui nichxin jao kʼa sixatʼa nga jngo nó nga jngó jngó grupo. A tongini bijnandai nga bitjokʼinyasuin kʼianga bichósíxatʼa grupoli je superintendente xi tsʼe servicio.
4. 1) Jósʼin tjínnele sʼe̱ndajin je kjoajtín xi satío nga mangínkʼinyasoán. 2) Ánni nga ndatjínsíni nga kʼoaiʼndee nga ya niʼyaná kuitjoni je xi tsoyason.
4 Tse kjoanda tje̱nkao nga kʼoasʼin tʼaxin tʼaxin batiojtín nga jngó jngó grupo nga xoto kao nga taingo kʼoa nga me tikui ora bitjoni. Xi títjon, ngisa choa ñʼai male je ndsʼee nga bichó ya jña bitjoni kʼoa ya jña tsoyason. Kʼoati ngisa choa ñʼai ma nga maxkoa̱ya je xi bitjotsoyason kʼoa ngisa choa bʼachxin. Kʼoa xi ijngosani, je ndsʼee xi kjinele grupo ngisa ma síkuinda jotjín mani je xi bʼakaole ya grupole. Tonga sakʼoa ma nga tojngo batiojtín tsa jao kʼoa tsa nkjínsa grupo. Jméni xi koa̱n sʼin jotjín mani grupo kʼiatsa tojngo batiojtín kʼianga bitjotsoyason nga xoto kʼianga tífitsʼia sá kʼoa tsakʼiaje̱ nga jechotʼaya je rebista La Atalaya. Ngisa nda nga tsen tsen koatio nga jngó jngó grupo kʼoa nga je ndsʼee xi kjinentsja tongini katasíxkoa̱ya je xi tsʼe grupole nga kjesa sʼejnajin je kjoabʼetsʼoa. (Chótʼai rekuadro xi tso: “A koaan ya niʼyali kuitjoni je xi tsoyason”.)
5. Jméni xi koa̱n kʼoéjngoaa tokoán ninga jetsín tisʼejnani ndʼaibi je Estudio de Libro.
5 Ninga jetsín tisʼejnani ndʼaibi je Estudio de Libro, je Jeobá tojo títsjoáná jmeni xi machjénná nga kʼoasʼiaan josʼin mele (Heb. 13:20, 21). Nikʼiajinla jme xi jchaná, nga̱ jé Jeobá sikuindaná (Sal. 23:1). Nʼio tse kjoanda tje̱nkao nga kʼoasʼin tjín grupo jñani bʼakaoná nga ʼmiyasoán. Kuinga kʼoénesínilee yaoná nga kʼoasʼiaan jmeni xi kaʼyaa ibi, nga̱ “je xi tse bʼéntje, kʼoati tse koa̱njchále” (2 Cor. 9:6).
[Én xi tjítʼa ya pájina 6]
A koaan ya niʼyali kuitjoni je xi tsoyason
Tjínkʼa jtín jñani tojngo batiojtín jotjín mani grupo xi tjínle kʼianga fitsoyason, nga̱ sakʼoa tsínle ʼnde jñasa koa̱n kuitjoni je xíngiaa. Je kjoajtín xi satío nga mangínkʼinyasoán yaa majngokao jmeni xi ʼmiyaná ya jinjtín. Kʼoa tsa ya kuitjoni niʼyaná je xíngiaa nga fitsoyason nʼio tse kjoanda tíbʼainá. A koaan kʼoakʼuínlai je xi chjotajchínga sʼin tjío tsa koa̱n ya niʼyali kuitjoni je xi tsoyason. Ali tokuijin bʼéchjoali tsa tokʼoakji ʼndíniʼyali. Je xi kuenta sʼin je xi chjotajchínga sʼin tjío kui jñani kijna je niʼya. Kʼoa tojo kui koaini je xi kuenta koan ngasʼa kʼianga kitjoejin je niʼya jña kisatio Estudio de Libro. Kʼiatsa meli nga ya niʼyali kuitjoni je xi tsoyason kʼoatʼinlai je ndsʼee xi kjinentsja grupo jña bʼakaoli.