Jókoanchon ya ʼndenaxóle Edén

Je Jeobá nʼio tse jmeni xi kitsjoale je Adán kao Eva (Génesis 1:28)

Je chjoón xi títjon kisinda Jeobá, Eva tsakʼin, kʼoa jé Adán kitsjoale nga chjoónle katama (Génesis 2:21, 22).

Je Niná ñaki nda kjoafaʼaitsjen kitsjoale je Adán kao Eva kʼianga sʼa kisinda kʼoa kʼoati ñaki nda je yao xi kitsjoale.

ʼNde jña tsakatio Edén tsakʼin. Nʼio naskákoanchon ʼnde jebi: kisʼe xongá, yá xi to bale kʼoa kao cho̱.

Je Jeobá ñaki tsakjákao sontseen Adán kao Eva kʼianga jme xi kitsole. Kʼiatsa kinrʼoélanile Niná tojo tjíojin saʼnda ndʼaibi kʼoa ʼndenaxójin Sonʼnde.

Je Niná tojngokjoan yá xi tsakʼéchjoale Adán kao Eva (Génesis 2:16, 17)

Je Jeobá jngo yá tsakakóle Adán kao Eva kʼoa kʼoakitsole nga kuiyá tsakui ski̱ne tole yá jebi.

Jngo ánkje tíjna xi yátsʼi̱n tsakasénle Niná. Ánkje tsʼen jebi jéní xi Na̱i kʼoa Satanás ʼmi.

Je Na̱i alikui koanmele nga je Jeobá kisitjosonle je Adán kao Eva. Kuinga jngo ye̱ kisichjénsíni nga tsakjákao Eva, nga kʼoakitsole nga tsín kuiyá tsa ski̱ne je tole yá xi kisatechjoale kʼoa nga tosa jo Niná koa̱nkjoan. Tonga to énndiso jmeni xi kitso (Génesis 3:1-5).